JANANUDI.COM NETWORK
ನಿತ್ಯಾದರ್ ವಾಡ್ಯಾಂತ್ ವಾಡ್ಯಾಚೆ ಫೆಸ್ತ್ : ಮಾಜಿ ಗುರ್ಕಾರಾಂಕ್ ಸನ್ಮಾನ್
ಕುಂದಾಪುರ್, ಒ.14: ಕುಂದಾಪುರ್ ಪವಿತ್ರ್ ರೊಜಾರ್ ಮಾಯ್ ಫಿರ್ಗಜೆಚ್ಯಾ ನಿತ್ಯಾದರ್ ಮಾಯೆಕ್ ಸಮರ್ಪುನ್ ದಿಲ್ಯಾ ವಾಡ್ಯಾಂತ್ ತಾಂಚಿಂ ಪಾತ್ರೊಣ್ ನಿತ್ಯಾದರ್ ಮಾಯೆಚೆ ಫೆಸ್ತ್ ಅಕ್ತೋಬರಚ್ಯಾ 13 ವೆರ್ ಸಾಂಜೆರ್ ವಾಡ್ಯಾಚ್ಯಾ ತರ್ಫೆನ್ ವಾಡ್ಯಾಗಾರ್ ವಾಲ್ಟರ್ ಡಿಸೋಜಾ ಆನಿ ತಾಚಿ ಪತಿಣ್ ಗುರ್ಕಾರ್ನ್ ಎಲಿಜಾಬೆತ್ ಡಿಸೋಜಾ ಹಾಂಚ್ಯಾ ಘರಾ ಆಚರಣ್ ಕೆಲೆಂ.
ಹ್ಯಾ ಸಂದರ್ಭಿ ಪಾಟ್ಲ್ಯಾ ವರ್ಸಾನಿಂ ಹ್ಯಾ ವಾಡ್ಯಾಕ್ ಸೆವಾ ದಿಲ್ಯಾ ಗುರ್ಕಾರ್ ಬೇಸಿಲ್ ಡಿಸೋಜಾ, ಫಿಲಿಪ್ ಡಾಯಾಸ್ ಆನಿ ಗುರ್ಕಾರ್ನ್ ಸಿಲೆಸ್ತೀನ್ ಡಿಸೋಜಾ ಹಾಂಕಾಂ ವಾಡ್ಯಾಗಾರಾಂಚ್ಯಾ ತರ್ಫೆನ್ ವಿಗಾರ್ ಭೊ|ಮಾ|ಬಾ|ಸ್ಟ್ಯಾನಿ ತಾವ್ರೊನ್ ಸನ್ಮಾನ್ ಕೆಲೊ.
ಹ್ಯಾ ಸಂದರ್ಭಿ ವಿಗಾರಾನ್ ‘ಹ್ಯಾ ವಾಡ್ಯಾಂತ್ ತಾಲೆಂತ್‍ವಂತ್ ಆಸಾತ್, ವಾಡೊ ಎಕ್ವಟಿತ್ ಜಾವ್ನ್ ಸಮ್ಜೊಣೆಚೆಂ ಮನಿಸ್ ಆಸ್ಲ್ಯಾರ್ ವಾಡೊ ಜೀವಾಳ್ ಆಸ್ತಾಂ. ವಾಡೊ ಫಿರ್ಗಜೆಚ್ಯಾ ಸಹಕಾರಾಕ್ ಮುಕಾರ್ ಆಸ್ತಾಂ, ಫಿರ್ಗಜೆಚ್ಯಾ ಯೋಜನಾಂತ್ ತುಮಿ ಕ್ರಿಯಾಳ್ ಆಸ್ತಾತ್. ತಶೆಂಚ್ ಹ್ಯಾ ವರ್ಸಾಂ ಆಮಿ ಆಚರಣ್ ಕರುಂಕ್ ಆಸ್ಚ್ಯಾ ಆಮ್ಚಿ ಪಾತ್ರೊನ್ ಪವಿತ್ರ್ ರೊಜಾರ್ ಮಾಯೆಚೊ 450 ವರ್ಸಾಂಚೊ ಜುಬ್ಲೆವ್ ಆಚರ್ಸಿತಾನಾ, ತುಮ್ಚ್ಯಾ ವಾಡ್ಯಾ ಥಾವ್ನ್ ಮೊಟೊ ಸಹಕಾರ್ ಆಶೆತಾಂ, ತುಮ್ಚ್ಯಾ ವಾಡ್ಯಾಚಿ ಪಾತ್ರೊನ್ ನಿತ್ಯಾದರ್ ಮಾಯ್ ತುಮ್ಚೆರ್ ದಾರಾಳ್ ಆಶಿರ್ವಾದಾಂ ವೊತುಂದಿ ಮ್ಹಣನ್ ಮಾಗ್ತಾಂ’ ಮ್ಹಣನ್ ತಾಣಿ ಸಂದೇಶ್ ದಿಲೊ.
ಸನ್ಮಾನಿತ್ ತರ್ಫೆನ್ ಬೇಸಿಲ್ ಡಿಸೋಜಾನ್ ಆಪ್ಲಿ ಭೊಗ್ಣಾ ಉಚಾರ್ಲಿ. ಸಹಾಯಕ್ ವಿಗಾರ್ ಮಾ|ಬಾ|ವಿಜಯ್ ಡಿಸೋಜಾನ್ ವಾಡ್ಯಾಚ್ಯಾ ಪ್ರತಿಭಾವಂತ್ ಭುಗ್ರ್ಯಾಂಚ್ಯಾ ವ್ಹಡಿಲಾಂಕ್ ಮಾನ್ ಕೆಲೊ. ಗೊವ್ಳಿಕ್ ಮಂಡಳಿ ಉಪಾಧ್ಯಕ್ಷ್ ಜೇಕಬ್ ದಿಸೋಜಾನ್ ವಾಡ್ಯಾಗಾರಾಂಕ್ ಶುಭಾಷಯ್ ಪಾಟಯ್ಲೆ. ಕಾರ್ಯದರ್ಶಿ ಫೆಲ್ಸಿಯಾನ್ ಡಿಸೋಜಾ, ಆಯೋಗಾಚಿಂ ಸಂಯೋಜಕಿ ಪ್ರೇಮಾ ಡಿಕುನ್ಹಾ ಹಾಣಿ ಖೆಳ್ ಪಂದ್ಯಾಟಾಂತ್ ಜಿಕಲ್ಯಾಂಕ್ ಇನಾಮಾ ವಾಂಟ್ಲಿ. ವಾಡ್ಯಾಗಾರಾನಿಂ ಸಾಂಸ್ಕ್ರತಿಕ್ ಕಾರ್ಯೆ ಜಾವ್ನ್ ನಾಟ್ಕುಳೊ, ಡ್ಯಾನ್ಸ್, ಪದಾಂಚೆಂ ಪ್ರದರ್ಶನ್ ಕೆಲೆಂ. ಸನ್ಮಾನಿತಾಚಿ ಪರಿಚಯ್ ಡಾ|ಸೋನಿ ಡಿಕೋಸ್ತಾನ್ ಕರ್ನ್ ದಿಲಿ. ಹ್ಯಾ ಕಾರ್ಯಾಂತ್ ಫಿರ್ಗಜೆಚ್ಯಾ ಸರ್ವ್ ವಾಡ್ಯಾಚೆಂ ಲ್ಹಾನ್ ಸಮುದಾಯ್ ಪ್ರೇರಕ್ ಹಾಜರ್ ಆಸಲ್ಲೆಂ. ವಾಡ್ಯಾಚಿ ಗುರ್ಕಾರ್ನ್ ತಶೆಂ ಲ್ಹಾನ್ ಸಮುದಾಯ್ ಪ್ರೇರಕ್ ಸಂಯೋಜಕಿ ಎಲಿಜ್ ಡಿಸೋಜಾನ್ ಸ್ವಾಗತ್ ಮಾಗ್ಲೊ. ವಾಡ್ಯಾಚೊ ಪ್ರತಿನಿಧಿ ಜೆಸನ್ ಪಾಯ್ಸಾನ್ ಧನ್ಯವಾದ್ ಪಾಟಯ್ಲೆ. ವೆನಿಶಾ ಡಿಸೋಜಾನ್ ಕಾರ್ಯೆ ಚಲವ್ನ್ ವೆಲೆಂ.
