ಬಾತ್ಮಿ: ಪ್ರಕಾಶ್ ಅಂದ್ರಾದೆ, ಉಡುಪಿ
ಗಂಗೊಳ್ಳಿ : ಅಮ್ರತ ಸ್ತ್ರೀ ಸಂಘಟನ್ ಪಂಗ್ಡಾ ಥಾವ್ನ್ ಹಡಾಂ ತಪಾಸ್ಣಿ ಶಿಬಿರ್
ಗಂಗೊಳ್ಳಿ, ಜೂ.11 ಗಂಗೊಳ್ಳಿ ಫಿರ್ಗಜ್ ಸ್ತ್ರೀ ಆಯೋಗ್ (ಸ್ತ್ರಿ ಸಂಘಟನ್) ಆನಿ ಭಲಾಯ್ಕಿ ಆಯೋಗ್ ಹಾಂಚ್ಯಾ ಮುಖೇಲ್ಪಣಾರ್ ಉಚಿತ್ ಹಡಾಂ ತಪಾಸ್ಣಿ ಶಿಬಿರ್ ಫಿರ್ಗಜೆಚ್ಯಾ ಸಾಂ.ಜುಜೆ ಸಭಾಸಾಲಾಂತ್ ಜೂನಾಚ್ಯಾ 7 ತಾರೀಕೆರ್ ಚಲ್ಲೆಂ.
ಹ್ಯಾ ಕಾರ್ಯಾಕ್ ಫಿರ್ಗಜೆಚೊ ವಿಗಾರ್, ಸ್ತ್ರೀ ಸಂಘಟನಾಚೊ ಅತ್ಮಿಕ್ ನಿರ್ದೇಶಕ್ ಮಾ|ಬಾ|ಆಲ್ಬರ್ಟ್ ಕ್ರಾಸ್ತಾ ಹಾಣಿ ಅಧ್ಯಕ್ಷಪಣ್ ಘೆಂವ್ನ್ ಬರೆ ಮಾಗ್ಲೆಂ. ಸಂಪನ್ಮೂಲ್ ವ್ಯಕ್ತಿ ಜಾವ್ನ್ ಉಡುಪಿ ಫಿರ್ಗಜೆಚೊ ಪ್ರಕಾಶ್ ಅಂದ್ರಾದೆ ಹಾಣಿ ಹಡಾಂಚ್ಯಾ ಮಹತ್ವಾ ವಿಶಿಂ ಜಾಣ್ವಾಯ್ ದಿಂವ್ನ್ ‘ಆಮ್ಚೆ ಮಾಲ್ಘಡೆಂ ಕ್ರಷಿ ಕಾಮ್, ವಸ್ತುರ್ ಉಂಬಳ್ಚೆ, ಧರ್ಣ್ ಪುಸ್ಚಿಂ ಅಸಲಿಂ ಕಾಮಾ ಕರ್ನ್ ಕುಡಿಕ್ ಗರ್ಜ್ ಆಸ್ಲೆಂ ವ್ಯಾಯಮ್ ಜೋಡ್ನ್ ಘೆತಾಲೆಂ, ತಶೆಂ ಜಾಂವ್ನ್ ತಾಂಚಿಂ ಹಡಾಂ ಘಟ್ ಮೂಟ್ ಆಸ್ತೆಲಿಂ. ಪುಣ್ ಆತಾಂಚ್ಯಾ ಯಾಂತ್ರೀಕ್ ಜೀವನಾಂತ್ ಅಸಲಿಂ ಕಾಮಾ ಕರಿನಾತ್ಲ್ಯಾನ್ ಪ್ರಾಯ್ ಜಾತಾನಾ, ಹಡಾಂ ಥಂಯ್ ಗರ್ಜ್ ಆಸ್ಲೆಂ ಕ್ಯಾಲ್ಸಿಯಂ ಅಂಶ್ ಉಣೆ ಜಾಂವ್ನ್ ಅಪಾಯಾಚ್ಯಾ ಹಂತಾಕ್ ಪಾವ್ತಾ.ದೆಕುನ್ ಒಕ್ತಾಚಿಂ ಗರ್ಜ್ ಪಡ್ತಾಂ. ತಶೆಂಚ್ ಹ್ಯಾ ಶಿಬಿರಾಂತ್ ಕುಡಿಕ್ ಗರ್ಜ್ ಆಸ್ಚೆಂ ಕೊಲೆಸ್ಟ್ರೊಲ್‍ಯಿ ತಪಾಸ್ಣಿ ಕರ್ಯೆತ್. ಅಸಲ್ಯಾ ಶಿಬಿರಾಂ ದ್ವಾರಿ ಸಭಾರ್ ಜಣಾನಿಂ ಫಾಯ್ದೊ ಜೊಡ್ಲ್ಯಾ’ ಮ್ಹಣನ್ ತಾಣಿ ಕಳಯ್ಲೆಂ.
ಹ್ಯಾ ಸಂದರ್ಭಾರ್ ಫಿರ್ಗಜೆಚೊ ಉಪಾಧ್ಯಕ್ಷ್ ವಿವಿಯನ್ ಕ್ರಾಸ್ತಾ, ಕಾರ್ಯದರ್ಶಿ ರೆನಿಟಾ ಬಾರ್ನೆಸ್, 18 ಆಯೋಗಾಚಿಂ ಸಂಯೊಜಕಿ ಪ್ರೀತಿ ಫೆರ್ನಾಂಡಿಸ್, ಸ್ತ್ರೀ ಆಯೋಗಾಚಿ (ಸಂಘಟನಾಚಿ ಅಧ್ಯಕ್ಷಿಣ್) ಸಂಚಾಲಕಿ, ಭಲಾಯ್ಕಿ ಆಯೋಗಾಚಿ ಸಂಚಾಲಕಿ ಹಾಜರ್ ಆಸ್ಲಿಂ. ಶಿಬಿರಾಂತ್ ಹಡಾಂ ತಪಾಸ್ಣಿ ಪ್ರಕಾಶ್ ಅಂದ್ರಾದೆ ಹಾಂಚ್ಯಾ ನೀರ್ದೇಶನ ಖಾಲ್ ‘ಮೆಸಸ್ ಒರ್ಗಾಯ್ನಿಕ್ ಪೈ.ಲಿ.’ ಸಂಸ್ಥೆಚ್ಯಾ ಉಮೇಶ್ ಕಡೂರ್ ಮಠ್, ಸಂದೇಶ್ ಶೆಟ್ಟಿ ಆನಿ ಮಧುಕೇಶ್ವರ್ ಹಾಣಿ ಚಲವ್ನ್ ವೆಲೆಂ. ಕಾರ್ಯಕ್ರಮಾಂತ್ 110 ಜಣ್ ಹಾಜರ್ ಆಸೊನ್ ಹಾಚೊ ಫಾಯ್ದೊ 71 ಜಣಾನಿಂ ಜೋಡ್ನ್ ಘೆತ್ಲೊ.
