ಶಿರ್ವಾ ವಾರಾಡ್ಯಾ ಮಟ್ಟಾರ್ ಅಂತರಾಷ್ಟ್ರೀಯ ಸ್ತ್ರೀಯಾಂಚೊ ದೀಸ್: ಜರ್ ಸ್ತ್ರೀಯೊ ಸಂಘಟಿತ್ ಜಾತಿತ್ ತರ್, ಸಮಾಜ್ ಪ್ರಗತಿ ದೆಖ್ತಾ
ಉಡುಪಿ, ಎ.೨. ’ಜರ್ ಸ್ತ್ರೀಯೊ ಸಂಘಟಿತ್ ಜಾತಿತ್ ತರ್ ಸಮಾಜ್ ಪ್ರಗತಿ ದೆಖ್ತಾ’ ಮ್ಹಣನ್ ಸಂದೇಶ್ ದಿಲೊ. ಶಿರ್ವಾ ವಾರಾಡ್ಯಾ ಮಟ್ಟಾರ್ ಶಿರ್ವಾ ಇಗರ್ಜೆಚ್ಯಾ ಸಾವುದ್ ಸಭಾಸಾಲಾಂತ್ ಆಯ್ತಾರಾ ಮಾರ್ಚ್ 31 ವೇರ್ ಶಿರ್ವಾ ವಾರಾಡೊ ಸ್ತ್ರೀ ಸಂಘಟನ್ ಆನಿ ಸ್ವಸಹಾಯ್ ಪಂಗ್ಡಾ ಥಾವ್ನ್ ಆಸಾ ಕೆಲ್ಯಾ ಅಂತರಾಷ್ಟ್ರೀಯ ಸ್ತ್ರೀಯಾಂಚ್ಯಾ ದೀಸಾ ಅಧ್ಯಕ್ಷ್ ಪಣ್ ಘೆತ್ಲ್ಯಾ ಶಿರ್ವಾ ಸಾವುದ್ ಮಾಯ್ ಫಿರ್ಗಜೆಚೊ ವಿಗಾರ್ ತಶೆಂ ಶಿರ್ವಾ ವಾರಾಡೊ ವಿಗಾರ್ ವಾರ್ ಭೋ|ಮಾ|ಬಾ|ಡೆನಿಸ್ ಡೆಸಾನ್ ಮ್ಹಳೆಂ. ತಾಣಿ ಥೊಡಿಂ ದ್ರಷ್ಟಾಂತ್ ಮುಕಾರ್ ದವ್ರುನ್ ’ಸ್ತ್ರೀಯೊ ಕುಟ್ಮಾಂತ್, ಸಮಾಜೆಂತ್ ತ್ಯಾಗ್ ಸೆವಾ ದಿಂವ್ಚ್ಯಾ ಸ್ತ್ರೀಯಾಂಕ್, ತಶೆಂಚ್ ಹೆಂ ಕಾರ್ಯೆ ಭೋವ್ ಉತ್ತಿಮ್ ಥರಾನ್ ಮಾಂಡುನ್ ಹಾಡ್ಲ್ಯಾಕ್ ಶಾಭಾಸ್ಕಿ ಪಾಟಯ್ಲಿ
ಉಡುಪಿ ದಿಯೆಸೆಜ್ ಸ್ತ್ರೀ ಆಯೋಗಾಚಿ ನಿರ್ದೇಶಕಿ ಸಂಪದಾಚಿ ಸಂಯೋಜಕಿ ಭಯ್ಣ್ ಜಾನೆಟ್ ಫೆರ್ನಾಂಡಿಸ್ ಹಾಣಿ ದಿವೊ ಪೆಟೊನ್ ಕಾರ್ಯೆ ಉಗ್ತಾವಣ್ ಕರ್ನ್ ’ಸ್ತ್ರೀಯಾಂಕ್ ಏಕ್ ದೀಸ್ ಮಾತ್ರ್ ಮಾನ್ ನ್ಹಯ್, ಹರ್ಯೆಕ್ ದೀಸ್ ಮಾನ್ ಮೆಳೊಂಕ್ ಜಾಯ್’ ಮ್ಹಣನ್ ತಾಣಿ ಸಂದೇಶ್ ದಿಲೊ.ಶಿರ್ವಾ ವಾರಾಡೊ ಕಥೊಲಿಕ್ ಸ್ತ್ರೀ ಸಂಘಟನಾಚೊ ಅತ್ಮಿಕ್ ನಿರ್ದೇಶಕ್ ಮಾ|ಬಾ|ರೋಕ್ ಡಿಸೋಜಾನ್ ದೆವಾಚ್ಯಾ ಉತ್ರಾಂಚ್ಯಾ ನಿಯಾಳ ಸವೆಂ ಮಾಗ್ಣ್ಯಾ ವಿಧಿ ಚಲಂವ್ನ್ ವೆಲಿ. ಕೇಂದ್ರಿಯಾ ಕಥೊಲಿಕ್ ಸ್ತ್ರೀ ಸಂಘಟನಾಚಿ ಕಾರ್ಯದರ್ಶಿ ಕೊಟಿಲ್ಡಾ ಡಿಸೋಜಾನ್ ’ಸ್ತ್ರೀ ಸೊಸ್ಣಿಕಾಯೆಚಿ ಜಾವ್ನಾಸೊನ್, ತಿ ಕುಟ್ಮಾಂತ್ ಸಮಾಜೆಂತ್ ಸದಾಂಚ್ ನಿಸ್ವಾರ್ಥ್ ಸೆವಾ’ ದಿತಾಂ ಮ್ಹಣನ್ ಶುಭಾಷಯ್ ಪಾಟಯ್ಲೆಂ.
ಸಂಪನ್ಮೂಳ್ ವ್ಯಕ್ತಿ ಜಾವ್ನ್ ಪ್ರೊಫೆಸರ್ ಹಿಲ್ಡಾ ರೊಡ್ರಿಗಸ್ ಹಿಣೆ ’ ಕಥೊಲಿಕ್ ಸ್ತ್ರೀ ಜಾವ್ನ್ ಜಲ್ಮಾಲ್ಲೆ ಆಮ್ಚೆಂ ವರ್ತೆ ಭಾಗ್, ಸ್ತ್ರೀಯೆನ್ ಪಯ್ಲೆಂ ಆಪ್ಲ್ಯಾ ವಿಶಿಂ ಚಿಂತಿಜಾಯ್, ಹಾಂವ್ ಕಶಿಂ, ಮೊಜೆಂ ಕುಟಾಮ್ ಕಶೆಂ ಆಸಾ, ಮುಖ್ಲ್ಯಾ ೨೫ ವರ್ಸಾಂ ಉಪ್ರಾಂತ್ ಆಮ್ಚೆ ಸ್ಥಾನ್ ಮಾನ್ ಕಶೆಂ ಆಸೊಂಕ್ ಪುರೊ ಮ್ಹಳ್ಯಾ ವಿಶಿಂ ಚಿಂತಾಪ್ ಆಟಂವ್ಕ್ ಉಲೊ ದಿಲೊ. ತಿಕಾ ವಿಗಾರ್ ವಾರ್ ಭೋ|ಮಾ|ಬಾ|ಡೆನಿಸ್ ಡೆಸಾನ್ ಸನ್ಮಾನ್ ಕೆಲೊ.
ವಾರಾಡ್ಯಾಚ್ಯಾ ಬಾರಾ ಘಟಕಾಂಚ್ಯಾ ಕಾರ್ಯದರ್ಶಿಂಕ್ ಆನಿ ಎನಿಮೇಟರ್ ಜೆಸಿಂತಾ ಡೆಸಾಕ್ ಫುಲಾಂ ದಿಂವ್ನ್ ಮಾನ್ ಕೆಲೊ. ವಾರಾಡ್ಯಾಚ್ಯಾ ಹರ್ಯೇಕ್ ಘಟಕಾಚ್ಯಾನಿಂ ಸಾಂಸ್ಕ್ರತಿಕ್ ಕಾರ್ಯೆ ಪ್ರದರ್ಶನ್ ಕೆಲೆಂ. ವಾರಾಡೊ ಕಥೊಲಿಕ್ ಸ್ತ್ರೀ ಸಂಘಟನಾಚಿ ಅಧ್ಯಕ್ಷಿಣ್ ಟ್ರೀಜಾ ಮಚಾದೊನ್ ಸ್ವಾಗತ್ ಮಾಗ್ಲೊ. ವಾರಾಡೊ ಉಪಾಧ್ಯಕ್ಷಿಣ್ ಸುನೀತಾ ಮಿನೇಜೆಸಾನ್ ಧನ್ಯವಾದ್ ಪಾಟಯ್ಲೆಂ. ವೀಡಾ ಡಿಸೋಜಾ ಪಿಲಾರ್ ಆನಿ ಟ್ರೀಜಾ ಕಾರ್ಡೊಜಾ ಬೆಳ್ಮಣ್ ಹಾಣಿ ಕಾರ್ಯೆ ನಿರೂಪಣ್ ಕೆಲೆಂ.
