ಡೆಸ್ಕ್‌: ಚರ್ಚ್‌ನ ಪ್ರಾರ್ಥನಾ ಕಾರ್ಯಕ್ರಮದ ಸಂದರ್ಭದಲ್ಲಿ ಸಾವಿನ ನಶ್ವರತೆ ಕುರಿತು ಬೋಧನೆ ನೀಡುತ್ತಿದ್ದ ಧರ್ಮಗುರುಗಳ ಮೇಲೆ ಏಕಾಏಕಿ ಬೃಹತ್‌ ಶಿಲುಬೆ ಬಿದ್ದ ಪರಿಣಾಮ ಅವರು ದುರಂತ ಸಾವು ಕಂಡಿದ್ದಾರೆ ಎಂದು ವರದಿಯಾಗಿದೆ. ಈ ಘಟನೆಗೆ ಸಂಬಂಧಿಸಿದ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ.
ಜೀವನ ಎಷ್ಟು ಅನಿಶ್ಚಿತ ಎಂಬುದನ್ನು ಯಾರೂ ಊಹಿಸಲು ಸಾಧ್ಯವಿಲ್ಲ. ಮನುಷ್ಯನ ಬದುಕಿನಲ್ಲಿ ಮುಂದಿನ ಕ್ಷಣದಲ್ಲಿ ಏನಾಗುತ್ತದೆ ಎಂಬುದು ಯಾರಿಗೂ ತಿಳಿದಿರುವುದಿಲ್ಲ. ಜೀವನ ನೀರಿನ ಮೇಲಿನ ಗುಳ್ಳಿ ಇದ್ದ ಹಾಗೆ. ಸಾವು ಯಾವಾಗ ಬೇಕಾದರೂ ಬರಬಹುದು. ಇದೇ ಕಾರಣಕ್ಕೆ ಜೀವನದ ಪ್ರತಿಯೊಂದು ಕ್ಷಣವೂ ಅಮೂಲ್ಯ ಎಂಬ ಸಂದೇಶವನ್ನು ಧಾರ್ಮಿಕ ಬೋಧನೆಗಳಲ್ಲಿಯೂ ನೀಡಲಾಗುತ್ತದೆ.
ಆದರೆ, ಜೀವನದ ನಶ್ವರತೆ ಮತ್ತು ಸಾವಿನ ಕುರಿತು ಜನರಿಗೆ ಬೋಧನೆ ನೀಡುತ್ತಿದ್ದ ಧರ್ಮಗುರುಗಳೊಬ್ಬರು ದುರಂತ ಘಟನೆಯಲ್ಲಿ ಮೃತಪಟ್ಟಿರುವ ಘಟನೆ ಇದೀಗ ಗಮನ ಸೆಳೆದಿದೆ.ದಕ್ಷಿಣ ಅಮೆರಿಕದ ಈಕ್ವೆಡಾರ್ ದೇಶದ ಗುವಾಕ್ವಿಲ್ ನಗರದಲ್ಲಿ ಈ ಘಟನೆ ನಡೆದಿದೆ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ. ಫಾದರ್ ಪ್ಯಾಟ್ರಿಸಿಯೊ ಆಲ್ಫ್ರೆಡೊ ಸ್ಯಾಂಚೆಜ್ ಮೊಲಿನಾರಿ (Father Patricio Alfredo Sánchez Molinari) ಎಂಬ ಪಾದ್ರಿಯೇ ಈ ದುರಂತದಲ್ಲಿ ಮೃತಪಟ್ಟವರು. ಪ್ರಾರ್ಥನಾ ಕಾರ್ಯಕ್ರಮದ ಸಂದರ್ಭದಲ್ಲಿ ಅವರ ಹಿಂದಿದ್ದ ದೊಡ್ಡ ಶಿಲುಬೆ ಏಕಾಏಕಿ ಮುರಿದು ಬಿದ್ದ ಪರಿಣಾಮ ಅವರು ಗಂಭೀರವಾಗಿ ಗಾಯಗೊಂಡು ಸಾವನ್ನಪ್ಪಿದ್ದಾರೆ ಎಂದು ವರದಿಯಾಗಿದೆ.
ಈ ಘಟನೆಯ ದೃಶ್ಯಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡುತ್ತಿದ್ದು, ಅನಿರೀಕ್ಷಿತ ದುರಂತದ ಬಗ್ಗೆ ಜನರು ಆಘಾತ ವ್ಯಕ್ತಪಡಿಸುತ್ತಿದ್ದಾರೆ.
ಪ್ರಾರ್ಥನೆಯ ನೇರ ಪ್ರಸಾರದ ವೇಳೆ ಸಂಭವಿಸಿದ ದುರಂತ :
ವರದಿಗಳ ಪ್ರಕಾರ, ಗುವಾಕ್ವಿಲ್‌ನ ಅವರ್ ಲೇಡಿ ಆಫ್ ಪರ್ಪೆಚುಯಲ್ ಹೆಲ್ಪ್ ಚರ್ಚ್‌ನಲ್ಲಿ ಧರ್ಮಗುರು ಮೊಲಿನಾರಿ ಧಾರ್ಮಿಕ ಸೇವೆಯಲ್ಲಿ ನಿರತರಾಗಿದ್ದರು. ಅವರು ಬಲಿಪೀಠದ ಹಿಂದೆ ನಿಂತು ಪ್ರಾರ್ಥನೆ ಮತ್ತು ಧರ್ಮೋಪದೇಶ ನಡೆಸುತ್ತಿದ್ದ ಸಂದರ್ಭದಲ್ಲಿ ಈ ಘಟನೆ ಸಂಭವಿಸಿದೆ.
ಆ ಸಮಯದಲ್ಲಿ ಅವರ ಹಿಂದಿನ ಗೋಡೆಯ ಮೇಲೆ ದೊಡ್ಡ ಶಿಲುಬೆ ಗೋಡೆಗೆ ಅಳವಡಿಸಲಾಗಿತ್ತು. ಪ್ರಾರ್ಥನಾ ಕಾರ್ಯಕ್ರಮದ ನೇರ ಪ್ರಸಾರ ನಡೆಯುತ್ತಿದ್ದಾಗ, ಇದ್ದಕ್ಕಿದ್ದಂತೆ ಶಿಲುಬೆ ಮುಂದಕ್ಕೆ ಬಾಗಿ ಪಾದ್ರಿಯ ಮೇಲೆ ಬಿದ್ದಿದೆ ಎನ್ನಲಾಗಿದೆ. ಅನಿರೀಕ್ಷಿತವಾಗಿ ಸಂಭವಿಸಿದ ಈ ಘಟನೆಯಿಂದ ಅಲ್ಲಿದ್ದ ಭಕ್ತರು ಬೆಚ್ಚಿಬಿದ್ದಿದ್ದಾರೆ.
ಶಿಲುಬೆ ಬಿದ್ದ ಬಳಿಕ ಧರ್ಮಗುರುಳಿಗೆ ಸ್ವತಃ ಎದ್ದು ನಿಲ್ಲಲು ಸಾಧ್ಯವಾಗಲಿಲ್ಲ ಎಂದು ವರದಿಗಳು ತಿಳಿಸಿವೆ. ಘಟನೆಯನ್ನು ಕಂಡ ಜನರು ಕಿರುಚುತ್ತಾ ಅವರ ನೆರವಿಗೆ ಧಾವಿಸಿದ್ದಾರೆ.ತಕ್ಷಣವೇ ತುರ್ತು ವೈದ್ಯಕೀಯ ನೆರವಿಗಾಗಿ ಕರೆ ಮಾಡಲಾಗಿದ್ದು, ರಕ್ಷಣಾ ಸಿಬ್ಬಂದಿ ಸ್ಥಳಕ್ಕೆ ಆಗಮಿಸಿದ್ದಾರೆ. ಆದರೆ, ಅಷ್ಟರಲ್ಲಾಗಲೇ ಗಂಭೀರ ಪರಿಸ್ಥಿತಿ ನಿರ್ಮಾಣವಾಗಿತ್ತು. ಅಧಿಕಾರಿಗಳ ಮಾಹಿತಿ ಪ್ರಕಾರ, ಧರ್ಮಗುರು ಅದೇ ದಿನ ಮೃತಪಟ್ಟಿದ್ದಾರೆ ಎಂದು ಘೋಷಿಸಲಾಯಿತು.
ಸಾವಿನ ಬಗ್ಗೆ ಮಾತನಾಡಿದ ಕೆಲವೇ ಕ್ಷಣಗಳಲ್ಲಿ ದುರಂತ :
ಈ ಘಟನೆಯಲ್ಲಿ ಜನರ ಗಮನ ಸೆಳೆದಿರುವ ಮತ್ತೊಂದು ಅಂಶವೆಂದರೆ, ದುರಂತ ಸಂಭವಿಸುವುದಕ್ಕೂ ಕೆಲವೇ ಕ್ಷಣಗಳ ಮೊದಲು ಧರ್ಮಗುರು ಜೀವನದ ನಶ್ವರತೆಯ ಕುರಿತು ಮಾತನಾಡುತ್ತಿದ್ದರು ಎನ್ನುವುದು.ತಮ್ಮ ಧರ್ಮೋಪದೇಶದ ವೇಳೆ ಅವರು ಜನರು ಮೊಬೈಲ್ ಫೋನ್‌ಗಳಲ್ಲಿ ಹೆಚ್ಚಿನ ಸಮಯ ಕಳೆಯುವ ಬದಲು ದೇವರ ಆರಾಧನೆಗೆ ಮತ್ತು ತಮ್ಮ ಕುಟುಂಬದ ಸದಸ್ಯರು ಹಾಗೂ ಪ್ರೀತಿಪಾತ್ರರೊಂದಿಗೆ ಸಮಯ ಕಳೆಯಲು ಆದ್ಯತೆ ನೀಡಬೇಕು ಎಂದು ಸಲಹೆ ನೀಡಿದ್ದರು ಎಂದು ಮಾಧ್ಯಮ ವರದಿಗಳು ತಿಳಿಸಿವೆ.
ಜೀವನದಲ್ಲಿ ನಾವು ಯಾವುದಕ್ಕೆ ಹೆಚ್ಚು ಸಮಯ ನೀಡುತ್ತಿದ್ದೇವೆ ಎಂಬುದನ್ನು ಪ್ರತಿಯೊಬ್ಬರೂ ಯೋಚಿಸಬೇಕು ಎಂಬ ಸಂದೇಶವನ್ನು ಅವರು ನೀಡಿದ್ದರು ಎನ್ನಲಾಗಿದೆ. ಸಾವಿನ ಅನಿವಾರ್ಯತೆ ಮತ್ತು ಜೀವನದ ಕ್ಷಣಿಕತೆಯ ಕುರಿತು ಮಾತನಾಡಿದ ಬಳಿಕ ಅವರು ಮುಂದಿನ ಪ್ರಾರ್ಥನೆಯನ್ನು ಆರಂಭಿಸಿದ್ದರು. ಈ ಸಂದರ್ಭದಲ್ಲಿ ಅವರ ಹಿಂದಿದ್ದ ಶಿಲುಬೆ ಬಿದ್ದಿದೆ ಎಂದು ವರದಿಯಾಗಿದೆ.ಜೀವನದ ಮೌಲ್ಯ, ಸಮಯದ ಮಹತ್ವ ಮತ್ತು ಸಾವಿನ ಅನಿಶ್ಚಿತತೆಯ ಕುರಿತು ಬೋಧನೆ ನೀಡುತ್ತಿದ್ದ ಪಾದ್ರಿಯೇ ಕೆಲವೇ ಕ್ಷಣಗಳಲ್ಲಿ ಇಂತಹ ದುರಂತಕ್ಕೆ ಬಲಿಯಾಗಿರುವುದು ಅನೇಕರನ್ನು ಭಾವುಕರನ್ನಾಗಿಸಿದೆ.
