ಕುಂದಾಪುರ್ ಮಾ.31: ಕುಂದಾಪುರ್ ರೊಜಾರ್ ಮಾಯೆಚಾ ಇಗರ್ಜೆ ಸಾಂ. ಜೋಸೆಫ್ ವಾಜ್ ಹಾಚಿ ನೊವಿ ಇಮಾಜ್ ಆಶಿರ್ವಚನ್ ಕೆಲಿ.
ಉಡುಪಿ ಧರ್ಮಪ್ರಾಂತ್ಯತ್ ಭೋವ್ ಮಲ್ಗಡಿ, ಐತಿಹಾಸಿಕ್ ಚರಿತ್ರಾ ಆಟಾಪ್ಲೆಲಿ ಕುಂದಾಪುರ್ ರೊಜಾರ್ ಮಾಯೆಚಾ ಇಗರ್ಜ್ (ಸ್ಥಾಪನೆ ಕಿ.ಶ.1570) ಸುಮಾರ್ 342 ವರ್ಸಾಂ ಪಾಟಿಂ (ಕಿ.ಶ.1681- ಂತ್) ವಾರಾಡೊ ಪ್ರಧಾನ್ ಜಾವ್ನ್ ಸೆವಾ ದಿಲ್ಲೊ ಸಾಂ. ಜೋಸೆಫ್ ವಾಜ್, ತವಳ್ ಕುಂದಾಪುರ್ ಇಗರ್ಜೆಚಾ ತಾಚ್ಯಾ ವಸ್ತೆ ಕುಡಾಂತ್ ಮಾಗ್ಣ್ಯಾರ್ ಆಸ್ತಾನಾ, ಏಕ್ ವಿಜ್ಮಿತಾಯ್ ಘಡ್ಲಿ. ತಾಚ್ಯಾ ಕುಡಾಚ್ಯಾ ವೂಣ್ದಿರ್ ಉಭಾರಾಯೆರ್ ಎಕ್ ಕ್ರುಸಿಫಿಸ್ ಉಮ್ಕಾಳಾವ್ನ್ ಆಸ್ಲಿ, ಆನಿ ಸಾಂ.ಜುಜೆ ವಾಜ್ ಮಾಗ್ಣ್ಯಾಚಾ ಧ್ಯಾನರ್ ಆಸೊನ್, ತೊ ಕಾಂಯ್ಚ್ ಆಧಾರ್ ನಾಸ್ತಾಂ, ತ್ಯಾ ಕ್ರುಸಿಫಿಸ್ ಇಮಾಜಿಚಾ ಉಭಾರಾಯೆಕ್ ವಾರ್ಯಾರ್ ಉಭೊನ್ ಆಸ್ಲೊ. ತೊ ತ್ಯಾ ವೇಳಿ, ದಿಂಬಿಯೆರ್ ಆಸೊನ್, ಹಾತ್ ಜೊಡ್ನ್ ಆಸೊನ್ ಕ್ರುಸಿಫಿಸ್ ಇಮಾಜಿ ವ್ಹಯ್ರ್ ಆಸಲ್ಯಾ ಜೆಜುಲಾಗಿ ಉಲಯ್ತಾ ತಶೆಂ ಭೊಗ್ತಾಲೆ. ಹೆಂ ನೀಜ್ ಘಡಿತ್ ದೆಖ್ಲೊ ಅನ್ಯೆಕ್ಲೊ ಸಯ್ರೊ ಯಾಜಕ್, ತೊ ಪಯ್ಣಾರ್ ಆಸೊನ್ ವಿಶೇವ್ ಘೆಂವ್ಕ್ ಕುಂದಾಪುರ್ ರಾವ್ಲ್ಯಾ ವೇಳಾರ್ ತಾಣೆ ತೆಂ ದೆಖಲ್ಲೆಂ. ಹೆಂ ಘಡಿತ್ ಜುಜೆ ವಾಜ್ ಸಂದ್ಗಿದ್ ಪರಿಸ್ಥಿಂತ್ ಸಾಂಪಡ್ಲ್ಯಾ ವೇಳಾರ್ ಹೆಂ ಘಡಿತ್ ತೊ ಯಾಜಕ್, ಗೊಂಯ್ಚ್ಯಾ ಆರ್ಚ್ ಬಿಸ್ಪಾಕ್ ಕಳಯ್ತಾ. ತವಳ್ ಥಾವ್ನ್ ಜೋಸೆಫ್ ವಾಜ್‍ಕ್ ಗೊಂಯ್ಚಿ ಧರ್ಮ್‍ಸಭಾ ಮಾಂದುಂಕ್ ಲಾಗ್ತಾಂ.
ತ್ಯಾ ಉಪ್ರಾಂತ್ ಜೋಸೆಫ್ ವಾಜ್ ಶ್ರೀಲಂಕಾಕ್ ವಚೊನ್ ಮಹತ್ಕಾರಾಯಾಂ ಕರುನ್ ಸಾಂತಾಚಿ ಪದ್ವಿ ಅಪ್ಣಾಯ್ತಾ. ಕುಂದಾಪುರ್ ಇಗರ್ಜೆ ಜೋಸೆಫ್ ವಾಜ್‍ಚಿ ವ್ಹಡ್ ಏಕ್ ಇಮಾಜ್ ಪಯ್ಲೆಂಚ್ ಆಸೊನ್ ತಿ ಇಗರ್ಜೆಚ್ಯಾ 450 ವರ್ಸಾಂಚ್ಯಾ ಜುಬ್ಲೆವಾಚಾ ಉಡಾಸಾಕ್ ಇಗರ್ಜೆಚ್ಯಾ ಮುಖದ್ವಾರಾಚಾ ಕುಸಿನ್ ಅನಾವರಣ ಕೆಲ್ಯಾ. ಕುಂದಾಪುರ್ ಇಗರ್ಜೆಂ ಸಾಂ. ಜೋಸೆಫ್ ವಾಜಾಚೆ ಭಕ್ತಿಪಣ್, ನೊವೆನ್ ಅವಿರತ್ ಚಲವ್ನ್ ಆಸಾ. ಇಗರ್ಜೆ ಭಿತರ್ ಹೆಂ ನೊವೆನ್, ಪ್ರಾರ್ಥನಾಂ ಚಲ್ತಾನಾ ಭಕ್ತಿಪಣ್ ಚಡ್ಚ್ಯಾ ಖಾತಿರ್ ದಾನಿನ್ ದಿಲ್ಲಿ ಹಿ ಸಾಂ. ಜೋಸೆಫ್ ವಾಜಾಚಿ ಇಮಾಜ್ ಕುಂದಾಪುರ್ ಫಿರ್ಗಜೆಚೊ ವಿಗಾರ್ ಭೊ|ಮಾ| |ಸ್ಟ್ಯಾನಿ ತಾವ್ರೊ ಪವಿತ್ರ್ ಉದ್ಕಾ ಥಾವ್ನ್ ಆಶಿರ್ವಾದಿತ್ ಕೆಲಿ. “ಹಿ ಇಮಾಜ್ ಮೂರ್ತಿ ಪೂಜಾ ಕರುಂಕ್ ನ್ಹಯ್, ಭಕ್ತ್ ಆಧಾರುಂಕ್, ಸಾಂತ್ ಜುಜೆ ವಾಜ್ ಜೆಜುಕ್ ಲಾಗ್ಸಿಲೊ, ತಾಚೆಂ ಥಾವ್ನ್ ಆಮ್ಚಿ ಮಾಗ್ಣಿ ಜೆಜು ಕ್ರಿಸ್ತಾಲಾಗಿಂ ದವರ್ಯಾಂ. ತೊ ಆಮ್ಕಾಂ ಜೆಜು ಥಾವ್ನ್ ಆಮ್ಕಾಂ ಉಪ್ಕಾರ್ ಮಾಗೊನ್ ದಿತಾಲೊ. ಹರ್ಯೇಕ್ ಸುಕ್ರಾರಾ ನೊವೆನಾಕ್ ಯೇವ್ನ್ ತಾಚಿಂ ಕ್ರಪಾ ಆಮಿ ಜೊಡ್ನ್ ಘೆಂವ್ಯಾ’ ಮ್ಹಣುನ್ ತಾಣಿ ಸಂದೇಶ್ ದಿಲೊ.
ಭಕ್ತಿಕಾಂಚಾ ಗಮನಾಕ್
ಸುಕ್ರಾರಾ ಸಕಾಳಿ 6.30 ಕ್ ಮಿಸಾಚೆ ಬಲಿದಾನ್ ಉಪ್ರಾಂತ್ ಸಾಂ.ಜುಜೆ ವಾಜಾಚೆ ನೊವೆನ್
ಮಹಿನಾಚ್ಯಾ ಪಯ್ಲ್ಯಾ ಸುಕ್ರಾರಾ ಸಾಂಜೆರ್ 4.30 ವೊರಾ ಸಾಂಕ್ರಾಮೆಂತಾಚೆ ಆರಾಧಾನ್ ಆನಿ ಉಪ್ರಾಂತ್ ಸಾಂ.ಜುಜೆ ವಾಜಾಚೆ ನೊವೆನ್.