ಕುಂದಾಪುರ್, ಜೂ. 10: ಉಡುಪಿ ದಿಯೆಸೆಜ್ ಧರ್ಮಾಧ್ಯಕ್ಷ್ ಅ| ಮಾ| ದೊ| ಜೆರಾಲ್ಡ್ ಐಸಾಕ್ ಲೋಬೊ ಹಾಂಚೆಂ, ಕುಂದಾಪುರ್ ರೊಜಾರ್ ಮಾಯೆಚ್ಯಾ ಫಿರ್ಗಜೆಕ್ ತೀನ್ ದಿಸಾಂಚಾ ಅಧಿಕೃತ್ ಗೊವ್ಳಿಕ್ ಭೇಟೆ ಖಾತಿರ್, ಸನ್ವಾರಾ ಸಾಂಜೆರ್ ತಾಂಚೆಂ ಆಗಮನ್ ಜಾಲೆಂ.
ಗೊವ್ಳಿ ಬಾಪಾಕ್ ಇಗರ್ಜೆಚ್ಯಾ ದಾರ್ವಾಟ್ಯಾರ್ ವಿಗಾರ್ ಅ|ಮಾ| ಬಾ| ಸ್ಟ್ಯಾನಿ ತಾವ್ರೊ ಝೆಲೊ ಗಾಲುನ್ ಸ್ವಾಗತ್ ಕೆಲೊ. ತಾಂಚೆಂ ಸಂಗಾತಾ ಸಹಾಯಕ್ ವಿಗಾರ್ ಮಾ|ಬಾ| ಅಶ್ವಿನ್ ಆರಾನ್ನಾ ಫಿರ್ಗಜ್ ಮಂಡಳಿ ಉಪಾಧ್ಯಕ್ಷಿಣ್ ಶಾಲೆಟ್ ರೆಬೆಲ್ಲೊ, ಕಾರ್ಯದರ್ಶಿ ಆಶಾ ಕರ್ವಾಲ್ಲೊ, ೨೦ ಅಯೋಗಾಂಚಿ ಸಂಚಾಲಕಿ ಪ್ರೇಮಾ ಡಿಕುನ್ಹಾ, ಸಾಂ. ಜೋಸೆಫ್ ಕೊವೆಂತಾಚಿಂ ವ್ಹಡಿಲ್ನ್ ಸಿಸ್ಟರ್ ಸುಪ್ರಿಯಾ ಆನಿ ಸರ್ವ್ ಫಿರ್ಗಜ್ ಲೊಕಾಂ ಸಾಂಗಾತಾ ತಾಂಕಾಂ ಮೊಗಾಚೊ ಸ್ವಾಗತ್ ದಿಲೊ.
ಉಪ್ರಾಂತ್ ಗೊವ್ಳಿ ಬಾಪಾಕ್ ದೇವ್ ಪ್ರಜೆನ್ ಪುರ್ಷಾಂವಾರ್ ದೇವ್ ಮಂದಿರಾಂತ್ ಆಪವ್ನ್ ವೆಲೆಂ. ದೇವ್ ಮಂದಿರಾಂತ್ ಗೊವ್ಳಿ ಬಾಪಾಕ್ ದುಂಪವ್ನ್, ಖುರಿಸ್, ಪೆಟಲ್ಲಿ ವಾತ್ ದಿವ್ನ್ ವಿಗಾರ್ ಬಾಪ್ ಸ್ಟ್ಯಾನಿ ತಾವ್ರೊನ್ ಧಾರ್ಮಿಕ್ ರೀತಿ ರಿವಾಜಿ ಪರ್ಮಾಣೆ ಸ್ವಾಗತಾಚಿ ರೀತ್ ಚಲಯ್ಲಿ.
ಉಪ್ರಾಂತ್ ದೇವ್ ಪ್ರಜೆಕ್ ಪವಿತ್ರ್ ಉದಾಕ್ ಶೆಣಾಂವ್ನ್ ಆಶಿರ್ವಾದಿತ್ ಕೆಲೆಂ, ಗೊವ್ಳಿಕ್ ಮಂಡಳಿ ಸಾಂದ್ಯಾಕ್ ಪೆಟಲ್ಲಿ ವಾತ್ ಗೊವ್ಳಿ ಬಾಪಾನ್ ದಿಂವ್ನ್ ’ತಾಂಚೆಂ ಥಾವ್ನ್ ಉತ್ತಿಮ್ ಸೆವಾ ಮೆಳ್ಚ್ಯಾ ಪಾಸೊತ್ ಮಾಗ್ಣೆ ಕೆಲೆಂ. ಉಪ್ರಾಂತ್ ಗೊವ್ಳಿಕ್ ಬಾಪಾನಿಂ ‘ಆಮ್ಕಾಂ ಜೆಜು ವರ್ವಿಂ ಪುನರ್ ಜಿವಂತ್ಪಣ್ ಆಸಾ, ಮರಣ್ ತತ್ಕಾಲಿಕ್, ಮರಣ್ ಆಮ್ಕಾಂ ಏಕ್ ಉತ್ರೊಣ್’ ಮ್ಹಣನ್ ತಾಣಿ ಸಂದೇಶ್ ದಿಲೊ. ಅಶೆಂ ವಿವಿಧ್ ಮಾಗ್ಣ್ಯಾ ವಿಧಿಂ ಚಲ್ಲಿ ಉಪ್ರಾಂತ್. ಸರಲ್ಯಾ ಆಮ್ಚ್ಯಾ ಮಲ್ಘಡ್ಯಾ ಪಾಸೊತ್ ಸಿಮೆಸ್ತ್ರಿಂತ್ ಮಾಗ್ಣ್ಯಾ ವಿಧಿ ಚಲವ್ನ್ ಗೊವ್ಳಿ ಬಾಪಾಂನಿ ಸಿಮಿಸ್ತ್ರ್ ಬೆಂಜಾರ್ ಕೆಲಿ. ಹ್ಯಾ ಮಾಗ್ಣ್ಯಾ ವಿಧಿಂತ್, ಗೊವ್ಳಿ ಬಾಪಾ ಸವೆಂ, ವಿಗಾರ್ ಮಾ|ಬಾ|ಸ್ಟ್ಯಾನಿ ತಾವ್ರೊ, ಸಹಾಯಕ್ ವಿಗಾರ್ ಸಹಾಯಕ್ ವಿಗಾರ್ ಮಾ|ಬಾ| ಅಶ್ವಿನ್ ಆರಾನ್ನಾ ವಾಂಟೊ ಘೆತ್ಲೊ. ತಶೆಂಚ್ ಸಭಾರ್ ಧರ್ಮ್ ಭಯ್ಣ್ಯೊ, ಆನಿ ಸಭಾರ್ ದೇವ್ ಪ್ರಜೆನ್ ವಾಂಟೊ ಘೆತ್ಲೊ.
