JANANUDI.COM NETWORK
19 ಜೂನ್ 2021: ಆಶಾವಾದಿ ಪ್ರಕಾಶನ್ ಮುಂಬಯ್, ಕಾರ್ಮೆಲ್ ಕೊಲೆಜ್ ನುವೆಂ-ಗೊಂಯ್ ತಶೆಂಚ್ ಸಾಂ|ಆಗ್ನೆಸ್ ಕೊಲೆಜ್ ಮಂಗ್ಳುರ್ ಹಾಂಚ್ಯಾ ಜೋಡ್ ಪಾಲಂವಾಖಾಲ್ ’ಕೊಂಕಣಿಂತಲ್ಯಾ ಅಸ್ತುರಿ ಸಾಹಿತ್ಯಾಚೆರ್’ ರಾಶ್ಟ್ರೀಯ್ ಮಟ್ಟಾಚೆಂ ವೆಬಿನಾರ್ ಜೂನ್ 19 ತಾರಿಕೆರ್ ಚಲ್ಲೆಂ. “ಅಸ್ತುರಿಚೊ ಪಾತ್ರ್ ಫಕತ್ ಕುಜ್ನಾಂತ್ ನ್ಹಯ್, ಬಗಾರ್ ಸಮಾಜೆಂತ್ ದಾದ್ಲ್ಯಾಕ್ ಸರಿ ಜಾವ್ನ್ ಆಸ್ಚೊ ಆನಿ ಹ್ಯಾ ದಿಶೆನ್ ಪಯ್ಲೆಂ ದರೇಕಾ ಅಸ್ತುರೆನ್ ಸಮ್ಜುನ್, ಅಸ್ತುರಿಚಿಂ ಹಕ್ಕಾಂ, ಅಸ್ತುರಿಚಿಂ ಸಂವೇದನಾಂ ಸಾಹಿತ್ಯಾರುಪಾರ್ ಅಭಿವ್ಯಕ್ತ್ ಕರ್ಚಿ ಗರಜ್ ಆಸಾ” ಅಶೆಂ ವೆಬಿನಾರಾಚೆಂ ಸುಂಕಾಣ್ ಘೆತ್‌ಲ್ಲ್ಯಾ ಬೆಸೆಂಟ್ ಕೊಲೆಜಿಚ್ಯಾ ಪತ್ರಿಕುಧ್ಯಮ್ ವಿಭಾಗಾಚಿ ಮುಖೆಸ್ತ್ ಕೊಂಕಣಿ ಕವಿ/ಲೇಖಕಿ ಬಾಯ್ ಸ್ಮಿತಾ ಶೆಣಯ್ ಹಿಣೆಂ ಯೆವ್ಕಾರ್ ಉಲವ್ಪಾಂತ್ ಸಾಂಗ್ಲೆಂ.
ಕಾರ್ಮೆಲ್ ಕೊಲೆಜಿಚ್ಯಾ ಪ್ರಿನ್ಸಿಪಾಲ್ ದೊ|ಅಲ್ಡಿನಾ ಬ್ರಗಾಂಜಾನ್ ಉಗ್ತಾವಣ್ ಉಲವ್ಪಾಂತ್ “ಏಕ್ ಸಮಾಜ್ ವಿಚಾರಾಂನಿ ಮಾತ್ರ್ ಮುಕಾರ್ ವೆತಾ ಆನಿ ವಿಚಾರ್ ವಾಡಂವ್ಚ್ಯಾ ದಿಶೆನ್ ಸಾಹಿತ್ಯ್ ಏಕ್ ಬಳ್ವಂತ್ ಹಾತೆರ್. ಆಜ್ ವಾಚ್ಪಿ ಉಣೆ ಜಾವ್ನ್ ಯೆಂವ್ಚ್ಯಾ ಕಾಳಾರ್, ಡಿಜಿಟಲ್ ಮಾಧ್ಯಮಾಚೊ ಥೆಂಕೊ ಘೆವ್ನ್ ಕೊಂಕಣಿಂತ್ಲ್ಯಾ ಅಸ್ತುರಿ ಸಾಹಿತ್ಯಾಕ್ ಜೊಕ್ತೊ ಪಾಟಿಂಬೊ ದಿಂವ್ಚಿ ಗರ್ಜ್ ಆಸಾ” ಮ್ಹಣಾಲಿ. ಉಗ್ತಾವಣ್ ಸಂಧೇಶಾಂತ್ ಭಯ್ಣ್ ದೊ|ವೆನಿಸ್ಸಾನ್ “ಕೊಂಕಣಿ ಆಮ್ಚಿ ಆವಯ್‌ಭಾಸ್ ಆನಿ ತಿಚೊ ಪೋಸ್ ಕರ್ಚಿ ಗರ್ಜ್ ಆಮಿ ಸಗಳ್ಯಾಂನಿ ಪಯ್ಲಿ ಸಮ್ಜುಂಚಿ ಆನಿ ಪಾಟ್ಲ್ಯಾ ಎಕಾ ಶೆಕ್ಡ್ಯಾ ಥಾವ್ನ್ ಸಮಾಜೆಂತ್ ಅಸ್ತುರೆನ್ ಸಯ್ತ್ ಮುಕಾರ್ ಯೆವ್ನ್ ದಾದ್ಲ್ಯಾಕ್ ಸರಿ ಜಾವ್ನ್ ಜವಾಭ್ದಾರೆಂತ್ ಖಾಂದ್ ಮಾರ್ಲಾ ತಶೆಂ ಅಸ್ತುರೆಕ್ ಸಾಹಿತ್ಯಾಂತ್ ತಶೆಂಚ್ ದರೇಕಾ ಶೆತಾಂತ್ ಮುಕ್ಲಿಂ ಪಾವ್ಲಾಂ ಕಾಡ್ಚಿ ಉರ್ಭಾ ಆನಿ ಪ್ರೇರಣ್ ಲಾಭುಂದಿ” ಮ್ಹಣಾಲಿ.
ಕೊಂಕಣಿಂತಲೆಂ ಅಸ್ತುರಿಂಚೆಂ ’ಅ ಸ್ತುರಿ ಸಾಹಿತ್ಯ್’ ವಿಶ್ಯಾಚೆರ್ ಏಕ್ ಖೊಲಾಯೆಚೆಂ ಅಧ್ಯಯನ್ ಪ್ರಬಂಧಾಕ್ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚಿ ದೋನ್ ಪಾವ್ಟಿಂ ಪುರಸ್ಕಾರ್ ಜೊಡ್ಪಿ ಬಾಯ್ ತಾರಾ ಲವಿ ಗಂಜಿಮಠ್ ಹಿಣೆಂ ಸಾದರ್ ಕರುನ್ ಗೊಂಯ್, ಮಹಾರಾಶ್ಟ್ರ, ಕೇರಳ ತಶೆಂಚ್ ಕರ್ನಾಟಕಾಂತ್ ಸಾಹಿತಿಕ್ ವಾವ್ರ್ ಕೆಲ್ಲ್ಯಾ ಅಸ್ತುರಿ ಲೇಖಿಕಾಂಚ್ಯಾ ವಾವ್ರಾಚೆರ್ ಉಲವ್ನ್, “ಅಸ್ತುರಿಕ್ ದಾದ್ಲ್ಯಾಕ್ ಸಮಾನ್ ಸ್ಥಾನ್-ಮಾನ್ ಲಾಭಾನಾ” ಮ್ಹಣಾಲಿ.
’ನವಿ ದಿಶಾ’ ಕಥೆಚೆರ್ ಏಕ್ ಖೊಲಾಯೆಚೆಂ ವಿಶ್ಲೇಷಣ್ ಪ್ರಬಂಧಾಕ್ ಗೊಂಯ್ಚ್ಯಾ ಬಾಯ್ ಉರ್ಜಿತಾ ಭೊಬೆನ್ ಸಾದರ್ ಕರ್ತಚ್, ಪ್ರಮುಕ್ ಉಲವ್ಪಿ ಎಚ್ಚೆಮ್ ಪೆರ್ನಾಳಾನ್ ” ’ಅಸ್ತುರಿ ಸಾಹಿತ್ಯ್’ ಏಕ್ ವಿಸ್ತಾರ್ ವಿಶಯ್. ಹಾಂಗಾಸರ್ ಅಸ್ತುರೆನ್ ಬರಯಿಲ್ಲೆಂ ಸಾಹಿತ್ಯ್ ತಶೆಂಚ್ ’ಅಸ್ತುರಿ ವಿಶ್ಯಾಚೆರ್ ಬರಯಿಲ್ಲೆಂ ಸಾಹಿತ್ಯ್’ ಸಯ್ತ್ ಮಹತ್ವಾಚೆಂ. ಕೊಂಕಣಿಂತ್ ಅಸ್ತುರಿ ಸಾಹಿತ್ಯ್ ಫುಲೊನ್ ಯೇಂವ್ಕ್ ಜಾಯ್” ಮ್ಹಣಾಲೊ. ಶೈಲೇಂದ್ರ ಮೆಹ್ತಾನ್ ’ನವಿ ದಿಶಾ’ ಪುಸ್ತಕಾಚಿ ವಳೊಕ್ ಕರುನ್ “ಬಾಯ್ ಮೊನಿಕಾಚ್ಯಾ ದರೇಕಾ ಕಥೆಂತ್ಲೆ ವಿಶಯ್ ಸಕಾಳಿಕ್ ಜಾವ್ನಾಸಾತ್, ಆನಿ ಹೆ ವಿಶಯ್ ಪ್ರಬುದ್ದ್ ರಿತಿನ್ ಉತ್ರಾಂವ್ಚ್ಯಾ ದಿಶೆನ್ ಥೊಡಿ ಮಿನತ್ ಕೆಲ್ಯಾರ್ ಕೊಂಕಣಿಚ್ಯಾ ಫುಡಾರಾಂತ್ ಏಕ್ ಬರಿ ಲೇಖಿಕಾ ಜಾಂವ್ಚ್ಯಾಂತ್ ದುಭಾವ್ ನಾ” ಮ್ಹಣಾಲೊ.
ತ್ಯೇ ಉಪ್ರಾಂತ್ ಆಶಾವಾದಿ ಪ್ರಕಾಶನಾನ್ ನಾಗರಿ ಲಿಪಿಯೆಕ್ ಲಿಪಿಯಂತರ್ ಕೆಲ್ಲ್ಯಾ ಡಿಜಿಟಲ್ ಪುಸ್ತಕಾಚೆಂ ಮೊಕ್ಳಿಕ್ ಕೆಲ್ಲ್ಯಾ ಬ್ರಾಯನ್ ಮಥಾಯಸಾನ್ “ಆಯ್ಚೊ ದೀಸ್ ಅಂತರ್‌ರಾಶ್ಟ್ರೀಯ್ ಮಟ್ಟಾರ್ ಘೊವಾಂಚೊ ದೀಸ್ ಜಾವ್ನಾಸುನ್, ಮ್ಹಜ್ಯಾ ಪತಿಣೆಚೆಂ ಇ-ಪುಸ್ತಕ್ ಮೊಕ್ಳಿಕ್ ಕರುಂಕ್ ಮ್ಹಾಕಾ ವರ್ತೊ ಸಂತೊಸ್ ತಶೆಂಚ್ ಅಭಿಮಾನ್ ಭಗ್ತಾ” ಮ್ಹಣಾಲೊ. ಬಾಯ್ ಮೊನಿಕಾ ಡೆ’ಸಾನ್ ಅಪ್ಲ್ಯಾ ಉಲವ್ಪಾಂತ್ “ಸಾಹಿತ್ಯಾಚಿ ವೋಡ್ ಮ್ಹಾಕಾ ಭುರ್ಗ್ಯಾಪಣಾರ್ ಆಸ್‌ಲ್ಲಿ ತಶೆಂಚ್ ಮ್ಹಜ್ಯೊ ಸಭಾರ್ ಕಥಾ ಪತ್ರಾಂನಿ ಪರ‍್ಗಟ್ ಜಾಲ್ಲ್ಯೊ ಪುಣ್ ಎಕಾ ಪುಸ್ತಕಾರುಪಾರ್ ಪರ್ಗಟ್ಚೆಂ ಸಪಣ್ ಜ್ಯಾರಿ ಕೆಲ್ಲ್ಯಾ ಆಶಾವಾದಿ ಪ್ರಕಾಶನಾಕ್ ತಶೆಂಚ್ ಪರ್ಗಾಂವಾಕ್ ಪಾವ್‌ಲ್ಲ್ಯಾ ಉಪ್ರಾಂತ್ ಪರತ್ ಲಿಖ್ನಿ ಮುಖಾರುನ್ ವ್ಹರುಂಕ್ ಉತ್ತೇಜನ್ ದಿಲ್ಲ್ಯಾ ಕಿಟಾಳ್ ಜಾಳಿಜಾಗ್ಯಾಕ್ ಅಪ್ಲೆ ಧಿನ್ವಾಸ್” ಮ್ಹಣಾಲಿ.
ತ್ಯೇ ಉಪ್ರಾಂತ್ ಚಲ್‌ಲ್ಲ್ಯಾ ಸಂವಾದ್ ಕಾರ್ಯಾಂತ್ ಉಲವ್ನ್ ತಿಣೆಂ ’ಫೊಟೊಗ್ರಾಫಿ/ಪೆಂಯ್ಟಿಂಗ್ ಆನಿ ಲಿಖ್ಣಿ – ಹ್ಯಾ ದೋನ್ ಹವ್ಯಾಸಾಂ ಪಯ್ಕಿಂತ್ ಅಪ್ಣಾಕ್ ಲಿಖ್ಣಿ ಖಾಯ್ಸ್ ಜಾತಾ’ ಮ್ಹಣಾಲಿ. ಸಂವಾದಾಂತ್ ದೊ|ಆಸ್ಟಿನ್ ಪ್ರಭು, ದೊ|ವಿಲ್ಲಿ ದ’ಸಿಲ್ವಾ, ಕನ್ಸೆಪ್ಟಾ ಫೆರ್ನಾಂಡಿಸ್ ಆಳ್ವ, ಪಾಸ್ಕಲ್ ಲೋಬೊ ಮುಂಬಯ್, ಮೆಲ್ವಿನ್ ರೊಡ್ರಿಗಸ್, ಸ್ಮಿತಾ ಶೆಣಯ್ ಹಾಣಿಂ ವಾಂಟೊ ಘೆತ್ಲೊ.
ಕ್ವೀನಿ ವೇಗಸಾನ್ ಧಿನ್ವಾಸ್ ಪಾಠಯ್ಲೆ. ಸ್ಮಿತಾ ಶೆಣಯ್ನ್ ಹೆಂ ವೆಬಿನಾರ್ ಚಲವ್ನ್ ವ್ಹೆಲೆಂ.
कोंकणिंतल्या अस्तुरी साहित्याचेर राश्ट्रीय मट्टाचें वेबिनार
१९ जून २०२१: आशावादी प्रकाशन मुंबय, कार्मेल कोलेज नुवें-गोंय तशेंच सां|आग्नेस कोलेज मंगळूर हांच्या जोड पालंवाखाल ’कोंकणिंतल्या अस्तुरी साहित्याचेर’ राश्ट्रीय मट्टाचें वेबिनार जून १९ तारिकेर चल्लें. “अस्तुरिचो पात्र फकत कुजनांत न्हय, बगार समाजेंत दादल्याक सरी जावन आस्चो आनी ह्या दिशेन पयलें दरेका अस्तुरेन समजून, अस्तुरिचीं हक्कां, अस्तुरिचीं संवेदनां साहित्यारुपार अभिव्यक्त कर्ची गरज आसा” अशें वेबिनाराचें सुंकाण घेतल्ल्या बेसेंट कोलेजिच्या पत्रिकुध्यम विभागाची मुखेसत कोंकणी कवी/लेखकी बाय स्मिता शेणय हिणें येवकार उलवपांत सांगलें.
कार्मेल कोलेजिच्या प्रिन्सिपाल दो|अलडिना ब्रगांजान उग्तावण उलवपांत “एक समाज विचारांनी मात्र मुकार वेता आनी विचार वाडंवच्या दिशेन साहित्य एक बळवंत हातेर. आज वाचपी उणे जावन येंवच्या काळार, डिजिटल माध्यमाचो थेंको घेवन कोंकणिंतल्या अस्तुरी साहित्याक जोक्तो पाटिंबो दिंवची गर्ज आसा” म्हणाली. उग्तावण संधेशांत भयण दो|वेनिस्सान “कोंकणी आमची आवयभास आनी तिचो पोस कर्ची गर्ज आमी सगळ्यांनी पयली समजुंची आनी पाटल्या एका शेकड्या थावन समाजेंत अस्तुरेन सयत मुकार येवन दादल्याक सरी जावन जवाभदारेंत खांद मारला तशें अस्तुरेक साहित्यांत तशेंच दरेका शेतांत मुकलीं पावलां काडची उर्भा आनी प्रेरण लाभुंदी” म्हणाली.
कोंकणिंतलें अस्तुरिंचें ’अ स्तुरी साहित्य’ विश्याचेर एक खोलायेचें अध्ययन प्रबंधाक कर्नाटक कोंकणी साहित्य अकाडेमिची दोन पावटीं पुरसकार जोडपी बाय तारा लवी गंजिमठ हिणें सादर करून गोंय, महाराश्ट्र, केरळ तशेंच कर्नाटकांत साहितीक वावर केल्ल्या अस्तुरी लेखिकांच्या वावराचेर उलवन, “अस्तुरीक दादल्याक समान स्थान-मान लाभाना” म्हणाली.
’नवी दिशा’ कथेचेर एक खोलायेचें विशलेषण प्रबंधाक गोंयच्या बाय उर्जिता भोबेन सादर कर्तच, प्रमूक उलवपी एच्चेम पेर्नाळान ” ’अस्तुरी साहित्य’ एक विसतार विशय. हांगासर अस्तुरेन बरयिल्लें साहित्य तशेंच ’अस्तुरी विश्याचेर बरयिल्लें साहित्य’ सयत महत्वाचें. कोंकणिंत अस्तुरी साहित्य फुलोन येवंक जाय” म्हणालो. शैलेंद्र मेहतान ’नवी दिशा’ पुस्तकाची वळोक करून “बाय मोनिकाच्या दरेका कथेंतले विशय सकाळीक जावनासात, आनी हे विशय प्रबुद्द रितीन उत्रांवच्या दिशेन थोडी मिनत केल्यार कोंकणिच्या फुडारांत एक बरी लेखिका जांवच्यांत दुभाव ना” म्हणालो.
त्ये उपरांत आशावादी प्रकाशनान नागरी लिपियेक लिपियंतर केल्ल्या डिजिटल पुस्तकाचें मोकळीक केल्ल्या ब्रायन मथायसान “आयचो दीस अंतरराश्ट्रीय मट्टार घोवांचो दीस जावनासून, म्हज्या पतिणेचें ई-पुस्तक मोकळीक करुंक म्हाका वर्तो संतोस तशेंच अभिमान भग्ता” म्हणालो. बाय मोनिका डे’सान अपल्या उलवपांत “साहित्याची वोड म्हाका भुर्ग्यापणार आसल्ली तशेंच म्हज्यो सभार कथा पत्रांनी पर्गट जाल्ल्यो पूण एका पुस्तकारुपार पर्गटचें सपण ज्यारी केल्ल्या आशावादी प्रकाशनाक तशेंच पर्गांवाक पावल्ल्या उपरांत परत लिखनी मुखारून व्हरुंक उत्तेजन दिल्ल्या किटाळ जाळिजाग्याक अपले धिन्वास” म्हणाली.
त्ये उपरांत चलल्ल्या संवाद काऱ्यांत उलवन तिणें ’फोटोग्राफी/पेंयटिंग आनी लिखणी – ह्या दोन हव्यासां पयकिंत अपणाक लिखणी खायस जाता’ म्हणाली. संवादांत दो|आसटीन प्रभू, दो|विल्ली द’सिलवा, कन्सेपटा फेर्नांडीस आळव, पासकल लोबो मुंबई, मेलवीन रोड्रिगस, स्मिता शेणय हाणीं वांटो घेतलो.
क्वीनी वेगसान धिन्वास पाठयले. स्मिता शेणयन हें वेबिनार चलवन व्हेलें.
