ಬಾತ್ಮಿ: ಪ್ರಕಾಶ್ ಅಂದ್ರಾದೆ, ಉಡುಪಿ
ತ್ರಾಸಿ – ಸ್ತ್ರೀ ಸಂಘಟನಾ ಥಾವ್ನ್ ಹಡಾಂ ತಪಾಸ್ಣಿ ಶಿಬಿರ್
ತ್ರಾಸಿ, ಜೂ.11: ತ್ರಾಸಿ ಫಿರ್ಗಜ್ ಸ್ತ್ರೀ ಆಯೋಗ್ (ಸ್ತ್ರೀ ಸಂಘಟನ್) ಆನಿ ಭಲಾಯ್ಕಿ ಆಯೋಗ್ ಮುಖೇಲ್ಪಣಾರ್ ಹಡಾಂ ತಪಾಸ್ಣಿ ಶಿಬಿರ್ ಜೂನಾಚ್ಯಾ 6 ತಾರೀಕೆರ್ ಫಿರ್ಗಜೆಚ್ಯಾ ಮಿಲೇನಿಯಮ್ ಸಭಾಸಾಲಾಂತ್ ಚಲ್ಲೆಂ.
ಹ್ಯಾ ಕಾರ್ಯಾಕ್ ಫಿರ್ಗಜೆಚೊ ವಿಗಾರ್, ಸ್ತ್ರೀ ಸಂಘಟನಾಚೊ ಅತ್ಮಿಕ್ ನಿರ್ದೇಶಕ್ ಮಾ|ಬಾ|ಚಾಲ್ರ್ಸ್ ಲೂವಿಸ್ ಹಾಣಿ ಅಧ್ಯಕ್ಷಪಣ್ ಘೆಂವ್ನ್ ಬರೆ ಮಾಗ್ಲೆಂ. ಸಂಪನ್ಮೂಲ್ ವ್ಯಕ್ತಿ ಜಾವ್ನ್ ಉಡುಪಿ ಫಿರ್ಗಜೆಚೊ ಪ್ರಕಾಶ್ ಅಂದ್ರಾದೆ ಹಾಣಿ ಹಡಾಂಚ್ಯಾ ಮಹತ್ವಾ ವಿಶಿಂ ಜಾಣ್ವಾಯ್ ದಿಂವ್ನ್ ‘ಆಮ್ಚೆ ಮಾಲ್ಘಡೆಂ ಕ್ರಷಿ ಕಾಮ್, ವಸ್ತುರ್ ಉಂಬಳ್ಚೆ, ಧರ್ಣ್ ಪುಸ್ಚಿಂ ಅಸಲಿಂ ಕಾಮಾ ಕರ್ನ್ ಕುಡಿಕ್ ಗರ್ಜ್ ಆಸ್ಲೆಂ ವ್ಯಾಯಮ್ ಜೋಡ್ನ್ ಘೆತಾಲೆಂ, ತಶೆಂ ಜಾಂವ್ನ್ ತಾಂಚಿಂ ಹಡಾಂ ಘಟ್ ಮೂಟ್ ಆಸ್ತೆಲಿಂ. ಪುಣ್ ಆತಾಂಚ್ಯಾ ಯಾಂತ್ರೀಕ್ ಜೀವನಾಂತ್ ಅಸಲಿಂ ಕಾಮಾ ಕರಿನಾತ್ಲ್ಯಾನ್ ಪ್ರಾಯ್ ಜಾತಾನಾ, ಹಡಾಂ ಥಂಯ್ ಗರ್ಜ್ ಆಸ್ಲೆಂ ಕ್ಯಾಲ್ಸಿಯಂ ಅಂಶ್ ಉಣೆ ಜಾಂವ್ನ್ ಅಪಾಯಾಚ್ಯಾ ಹಂತಾಕ್ ಪಾವ್ತಾ.ದೆಕುನ್ ಒಕ್ತಾಚಿಂ ಗರ್ಜ್ ಪಡ್ತಾಂ. ತಶೆಂಚ್ ಹ್ಯಾ ಶಿಬಿರಾಂತ್ ಕುಡಿಕ್ ಗರ್ಜ್ ಆಸ್ಚೆಂ ಕೊಲೆಸ್ಟ್ರೊಲ್‍ಯಿ ತಪಾಸ್ಣಿ ಕರ್ಯೆತ್. ಅಸಲ್ಯಾ ಶಿಬಿರಾಂ ದ್ವಾರಿ ಸಭಾರ್ ಜಣಾನಿಂ ಫಾಯ್ದೊ ಜೊಡ್ಲ್ಯಾ’ ಮ್ಹಣನ್ ತಾಣಿ ಕಳಯ್ಲೆಂ.
ಹ್ಯಾ ಸಂದರ್ಭಾರ್ ಕುಂದಾಪುರ್ ವಾರಾಡ್ಯಾ ಮಟ್ಟ್ಟಾಚಿ ಪ್ರೇರಕಿ ಪ್ರೀತಿ ಫೆರ್ನಾಂಡಿಸ್, ಸ್ತ್ರೀ ಆಯೋಗಾಚಿ ಸಂಚಾಲಕಿ, ಭಲಾಯ್ಕಿ ಆಯೋಗಾಚಿ ಸಂಚಾಲಕಿ, ಅಟ್ರಾ ಆಯೋಗಾಚಿ ಸಂಯೋಜಕಿ ಹಾಜರ್ ಆಸಲ್ಲಿಂ. ಶಿಬಿರಾಂತ್ ಹಡಾಂ ತಪಾಸ್ಣಿ ಪ್ರಕಾಶ್ ಅಂದ್ರಾದೆ ಹಾಂಚ್ಯಾ ನೀರ್ದೇಶನ ಖಾಲ್ ‘ಮೆಸಸ್ ಒರ್ಗಾಯ್ನಿಕ್ ಪೈ.ಲಿ.’ ಸಂಸ್ಥೆಚ್ಯಾ ಉಮೇಶ್ ಕಡೂರ್ ಮಠ್, ಸಂದೇಶ್ ಶೆಟ್ಟಿ ಆನಿ ಮಧುಕೇಶ್ವರ್ ಹಾಣಿ ಚಲವ್ನ್ ವೆಲೆಂ. 73 ಜಣಾನಿಂ ಹಾಚೊ ಫಾಯ್ದೊ ಜೋಡ್ನ್ ಘೆತ್ಲೊ.
