ಗೊಂಯ್,4 ಜುಲಾಯ್: ಆಶಾವಾದಿ ಪ್ರಕಾಶನ್, ಸೈಂಟ್ ಝೇವಿಯರ್ಸ್ ಕೊಲೆಜ್ ಮಾಪ್ಸಾ, ಧೆಂಪೆ ಮಹಾವಿಧ್ಯಾಲಯ್ (ಪರಿಗಣಿತ್) ಮಿರಾಮಾರ್ ಹಾಂಚ್ಯಾ ಮುಖೆಲ್ಪಣಾಖಾಲ್, ಕೊಂಕಣಿ ಅಕಾಡೆಮಿ ಗೊಂಯ್, ದಲ್ಗಾದೊ ಕೊಂಕಣಿ ಅಕಾಡೆಮಿ ಆನಿ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚ್ಯಾ ಭಾಗಿದಾರಾಂತ್, ಕಾರ್ಮೆಲ್ ಕೊಲೆಜ್ ನುವೆಂ, ಫಾ.ಆಗ್ನೆಲ್ ಕೊಲೆಜ್ ಪಿಲಾರ್, ಶ್ರೀ ಮಲ್ಲಿಕಾರ್ಜುನ ಕೊಲೆಜ್ ಕಾಣಕೊಣ್, ಸರ್ಕಾರಿ ಕೊಲೆಜ್ ಖೆಪೆಂ ಆನಿ ಹೆರ್ ಥೊಡ್ಯಾ ಕೊಲೆಜಿಚ್ಯಾ ಸಹಭಾತ್ವಾಂತ್ ಆಯೋಜಿತ್ ಕಥಾಪಾಠ್ ಶಿಂಕಳ್ VII ಚೆಂ ಉಗ್ತಾವಣ್ ಸನ್ವಾರಾ (4 ಜುಲಾಯ್ 2026) ವೆರ್ ಬಾಯ್ ಜೇನ್ ಎಡ್ವಿನ್ ಡಿಸೋಜಾನ್ ಕರುನ್ ಅಪ್ಲೆ ಸಂಧೇಶ್ ದಿಲೆ.
ಯೆವ್ಕಾರ್ ಉಲವ್ಪಾಂತ್ ಬಾಬ್ ಶೈಲೇಂದ್ರ ಮೆಹ್ತಾನ್ ಕಥಾ ಆನಿ ಪಾಠ್ ಹ್ಯಾ ದೊನಾಚಿ ಗರ್ಜ್ ಆಯ್ಚಾ ಕಾಳಾರ್ ಕಿತ್ಲಿ ಮಹತ್ವಾಚಿ ಮ್ಹಳ್ಳ್ಯಾಚೆರ್ ಉಲವ್ಪ್ ಕರುನ್, ೨೦೦೪ ಇಸ್ವೆಂತ್ ಕುವೆಯ್ಟಾಂತ್ ಸುರ್ವಾತ್ ಜಾಲ್ಲ್ಯಾ ’ಕಥಾಪಾಠ್’ ಅಧ್ಯಯನ್ ಕಾಮಾಸಾಳಾಂನಿ ಕಶೆಂ ೨೦೨೦ ಇಸ್ವೆಂತ್ ಡಿಜಿಟಲ್ ಸ್ವರೂಪಾಂತ್ ಗೊಂಯ್, ಕರ್ನಾಟಕ್, ಮಹರಾಷ್ಟ್ರ್, ಕೇರಳ ಮಾತ್ರ್ ನ್ಹಯ್, ದೇಸ್-ವಿದೇಶಾಂತ್ಲ್ಯಾ ಆಸಕ್ತ್‌ವಂತಾಂಕ್ ಹ್ಯಾ ಡಿಜಿಟಲ್ ಕಾಮಾಸಾಳಾಂನಿ ವಾಂಟೆಲಿ ಜಾಂವ್ಕ್ ಸಂಧಿ ಮೆಳ್ಳಿ ಮ್ಹಳ್ಳ್ಯಾಚೆರ್ ಸವಿಸ್ತಾರ್ ವಿವರ್ ದಿಲೊ. ಕಥಾಪಾಠ್ ಶಿಂಕಳಿ I – VI ಚೆರ್ ಜಾಲ್ಲ್ಯಾ ಸಮಗ್ರ್ ಅಧ್ಯಯಾಚಿ, ತಶೆಂಚ್ ಹ್ಯಾ ವೆಬಿನಾರಾಂನಿ ಸಾದರ್ ಜಾಲ್ಲ್ಯಾ ಪ್ರಪತ್ರಾಂಕ್ ಪುಸ್ತಕಾರುಪಾರ್ ಸಂಕಲನ್ ಜಾವ್ನ್ ಪರ್ಗಟ್ ಕೆಲ್ಲಿ ಖೊಲಾಯೆಚಿ ಮಾಹೆತ್ ದಿಲಿ.
ಪ್ರಸ್ತಾವಿಕ್ ಉಲವ್ಪಾಂತ್ ಡೊ. ಚಂದ್ರಲೇಖ ಡಿಸೋಜಾನ್ “ಎಡ್ವಿನ್ ಜೆ. ಎಫ್. ಡಿಸೋಜಾನ್ ಅಪ್ಲ್ಯಾ ಸಾಹಿತ್ಯಾಮುಖಾಂತ್ರ್ ಕೊಂಕಣಿ ಸಾಹಿತ್ಯಾಕ್ ಎಕ್ ನವೊಚ್, ಉಂಚ್ಲೊ ದರ್ಜೊ ದಿಲೊ. ತಾಚ್ಯಾ ಬರ್ಪಾಂನಿ ವಯ್ಚಾರಿಕತಾ, ಆಧ್ಯಾತ್ಮಿಕತಾ, ತಾತ್ವಿಕತಾ ತಶೆಂಚ್ ಸಮಾಜ್-ಮುಖಿ ಚಿಂತ್ಪಾಕ್ ಜಾಗವ್ಣಿ ಆಸ್ತಾಲಿ. ಜಾಂವ್ ತಿ ವಿಡಂಬನಾತ್ಮಕ್ ರಿತಿರ್ ವಾ ಹೆರ್. ಎಡ್ವಿನ್ ಜೆ. ಎಫ್. ಡಿಸೋಜಾಚ್ಯಾ ಕಥೆಂಚೆರ್ ’ಕಥಾಪಾಠ್’ ಚೆರ್ ಅಧ್ಯಯನ್ ಜಾಂವ್ಚಿ ನಿಜಾಯ್ಕಿ ಭೋವ್ ಅಪುರ್ಭಾಯೆಚಿ ವಿಂಚವ್ಣ್” ಅಶೆಂ ಮ್ಹಣೊನ್ ’ಕೊಂಕಣಿಚ್ಯಾ ಬಹುಲಿಪಿಚ್ಯಾ ಡಿಜಿಟಲೀಕರಣ್ ಆನಿ ಪ್ರಸಾರಣ್’ ಕೊಂಕಣಿಚ್ಯಾ ಸಮಗ್ರ್ ಸಾಹಿತ್ಯಾಕ್ ಎಕಾಮೆಕಾ ವಾಂಟುನ್ ಘೆಂವ್ಕ್ ತಶೆಂಚ್ ಸಮ್ಜೊಂಕ್ ಏಕ್ ಅಪುರ್ಭಾಯೆಚಿ ಸಂಧಿ ಕರುನ್ ದಿತಾ. ದೆಕುನ್ ಹ್ಯಾ ಪ್ರಕಲ್ಪಾಂತ್ ಸಹಭಾಗಿತ್ವ್ ಘೆತ್ಲಲ್ಯಾ ಸರ್ವ್ ಸಂಸ್ಥ್ಯಾಂಕ್ ತಶೆಂಚ್ ವೆಕ್ತಿಂಕ್ ಧಿನ್ವಾಸ್ ದಿಲೆ.
ಫಾದರ್ ಲುವಿಸ್ ಗೊಮ್ಸ್ ಹಾಣಿಂ ಅಪ್ಲ್ಯಾ ಉಲವ್ಪಾಂತ್ “’ಕೊಂಕಣಿಚ್ಯಾ ಬಹುಲಿಪಿಚ್ಯಾ ಡಿಜಿಟಲೀಕರಣ್ ಆನಿ ಪ್ರಸಾರಣ್’ ಚೊ ವಾವ್ರ್ ಪಾಟ್ಲ್ಯಾ ಥೊಡ್ಯಾ ತೆಂಪಾಂತ್ ಬರೊಚ್ ಚಾಲು ಆಸಾ ಆನಿ ಹ್ಯಾ ವಾವ್ರಾಂತ್ ಆಶಾವಾದಿ ಪ್ರಕಾಶನಾಸವೆಂ ಸಮ್ಜಿಕಾಯೆಚೆಂ ಖರಾರ್ ಸೈಂಟ್ ಝೇವಿಯರ್ಸ್ ಕೊಲೆಜಿನ್ ಕೆಲಾಂ ಆನಿ ಆಮ್ಚೊ ಉದ್ದೇಶ್ ಇತ್ಲೊಚ್; ಸಮಗ್ರ್ ಕೊಂಕಣಿ ಸಾಹಿತ್ಯಾಕ್ ಎಕಾಮೆಕಾ ಲಿಪಿಂ/ಪ್ರಾಂತ್ಯಾಚ್ಯೊ ಗಡಿ ಉತ್ರೊಂಚೊ.”
ಫಾದರ್ ಚೇತನ್ ಲೋಬೊನ್ ಅಪ್ಲ್ಯಾ ಉಲವ್ಪಾಂತ್ “ಎಡ್ವಿನ್ ಜೆ, ಎಫ್ ಡಿಸೋಜಾಚೆಂ ನಾಂವ್ ಆಯ್ಕತಾನಾಂತ್ ಹಾಂವ್ ಭಾವುಕ್ ಜಾತಾಂ, ಕಿತ್ಯಾಕ್ ಮ್ಹಳ್ಯಾರ್ ಮ್ಹಜೊ ಆನಿ ತಾಚೊ ಭಾಂದ್ ಫಕತ್ ಸಂಪಾದಕ್-ಕಥಾಕಾರ್ ಜಾವ್ನ್ ಮಾತ್ರ್ ನ್ಹಯ್, ಹಾಂವ್ ಕಥಾಕಾರ್ ಜಾಂವ್ಕ್ ಮ್ಹಾಕಾ ಎಕಾರಿತಿಚೆಂ ಪ್ರೇರಣ್ ಲಾಭ್ಲೆಲೆಂಚ್ ಎಡ್ವಿನ್ ಜೆ. ಎಫ್. ಡಿಸೋಜಾಚ್ಯಾ ಕಥೆಂನಿ. ತಾಚ್ಯಾ ಕಥೆಂಚೆಂ ಪುಸ್ತಕ್ ’ಬೆತ್ಲೆಹೆಮ್’ ಮ್ಹಾಕಾ ಅಜೂನ್ ಪರತ್ ಪರತ್ ವಾಚುಂಕ್ ಪ್ರೇರಣ್ ದಿತಾ. ಹಾಂತ್ಲ್ಯೊ ಚಡ್ತಾವ್ ಕಥಾ ಸೆವಕ್ ನೆಮಾಳ್ಯಾಚೆರ್ ಪರ್ಗಟ್ ಜಾಲ್ಲ್ಯೊ.”
’ಕೊಂಕಣಿಚ್ಯಾ ಬಹುಲಿಪಿಚ್ಯಾ ಡಿಜಿಟಲೀಕರಣ್ ಆನಿ ಪ್ರಸಾರಣ್’ ಚೊ ಸಲ್ಹಾದಾರ್ ಆಂಡ್ರ್ಯೂ ಎಲ್. ಡಿಕುನ್ಹಾನ್ ಅಪ್ಲ್ಯಾ ಉಲವ್ಪಾಂತ್ “ಕೊಂಕಣಿ ಭಾಸ್ ಉದೆಲ್ಲಿ ಖಂಚ್ಯಾಯ್ ಪಂಡಿತಾಂ ಥಾವ್ನ್ ವಾ ವಿಧ್ವಾನಾಂ ಥಾವ್ನ್ ನ್ಹಯ್, ಬಗಾರ್ ಲೊಕಾಂಥಾವ್ನ್ ಉದೆಲ್ಲಿ, ಲೊಕಾನ್ ಅಜೂನ್ ಜೊಗಾಸಣೆನ್ ಸಾಂಬಾಳುನ್ ದವರ್ಲೆಲಿ ಭಾಸ್. ತೆದ್ನಾ ಲಿಪಿಚ್ ನಾತ್ಲಿ, ಪುಣ್ ಆಜ್ ಹ್ಯಾ ಲೊಕಾಂ ಮಧೆಂಚ್ ಉದೆಲ್ಲ್ಯಾ ವಿಧ್ವಾನ್-ಪಂಡಿತಾಂನಿ ಲಿಲ್ಪಿಚ್ಯೊ ಗಡಿ ಬೊಲಿಚ್ಯೊ ತಡಿ ಘಾಲ್ಯಾತ್. ಪುಣ್ ಆಶಾವಾದಿ ಪ್ರಕಾಶನಾನ್ ಘೆತ್ಲಲೆಂ ಹೆಂ ಮೇಟ್ ಖರೆಂಚ್ ಫುಡಾರಾಕ್ ಭೋವ್ ಉಪ್ಕಾರ್ಚೆಂ, ದಿಶ್ಟಾವ್ಯಾಚೆಂ ಕಾಮ್. ಕೊಂಕಣಿ ಸಾಹಿತ್ಯ್ ಸಭಾರ್ ಲಿಪಿಂನಿ ಆಸಾ, ಆನಿ ಹೆಂ ಸಾಹಿತ್ಯ್ ಡಿಜಿಟಲ್ ರುಪಾರ್ ಎಕಾಮೆಕಾ ಸಾಂಕವ್ ಭಾಂದುನ್ ಎಕಾಮೆಕಾ ಪಾವಂವ್ಚೆಂ ಮಿಸಾಂವ್ ವರ್ತೆಂ. ಅಶೆಂ ಪಳೆಲ್ಯಾರ್ ಕೊಂಕಣಿ ಸಂಗೀತಾಕ್ ಸಯ್ತ್ ಲಿಪಿ ನಾ ಪುಣ್ ತೆಂ ಸಂಗೀತ್ ಕಿತ್ಯಾಕ್ ಎಕಾ ನಿರ್ದಿಶ್ಟ್ ಪ್ರಾಂತ್ಯಾಂತ್ ಮಾತ್ರ್ ಸೀಮಿತ್ ಜಾಲಾಂ? ಗೊಂಯ್ಚೆಂ ಸಂಗೀತ್ ಮಂಗ್ಳುರಾಕ್ ಜಾಂವ್, ಮಂಗ್ಳುರಾಂತ್ಲೆಂ ಸಂಗೀತ್ ಗೊಂಯಾಂಕ್ ಕಿತ್ಯಾಕ್ ಪಾವಾನಾ? ಕಿತ್ಯಾಕ್ ಮ್ಹಳ್ಯಾರ್ ತಸಲೆಂ ವ್ಹಡ್ ಮನ್ ಆಮ್ಚೆಲಾಗಿಂ ನಾ. ಪುಣ್ ಕಥಾಪಾಠ್ ತಸಲಿಂ ಅಧ್ಯಯನ್ ಕಾಮಾಸಾಳಾಂ ಚಲವ್ನ್ ವರುನ್ ಹ್ಯಾ ಲಿಪಿ, ಪ್ರಾಂತ್ಯಾಚ್ಯೊ ಗಡಿ ಉತ್ರೊನ್ ವಾವ್ರ್ ಕರ್ತಾ ಆನಿ ತಾಚೊ ಫಾಯ್ದೊ ಕೊಂಕಣಿಕ್ ಪಾವಾಶೆಂ ಕರ್ತಾ.”
ಪ್ರಾಧ್ಯಾಪಕ್ ಅಂಜು ಸಾಖರ್‌ದಾಂಡೆನ್ ಅಪ್ಲ್ಯಾ ಉಲವ್ಪಾಂತ್ ಮ್ಹಣಾಲಿ; “ಕಥಾಪಾಠ್ ಸುರ್ವಾತೆರ್ ಥಾವ್ನ್ ಧೆಂಪೆ ಮಹಾವಿಧ್ಯಾಲಯಾಚ್ಯಾ ವಿಧ್ಯಾರ್ಥಿಂನಿ ವಾಂಟೆಲಿ ಜಾಲ್ಯಾಂತ್, ಆನಿ ಹ್ಯಾ ಮುಖಾಂತ್ರ್ ಕನ್ನಡ ಲಿಪಿಂತ್ ಕಥಾ ಬರಯ್ತೆಲ್ಯಾಂಚ್ಯೊ ಕಥಾ ವಾಚುಂಕ್, ಆನಿ ಸಮ್ಜುಂಕ್ ಏಕ್ ಸಂಧಿ ಮೆಳ್ಳ್ಯಾ ಆನಿ ಹ್ಯಾ ಸಾಂಕವಾಕ್ ಆಸಾ ಕರುಂಕ್ ಆಶಾವಾದಿ ಪ್ರಕಾಶನಾಚೊ ಮೊಟೊ ವಾವ್ರ್ ಕಾರಣ್. ಧೆಂಪೆ ಮಹಾವಿಧ್ಯಾಲಯಾನ್ ಆಶಾವಾದಿ ಪ್ರಕಾಶನಾಸವೆಂ ಆತಾಂ ದುಸ್ರೆಂ ಸಮ್ಜಿಕಾಯೆಚೆಂ ಖರಾರ್ ಕೆಲಾಂ ಆನಿ ಹಾಚೊ ಉದ್ದೇಶ್ ’ಕೊಂಕಣಿಚ್ಯಾ ಬಹುಲಿಪಿಚ್ಯಾ ಡಿಜಿಟಲೀಕರಣ್ ಆನಿ ಪ್ರಸಾರಣ್’ ಹ್ಯಾ ಪ್ರಕಲ್ಪಾಕ್ ಸಹಭಾಗಿತ್ವ್ ಕರುಂಕ್.”
ದೊತೊರ್ ಚಾರ್ಲ್ಸ್ ಲೊಬೊನ್ ಅಪ್ಲ್ಯಾ ಉಲವ್ಪಾಂತ್ ಕಥಾಪಾಠ್ ಅಧ್ಯಯನ್ ಉಪಕ್ರಮಾಕ್ ತಶೆಂಚ್ ವಾಂಟೆಲಿ ಜಾಂವ್ಚಾ ಸರ್ವ್ ವಿಧ್ಯಾರ್ಥಿಂಕ್ ಹ್ಯಾ ಕಾಮಾಸಾಳಾಂಚೊ ಫಾಯ್ದೊ ಜೊಡುಂಕ್ ಉಲೊ ದಿಲೊ.
ಬಾಬ್ ವಿಲ್ಲಿ ಗೋಯೆಸಾನ್ ಅಪ್ಲ್ಯಾ ಉಲವ್ಪಾಂತ್ ಮ್ಹಣಾಲೊ; “ಎಡ್ವಿನ್ ಜೆ. ಎಫ್. ಡಿಸೋಜಾಸವೆಂ ಸಾಹಿತ್ಯ್ ಅಕಾಡೆಮಿಚೊ ಸಾಂದೊ ಜಾವ್ನ್ ವಾವ್ರ್ ಕೆಲಾ ಆನಿ ಎಡ್ವಿನಾಚ್ಯೊ ಕಥಾ ಖೊಲಾಯೆನ್ ಅಧ್ಯಯನ್ ಕೆಲ್ಯಾತ್. ಕಥಾಪಾಠ್ ಕಾಮಾಸಾಳಾಂನಿ ತಾಚ್ಯಾ ಕಥೆಂಚೆರ್ ಸಾದರ್ ಜಾಂವ್ಕ್ ಆಸ್ಚಿಂ ಪ್ರಪತ್ರಾಂ ಖರಿಂಚ್ ಜಾವ್ನ್ ವಿಧ್ಯಾರ್ಥಿಂಕ್ ದೆಖಿಭರಿತ್ ಜಾಂವ್ಚಾಂತ್ ದುಭಾವ್ ನಾ. ಕೊಂಕಣಿಚ್ಯಾ ಬಹುಲಿಪಿಚ್ಯಾ ಡಿಜಿಟಲೀಕರಣ್ ಆನಿ ಪ್ರಸಾರಣ್’ ಏಕ್ ಭೋವ್ ಮೊಲಾಧಿಕ್ ಯೆವ್ಜಣ್, ಆನಿ ಹ್ಯಾ ಯೆವ್ಜಣೆಂತ್ ಹಾಂವ್ ಆಶಾವಾದಿ ಪ್ರಕಾಶನಾಸವೆಂ ಆಸ್ತಲೊಂ.”
ಬಾಬ್ ಮಾರ್ಸೆಲ್ ಡಿಸೋಜ್ (ಮಚ್ಚಾ ಮಿಲಾರ್) ಹಾಣೆಂ ಅಪ್ಲ್ಯಾ ಉಲವ್ಪಾಂತ್ ಮ್ಹಣಾಲೊ; “ಎಡ್ವಿನ್ ಜೆ. ಎಫ್. ಬರೊ ಕಥಾಕಾರ್ ಪುಣ್ ಬರೊ ವಾಚ್ಪಿ, ತಾಚ್ಯಾ ವಾಚ್ಪಾಚಿ ಸವಯ್ ಭಳ್ವಂತ್ ಜಾವ್ನಾಸ್ಲಿ. ತಾಚ್ಯಾ ಸಾಹಿತ್ಯಾಚೆರ್ ಜೆರಾಲ್ ರಿತಿನ್ ತಾಚೆ ಸಮಕಾಳೀನ್ ಬರವ್ಪಿ ಖೊಡಿ ಕಾಡ್ತಾಲೆ ’ಎಡ್ವಿನಾಚ್ಯಾ ಸಾಹಿತ್ಯಾಂತ್ ಮಾತಿಯೆಚಿ ಮೂರ್ ನಾ’, ಆನಿ ಹ್ಯಾ ಖೊಡಿಜ್ ಎಡ್ವಿನಾನ್ ಜಾಪ್ ದಿಲ್ಲಿ ಆಸಾ ’ಇಂಗ್ಲಿಶ್ ತಶೆಂಚ್ ಹೆರ್ ಭಾಸೆಂನಿ ಆಸ್ಚೆಂ ಕೊಂಕಣಿಂತ್ ಕಿತ್ಯಾಕ್ ಆಸಾನಾಯೆ?’, ಅಶೆಂ ಪಳೆಲ್ಯಾರ್ ಪತ್ತೇದಾರಿ/ಗೂಡಾಚಾರಿ ಚಿಂತ್ಪಾಚ್ಯೊ, ವೈಗ್ಯಾನಿಕ್ ಚಿಂತ್ಪಾಚ್ಯೊ ಆನಿ ಹೆರ್ ಗುಂಡಾಯೆಚ್ಯಾ ಚಿಂತ್ಪಾಚ್ಯೊ ಕಾದಂಬರಿ ಬರಂವ್ಚಿ ಸುರ್ವಾತ್ ಕೆಲ್ಲಿಚ್ ಎಡ್ವಿನಾನ್.”
ಬಾಯ್ ರಾಜಶ್ರೀ ಸೈಲ್ ಅಪ್ಲ್ಯಾ ಉಲವ್ಪಾಂತ್ ಕಥಾಪಾಠ್ ಶಿಂಕಳೆಚ್ಯಾ ಸರ್ವ್ ವೆಬಿನಾರಾಂನಿ ವಿಧ್ಯಾರ್ಥಿಂನಿ ಹಾಜರ್ ಆಸೊನ್, ಹ್ಯಾ ಕಾಮಾಸಾಳಾಂಚೊ ಫಾಯ್ದೊ ಜೊಡ್ಚೊ ಮ್ಹಣಾಲಿ.
ಬಾಬ್ ಧರ್ಮ ಚೋಡನ್ಕಾರ್ ಹಾಣೆಂ ಕಥಾಪಾಠ್ ಶಿಂಕಳೆಚ್ಯಾ ಸರ್ವ್ ವೆಬಿನಾರಾಂಕ್ ತಶೆಂಚ್ ವಿಧ್ಯಾರ್ಥಿಂಕ್ ಸಕ್ರಿಯ್ ರಿತಿನ್ ಭಾಗ್ ಘೆವ್ನ್ ಹಾಚೊ ಫಾಯ್ದೊ ಜೊಡುಂಕ್ ಉಲೊ ದಿಲೊ.
ಬಾಯ್ ವಿಧಿತಾ ಶೇಟ್ ಹಿಣೆಂ ಕಥಾಪಾಠಾಚ್ಯಾ ಆಧ್ಲ್ಯಾ ಸರ್ವ್ ವೆಬಿನಾರಾಂನಿ ಹಾಜರ್ ಜಾವ್ನ್ ಜೊಡ್ಲಲ್ಯಾ ಮಾಹೆತಿಚೊ ಉಲ್ಲೇಕ್ ಕರುನ್, ಖರೊಚ್ ಜಾವ್ನ್ ಕಥಾಪಾಠ್ ಏಕ್ ಭೋವ್ ಉಪ್ಕಾರಾಚೆಂ ಉಪಕ್ರಮ್ – ಅಶೆಂ ಮ್ಹಣಾಲಿ.
ಬಾಬ್ ಶೈಲೇಂದ್ರ ಮೆಹ್ತಾನ್ ಫುಡ್ಲ್ಯಾ ಕಥಾಪಾಠ್ ವೆಬಿನಾರಾಂಚಿ ಮಾಹೆತ್ ದಿವುನ್, ಧಿನ್ವಾಸಿ ಉಲವ್ಪ್ ಕೆಲೆಂ.
आशावादी प्रकाशन ; कथापाठ शिंकळ VII उग्तावण
गोंय, ४ जुलाय: आशावादी प्रकाशन, सैंट झेवियर्स कोलेज माप्सा, धेंपे महाविध्यालय (परिगणीत) मिरामार हांच्या मुखेल्पणाखाल, कोंकणी अकाडेमी गोंय, दल्गादो कोंकणी अकाडेमी आनी कर्नाटक कोंकणी साहित्य अकाडेमिच्या भागिदारांत, कार्मेल कोलेज नुवें, फा.आग्नेल कोलेज पिलार, श्री मल्लिकार्जून कोलेज काणकोण, सर्कारी कोलेज खेपें आनी हेर थोड्या कोलेजिच्या सहभात्वांत आयोजीत कथापाठ शिंकळ VII चें उग्तावण सन्वारा (४ जुलाय २०२६) वेर बाय जेन एडवीन डिसोजान करून अपले संधेश दिले.
येवकार उलवपांत बाब शैलेंद्र मेहतान कथा आनी पाठ ह्या दोनाची गर्ज आयचा काळार कितली महत्वाची म्हळ्ळ्याचेर उलवप करून, २००४ इस्वेंत कुवेयटांत सुर्वात जाल्ल्या ’कथापाठ’ अध्ययन कामासाळांनी कशें २०२० इस्वेंत डिजिटल स्वरूपांत गोंय, कर्नाटक, महराषट्र, केरळ मात्र न्हय, देस-विदेशांतल्या आसक्तवंतांक ह्या डिजिटल कामासाळांनी वांटेली जावंक संधी मेळ्ळी म्हळ्ळ्याचेर सविसतार विवर दिलो. कथापाठ शिंकळी I – VI चेर जाल्ल्या समग्र अध्ययाची, तशेंच ह्या वेबिनारांनी सादर जाल्ल्या प्रपत्रांक पुसतकारुपार संकलन जावन पर्गट केल्ली खोलायेची माहेत दिली.
प्रसतावीक उलवपांत डो. चंद्रलेख डिसोजान “एडवीन जे. एफ. डिसोजान अपल्या साहित्यामुखांत्र कोंकणी साहित्याक एक नवोच, उंचलो दर्जो दिलो. ताच्या बर्पांनी वयचारिकता, आध्यात्मिकता, तात्विकता तशेंच समाज-मुखी चिंत्पाक जागवणी आसताली. जांव ती विडंबनात्मक रितीर वा हेर. एडवीन जे. एफ. डिसोजाच्या कथेंचेर ’कथापाठ’ चेर अध्ययन जांवची निजायकी भोव अपुर्भायेची विंचवण” अशें म्हणोन ’कोंकणिच्या बहुलिपिच्या डिजिटलीकरण आनी प्रसारण’ कोंकणिच्या समग्र साहित्याक एकामेका वांटून घेवंक तशेंच समजोंक एक अपुर्भायेची संधी करून दिता. देकून ह्या प्रकल्पांत सहभागित्व घेतलल्या सर्व संस्थ्यांक तशेंच वेक्तिंक धिन्वास दिले.
फादर लुवीस गोम्स हाणीं अपल्या उलवपांत “’कोंकणिच्या बहुलिपिच्या डिजिटलीकरण आनी प्रसारण’ चो वावर पाटल्या थोड्या तेंपांत बरोच चालू आसा आनी ह्या वावरांत आशावादी प्रकाशनासवें समजिकायेचें खरार सैंट झेवियर्स कोलेजीन केलां आनी आमचो उद्देश इतलोच; समग्र कोंकणी साहित्याक एकामेका लिपीं/प्रांत्याच्यो गडी उत्रोंचो.”
फादर चेतन लोबोन अपल्या उलवपांत “एडवीन जे, एफ डिसोजाचें नांव आयकतानांत हांव भावूक जातां, कित्याक म्हळ्यार म्हजो आनी ताचो भांद फकत संपादक-कथाकार जावन मात्र न्हय, हांव कथाकार जावंक म्हाका एकारितिचें प्रेरण लाभलेलेंच एडवीन जे. एफ. डिसोजाच्या कथेंनी. ताच्या कथेंचें पुसतक ’बेतलेहेम’ म्हाका अजून परत परत वाचुंक प्रेरण दिता. हांतल्यो चडताव कथा सेवक नेमाळ्याचेर पर्गट जाल्ल्यो.”
’कोंकणिच्या बहुलिपिच्या डिजिटलीकरण आनी प्रसारण’ चो सल्हादार आंडऱ्यू एल. डिकुन्हान अपल्या उलवपांत “कोंकणी भास उदेल्ली खंच्याय पंडितां थावन वा विध्वानां थावन न्हय, बगार लोकांथावन उदेल्ली, लोकान अजून जोगासणेन सांबाळून दवरलेली भास. तेदना लिपीच नातली, पूण आज ह्या लोकां मधेंच उदेल्ल्या विध्वान-पंडितांनी लिल्पिच्यो गडी बोलिच्यो तडी घाल्यात. पूण आशावादी प्रकाशनान घेतललें हें मेट खरेंच फुडाराक भोव उपकार्चें, दिश्टाव्याचें काम. कोंकणी साहित्य सभार लिपिंनी आसा, आनी हें साहित्य डिजिटल रुपार एकामेका सांकव भांदून एकामेका पावंवचें मिसांव वर्तें. अशें पळेल्यार कोंकणी संगीताक सयत लिपी ना पूण तें संगीत कित्याक एका निर्दिश्ट प्रांत्यांत मात्र सीमीत जालां? गोंयचें संगीत मंगळुराक जांव, मंगळुरांतलें संगीत गोंयांक कित्याक पावाना? कित्याक म्हळ्यार तसलें व्हड मन आमचेलागीं ना. पूण कथापाठ तसलीं अध्ययन कामासाळां चलवन वरून ह्या लिपी, प्रांत्याच्यो गडी उत्रोन वावर कर्ता आनी ताचो फायदो कोंकणीक पावाशें कर्ता.”
प्राध्यापक अंजू साखरदांडेन अपल्या उलवपांत म्हणाली; “कथापाठ सुर्वातेर थावन धेंपे महाविध्यालयाच्या विध्यार्थिंनी वांटेली जाल्यांत, आनी ह्या मुखांत्र कन्नड लिपिंत कथा बरयतेल्यांच्यो कथा वाचुंक, आनी समजुंक एक संधी मेळ्ळ्या आनी ह्या सांकवाक आसा करुंक आशावादी प्रकाशनाचो मोटो वावर कारण. धेंपे महाविध्यालयान आशावादी प्रकाशनासवें आतां दुस्रें समजिकायेचें खरार केलां आनी हाचो उद्देश ’कोंकणिच्या बहुलिपिच्या डिजिटलीकरण आनी प्रसारण’ ह्या प्रकल्पाक सहभागित्व करुंक.”
दोतोर चारल्स लोबोन अपल्या उलवपांत कथापाठ अध्ययन उपक्रमाक तशेंच वांटेली जांवचा सर्व विध्यार्थिंक ह्या कामासाळांचो फायदो जोडुंक उलो दिलो.
बाब विल्ली गोयेसान अपल्या उलवपांत म्हणालो; “एडवीन जे. एफ. डिसोजासवें साहित्य अकाडेमिचो सांदो जावन वावर केला आनी एडविनाच्यो कथा खोलायेन अध्ययन केल्यात. कथापाठ कामासाळांनी ताच्या कथेंचेर सादर जावंक आसचीं प्रपत्रां खरिंच जावन विध्यार्थिंक देखिभरीत जांवचांत दुभाव ना. कोंकणिच्या बहुलिपिच्या डिजिटलीकरण आनी प्रसारण’ एक भोव मोलाधीक येवजण, आनी ह्या येवजणेंत हांव आशावादी प्रकाशनासवें आसतलों.”
बाब मार्सेल डिसोज (मच्चा मिलार) हाणें अपल्या उलवपांत म्हणालो; “एडवीन जे. एफ. बरो कथाकार पूण बरो वाचपी, ताच्या वाचपाची सवय भळवंत जावनासली. ताच्या साहित्याचेर जेराल रितीन ताचे समकाळीन बरवपी खोडी काडताले ’एडविनाच्या साहित्यांत मातियेची मूर ना’, आनी ह्या खोडीज एडविनान जाप दिल्ली आसा ’इंगलीश तशेंच हेर भासेंनी आसचें कोंकणिंत कित्याक आसानाये?’, अशें पळेल्यार पत्तेदारी/गूडाचारी चिंत्पाच्यो, वैग्यानीक चिंत्पाच्यो आनी हेर गुंडायेच्या चिंत्पाच्यो कादंबरी बरंव
ची सुर्वात केल्लीच एडविनान.”
बाय राजश्री सैल अपल्या उलवपांत कथापाठ शिंकळेच्या सर्व वेबिनारांनी विध्यार्थिंनी हाजर आसोन, ह्या कामासाळांचो फायदो जोडचो म्हणाली.
बाब धर्म चोडनकार हाणें कथापाठ शिंकळेच्या सर्व वेबिनारांक तशेंच विध्यार्थिंक सक्रीय रितीन भाग घेवन हाचो फायदो जोडुंक उलो दिलो.
बाय विधिता शेट हिणें कथापाठाच्या आधल्या सर्व वेबिनारांनी हाजर जावन जोडलल्या माहेतिचो उल्लेक करून, खरोच जावन कथापाठ एक भोव उपकाराचें उपक्रम – अशें म्हणाली.
बाब शैलेंद्र मेहतान फुडल्या कथापाठ वेबिनारांची माहेत दिवून, धिन्वासी उलवप केलें.
