ಕುಂದಾಪುರ್, ಅ.28: ಕುಂದಾಪುರ್ ರೊಜಾರ್ ಮಾಯೆಚಾ ಫಿರ್ಗಜೆಂತ್ ಸಾಂ.ಫ್ರಾನ್ಸಿಸ್ ಅಸಿಸ್ಸಿಚೆ ಫೆಸ್ತ್ ಆಚರಣ್ ಭಕ್ತಿನ್ ಆನಿ ಗದ್ದಾಳಾಯೆನ್ ಕುಂದಾಪುರ್ ರೊಜಾರ್ ಮಾಯೆಚ್ಯಾ ಘಟಕಾನ್ ಆಚರಣ್ ಕೆಲೆಂ. ಕುಂದಾಪುರ್ ವಾರಾಡ್ಯಾಚೊ ವಿಗಾರ್‍ವಾರ್ ಭೋ|ಮಾ|ಮಾ|ಬಾಪ್ ಸ್ಟ್ಯಾನಿ ತಾವ್ರೊ ಹಾಣಿ ಪವಿತ್ರ್ ಬಲಿದಾನ್ ಭೆಟಯ್ಲೆ. ಸಾಂ.ಫ್ರಾನ್ಸಿಸ್ ಅಸಿಸ್ಸಿ ಮೇಳಾಚೊ ಅತ್ಮಿಕ್ ನಿರ್ದೆಶಕ್ ಮಾ|ಬಾ|ಜೊಕೀಮ್ ಡಿಸೋಜಾ ಹಾಣಿ ದೆವಾಚೆ ಉತರ್ ಮೊಡ್ನ್ “ಸಾಂತ್ ಫ್ರಾನ್ಸಿಸ್ ಅಸಿಸ್ಸಿ, ಝುಜಾರಿ ತಾಕಾ ದೆವಾನ್ ಆಪ್ಲ್ಯಾ ಮಿಸಾವಾಂಕ್ ಆಪಯ್ಲೊ. ತೊ ಸಂಗೀತ್‍ಗಾರ್ ಜಾವ್ನಾಸೊನ್, ಲೊಕಾಮೊಗಾಳ್ ಜಾವ್ನಾಸ್ಲೊ, ತೊ ವರ್ತೊ ಭಿರ್ಮೊತಿಚೊ ಮನಿಸ್, ಚೊರಾಂಕ್ ಲುಟ್ಕಾರಾಂಚೆರ್‍ಯಿ ಭಿರ್ಮೊತ್ ಪಾವ್ಲೊ ಮನಿಸ್, ಮನ್ಶ್ಯಾಂಕ್ ಮಾತ್ರ್ ನ್ಹಯ್ ಮನ್ಜಾತ್, ಸುಕ್ಣಿ ಸೌವ್ಜಾಂಚೆರ್‍ಯಿ ಭಿರ್ಮೊತ್ ಪಾಂವ್ಚೊ ಅಪ್ರೂಪ್ ಸಾಂತ್, ಶಾಂತಿಚ್ಯಾ ದೂತಾ ಬರಿ’ ಮ್ಹಣ್ತಾಂ. “ಸಾಂತ್ ಫ್ರಾನ್ಸಿಸ್ ಅಸಿಸ್ಸಿ ವಿಶ್ಯಾಂತ್ ವಿವರ್ ತಾಣಿ ದಿವ್ನ್ ಸಂದೇಶ್ ದಿಲೊ.ಕುಂದಾಪುರ್ ಫಿರ್ಗಜೆಚೊ ಸಹಾಯಕ್ ಯಾಜಕ್ ಮಾ|ಬಾ|ಅಶ್ವಿ ಆರಾನ್ನಾ ಹಾಣಿ ಸಹಬಲಿದಾನ್ ಭೆಟಯ್ಲೆ.
ಬಲಿದಾನ ವೇಳಾರ್ ನವ್ಯಾ ಸಾಂದ್ಯಾಕ್ ಮೆಳಾಂತ್ ಸಮರ್ಪಣ್ ಕರ್ನ್ ತಾಂಕಾ ಫಿಂತ್, ಪವಿತ್ರ್ ಪುಸ್ತಕ್ ಜಳ್ಚಿ ವಾತ್ ದಿಂವ್ನ್ ಸಂಸ್ಕಾರ್ಣಿ ಕೆಲಿ.
ಸಭಾ ಕಾರ್ಯಕ್ರಮಾಂತ್ ಬಂಧೆಂತ್ ಆಸ್ಲೊ ಪಾರ್ವೊ ಉಬಾವ್ನ್ ಸೈರ್ಯಾನಿ ಸಭಾ ಕಾರ್ಯಕ್ರಮ್ ಉದ್ಘಾಟನ್ ಕೆಲೆಂ. ಕುಂದಾಪುರ್ ಫಿರ್ಗಜ್ ಘಟಕಾಚಿ ಅಧ್ಯಕ್ಷಿಣ್ ಡಾ|ಸೋನಿ ಡಿಕೋಸ್ತಾನ್ ಸ್ವಾಗತ್ ಮಾಗ್ಲೊ. ವಾರಾಡ್ಯಾಚೊ ಅಧ್ಯಕ್ಷ್ ಬಾಸಿಲ್ ಡಿಸೋಜಾನ್ ಫುಲಾಂ ದೀಂವ್ ಸಾಂಗಾತ್ ದಿಲೊ. ಅತ್ಮಿಕ್ ನಿರ್ದೇಶಕ್ ಮಾ|ಬಾ|ಜೊಕೀಮ್ ಡಿಸೋಜಾ, ಕುಂದಾಪುರ್ ಕೊವೆಂತಾಚಿ ವ್ಹಡಿಲ್ನ್ ಭಯ್ಣ್ ಸುಪ್ರಿಯಾ, ಕುಂದಾಪುರ್ ಫಿರ್ಗಜೆಚಿ ಉಪಾಧ್ಯಕ್ಷಿಣ್ ಶಾಲೆಟ್ ರೆಬೆಲ್ಲೊ ಹಾಣಿ ಸಂದೇಶ್ ದಿಲೊ. ಕುಂದಾಪುರ್ ವಾರಾಡ್ಯಾಚಾ 11 ಫಿರ್ಗಜ್ ಘಟಕಾನಿ ಹಾಂತುನ್ ವಾಂಟೊ ಘೆತ್ಲೊ.
ಕಾರ್ಯಕ್ರಮಾಚೊ ಅಧ್ಯಕ್ಷ್ ಕುಂದಾಪುರ್ ಫಿರ್ಗಜೆಚೊ ವಿಗಾರ್, ಕುಂದಾಪುರ್ ವಾರಾಡ್ಯಾಚೊ ವಿಗಾರ್‍ವಾರ್ “ಮ್ಹಾಕಾ ಭೋವ್ ಚಡ್ ಮೊಗಾಚ್ಯಾ ಸಾಂತಾ ಮಧ್ಲೊ ಏಕ್ಲೊ ಸಾಂತ್ ಸಾಂ. ಫ್ರಾನ್ಸಿಸ್ ಅಸಿಸ್ಸಿ, ಮೊಜಿ ಆವಯ್ ಸಾಂ. ಫ್ರಾನ್ಸಿಸ್ ಅಸಿಸ್ಸಿಚ್ಯಾ ಮೆಳಾಂತ್ ಸೆವಾ ದಿತೆಲಿ. ಸಾಂ.ಫ್ರಾನ್ಸಿಸ್ ಅಸಿಸ್ಸಿ ಪøಕ್ರತಿಚಾ ಮೊಗಾರ್ ಪಡ್ಲೊ ಸಾಂತ್, ಕುಂದಾಪುರ್ ಫಿರ್ಗಜೆಂ ಹೊ ಮೇಳ್ ಆರಂಭ್ ಜಾವ್ನ್ 95 ವರ್ಸಾಂ ಸಂಪ್ತಾತ್, ತುಮ್ಚೊ ಶತಮಾನೋತ್ಸವ್ ಬರ್ಯಾನ್ ಜಾಂವ್’ ಮ್ಹಣುನ್ ಉಲ್ಲಾಸ್ ಪಾಟಾಯೈಲೆ.
ಮನೋರಂಜನ್ ಜಾವ್ನ್ ಪ್ರಹಸನ್, ಗೀತ್ ಗಾಯಾನಾ ಫಿರ್ಗಜ್ವಾರ್ ಘಟಕಾನಿಂ ಪರ್ದರ್ಶನ್ ಕೆಲೆಂ. ಕುಂದಾಪುರ್ ಘಟಕಾಚಿ ಕಾರ್ಯದರ್ಶಿ ಮರಿಯಾ ಬಾರೆಟ್ಟೊನ್ ವರದಿ ವಾಚನ್ ಕೆಲಿ. ವಾರಾಡೊ ಕಾರ್ಯದರ್ಶಿ ಪ್ರಮೀಳಾ ಡೆಸಾನ್ ಧನ್ಯವಾದ್ ಪಾಟಯ್ಲೆ. ಡಯಾನಾ ಡಿಆಲ್ಮೇಡಾನ್ ಕಾರ್ಯೆ ಚಲವ್ನ್ ವೆಲೆಂ. ಜೆವ್ಣಾ ಸವೆಂ ಕಾರ್ಯೆ ಸಂಪ್ಲೆ.
