೨೫ ಒಕ್ಟೊಬರ್ ೨೦೨೬: ’ಡಿಜಿಟಲ್ ಕೊಂಕಣಿ ಪ್ರಸ್ತುತ್ ಆನಿ ಫುಡಾರ್’ ವಿಶ್ಯಾಚೆರ್ ಆಯೋಜಿತ್ ಕೆಲ್ಲೆಂ ಡಿಜಿಟಲ್ ಪರಿಸಂವಾದ್ ಆಶಾವಾದಿ ಪ್ರಕಾಶನಾನ್ ಆಯ್ತಾರಾ (೨೫ ಒಕ್ಟೊಬರ್) ಸಾಂಜೆರ್ ೪ ಥಾವ್ನ್ ೬ ಪರ್ಯಾಂತ್ ಚಲವ್ನ್ ವೆಲೆಂ. ಪ್ರಿಂಟ್ ಪುಸ್ತಕ್, ಇ-ಪುಸ್ತಕ್, ಆ-ಪುಸ್ತಕ್ ಅಶ್ಯಾ ತೀನ್ ಪ್ರಕಾರಾಚಿಂ ಕೊಂಕಣಿ ಪುಸ್ತಕಾಂ ಹಾಂತುಂ ಲೊಕಾರ್ಪಣ್ ಜಾಲಿಂ.
ಡೊ.ಜಯವಂತ ನಾಯಕ್ (ಪ್ರಿನ್ಸಿಪಾಲ್, ಯುನಿವರ್ಸಿಟಿ ಕೊಲೆಜ್ ಮಂಗ್ಳುರ್) ಹಾಣೆಂ ಕಾರ್ಯಾಚೆಂ ಉಗ್ತಾವಣ್ ಕರುನ್, ಡಿಜಿಟಲ್ ಕೊಂಕಣಿ ಶೆತಾಂತ್ ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವ್ನ್ ನಿರಂತರ್ ಜಾವ್ನ್ ವಾವ್ರ್ ಕರುನ್ ಆಸ್ಚ್ಯಾ ಆಶಾವಾದಿ ಪ್ರಕಾಶನಾಚಿ ಥೊಕ್ಣಾಯ್ ಕರುನ್ ಮ್ಹಣಾಲೊ; ’ಡಿಜಿಟಲ್ ಆಮ್ಚೊ ಫುಡಾರ್, ದೆಕುನ್ ಕೊಂಕಣಿ ಸಾಹಿತ್ಯ್ ಸಯ್ತ್ ಡಿಜಿಟಲೀಕರಣ್ ಕರುನ್ ಫುಡ್ಲ್ಯಾ ಜನಾಂಗಾಕ್ ಎಕಾ ನಾ ಎಕಾ ರಿತಿನ್ ಸಲೀಸ್ ಜಾಂವ್ಚೆದಿಶೆನ್ ಆಮಿ ಸರ್ವಾಂನಿ ಎಕ್ವಟಿನ್ ಮನೊಭವಾನ್ ಕಾಮ್ ಕರ್ಚಿ ಗರ್ಜ್ ಆಸಾ’
ವಲ್ಲಿ ಕ್ವಾಡ್ರಸಾನ್ ಪರಿಸಂವಾದಾಚಿ ತಶೆಂಚ್ ಸರ್ವ್ ಸಯ್ರ್ಯಾಂಚಿ ಒಳೊಕ್ ಕರುನ್, ಕೆ.ಬಿ.ಎಸ್. (ಕೊಂಕಣಿ ಬಿಯೊಂಡ್ ಸ್ಕ್ರಿಪ್ಟ್) ಮಿಸಾಂವಾವಿಶಿಂ ಮಾಹೆತ್ ದಿವುನ್ ಮ್ಹಣಾಲೊ; “ಜಶೆಂ ಏಕ್ ದೇಶ್, ಏಕ್ ಭಾಸ್’ ಮ್ಹಳ್ಳೆಂ ಮೂರ್ಖ್‌ಪಣ್‌ಕಿ ತೆಚ್‌ಪರಿಂ ಕೊಂಕಣಿಂತ್ ’ಏಕ್ ಲಿಪಿ, ಏಕ್ ಬೊಲಿ’ ಚಿಂತಪ್ ಸಯ್ತ್ ’ಪಿಶೆಂ ಚಿಂತಪ್’. ಕಿತ್ಯಾಕ್ ಮ್ಹಳ್ಯಾರ್ ಕಾರಣಾಂತರ್ ಆಮಿ ವೆಗ್-ವೆಗಳ್ಯಾ ಪ್ರಾಂತ್ಯಾಂನಿ ಜಿಯೆವ್ನ್ ಆಸಾಂವ್ ದೆಕುನ್ ಪ್ರಾಂತೀಯ್ ಭಾಸ್, ಲಿಪಿ ವ್ಹಾಪಾರ್ನ್ ಆಮಿ ಕೊಂಕಣಿ ಬರಯ್ತಾಂವ್, ವಾಚ್ತಾಂವ್. ಅಶೆಂ ಆಸ್ತಾನಾ ಎಕ್ಲ್ಯಾನ್ ಸರ್ವ್ ಲಿಪಿ/ಬೊಲಿ ಶಿಕ್ಚೆಂ ಅಸಂಭವ್. ಪುಣ್ ಕೊಂಕಣಿಂತ್ ಹ್ಯಾ ಸರ್ವ್ ಲಿಪಿಂಕ್ ತಶೆಂಚ್ ಬೊಲಿಂಕ್ ಏಕ್ ಸಮಾನ್ ಮಾನ್-ಸಮ್ಮಾನ್ ಮೆಳುಂಕ್ ಫಾವೊ. ತ್ಯಾ ದಿಶೆನ್ ’ಲಿಪ್ಯಂತರಣ್’ ಏಕ್ ಭೋವ್ ಗರ್ಜೆಚೆಂ ಪುಣ್ ಭೋವ್ ಸಂಕಷ್ಟಾಚೆಂ ಮಿಸಾಂವ್. ಹ್ಯಾ ಮಿಸಾಂವಾಂತ್ ಧರ್ಮ್/ಜಾತ್/ಲಿಪಿ/ಬೊಲಿ/ಪ್ರಾಂತ್ಯ್ ವಾ ಕಸಲೆಚ್ ದೊರೆ ನಾಸ್ತಾನಾ ಫಕತ್ ಲಿಪ್ಯಂತರಣಾಚೆಂ ಕಾಮ್ ಆಶಾವಾದಿ ಪ್ರಕಾಶನಾನ್ ಹಾತಿಂ ಘೆತ್ಲಾಂ. ಸಮಾನ್ ಚಿಂತ್ಪಾಚೆ ಹೆರ್ ವೆಕ್ತಿ ತಶೆಂಚ್ ಸಂಸ್ಥೆ ಹ್ಯಾ ಮಿಸಾಂವಾಂತ್ ಜೊಡ್ಲ್ಯಾತ್. ಆನಿ ಹ್ಯಾ ಮಿಸಾಂವಾ ನಿಮ್ತಿಂ ಎದೊಳ್‌ಚ್ ಪಾಂಚ್ ಪ್ರಿಂಟ್ ಪುಸ್ತಕಾಂ, ದೋನ್ ಡಿಜಿಟಲ್ ಇ-ಪುಸ್ತಕಾಂ, ತೀನ್ ಆ-ಪುಸ್ತಕಾಂ, ಏಕ್ ವಿ-ಪುಸ್ತಕ್ ಲೊಕಾರ್ಪಣ್ ಜಾಲಾಂ. ಹೆಂ ಮಿಸಾಂವ್ ಅಶೆಂಚ್ ಫುಡೆಂ ವತಲೆಂ” ಅಶೆಂ ಮ್ಹಣಾಲೊ.
ಲಾರೆನ್ಸ್ ವಿ. ಬರ್ಬೋಜ್ ಮ್ಯಾಂಚೆಸ್ಟರ್ ಹಾಣೆಂ “ಗೋಲಿಮಾರ್‌ಚ್ಯೊ ಕಥಾ, ಅಲ್ಗೊರಿದಮಾಚ್ಯಾ ವಿಶ್ವಾಂತ್, ಮೊನಿಕಾ ಡೆಸಾ ಮಥಾಯಸಾಚ್ಯೊ ಕಥಾ’ ಹ್ಯಾ ತೀನ್ ಪುಸ್ತಕಾಂಚಿ ತಶೆಂಚ್ ಬರವ್ಪ್ಯಾಂಚಿ; ಡೊ.ಎಡ್ವರ್ಡ್ ಎಲ್. ನಜ್ರೆತ್, ಮೊನಿಕಾ ಡೆಸಾ ಮಥಾಯಸ್ ಹಾಂಚಿ ಮೋಟ್ವ್ಯಾನ್ ಒಳೊಕ್ ಕರುನ್ ದಿಲಿ. ಗೋಕುಲ್‌ದಾಸ್ ಪ್ರಭುನ್ ಡೋ.ಎಡ್ವರ್ಡ್ ಎಲ್, ನಜ್ರೆತಾಚೆಂ ನಾಗರಿ ಲಿಪಿಂತ್ಲೆಂ ದುಸ್ರೆಂ ಪ್ರಿಂಟ್ ಪುಸ್ತಕ್ ’ಗೋಲಿಮಾರ್‌ಚ್ಯೊ ಕಥಾ’ ಕಥಾಸಂಗ್ರಹ್ ಲೊಕಾರ್ಪಣ್ ಕರುನ್ ಅಪ್ಲ್ಯಾ ಪ್ರಮುಕ್ ಉಲವ್ಪಾಂತ್ “ಕೊಂಕಣಿ ಸಾಹಿತ್ಯ್ ಡಿಜಿಟಲ್ ಮಾಧ್ಯಮಾಚೆರ್ ಹಾಡುಂಕ್ ಗೊಂಯಾಂತ್, ಕರ್ನಾಟಕಾಂತ್, ಮಹಾರಾಷ್ಟ್ರಾಂತ್ ತಶೆಂಚ್ ಕೇರಳಾಂತ್ ಥೊಡಿಂ ವಾವ್ರ್ ಕರುನ್ ಆಸಾತ್. ಹಿ ಆಯ್ಚಿ ಗರ್ಜ್ ಜಾವ್ನಾಸಾ. ಹ್ಯಾ ದಿಶೆನ್ ಆಶಾವಾದಿ ಪ್ರಕಾಶನಾನ್ ಸಭಾರ್ ವರ್ಸಾಂನಿ ಕೆಲ್ಲೆ ಪ್ರಯೋಗ್ ಖರೆಚ್ ಜಾವ್ನ್ ಥೊಕ್ಣಾಯೆಕ್ ಫಾವೊ ಜಾಲ್ಲೆ. ೬೨ ಡಿಜಿಟಲ್ ಇ-ಪುಸ್ತಕಾಂ, ೧೬ ಆ-ಪುಸ್ತಕಾಂ, ತಶೆಂಚ್ ಪನ್ನಾಸಾಂ ವಯ್ರ್ ವೆಬಿನಾರಾಂನಿ ಕೊಂಕಣಿ ಸಾಹಿತ್ಯ್ ಅಧ್ಯಯನ್ ಸಯ್ತ್ ಚಲಂವ್ಚೆಂ ಮಿಸಾಂವ್ ಸೊಂಪೆಂ ನ್ಹಯ್. ಹ್ಯಾ ಡಿಜಿಟಲ್ ಯುಗಾಂತ್ ಕೃತಿಮ್ ಭುಧ್ವಂತ್ಕಾಯ್, ಕಿಂಡೆಲ್, ಅಸಲ್ಯಾ ಸಾಹೆತ್/ಮಾಧ್ಯಮಾಂಚೊ ತೆಂಕೊ ಘೆವ್ನ್ ಕೊಂಕಣಿ ಸಾಹಿತ್ಯಾಚೆಂ ಡಿಜಿಟಲೀಕರಣ್ ಜಾಲೆಂ ತರ್, ತೆಂ ಕೊಂಕಣಿಕ್ ಭೋವ್ ಉಪ್ಕಾರಾಕ್ ಪಡ್ತೆಲೆಂ. ಆ-ಪುಸ್ತಕಾಕ್ ಲಿಪಿಚಿಚ್ ಗರ್ಜ್ ನಾ, ತಶೆಂಚ್ ವಿ-ಪುಸ್ತಕಾಂತ್ ಆಮಿ ಆಯ್ಕೊಂಕ್ ಆನಿ ಪಳೆಂವ್ಕ್ ಸಕ್ತಾಂವ್ ಜಾಲ್ಲ್ಯಾನ್ ಆಮ್ಚ್ಯಾ ಮೊಬಾಯ್ಲಾಂನಿ ಸಯ್ತ್ ಕೊಂಕಣಿ ಹಾಡುಂಕ್, ಎಕಾಮೆಕಾ ವಾಂಟುಂಕ್, ಸಮಾಜಿಕ್ ಮಾಧ್ಯಮಾಂನಿ ಪ್ರಚಾರ್ ಕರುಂಕ್ ಮಜತ್‌ಗಾರ್ ಜಾತಲೆಂ” ಅಶೆಂ ಮ್ಹಣಾಲೊ.
ಡೊ.ಎಡ್ವರ್ಡ್ ಎಲ್. ನಜ್ರೆತ್ ಅಪ್ಲ್ಯಾ ಸಂಧೆಶಾಂತ್ ಮ್ಹಣಾಲೊ; “ಕಥಾಕಾರ್ ಜಾವ್ನ್ ಹಾಂವ್ ಏಕ್ ಕಥಾ ಬರಯ್ತಾನಾ ಮ್ಹಜ್ಯಾ ಭಂವ್ತೊಣಿಚೆಂ ಪರಿಸರ್, ಮನ್ಶಾಂ, ಭಗ್ಣಾಂ ಮಾತ್ರ್ ವಿಂಚ್ತಾಂ ಶಿವಾಯ್, ಕಸಲ್ಯಾಚ್ ತಾತ್ವಿಕ್ ಚಿಂತ್ಪಾಕ್ ಪ್ರತಿನಿಧಿತ್ವ್ ಕರ್ಚ್ಯಾ ದಿಶೆನ್ ಬರಯ್ನಾಂ, ಪುಣ್ ಮ್ಹಜ್ಯಾ ಹ್ಯಾ ಕಥೆಂನಿ ಆಸ್ಚಿ ತಾತ್ವಿಕತಾ ಕಥಾ ಅಧ್ಯಯನ್ ಕರ್ತೆಲ್ಯಾಂನಿ ಪಳೆಲ್ಯಾ ಆನಿ ಪಾರ್ಕಿಲ್ಯಾ ಮ್ಹಳ್ಳೆಂ ತಾಂಚಿಂ ಪ್ರಪತ್ರಾಂ ವಾಚ್ತಾನಾ ಗಮ್ತಾ. ಎಕಾ ಕಥಾಕಾರಾಕ್ ಪಯ್ಲಿ ಆಧ್ಯತಾ ತಾಚೊ ವಾಚ್ಪಿ. ತೊ ಖಂಚ್ಯಾಯ್ ಪ್ರಾಂತ್ಯಾಂತ್ ಆಸೊಂದಿ ವಾ ಖಂಚ್ಯಾಯ್ ಲಿಪಿಂತ್ ಆಸೊಂದಿ. ಮೂಳ್ ಕನ್ನಡ ಲಿಇಂತ್ಲ್ಯೊ ಮ್ಹಜ್ಯೊ ಕಥಾ ನಾಗರಿ ಲಿಪಿಂತ್ ಲಿಪ್ಯಂತರಣ್ ಕೆಲ್ಲ್ಯಾ ಮಿತ್ರ್ ವಲ್ಲಿ ಕ್ವಾಡ್ರಸಾಚ್ಯಾ ಮಿನತೆಚೊ ಫಳ್ ಜಾವ್ನ್ ಕನ್ನಡ ಲಿಪಿ ವಾಚುಂಕ್ ಕಳಿತ್ ನಾತ್ಲ್ಯಾಂಕ್ ಮ್ಹಜ್ಯೊ ಕಥಾ ಪಾವಿತ್ ಕೆಲ್ಲೆವರ್ವಿಂ ಲಾಭ್ಲಲಿ ತೃಪ್ತಿ ಖಂಚ್ಯಾಯ್ ಪುರಸ್ಕಾರಾಚ್ಯಾಕೀ ವರ್ತೆಂ. ಆಜ್ ನಾಗರಿ ಲಿಪಿಂತ್ಲೆಂ ಮ್ಹಜೆಂ ದುಸ್ರೆಂ ಪುಸ್ತಕ್ ಲೊಕಾರ್ಪಣ್ ಜಾಲೆಂ. ಹ್ಯಾ ಪಾಸತ್ ಆಶಾವಾದಿ ಪ್ರಕಾಶನಾಕ್ ಧಿನ್ವಾಸ್”.
ಡೊ.ಆಸ್ಟಿನ್ ಡಿಸೋಜ್ ಪ್ರಭುನ್ ’ಮೊನಿಕಾ ಡೆಸಾ ಮಥಾಯಸಾಚ್ಯೊ ಕಥಾ’ ನಾಂವಾಚೆಂ ಆಶಾವಾದಿ ಪ್ರಕಾಶನಾಚೆಂ ೧೬ವೆಂ ಆ-ಪುಸ್ತಕ್ ಲೊಕಾರ್ಪಣ್ ಕರುನ್ ಅಪ್ಲ್ಯಾ ಸಂಧೇಶಾಂತ್ ಮ್ಹಣಾಲೊ; “ಮೊನಿಕಾ ಡೆಸಾ ಮಥಾಯಸ್ ಡಬ್ಲಿನಾಂತ್ ಕಾಮ್ ಕರ್ನ್ ಆಸಾ ಪುಣ್ ಪಾಟ್ಲ್ಯಾ ಕಾಂಯ್ ತೆಂಪಾಂನಿ ಕೊಂಕಣಿ ಸಾಹಿತ್ಯಾಂತ್ ಉಂಚ್ಲೆಂ ನಾಂವ್ ಜೊಡ್ಲಾಂ. ಕೊಂಕಣಿ ಕಾಣಿಯಾಂಚಿ ತಿ ರಾಣಿ ಕಶಿ ಸೊಭ್ತಾ. ಡಿಜಿಟಲ್ ಕೊಂಕಣಿಂತ್ ಆಶಾವಾದಿ ಪ್ರಕಾಶನ್ ವೆಳಾಕಾಳಾನುಸಾರ್ ವೆವೆಗ್ಳೆ ಪ್ರಯೋಗ್ ಕರುನ್ ತಾಚೊ ಸಗ್ಳೊ ಫಾಯ್ದೊ ಕೊಂಕಣಿಕ್ ಲಾಭಾಶೆಂ ಕರ್ತಾ. ಹ್ಯಾ ಮಿಸಾಂವಾಕ್ ಆಮಿ ಸರ್ವಾಂನಿ ತೆಂಕೊ ದಿಂವ್ಚಿ ಗರ್ಜ್ ಆಸಾ. ಆಮಿಂ ಹೆಂ ಡಿಜೀಟಲ್ ಸಾಹಿತ್ಯ್ ಎಕಾಮೆಕಾ ವಾಂಟುಂಕ್ ಸಕ್ತಾಂವ್. ದೆಕುನ್ ಹ್ಯಾ ಮಿಸಾಂವಾಂತ್ ಚಡಿತ್ ಆನಿ ಚಡಿತ್ ಲೊಕಾಂನಿ ಜೊಡ್ಚಿ ಗರ್ಜ್ ಆಸಾ”.
ಶರತ್‌ಚಂದ್ರ ಶೆಣಯ್ ಕೊಚಿನ್ (ಸಂಪಾದಕ್, ದಿಶಾ ಡಿಜಿಟಲ್ ನೆಮಾಳೆಂ) ಹಾಣೆಂ ಶೈಲೆಂದ್ರ ಮೆಹ್ತಾಚ್ಯಾ ಕನ್ನಡ ಲಿಪಿಂತ್ಲ್ಯಾ ’ಅಲ್ಗೋರಿದಮಾಚ್ಯಾ ವಿಶ್ವಾಂತ್’ ಇ-ಪುಸ್ತಕಾಚೆಂ ಲೊಕಾರ್ಪಣ್ ಕರುನ್ “ಡಿಜಿಟಲ್ ಕೊಂಕಣಿಂತ್ ಕೇರಳಾಂತ್ ಬಾಯ್ ಅಂಜಲಿ ಕಿಣಿ, ಬಾಲಕೃಷ್ಣ ಮಲ್ಲ್ಯ, ಆನಿ ಹೆರಾಂ ವೆವೆಗ್ಳೆ ಪ್ರಯೋಗ್ ಕರುನ್ ಆಸಾತ್ ಆನಿ ಅಶೆಂಚ್ ಕಿಂಡೆಲ್, ಫ್ಲಿಪ್‌ಬುಕ್, ಇ-ಪಬ್ ಅಶೆಂ ವೆವೆಗ್ಳಿಂ ಮಾಧ್ಯಮಾಂ ವಾಪಾರ್ನ್ ಆಮಿ ಕೊಂಕಣಿ ಸಾಹಿತ್ಯಾಕ್ ಚಡಿತ್ ಲೊಕಾಕ್ ಪಾವಿತ್ ಜಾಂವ್ಚೆಪರಿಂ ಕರ್ಚೆಂ ಸೂಕ್ತ್. ಡಿಜಿಟಲ್ ಕೊಂಕಣಿ ಶೆತಾಂತ್ ಆಶಾವಾದಿ ಪ್ರಕಾಶನ್ ಪಾಟ್ಲ್ಯಾ ಸಭಾರ್ ವರ್ಸಾಂನಿ ಕೆಲ್ಲೊ ವಾವ್ರ್ ಆಮ್ಕಾಂ ಸರ್ವಾಂಕ್ ಪ್ರೇರಿತ್ ಜಾವ್ನಾಸಾ ದೆಕುನ್ ಹೊ ವಾವ್ರ್ ಮೊಟ್ಯಾ ಪ್ರಮಾಣಾಂತ್ ಜಾಂವ್ – ಅಶೆಂ ಮಾಗ್ತಾಂ” ಮ್ಹಣಾಲೊ.
ಡೊ.ನಿತಿನ್ ಬೊರ್ಕರ್ ಹಾಣೆಂ ಅಪ್ಲ್ಯಾ ಸಂಧೆಶಾಂತ್ “ಡಿಜಿಟಲ್ ಶೆತಾಂತ್ ಹಾಂವ್ ಪಾಟ್ಲ್ಯಾ ವೀಸ್-ಪಂಚ್ವಿಸ್ ವರ್ಸಾಂನಿ ಕಾಮ್ ಕರುನ್ ಆಸಾಂ, ಪುಣ್ ಕೊಂಕಣಿಂತ್ ಸಯ್ತ್ ಹಾಚೊ ಫಾಯ್ದೊ ಪಾವಂವ್ಚೆ ದಿಶೆನ್ ಪಾಟ್ಲ್ಯಾ ಥೊಡ್ಯಾ ತೆಂಪಾಂತ್ ಶೆಣಯ್ ಗೊಂಯ್‌ಬಾಬ್, ಉದಯ್ ಭೆಂಬ್ರೆ, ಮಾಧವ್ ಬೊರ್ಕರ್, ಶಂಕರ್ ರಮಣಿ, लक्ष्मिदास कृष्ण बोरकार आनि हेरांचें सग्ळें साहित्य डिजिटल माध्यमाचेर येंव्चें काम करुन आसां. पुण आशावादि प्रकाशनाचें एद्या मोट्याप्रमाणांत जाल्लें काम पळेव्न म्हाकाच अज्याप जाता. डिजिटल कोंकणिंत कन्नड लिपिंत सय्त असलो वाव्र जांव्चो हांवें पळेंव्चें पय्लेपाव्टिं. म्हाका ह्या वेबिनारांत आपोव्णें पाटव्न म्हाका हि सम्जणि लाभाशें केल्ल्या आशावादि प्रकाशनाक धिन्वास. आमि सर्वांनि एक्वटित जाव्न एकामेकाचो हात धरुन कोंकणिक डिजिटल माध्यमाचेर हाड्चें काम भळान कर्चि गर्ज आसा” म्हणालो.
ಡೊ.ನಿತಿನ್ ಬೊರ್ಕರ್ ಹಾಣೆಂ ಅಪ್ಲ್ಯಾ ಸಂಧೆಶಾಂತ್ “ಡಿಜಿಟಲ್ ಶೆತಾಂತ್ ಹಾಂವ್ ಪಾಟ್ಲ್ಯಾ ವೀಸ್-ಪಂಚ್ವಿಸ್ ವರ್ಸಾಂನಿ ಕಾಮ್ ಕರುನ್ ಆಸಾಂ, ಪುಣ್ ಕೊಂಕಣಿಂತ್ ಸಯ್ತ್ ಹಾಚೊ ಫಾಯ್ದೊ ಪಾವಂವ್ಚೆ ದಿಶೆನ್ ಪಾಟ್ಲ್ಯಾ ಥೊಡ್ಯಾ ತೆಂಪಾಂತ್ ಶೆಣಯ್ ಗೊಂಯ್‌ಬಾಬ್, ಉದಯ್ ಭೆಂಬ್ರೆ, ಮಾಧವ್ ಬೊರ್ಕರ್, ಶಂಕರ್ ರಮಣಿ, ಲಕ್ಷ್ಮಿದಾಸ್ ಕೃಷ್ಣ ಬೊರಕಾರ್ ಆನಿ ಹೆರಾಂಚೆಂ ಸಗ್ಳೆಂ ಸಾಹಿತ್ಯ್ ಡಿಜಿಟಲ್ ಮಾಧ್ಯಮಾಚೆರ್ ಯೆಂವ್ಚೆಂ ಕಾಮ್ ಕರುನ್ ಆಸಾಂ. ಪುಣ್ ಆಶಾವಾದಿ ಪ್ರಕಾಶನಾಚೆಂ ಎದ್ಯಾ ಮೊಟ್ಯಾಪ್ರಮಾಣಾಂತ್ ಜಾಲ್ಲೆಂ ಕಾಮ್ ಪಳೆವ್ನ್ ಮ್ಹಾಕಾಚ್ ಅಜ್ಯಾಪ್ ಜಾತಾ. ಡಿಜಿಟಲ್ ಕೊಂಕಣಿಂತ್ ಕನ್ನಡ ಲಿಪಿಂತ್ ಸಯ್ತ್ ಅಸಲೊ ವಾವ್ರ್ ಜಾಂವ್ಚೊ ಹಾಂವೆಂ ಪಳೆಂವ್ಚೆಂ ಪಯ್ಲೆಪಾವ್ಟಿಂ. ಮ್ಹಾಕಾ ಹ್ಯಾ ವೆಬಿನಾರಾಂತ್ ಆಪೊವ್ಣೆಂ ಪಾಟವ್ನ್ ಮ್ಹಾಕಾ ಹಿ ಸಮ್ಜಣಿ ಲಾಭಾಶೆಂ ಕೆಲ್ಲ್ಯಾ ಆಶಾವಾದಿ ಪ್ರಕಾಶನಾಕ್ ಧಿನ್ವಾಸ್. ಆಮಿ ಸರ್ವಾಂನಿ ಎಕ್ವಟಿತ್ ಜಾವ್ನ್ ಎಕಾಮೆಕಾಚೊ ಹಾತ್ ಧರುನ್ ಕೊಂಕಣಿಕ್ ಡಿಜಿಟಲ್ ಮಾಧ್ಯಮಾಚೆರ್ ಹಾಡ್ಚೆಂ ಕಾಮ್ ಭಳಾನ್ ಕರ್ಚಿ ಗರ್ಜ್ ಆಸಾ” ಮ್ಹಣಾಲೊ.
ಕೆ.ಬಿ.ಎಸ್. ನಿರ್ದೇಶನ್ ಸಮಿತಿಚಿ ಬಾಯ್ ಅಂಜು ಸಾಖರ್‌ದಾಂಡೆನ್ ಅಪ್ಲ್ಯಾ ಉಲವ್ಪಾಂತ್ “ಜಶೆಂ ಕೊಂಕಣಿಂತ್ ಸಾಂಗ್ಣಿ ಆಸಾ ಪೆಳಾ ಪರ್ಮಾಣೆ ಮಾತ್ಯಾಕ್ ಕುರ್ಪಣೆ, ತೆಚ್‌ಪರಿಂ ಡಿಜಿಟಲ್ ಆಯ್ಚಿ ಆನಿ ಫುಡಾರಾಚಿ ಗರ್ಜ್ ಸಮ್ಜೊನ್ ಧೆಂಪೆ ಕೊಲೆಜಿನ್ ಹ್ಯಾ ದಿಶೆನ್ ಕೊಲೆಜಿಚ್ಯಾ ಸಿಲೆಬಸಾಂತ್ ಸಯ್ತ್ ವಿಧ್ಯಾರ್ಥಿಂಕ್ ವೆವೆಗ್ಳ್ಯಾ ಕೃತಿಮ್ ಭುಧ್ವಂತ್ಕಾಯೆಚಿಂ ಮಾಧ್ಯಮಾಂ ಆನಿ ಸಾಹೆತಾಂಚೆ ತರ್ಭೆತ್ ದಿಂವ್ಚೆಂ ಕಾಮ್ ಯೆದೊಳ್‌ಚ್ ಸುರು ಕೆಲಾಂ. ಬಾಬ್ ವಲ್ಲಿ ಕ್ವಾಡ್ರಸ್ ಸಯ್ತ್ ಹಾಂತುಂ ವಾಂಟೆಲಿ ಜಾವ್ನಾಸಾ. ಆಮಿಂ ಕೆ. ಬಿ. ಎಸ್. ಮಿಸಾಂವಾಂ ಮುಖಾಂತ್ರ್ ಕೊಂಕಣಿ ಸಾಹಿತ್ಯಾಕ್ ಡಿಜಿಟಲೀಕರಣ್ ಕರ್ಚೆಂ ಕಾಮ್ ಚಾಲುಚ್ ದವರ್ತಾಂವ್. ಹೆಂ ಅಶೆಂಚ್ ಮುಕಾರ್ ವೆಚಿ ಗರ್ಜ್ ಆಸಾ” ಮ್ಹಣಾಲಿ.
ಕೆ.ಬಿ.ಎಸ್. ನಿರ್ದೇಶನ್ ಸಮಿತಿಚಿ ಡೊ.ಚಂದ್ರಲೇಖ ಡಿಸೋಜಾನ್ ಅಪ್ಲ್ಯಾ ಉಲವ್ಪಾಂತ್ “ಧೆಂಪೆ ಕೊಲೆಜಿನ್ ಡಿಜಿಟಲ್ ಕೊಂಕಣಿಕ್ ಶಿಕಂವ್ಚಾಕ್ ಘೆತ್ಲಲೆಂ ಏಕ್ ಪ್ರಗತಿಶೀಲ್ ಮೇಟ್ ಜಾವ್ನಾಸಾ. ಹೆರ್ ಕೊಲೆಜಿಂನಿ ಸಯ್ತ್ ಹ್ಯಾ ದಿಶೆನ್ ವೆಚಿ ಗರ್ಜ್ ಆಸಾ.” ಮ್ಹಣಾಲಿ.
ಗೋವಿಂದ್ ಮೊಪಕಾರ್ ಹಾಣೆಂ “ಕೊಂಕಣಿಕ್ ಡಿಜಿಟಲ್ ಮಾಧ್ಯಮಾಚೆರ್ ಚಡಿತ್ ಮಾಪಾನ್ ತಾಂತ್ರಿಕ್ ಸಕ್ತೆಚೊ ತೆಂಕೆ ಲಾಭ್ಚೆದಿಶೆನ್ ಜಾಯ್ತಿ ತರ್ನಾಟಿಂ ಕಾಮ್ ಕರ್ನ್ ಆಸಾತ್, ಆಶಾವಾದಿ ಪ್ರಕಾಶನಾಚ್ಯಾ ಸಮಗ್ರ್ ಡಿಜಿಟಲ್ ವಾವ್ರಾಚಿ ಮಾಹೆತ್ ಲಾಭ್ಲಿ, ತಿ ಖರಿಚ್ ಕೊಂಕಣಿಕ್ ಉಪ್ಕಾರಾಕ್ ಪಡ್ಚೆತಸಲಿ.” ಅಶೆಂ ಮ್ಹಣಾಲೊ.
ಶೈಲೆಂದ್ರ ಮೆಹ್ತಾನ್ ’ಅಲ್ಗೊರಿದಮಾಚ್ಯಾ ವಿಶ್ವಾಂತ್’ ಪುಸ್ತಕ್ ಮ್ಹಜೆಂ ತಿಸ್ರೆಂ ಕವಿತೆಚೆಂ ಪುಸ್ತಕ್, ತಶೆಂಚ್ ಕನ್ನಡ ಲಿಪಿಂತ್ ಲಿಪ್ಯಂತರಣ್ ಜಾಂವ್ಚೆಂ ತಿಸ್ರೆಂ ಪುಸ್ತಕ್. ಮ್ಹಜ್ಯಾ ಆಧ್ಲ್ಯಾ ಲಿಪ್ಯಂತರಣ್ ಪುಸ್ತಕಾಕ್ ಪುರಸ್ಕಾರ್ ಸಯ್ತ್ ಲಾಭ್ಲಾ. ಆಮಿ ಲಿಪಿಚೆ ದೊರೆ ಮೊಡುನ್ ಕೊಂಕಣಿಕ್ ’ಅಪ್ಲಿ ಭಾಸ್’ ಕರ್ಚಿ ಗರ್ಜ್ ಆಸಾ. ಡಿಜಿಟಲ್ ಮಾಧ್ಯಮ್ ಆನಿ ತಾಂತ್ರಿಕತಾ ಆಮ್ಕಾಂ ತೆಂಕೊ ಲಾಭಾಶೆಂ ಕರ್ತಾ. ಆನಿ ಹಾಚೊ ಫಾಯ್ದೊ ಆಮಿ ಜೊಡ್ಚೊ. ಕವಿತೆಚಿಂ ಅಲ್ಗೋರಿದಮಾಂತ್ ಕಶೆಂ ಕವಿತಾ ಬರಂವ್ಕ್ ಚಿಂತ್ಪಾಚೆಂ ಪ್ರಮಾಣ್ ಆನಿ ಚಿಂತ್ಪಾಚೆಂ ಅಲ್ಗೊರಿದಮ್ ಕಿತ್ಯಾಕ್ ಗರ್ಜೆಚೆಂ ಮ್ಹಳ್ಳ್ಯಾಚೆರ್ ಆಸಾ. ಕನ್ನಡ ಲಿಪಿಂತ್ ಸಯ್ತ್ ಜಾಯ್ತ್ಯೊ ಕವಿತಾ ಹಾಂವೆಂ ವಾಚ್ಲ್ಯಾತ್ ಆಯ್ಲೆವಾರ್ ’ಆಂಡ್ರ್ಯೂ ಎ; ಡಿಕುನ್ಹಾಚ್ಯೊ ಕವಿತಾ’ ಸಯ್ತ್ ವಾಚುನ್, ಕನ್ನಡ ಲಿಪಿಂತ್ ಆಸ್ಚೆಂ ಉತ್ಕೃಷ್ಟ್ ಸಾಹಿತ್ಯ್ ಸಮ್ಜೊಂಕ್ ಸಕ್ಲೊಂ. ದೆಕುನ್ ಸರ್ವ್ ಲಿಪಿಂಚೆಂ ಉಂಚ್ಲೆಂ ಸಾಹಿತ್ಯ್ ಆಮಿ ಆಪ್ಣಾಂವ್ಕ್ ಜಾಯ್” ಅಶೆಂ ಮ್ಹಣಾಲೊ.
ವಲ್ಲಿ ಕ್ವಾಡ್ರಸಾನ್ ಧಿನ್ವಾಸ್ ಪಾಠಯ್ಲೆ.
