25 ಜುಲಾಯ್ 2026: ಆಶಾವಾದಿ ಪ್ರಕಾಶನಾನ್ ವರ್ಸಾನ್ ಡಿಜಿಟಲ್ ಮಾಧ್ಯಮಾಚೆರ್, ಕೊಂಕಣಿ ಮೊಟ್ವ್ಯಾ ಕಥೆಂಚೆರ್ ವರಸ್ ಚಲಂವ್ಚೆಂ ಅಧ್ಯಯನ್ ಕಾಮಾಸಾಳ್; ’ಕಥಾಪಾಠ್ ಶಿಂಕಳ್ VII’ ಚೆಂ ಸಮಾರೋಪ್ ವೆಬಿನಾರ್ ಜುಲಾಯ್ 25 ತಾರಿಕೆರ್, ಸನ್ವಾರಾ ಸಾಂಜೆರ್ 4 ವೊರಾಂಚೆರ್ ಚಲ್ಲೆಂ. ಆಶಾವಾದಿ ಪ್ರಕಾಶನಾಸವೆಂ ಸೈಂಟ್ ಝೆವಿಯರ್ಸ್ ಮಹಾವಿಧ್ಯಾಲಯ್ ಮಾಪ್ಸಾ, ಧೆಂಪೆ ಮಹಾವಿಧ್ಯಾಲಯ್ ಮಿರಾಮಾರ್ ಹಾಂಚ್ಯಾ ಜೊಡ್ ಆಯೊಗಾಖಾಲ್ ಕೊಂಕಣಿ ಅಕಾಡೆಮಿ ಗೊಂಯ್, ದಲ್ಗಾದೊ ಕೊಂಕಣಿ ಅಕಾಡೆಮಿ ತಶೆಂಚ್ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚ್ಯಾ ಸಹ-ಭಾಗಿತ್ವಾಂತ್, ಕಾರ್ಮೆಲ್ ಕೊಲೆಜ್ ನುವೆಂ, ಫಾದರ್ ಆಗ್ನೆಲ್ ಕೊಲೆಜ್ ಪಿಲಾರ್, ಶ್ರೀ ಮಲ್ಲಿಕಾರ್ಜುನ ಕೊಲೆಜ್ ಕಾಣ್ಕೊಣ್, ತಶೆಂಚ್ ಹೆರ್ ಕೊಲೆಜಿಚ್ಯಾ ವಿಧ್ಯಾರ್ಥಿಂನಿ ಹ್ಯಾ ವೆಬಿನಾರಾಂನಿ ವಾಂಟೊ ಘೆತ್ಲೊ.
4 ಜುಲಾಯ್: ಕಥಾಪಾಠ್ ಶಿಂಕಳ್ – VII ಚೆಂ ಉಗ್ತಾವಣ್
11 ಜುಲಾಯ್: ವೆಬಿನಾರ್ – II: ಎಡ್ವಿನ್ ಜೆ. ಎಫ್. ಡಿಸೊಜಾಚ್ಯಾ ಕಥೆಂಚೆರ್ ಪ್ರಪತ್ರ್: ಧರ್ಮ ಚೊಡನ್ಕಾರ್
18 ಜುಲಾಯ್: ವೆಬಿನಾರ್ – III:
ಎಡ್ವಿನ್ ಜೆ. ಎಫ್. ಡಿಸೊಜಾಚ್ಯಾ ಕಥೆಂಚೆರ್ ವಲ್ಲಿ ಕ್ವಾಡ್ರಸಾನ್ ಕೆಲ್ಲ್ಯಾ ಸಮೀಕ್ಷೆಚೆಂ ’ಚಲ್ ದೊನ್ ಚಂದ್ರಾಂಕ್’ ಪುಸ್ತಕಾಚೆರ್ ಸಮೀಕ್ಷಾ: ಡೊ. ಚಂದ್ರಲೇಖ ಡಿಸೋಜ
ಎಡ್ವಿನ್ ಜೆ. ಎಫ್. ಡಿಸೊಜಾಚ್ಯಾ ಕಥೆಂಚೆರ್ ಪ್ರಪತ್ರ್: ಡೊ| ರೆಷ್ಮಾ ಅಮಿತ್ ಖೊಲ್ಕಾರ್
ಸಮಾರೊಪ್ ಕಾರ್ಯಾಚ್ಯಾ ಸುರ್ವಾತೆರ್ ಆಯ್ಲೆವಾರ್ ಅಂತರ್ಲೆಲ್ಯಾ ಕೇರಳಚ್ಯಾ ಕೊಂಕಣಿ ಸಂಘಟಕಾಕ್ ಬಾಬ್ ಆನಂದ್ ಕಾಮತ್ ಹಾಚ್ಯಾ ಅತ್ಮ್ಯಾಕ್ ಏಕ್ ಮಿನುಟ್ ಮೌನ್ ಪ್ರಾರ್ಥನ್ ಜಾತಚ್, ವಲ್ಲಿ ಕ್ವಾಡ್ರಸಾನ್ ಸರ್ವಾಂಕ್ ಜೆರಾಲ್ ಯೆವ್ಕಾರ್ ದಿವುನ್ ೨೦೦೪ ಇಸ್ವೆಂತ್ ’ಕಥಾಪಾಠ್’ ಕಶಿ ಸುರ್ವಾತ್ ಜಾಲ್ಲಿ ತಶೆಂಚ್ “ಕೋವಿಡ್ ಕಾಳಾರ್ ಕಶೆಂ ಡಿಜಿಟಲ್ ಸ್ವರೂಪಾರ್ ಯೆದೊಳ್ ಪಾಸೊನ್ ಸಾತ್ ಶಿಂಕಳೆಂನಿ ಪನ್ನಾಸಾಂ ವಯ್ರ್ ವೆಬಿನಾರಾಂ ಚಲ್ಲಿಂ ಮ್ಹಳ್ಳಿ ಮೊಟ್ವಿ ಮಾಹೆತ್ ದಿಲಿ. ಹೆಚ್ ವೆಳಾರ್ ಕೊಂಕಣಿ ಬಿಯೊಂಡ್ ಸ್ಕ್ರಿಪ್ಟ್ (ಲಿಪಿಭಾಯ್ಲಿ ಕೊಂಕಣಿ) ಮಿಸಾಂವಾಚಿ ಒಳೊಕ್ ಕರುನ್ ಮ್ಹಣಾಲೊ; ’ಕಾರಣಾಂತರ್ ಆಮಿ ಲಿಪಿ/ಬೊಲಿಂನಿ ವಿಂಗಡ್ಲ್ಯಾಂವ್ ದೆಕುನ್ ಆಮಿ ಉಲಂವ್ಚಿ/ಬರಂವ್ಚಿ ರೀತ್ ಮಾತ್ಶಿ ವೆಗ್ಳಿ ಆಸಾ ಆನಿ ತೆಂ ಕೊಂಕಣಿಚಿ ವೈವಿಧ್ಯತಾ ಮ್ಹಣ್ ಸಮ್ಜುಂಚೆಂ ಶಿವಾಯ್ ಎಕಾ ಲಿಪಿಕ್/ಎಕಾ ಬೊಲಿಕ್ ಹೆರಾಂಚೆರ್ ಥಾಪುಂಕ್ ಗೆಲ್ಯಾರ್ ತಾಚೊ ಫಾಯ್ದೊ ಕೊಂಕಣಿಕ್ ಕೆದಿಂಚ್ ಜಾಂವ್ಚೊನಾ ಬಗಾರ್ ಲುಕ್ಸಾಣ್ ಜರೂರ್ ಜಾತಲೆಂ. ದೆಕುನ್ ಆಶಾವಾದಿ ಪ್ರಕಾಶನ್ ಸರ್ವ್ ಲಿಪಿಂಕ್, ಸರ್ವ್ ಬೊಲಿಂಕ್ ಸಮಾನತಾ ದಿತಾ ಮ್ಹಣಾಲೊ. ಮುಖಾರುನ್ ಮ್ಹಣಾಲೊ ’ಕೆ.ಬಿ.ಎಸ್. ಸೊ ವಾವ್ರ್ ಫಕತ್ ಲಿಪಿಂನಿ ಆಟಾಪುನ್ ಆಸ್ಚೆಂ ಉತ್ತೀಮ್ ಕೊಂಕಣಿ ಸಾಹಿತ್ಯ್ ಲಿಪ್ಯಂತರಣ್ ಕರುನ್ ಹೆರ್ ಲಿಪಿಂತ್ ವಾಚ್ತಲ್ಯಾಂಕ್ ಪಾವಂವ್ಚೊ ಎಕ್ ಸಾಂಕವ್ ನಿರ್ಮಾಣ್ ಕರ್ಚೊ ಶಿವಾಯ್, ದುಡು/ಪುರಸ್ಕಾರ್/ನಾಂವಾ ಪಾಟ್ಲ್ಯಾನ್ ಧಾಂವ್ಚೊ ಬಿಲ್ಕುಲ್ ನ್ಹಯ್” – ಅಶೆಂ ಮ್ಹಣಾಲೊ.
2020: ಕಥಾಪಾಠ್ ಶಿಂಕಳ್ – I: ಮೊಟ್ವಿ ಕಥೆಚಿ ತಾಂತ್ರಿಕತಾ ಆನಿ ಕೊಂಕಣಿಂತ್ಲ್ಯಾ ಮೊಟ್ವ್ಯಾ ಕಥೆಂಚೆ ವೆವೆಗ್ಳ್ಯಾ ಪ್ರಕಾರಾಂಚೆರ್ ಅಧ್ಯಯನ್.
2021: ಕಥಾಪಾಠ್ ಶಿಂಕಳ್ – II: ವಿಲ್ಫಿ ರೆಬಿಂಬಸಾಚ್ಯಾ ಮೊಟ್ವ್ಯಾ ಕಥೆಂಚೆರ್ ಅಧ್ಯಯನ್.
2022: ಕಥಾಪಾಠ್ ಶಿಂಕಳ್ – III: ಕೊಂಕಣಿಂತ್ಲ್ಯಾ ಸಮಕಾಳೀನ್ ಕಥಾಕಾರಾಂಚ್ಯಾ ಕಥೆಂಚೆರ್ ತುಲನಾತ್ಮಕ್ ಅಧ್ಯಯನ್.
2023: ಕಥಾಪಾಠ್ ಶಿಂಕಳ್ – IV: ಸಾಳಕ್ ಪ್ರಕಾಶನಾಚೊ ವಾವ್ರ್ ಆನಿ ಸಿರಿವಂತಾಚ್ಯೊ ಕಥಾಚೆರ್ ಅಧ್ಯಯನ್.
2024: ಕಥಾಪಾಠ್ ಶಿಂಕಳ್ – V: ಪಯ್ಣಾರಿ 2024 ವರ್ಸಾಚೊ ಕಥಾಕಾರ್ ಡೊ.ಎಡ್ವರ್ಡ್ ಎಲ್ ನಜ್ರೆತಾಚ್ಯಾ ಕಥೆಂಚೆರ್ ಅಧ್ಯಯನ್.
2025: ಕಥಾಪಾಠ್ ಶಿಂಕಳ್ – VI: ಪಯ್ಣಾರಿ 2025 ವರ್ಸಾಚೊ ಕಥಾಕಾರ್ ಬಾಪ್ ಚೇತನ್ ಲೋಬೊಚ್ಯಾ ಕಥೆಂಚೆರ್ ಅಧ್ಯಯನ್.
ಸೈಂಟ್ ಝೇವಿಯರ್ಸ್ ಮಹಾವಿಧ್ಯಾಲಯಾಚಿ ಪ್ರಿನ್ಸಿಪಾಲ್ ಬಾಯ್ ಉರ್ಸುಲಾ ಬಾರೆಟೊನ್ ಉಗ್ತಾವಣ್ ಕರುನ್ ಅಪ್ಲ್ಯಾ ಉಲವ್ಪಾಂತ್ “ಕೊಂಕಣಿ ಆಮ್ಚಿ ಆವಯ್ಭಾಸ್ ಆನಿ ತಿ ರಾಕೊನ್ ವರ್ಚಿ ಆಮ್ಚಿ ಜವಾಭ್ದಾರಿ, ತಶೆಂಚ್ ಕೊಂಕಣಿ ಭಾಸೆಚ್ಯಾ ಸಾಹಿತಿಕ್ ವಾವ್ರಾಕ್ ಆಮಿ ಸರ್ವಾಂನಿ ಎಕಾ ಮನಾನ್ ಹಾತಾತ್ ಹಾತ್ ಧರುನ್ ಕಾಮ್ ಕರ್ಚಿ ಗರ್ಜ್ ಆಸಾ. ಕೊಂಕಣಿ ವಿಧ್ಯಾರ್ಥಿಂಕ್ ತಾಂತ್ರಿಕತಾ ತಶೆಂಚ್ ಕೊಂಕಣಿಂತ್ ಲಿಪ್ಯಂತರಣಾಚಿ ತರ್ಭೆತ್ ದಿಂವ್ಚಾ ದಿಶೆನ್ ಕೊಲೆಜಿನ್ ಆಧ್ಲ್ಯಾ ವರ್ಸಾ ಭಾವೀಸ್ ವಿಧ್ಯಾರ್ಥಿಂಕ್ ತರ್ಭೆತೆ ಕಾಮಾಸಾಳ್ ಆಸಾ ಕೆಲ್ಲೆಂ ಆನಿ ತೆಚ್ ಕಾಮಾಸಾಳಾಚೆರ್ ವಿಧ್ಯಾರ್ಥಿಂನಿ ಲಿಪ್ಯಂತರಣ್ ಕೆಲ್ಲೆಂ ’ದರ್ಯಾ ಗಾಜೊತಾ’ ಇ-ಪುಸ್ತಕ್ ಸಯ್ತ್ ಲೊಕಾರ್ಪಣ್ ಕೆಲ್ಲೆಂ. ಅಶೆಂಚ್ ಸವಿಸ್ತಾರ್ ರಿತಿಚೊ ಕೊಂಕಣಿ ವಾವ್ರ್ ಮುಖಾರುನ್ ವರ್ಚ್ಯಾ ಇರಾದ್ಯಾನ್ ಆಶಾವಾದಿ ಪ್ರಕಾಶನಾಸವೆಂ ಸಮ್ಜಿಕಾಯೆಚೆಂ ಕರಾರ್ ಆಸಾ ಕೆಲಾಂ ಆನಿ ಅರ್ವ್ ಲಿಪಿಂಚ್ಯಾ ಹ್ಯಾ ವಾವ್ರಾಕ್ ಪಾಟಿಂಬೊ ಆಸಾ ಮ್ಹಣಾಲಿ.
ಮುಖೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್ಲೆಲ್ಯಾ ಧೆಂಪೆ ಮಹಾವಿಧ್ಯಾಲಯಾಚ್ಯಾ ಪ್ರಿನ್ಸಿಪಾಲ್ ಡೊ.ರಾಮು ಮೂರ್ತಿನ್ ಅಪ್ಲ್ಯಾ ಉಲವ್ಪಾಂತ್ “ಕಥಾಪಾಠ್ ಅಂತರ್ರಾಷ್ಟ್ರೀಯ್ ಮಟ್ಟಾಚ್ಯಾ ಕೊಂಕಣಿ ಮೊಟ್ವ್ಯಾ ಕಥೆಂಚೆರ್ ಚಲ್ಚ್ಯಾ ಅಧ್ಯಯನ್ ಕಾಮಾಸಾಳಾಂನಿ ಆಶಾವಾದಿ ಪ್ರಕಾಶನಾಸವೆಂ ಧೆಂಪೆ ಮಹಾವಿಧ್ಯಾಲಯ್ ತಶೆಂಚ್ ಸಹಭಾಗಿತ್ವ್ ಕೆಲ್ಲ್ಯಾ ಸರ್ವ್ ಸಂಸ್ಥ್ಯಾಂಕ್ ಆನಿ ಕೊಲೆಜಿಂಕ್ ಧಿನ್ವಾಸ್ ಫಾವೊ. ಆಶಾವಾದಿ ಪ್ರಕಾಶನಾಸವೆಂ ಸಮ್ಜಿಕಾಯೆಚೆಂ ಕರಾರ್ ದುಸ್ರೆ ಪಾವ್ಟಿಂ ಆಸಾ ಕರುನ್ ವಿಧ್ಯಾರ್ಥಿಂಕ್ ಬರೆಂ ಶಿಕ್ಷಣ್ ದಿಂವ್ಚೆ ದಿಶೆನ್ ಆಮ್ಚಿಂ ಸದಾಂಚ್ ವಾವ್ರ್ ಕರುನ್ ಆಸಾಂವ್, ಅಸಲಿಂ ಅಧ್ಯಯನ್ ಖರಿಂಚ್ ವಿಧ್ಯಾರ್ಥಿಂಕ್ ಕೊಂಕಣಿ ಭಾಸೆಚೆರ್ ಅಪ್ಲಿ ಸಮ್ಜಣಿ ವಿಸ್ತಾರಿತ್ ಕರುಂಕ್ ಮಜತ್ದಾರ್ ಜಾತಾತ್ ಮ್ಹಣಾಲೊ.
ಕೆ.ಬಿ.ಎಸ್. (ಕೊಂಕಣಿ ಬಿಯೊಂಡ್ ಸ್ಕ್ರಿಪ್ಟ್) ಮಿಸಾಂವಾಚೆಂ ಪಯ್ಲೆಂ ಪುಸ್ತಕ್; ’ನವಿ ದಿಶಾ’ (ಆಶಾವಾದಿ ಪ್ರಕಾಶನಾಚೆಂ 101 ವೆಂ, ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಜೊಡ್ಲಲ್ಲೆಂ, ಮೊನಿಕಾ ಡೆಸಾ ಮಥಾಯಸಾಚ್ಯಾ ಮೊಟ್ವ್ಯಾ ಕಥೆಂಚೆಂ ಪುಸ್ತಕ್), ಪಯ್ಣಾರಿ 2025 ವರ್ಸಾಚೊ ಕಥಾಕಾರ್ ಮಾ|ಚೇತನ್ ಲೋಬೊನ್ ಉಗ್ತಾವಣ್ ಕರುನ್ ಅಪ್ಲ್ಯಾ ಸಂಧೇಶಾಂತ್ ’ಕೊಂಕಣಿ ಬಿಯೊಂಡ್ ಸ್ಕ್ರಿಪ್ಟ್, ಕೊಂಕಣಿಚ್ಯಾ ಚಡಿತ್ ವಾಚ್ಪ್ಯಾಂಕ್ ಕೊಂಕಣಿ ಸಾಹಿತ್ಯ್ ವ್ಹರುನ್ ದಿಂವ್ಚ್ಯಾ ದಿಶೆನ್ ಮಹತ್ವಾಚೆಂ ಮೆಟ್. ವಾಚುಂಕ್ ಆಸಕ್ತ್ ಆಸ್ಚ್ಯಾಂಕ್ ವಾಚುಂಕ್ ತಶೆಂಚ್ ವಾಚುಂಕ್ ವೇಳ್ ನಾತ್ಲೆಲ್ಯಾಂಕ್ ಡಿಜಿಟಲ್ ಸ್ವರೂಪಾಂತ್ ಆಡಿಯೊ ರುಪಾಚೆರ್ ಹೆಂ ಸಾಹಿತ್ಯ್ ಮೊಬಾಯ್ಲಾಂನಿ ಪಾವಂವ್ಚೆಂ, ಜಶೆಂ ವೆಳಾಕಾಳಾತೆಕಿದ್ ತಾಂತ್ರಿಕ್ ಬದ್ಲಾವಣ್ ಜಾವ್ನಾಸಾ’ ಮ್ಹಣಾಲೊ.
ಕೆ.ಬಿ.ಎಸ್. ಮಿಸಾಂವಾಚ್ಯಾ ಸಲ್ಹಾ ಸಮಿತಿಚೊ ಸಾಂದೊ ಬಾಪ್ ಲೂವಿಸ್ ಗೋಮ್ಸ್ ಹಾಣಿಂ ’ಕಥನ್ (ನಾಗರಿ ಲಿಪಿಂತ್)’ ಇ-ಪುಸ್ತಕಾಚೆಂ ಲೊಕಾರ್ಪಣ್ ಕೆಲೆಂ. ಎಡ್ವಿನ್ ಜೆ. ಎಫ್ ಡಿಸೊಜಾಚ್ಯಾ ಕಥೆಂಚೆರ್ ಸಾದರ್ ಕೆಲ್ಲಿಂ ಪ್ರಪತ್ರಾಂ ಹ್ಯಾ ಇ-ಪುಸ್ತಕಾಂತ್ ಆಸಾತ್. ಅಪ್ಲ್ಯಾ ಉಲವ್ಪಾಂತ್; ’ಕೊಂಕಣಿ ಬಿಯೊಂಡ್ ಸ್ಕ್ರಿಪ್ಟ್, ಸರ್ವ್ ಲಿಪಿ ಆನಿ ಬೊಲಿಚ್ಯಾ ಲೊಕಾಂಕ್ ಕೊಂಕಣಿ ಸಾಹಿತ್ಯಾಚಿ ಗ್ರೆಸ್ತ್ಕಾಯ್ ಸಮ್ಜುಂಕ್ ಏಕ್ ವಾಟ್ ಕರುನ್ ದಿತಾ, ಆನಿ ಹಿ ವಾಟ್ ಕೊಂಕಣಿಚ್ಯಾ ಫುಡಾರಾಕ್ ಉಪ್ಕಾರ್ತಲಿ’ ಮ್ಹಣಾಲೊ.
ಕಥನ್ (ಕನ್ನಡ ಲಿಪಿಂತ್ಲೆಂ ಪುಸ್ತಕ್, ಆಶಾವಾದಿ ಪ್ರಕಾಶನಾಚೆಂ 102 ವೆಂ ಪುಸ್ತಕ್), ಡೊ.ಆಸ್ಟಿನ್ ಡಿಸೊಜ್ ಪ್ರಭುನ್ ಉಗ್ತಾವಣ್ ಕರುನ್ ಅಪ್ಲ್ಯಾ ಉಲವ್ಪಾಂತ್ ’ಲಿಪಿ ಪಲ್ತೊಡಿ ಆಸ್ಚ್ಯಾ ಕೊಂಕಣಿಕ್ ಎಕಾಮೆಕಾ ಲಾಗಿಂ ಹಾಡುಂಕ್ ಆಶಾವಾದಿ ಪ್ರಕಾಶನಾನ್ ಕರ್ಚ್ಯಾ ವಾವ್ರಾಕ್ ಯಶ್ ಆಂವ್ಡೆತಾಂ’ ಮ್ಹಣಾಲೊ.
ಕಥನ್ (ನಾಗರಿ ಲಿಪಿಂತ್ಲೆಂ ಪುಸ್ತಕ್, ಆಶಾವಾದಿ ಪ್ರಕಾಶನಾಚೆಂ 103 ವೆಂ ಪುಸ್ತಕ್) ಕೆ.ಬಿ.ಎಸ್. ಚ್ಯಾ ಸಲ್ಹಾಸಮಿತಿಚ್ಯಾ ಬಾಯ್ ಅಂಜು ಸಾಖರ್ದಾಂಡೆನ್ ಉಗ್ತಾವಣ್ ಕರುನ್ ಅಪ್ಲ್ಯಾ ಉಲವ್ಪಾಂತ್ ’ಲಿಪಿಂ ಮಧೆಂ ಸಾಂಕವ್ ಭಾಂದ್ಚೊ ವಾವ್ರ್ ಕಾಂಯ್ ತೆಂಪಾಥಾವ್ನ್ ಆಶಾವಾದಿ ಪ್ರಕಾಶನ್ ಕರುನ್ ಆಸಾ ಆನಿ ಆಶಾವಾದಿ ಪ್ರಕಾಶನಾಸವೆಂ ಧೆಂಪೆ ಕೊಲೆಜ್ ತಶೆಂಚ್ ಹೆರ್ ಕೊಲೆಜಿಂನಿ ಸಯ್ತ್ ಸಹಯೊಗ್ ದಿಲಾ. ಸರ್ವಾಂಕ್ ಧಿನ್ವಾಸ್’ ಮ್ಹಣಾಲಿ.
ಬಾಬ್ ಧರ್ಮ ಚೊಡನ್ಕಾರ್ (ಸೈಂಟ್ ಝೇವಿಯರ್ಸ್ ಮಹಾವಿಧ್ಯಾಲಯಾಚ್ಯಾ ಕೊಂಕಣಿ ವಿಭಾಗಾಚೊ ಮುಖೆಲಿ) ಅಪ್ಲ್ಯಾ ಉಲವ್ಪಾಂತ್ “ಕೊಂಕಣಿ ಮೊಟ್ವ್ಯಾ ಕಥೆಂಚೆರ್ ಇತ್ಲ್ಯಾ ತೆಂಪಾನ್ ಇತ್ಲ್ಯಾ ವೆವಸ್ಥಿತ್ ರಿತಿನ್ ವಾವ್ರ್ ಚಲ್ತಾ ತೆಂ ಭೋವ್ ಸಂತೊಸಾಚೆಂ. ಹ್ಯಾ ವರ್ಸಾಚ್ಯಾ ಅಧ್ಯಯನಾಂತ್ ಮ್ಹಾಕಾಯ್ ಏಕ್ ಪ್ರಪತ್ರ್ ಸಾದರ್ ಕರುಂಕ್ ಸಂಧ್ ಮೆಳ್ಳೊ. ಹೊ ವಾವ್ರ್ ಅಸೊಚ್ ಮುಕಾರ್ ವಚೊಂ, ಆನಿ ಆಮ್ಚೊ ಪಾಟಿಂಬೊ ಆಸಾ” ಮ್ಹಣಾಲೊ.
ಬಾಯ್ ಜೇನ್ ಡಿಸೊಜಾನ್ ಅಪ್ಲ್ಯಾ ಸಂಧೇಶಾಂತ್ ಎಡ್ವಿನಾಚ್ಯಾ ಕಥೆಂಚೆರ್ ಅಧ್ಯಯನ್ ಚಲವ್ನ್ ತ್ಯಾ ಅಧ್ಯಯನ್ ಪ್ರಪತ್ರಾಂಕ್ ಪುಸ್ತಕಾ ರುಪಾರ್ ಪರ್ಗಟ್ ಕೆಲ್ಲ್ಯಾಕ್ ಆಶಾವಾದಿ ಪ್ರಕಾಶನಾಕ್ ಧಿನ್ವಾಸ್ ಪಾಠಯ್ಲೆ.
ಬಾಬ್ ಪ್ರಕಾಶ್ ನಾಯ್ಕಾನ್ ಅಪ್ಲ್ಯಾ ಸಂಧೇಶಾಂತ್ “ಆಶಾವಾದಿ ಪ್ರಕಾಶನ್ ಫಕತ್ ಸಾಹಿತಿಕ್ ವಾವ್ರ್ ಮಾತ್ರ್ ನ್ಹಯ್ ಆಸ್ತಾಂ, ಕೊಂಕಣಿ ಚಳ್ವಳೆಚೊ ವಾವ್ರ್ ಸಯ್ತ್ ಕರುನ್ ಆಸಾ ದೆಕುನ್ ಮ್ಹಜೆ ತಸಲೊ ಏಕ್ ಚಳ್ವಳೆಗಾರ್ ಆಶಾವಾದಿ ಪ್ರಕಾಶನಾಕ್ ಚಡ್ ಲಾಗಿಂ ಆಸಾಂ, ಆನಿ ಲಿಪ್ಯಂತರಣ್ ಕರುನ್ ಜಾಯ್ತಿಂ ಪುಸ್ತಕಾಂ ಹೆರ್ ಲಿಪಿಂಚ್ಯಾಂನಿ ವಾಚುಂಕ್ ಜಾಯ್ಶೆಂ ಕರ್ಚಾಂತ್ ಕೆಲ್ಲೊ ವಾವ್ರ್ ಹಾಂವ್ ಲಾಗ್ಶಿಲ್ಯಾನ್ ಪಳೆವ್ನ್ ಆಯ್ಲಾಂ.” ಮ್ಹಣಾಲೊ.
ಬಾಯ್ ಡೊ.ಚಂದ್ರಲೇಖ ಡಿಸೊಜ್ (ಕೆ.ಬಿ.ಎಸ್. ಚ್ಯಾ ಸಲ್ಹಾ ಸಮಿತಿಚಿ) ಅಪ್ಲ್ಯಾ ಉಲವ್ಪಾಂತ್ “ಕೊಂಕಣಿ ಭಾಸ್ ಮ್ಹಳ್ಯಾರ್ ಸರ್ವ್ ಲಿಪಿ-ಬೊಲಿಂಚ್ಯಾ ಲೊಕಾಂಚಿ ಭಾಸ್, ದೆಕುನ್ ಕೊಂಕಣಿ ಸಾಹಿತ್ಯ್ ಜೆಂ ವೆವೆಗ್ಳ್ಯಾ ಲಿಪಿಂನಿ ಆಸ್ಚೆಂ, ತೆಂ ಎಕಾಮೆಕಾ ಲಿಪ್ಯಂತರಣ್ ಕರ್ಚೆಂ ತಶೆಂಚ್ ಡಿಜಿಟಲ್ ಸ್ವರೂಪಾಂತ್ ಹಾಡ್ಚೆಂ ಕಾಮ್ ಫುಡಾರ್ಚ್ಯಾ ನದ್ರೆಂತ್ ಮಹತ್ವಾಚೆಂ” ಮ್ಹಣಾಲಿ.
ಕೆ.ಬಿ.ಎಸ್. ಚ್ಯಾ ಸಲ್ಹಾ ಸಮಿತಿಚೊ ಸಾಂದೊ ಆಂಡ್ರ್ಯೂ ಎಲ್. ಡಿಕುನ್ಹಾನ್ ಅಪ್ಲ್ಯಾ ಉಲವ್ಪಾಂತ್ “ಕೊಂಕಣಿ ಭಾಸೆಚ್ಯಾ ಸುರ್ವಾತೆರ್ ಕೊಂಕಣಿ ಲಿಪಿಭಾಯ್ಲಿಚ್ ಜಾವ್ನ್ ಆಸ್ಲಿ. ಮೌಕಿಕ್ ರಿತಿಚ್ಯಾ ಭಾಸೆಕ್ ಲಿಪಿಚಿ ಗರ್ಜ್ ನಾತ್ಲಿ. ಪುಣ್ ಆತಾಂ ವೆವೆಗ್ಳ್ಯಾ ಲಿಪಿಂನಿ ಕಯ್ದ್ ಜಾಲ್ಲ್ಯಾ ಹ್ಯಾ ಕೊಂಕಣಿ ಸಾಹಿತ್ಯಾಕ್ ಡಿಜಿಟಲ್ ರುಪಾರ್ ಎಕಾಮೆಕಾ ಲಿಪ್ಯಂತರಣ್ ಕರ್ನ್ ಹೆರ್ ಲಿಪಿಂಚ್ಯಾ ವಾಚ್ಪ್ಯಾಂಕ್ ಪಾವಂವ್ಚೆಂ ಕಾಮ್ ಖರೆಂಚ್ ಜಾವ್ನ್ ಕೊಂಕಣಿಚ್ಯಾ ಫುಡಾರಾಂತ್ ಭೋವ್ ಮಹತ್ವಾಚೆಂ ಜಾಂವ್ಕ್ ಪಾವ್ತೆಲೆಂ” ಮ್ಹಣಾಲೊ.
ಧಿನ್ವಾಸಿ ಉಲವ್ಪಾಂತ್ ವಲ್ಲಿ ಕ್ವಾಡ್ರಸಾನ್ ’ಕಥಾಪಾಠ್’ ಅಧ್ಯಯನಾಚ್ಯಾ ವೆಬಿನಾರ್ ಶಿಂಕಳೆಕ್ ಪಾಟಿಂಬೊ ದಿಂವ್ಚ್ಯಾ ಮಾನೆಸ್ತ್ ಮಾಯ್ಕಲ್ ಡಿಸೋಜಾಕ್, ತಶೆಂಚ್ ಸರ್ವ್ ಜೊಡ್ ಆಯೋಜಕಾಂಕ್, ಸಹ-ಭಾಗಿತ್ವ್ ಕೆಲ್ಲ್ಯಾಂಕ್, ಪ್ರಪತ್ರಾಂ ಸಾದರ್ ಕೆಲ್ಲ್ಯಾಂಕ್, ವಿಧ್ಯಾರ್ಥಿಂಕ್ ಧಿನ್ವಾಸ್ ಪಾಠಯ್ಲೆ.
For complete details and more photographs, you may visit POINNARI
कथापाठ शिंकळ VII समारोप वेबिनार
२५ जुलाय २०२६: आशावादी प्रकाशनान वर्सान डिजिटल माध्यमाचेर, कोंकणी मोटव्या कथेंचेर वरस चलंवचें अध्ययन कामासाळ; ’कथापाठ शिंकळ VII’ चें समारोप वेबिनार जुलाय २५ तारिकेर, सन्वारा सांजेर ४ वोरांचेर चल्लें. आशावादी प्रकाशनासवें सैंट झेवियर्स महाविध्यालय माप्सा, धेंपे महाविध्यालय मिरामार हांच्या जोड आयोगाखाल कोंकणी अकाडेमी गोंय, दल्गादो कोंकणी अकाडेमी तशेंच कर्नाटक कोंकणी साहित्य अकाडेमिच्या सह-भागित्वांत, कार्मेल कोलेज नुवें, फादर आग्नेल कोलेज पिलार, श्री मल्लिकार्जून कोलेज काणकोण, तशेंच हेर कोलेजिच्या विध्यार्थिंनी ह्या वेबिनारांनी वांटो घेतलो.
४ जुलाय: कथापाठ शिंकळ – VII चें उग्तावण
११ जुलाय: वेबिनार – II: एडवीन जे. एफ. डिसोजाच्या कथेंचेर प्रपत्र: धर्म चोडनकार
१८ जुलाय: वेबिनार – III:
एडवीन जे. एफ. डिसोजाच्या कथेंचेर वल्ली क्वाड्रसान केल्ल्या समीक्षेचें ’चल दोन चंद्रांक’ पुसतकाचेर समीक्षा: डो. चंद्रलेख डिसोज
एडवीन जे. एफ. डिसोजाच्या कथेंचेर प्रपत्र: डो| रेषमा अमीत खोल्कार
समारोप काऱ्याच्या सुर्वातेर आयलेवार अंतरलेल्या केरळच्या कोंकणी संघटकाक बाब आनंद कामत हाच्या अत्म्याक एक मिनूट मौन प्रार्थन जातच, वल्ली क्वाड्रसान सर्वांक जेराल येवकार दिवून २००४ इस्वेंत ’कथापाठ’ कशी सुर्वात जाल्ली तशेंच “कोवीड काळार कशें डिजिटल स्वरूपार येदोळ पासोन सात शिंकळेंनी पन्नासां वयर वेबिनारां चल्लीं म्हळ्ळी मोटवी माहेत दिली. हेच वेळार कोंकणी बियोंड स्क्रिपट (लिपिभायली कोंकणी) मिसांवाची ओळोक करून म्हणालो; ’कारणांतर आमी लिपी/बोलिंनी विंगडल्यांव देकून आमी उलंवची/बरंवची रीत मातशी वेगळी आसा आनी तें कोंकणिची वैविध्यता म्हण समजुंचें शिवाय एका लिपीक/एका बोलीक हेरांचेर थापुंक गेल्यार ताचो फायदो कोंकणीक केदिंच जांवचोना बगार लुक्साण जरूर जातलें. देकून आशावादी प्रकाशन सर्व लिपिंक, सर्व बोलिंक समानता दिता म्हणालो. मुखारून म्हणालो ’के.बी.एस. सो वावर फकत लिपिंनी आटापून आसचें उत्तीम कोंकणी साहित्य लिप्यंतरण करून हेर लिपिंत वाचतल्यांक पावंवचो एक सांकव निर्माण कर्चो शिवाय, दुडू/पुरसकार/नांवा पाटल्यान धांवचो बिल्कूल न्हय” – अशें म्हणालो.
२०२०: कथापाठ शिंकळ – I: मोटवी कथेची तांत्रिकता आनी कोंकणिंतल्या मोटव्या कथेंचे वेवेगळ्या प्रकारांचेर अध्ययन.
२०२१: कथापाठ शिंकळ – II: विलफी रेबिंबसाच्या मोटव्या कथेंचेर अध्ययन.
२०२२: कथापाठ शिंकळ – III: कोंकणिंतल्या समकाळीन कथाकारांच्या कथेंचेर तुलनात्मक अध्ययन.
२०२३: कथापाठ शिंकळ – IV: साळक प्रकाशनाचो वावर आनी सिरिवंताच्यो कथाचेर अध्ययन.
२०२४: कथापाठ शिंकळ – V: पयणारी २०२४ वर्साचो कथाकार डो.एडवर्ड एल नज्रेताच्या कथेंचेर अध्ययन.
२०२५: कथापाठ शिंकळ – VI: पयणारी २०२५ वर्साचो कथाकार बाप चेतन लोबोच्या कथेंचेर अध्ययन.
सैंट झेवियर्स महाविध्यालयाची प्रिन्सिपाल बाय उर्सुला बारेटोन उग्तावण करून अपल्या उलवपांत “कोंकणी आमची आवयभास आनी ती राकोन वर्ची आमची जवाभदारी, तशेंच कोंकणी भासेच्या साहितीक वावराक आमी सर्वांनी एका मनान हातात हात धरून काम कर्ची गर्ज आसा. कोंकणी विध्यार्थिंक तांत्रिकता तशेंच कोंकणिंत लिप्यंतरणाची तर्भेत दिंवचा दिशेन कोलेजीन आधल्या वर्सा भावीस विध्यार्थिंक तर्भेते कामासाळ आसा केल्लें आनी तेच कामासाळाचेर विध्यार्थिंनी लिप्यंतरण केल्लें ’दऱ्या गाजोता’ ई-पुसतक सयत लोकार्पण केल्लें. अशेंच सविसतार रितिचो कोंकणी वावर मुखारून वर्च्या इराद्यान आशावादी प्रकाशनासवें समजिकायेचें करार आसा केलां आनी अर्व लिपिंच्या ह्या वावराक पाटिंबो आसा म्हणाली.
मुखेल सयरो जावन हाजर आसलेल्या धेंपे महाविध्यालयाच्या प्रिन्सिपाल डो.रामू मूर्तीन अपल्या उलवपांत “कथापाठ अंतरराषट्रीय मट्टाच्या कोंकणी मोटव्या कथेंचेर चल्च्या अध्ययन कामासाळांनी आशावादी प्रकाशनासवें धेंपे महाविध्यालय तशेंच सहभागित्व केल्ल्या सर्व संस्थ्यांक आनी कोलेजिंक धिन्वास फावो. आशावादी प्रकाशनासवें समजिकायेचें करार दुस्रे पावटीं आसा करून विध्यार्थिंक बरें शिक्षण दिंवचे दिशेन आमचीं सदांच वावर करून आसांव, असलीं अध्ययन खरिंच विध्यार्थिंक कोंकणी भासेचेर अपली समजणी विसतारीत करुंक मजतदार जातात म्हणालो.
के.बी.एस. (कोंकणी बियोंड स्क्रिपट) मिसांवाचें पयलें पुसतक; ’नवी दिशा’ (आशावादी प्रकाशनाचें १०१ वें, कर्नाटक कोंकणी साहित्य अकाडेमिचो पुरसकार जोडलल्लें, मोनिका डेसा मथायसाच्या मोटव्या कथेंचें पुसतक), पयणारी २०२५ वर्साचो कथाकार मा|चेतन लोबोन उग्तावण करून अपल्या संधेशांत ’कोंकणी बियोंड स्क्रिपट, कोंकणिच्या चडीत वाचप्यांक कोंकणी साहित्य व्हरून दिंवच्या दिशेन महत्वाचें मेट. वाचुंक आसक्त आसच्यांक वाचुंक तशेंच वाचुंक वेळ नातलेल्यांक डिजिटल स्वरूपांत आडियो रुपाचेर हें साहित्य मोबायलांनी पावंवचें, जशें वेळाकाळातेकीद तांत्रीक बदलावण जावनासा’ म्हणालो.
के.बी.एस. मिसांवाच्या सल्हा समितिचो सांदो बाप लूवीस गोम्स हाणीं ’कथन (नागरी लिपिंत)’ ई-पुसतकाचें लोकार्पण केलें. एडवीन जे. एफ डिसोजाच्या कथेंचेर सादर केल्लीं प्रपत्रां ह्या ई-पुसतकांत आसात. अपल्या उलवपांत; ’कोंकणी बियोंड स्क्रिपट, सर्व लिपी आनी बोलिच्या लोकांक कोंकणी साहित्याची ग्रेसतकाय समजुंक एक वाट करून दिता, आनी ही वाट कोंकणिच्या फुडाराक उपकार्तली’ म्हणालो.
कथन (कन्नड लिपिंतलें पुसतक, आशावादी प्रकाशनाचें १०२ वें पुसतक), डो.आसटीन डिसोज प्रभून उग्तावण करून अपल्या उलवपांत ’लिपी पल्तोडी आसच्या कोंकणीक एकामेका लागीं हाडुंक आशावादी प्रकाशनान कर्च्या वावराक यश आंवडेतां’ म्हणालो.
कथन (नागरी लिपिंतलें पुसतक, आशावादी प्रकाशनाचें १०३ वें पुसतक) के.बी.एस. च्या सल्हासमितिच्या बाय अंजू साखरदांडेन उग्तावण करून अपल्या उलवपांत ’लिपीं मधें सांकव भांदचो वावर कांय तेंपाथावन आशावादी प्रकाशन करून आसा आनी आशावादी प्रकाशनासवें धेंपे कोलेज तशेंच हेर कोलेजिंनी सयत सहयोग दिला. सर्वांक धिन्वास’ म्हणाली.
बाब धर्म चोडनकार (सैंट झेवियर्स महाविध्यालयाच्या कोंकणी विभागाचो मुखेली) अपल्या उलवपांत “कोंकणी मोटव्या कथेंचेर इतल्या तेंपान इतल्या वेवस्थीत रितीन वावर चल्ता तें भोव संतोसाचें. ह्या वर्साच्या अध्ययनांत म्हाकाय एक प्रपत्र सादर करुंक संध मेळ्ळो. हो वावर असोच मुकार वचों, आनी आमचो पाटिंबो आसा” म्हणालो.
बाय जेन डिसोजान अपल्या संधेशांत एडविनाच्या कथेंचेर अध्ययन चलवन त्या अध्ययन प्रपत्रांक पुसतका रुपार पर्गट केल्ल्याक आशावादी प्रकाशनाक धिन्वास पाठयले.
बाब प्रकाश नायकान अपल्या संधेशांत “आशावादी प्रकाशन फकत साहितीक वावर मात्र न्हय आसतां, कोंकणी चळवळेचो वावर सयत करून आसा देकून म्हजे तसलो एक चळवळेगार आशावादी प्रकाशनाक चड लागीं आसां, आनी लिप्यंतरण करून जायतीं पुसतकां हेर लिपिंच्यांनी वाचुंक जायशें कर्चांत केल्लो वावर हांव लागशिल्यान पळेवन आयलां.” म्हणालो.
बाय डो.चंद्रलेख डिसोज (के.बी.एस. च्या सल्हा समितिची) अपल्या उलवपांत “कोंकणी भास म्हळ्यार सर्व लिपी-बोलिंच्या लोकांची भास, देकून कोंकणी साहित्य जें वेवेगळ्या लिपिंनी आसचें, तें एकामेका लिप्यंतरण कर्चें तशेंच डिजिटल स्वरूपांत हाडचें काम फुडार्च्या नद्रेंत महत्वाचें” म्हणाली.
के.बी.एस. च्या सल्हा समितिचो सांदो आंडऱ्यू एल. डिकुन्हान अपल्या उलवपांत “कोंकणी भासेच्या सुर्वातेर कोंकणी लिपिभायलीच जावन आसली. मौकीक रितिच्या भासेक लिपिची गर्ज नातली. पूण आतां वेवेगळ्या लिपिंनी कयद जाल्ल्या ह्या कोंकणी साहित्याक डिजिटल रुपार एकामेका लिप्यंतरण कर्न हेर लिपिंच्या वाचप्यांक पावंवचें काम खरेंच जावन कोंकणिच्या फुडारांत भोव महत्वाचें जावंक पावतेलें” म्हणालो.
धिन्वासी उलवपांत वल्ली क्वाड्रसान ’कथापाठ’ अध्ययनाच्या वेबिनार शिंकळेक पाटिंबो दिंवच्या मानेसत मायकल डिसोजाक, तशेंच सर्व जोड आयोजकांक, सह-भागित्व केल्ल्यांक, प्रपत्रां सादर केल्ल्यांक, विध्यार्थिंक धिन्वास पाठयले.
