ಶ್ರೀಹರಿಕೋಟಾ (ಜ. 12, 2026): ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ (ISRO) ಅತ್ಯಂತ ನಂಬಿಕಸ್ತ ಉಡಾವಣಾ ವಾಹನ ಎಂದೇ ಖ್ಯಾತಿಯಾಗಿರುವ ಪಿಎಸ್ಎಲ್ವಿ (PSLV), ಇಂದು ಮಧ್ಯಾಹ್ನ ನಡೆದ ತನ್ನ 64ನೇ ಉಡಾವಣೆಯಲ್ಲಿ ಭಾರಿ ಹಿನ್ನಡೆ ಅನುಭವಿಸಿದೆ. 2026ರ ಮೊದಲ ಮಿಷನ್ ಆಗಿದ್ದ ಪಿಎಸ್ಎಲ್ವಿ-ಸಿ62 (PSLV-C62) ಉಡಾವಣೆಯು ತಾಂತ್ರಿಕ ದೋಷದಿಂದಾಗಿ ವಿಫಲವಾಗಿದ್ದು, ಇದರಲ್ಲಿದ್ದ 16 ಉಪಗ್ರಹಗಳು ಬಾಹ್ಯಾಕಾಶದಲ್ಲಿ ನಾಶವಾಗಿವೆ.
ಶ್ರೀಹರಿಕೋಟಾದಿಂದ ಬೆಳಿಗ್ಗೆ 10:17ಕ್ಕೆ ಯಶಸ್ವಿಯಾಗಿ ನಭಕ್ಕೆ ಚಿಮ್ಮಿದ ರಾಕೆಟ್, ಮೊದಲ ಮತ್ತು ಎರಡನೇ ಹಂತಗಳನ್ನು ಯಾವುದೇ ಅಡೆತಡೆಯಿಲ್ಲದೆ ಪೂರೈಸಿತ್ತು. ಆದರೆ, ಉಡಾವಣೆಯಾದ ಎಂಟು ನಿಮಿಷಗಳ ನಂತರ ಮೂರನೇ ಹಂತದಲ್ಲಿ ದಿಢೀರ್ ತಾಂತ್ರಿಕ ವ್ಯತ್ಯಯ ಉಂಟಾಯಿತು.
ದಿಶೆ ಬದಲಿಸಿದ ರಾಕೆಟ್: ಮೂರನೇ ಹಂತದ ಇಂಜಿನ್ ಉರಿಯುವ ಸಂದರ್ಭದಲ್ಲಿ ಅದರ ಒತ್ತಡ ಕಡಿಮೆಯಾದ ಕಾರಣ (Chamber Pressure Drop), ರಾಕೆಟ್ ತನ್ನ ಪಥದಿಂದ (Trajectory) ಹೊರಬಂದು ದಿಶೆ ಬದಲಿಸಿತು.
ಸಂಪರ್ಕ ಕಡಿತ: ಮಿಸೈಲ್ ಕಂಟ್ರೋಲ್ ಸೆಂಟರ್ನ ಟೆಲಿಮೆಟ್ರಿ ಪರದೆಗಳಲ್ಲಿ ಡೇಟಾ ಬರುವುದು ನಿಂತುಹೋದಾಗ ವಿಜ್ಞಾನಿಗಳಲ್ಲಿ ಆತಂಕ ಮೂಡಿತು. ಕೊನೆಗೆ ರಾಕೆಟ್ ನಿಯಂತ್ರಣ ತಪ್ಪಿರುವುದು ದೃಢಪಟ್ಟಿತು.
ನಷ್ಟವಾದ ಉಪಗ್ರಹಗಳ ವಿವರ:
ಈ ಮಿಷನ್ನಲ್ಲಿ ರಕ್ಷಣಾ ಇಲಾಖೆಯ (DRDO) ಅತ್ಯಂತ ಮಹತ್ವದ ಕಣ್ಗಾವಲು ಉಪಗ್ರಹ ‘ಅನ್ವೇಷ’ (Anvesha/EOS-N1) ಸೇರಿದಂತೆ ಒಟ್ಟು 16 ಉಪಗ್ರಹಗಳಿದ್ದವು. ಇವುಗಳಲ್ಲಿ ಭಾರತೀಯ ಸ್ಟಾರ್ಟ್-ಅಪ್ಗಳು, ವಿಶ್ವವಿದ್ಯಾಲಯಗಳ ವಿದ್ಯಾರ್ಥಿಗಳು ತಯಾರಿಸಿದ ಪೇಲೋಡ್ಗಳು ಮತ್ತು ವಿದೇಶಿ ವಾಣಿಜ್ಯ ಉಪಗ್ರಹಗಳೂ ಸೇರಿದ್ದವು. ಎಲ್ಲವೂ ಕಕ್ಷೆ ಸೇರಲಾಗದೆ ಸುಟ್ಟು ಭಸ್ಮವಾಗಿವೆ.
ಇಸ್ರೋ ಅಧ್ಯಕ್ಷರ ಪ್ರತಿಕ್ರಿಯೆ:
ಘಟನೆಯ ನಂತರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಇಸ್ರೋ ಅಧ್ಯಕ್ಷ ವಿ. ನಾರಾಯಣನ್ ಅವರು, “ಮೂರನೇ ಹಂತದ ಕೊನೆಯಲ್ಲಿ ಉಂಟಾದ ಅನಿರೀಕ್ಷಿತ ಅನಿಮೋಲಿಯಿಂದಾಗಿ ರಾಕೆಟ್ ಹಾದಿ ತಪ್ಪಿದೆ. ಈ ಬಗ್ಗೆ ವಿವರವಾದ ವಿಶ್ಲೇಷಣೆ ನಡೆಸಲು ವಿಫಲತಾ ವಿಶ್ಲೇಷಣಾ ಸಮಿತಿಯನ್ನು ರಚಿಸಲಾಗಿದೆ” ಎಂದು ತಿಳಿಸಿದರು.