ಕೋಲಾರ : ಪತ್ರಿಕೋದ್ಯಮದ ಕ್ಷೇತ್ರದಲ್ಲಿ ಚುರುಕಾಗಿ ಕಾರ್ಯನಿರ್ವಹಿಸುತ್ತಿರುವ ಕೋಲಾರ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘ (ರಿ.) ಕಳೆದ ಮೂರು ವರ್ಷಗಳಲ್ಲಿ ಅನೇಕ ನೂತನ ಹಾಗೂ ಮಾದರಿ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡು ರಾಜ್ಯದ ಪತ್ರಕರ್ತರ ವಲಯದಲ್ಲಿ ಗಮನ ಸೆಳೆದಿದೆ. ಸಂಘದ ಸಂಘಟನಾ ಬಲ, ಸಾಮಾಜಿಕ ಹೊಣೆಗಾರಿಕೆ ಮತ್ತು ಪತ್ರಕರ್ತರ ಕಲ್ಯಾಣ ಚಟುವಟಿಕೆಗಳ ಹಿನ್ನೆಲೆಯಲ್ಲಿ ಕರ್ನಾಟಕ ರಾಜ್ಯ ಕಾರ್ಯನಿರತ ಪತ್ರಕರ್ತರ ಸಂಘವು ಕೋಲಾರ ಜಿಲ್ಲಾ ಘಟಕಕ್ಕೆ “2022ನೇ ಸಾಲಿನ ಕ್ರಿಯಾಶೀಲ ಸಂಘ ಪ್ರಶಸ್ತಿ” ನೀಡಿ ಗೌರವಿಸಿದೆ. ಈ ಪ್ರಶಸ್ತಿಯನ್ನು 2023ರಲ್ಲಿ ದಾವಣಗೆರೆಯಲ್ಲಿ ನಡೆದ ರಾಜ್ಯ ಸಮಾವೇಶದಲ್ಲಿ ಪ್ರದಾನ ಮಾಡಲಾಯಿತು.
ಪತ್ರಕರ್ತರ ಕಲ್ಯಾಣ ನಿಧಿ – ಅಪರೂಪದ ಉಪಕ್ರಮ
ಸಂಘದ ಪ್ರಮುಖ ಸಾಧನೆಯೆಂದರೆ ಪತ್ರಕರ್ತರು ಮತ್ತು ಅವರ ಕುಟುಂಬದವರಿಗೆ ಆಪತ್ಕಾಲದಲ್ಲಿ ನೆರವಾಗುವ ಉದ್ದೇಶದಿಂದ ₹1 ಕೋಟಿ ಮೌಲ್ಯದ ಪತ್ರಕರ್ತರ ಕಲ್ಯಾಣ ನಿಧಿ ಸ್ಥಾಪನೆಗೆ ಚಾಲನೆ ನೀಡಿರುವುದು. ಈಗಾಗಲೇ ₹30.50 ಲಕ್ಷವನ್ನು ನಿಧಿ ಖಾತೆಗೆ ಠೇವಣಿ ಇಡಲಾಗಿದ್ದು, ಅದರ ಬಡ್ಡಿದಾರಿತ ಹಣದಿಂದ ಅಗತ್ಯ ಸಹಾಯ ಹಸ್ತ ಚಾಚಲಾಗುತ್ತಿದೆ.
ಡಿ.ವಿ.ಜಿ. ಜಯಂತಿ – ಸಂಸ್ಥಾಪಕ ದಿನಾಚರಣೆ
ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ಸಂಸ್ಥಾಪಕರಾದ ಡಿ.ವಿ. ಗುಂಡಪ್ಪ (ಡಿ.ವಿ.ಜಿ) ಅವರ ಜನ್ಮದಿನ ಮಾರ್ಚ್ 17 ರಂದು ಪ್ರತಿವರ್ಷ ಸಂಘದ ಸಂಸ್ಥಾಪಕ ದಿನಾಚರಣೆಯಾಗಿ ಆಚರಿಸಲು ನಿರ್ಧರಿಸಲಾಗಿದೆ.
ಕಾರ್ಮಿಕ ದಿನಾಚರಣೆ ಮತ್ತು ರಾಜ್ಯೋತ್ಸವ
ಪತ್ರಕರ್ತರ ಸಂಘವು ಕಾರ್ಮಿಕ ಸಂಘಟನೆಯೂ ಆಗಿರುವುದರಿಂದ ಮೇ 1ರಂದು ಕಾರ್ಮಿಕ ದಿನಾಚರಣೆ ಪ್ರತಿ ವರ್ಷ ನಡೆಸಲಾಗುತ್ತಿದೆ.
ನಾಡಹಬ್ಬವಾದ ಕನ್ನಡ ರಾಜ್ಯೋತ್ಸವದ ಅಂಗವಾಗಿ ಅಕ್ಟೋಬರ್ 31ರಂದು ಕನ್ನಡ ನಾಡು ನುಡಿಗಾಗಿ ಸೇವೆ ಸಲ್ಲಿಸುತ್ತಿರುವ ಇಬ್ಬರು ಕನ್ನಡ ಸೇವಕರಿಗೆ “ಕನ್ನಡ ಪರಿಚಾರಕ ಪ್ರಶಸ್ತಿ” ನೀಡಿ ಗೌರವಿಸಲಾಗುತ್ತಿದೆ. ಈ ಸಂದರ್ಭದಲ್ಲಿ ಸಂವಾದ ಕಾರ್ಯಕ್ರಮವೂ ಆಯೋಜನೆಗೊಂಡಿರುತ್ತದೆ.
ಕಾಮರೂಪಿ ಸಂಸ್ಮರಣೆ ಮತ್ತು ಹಿರಿಯರ ಗೌರವ
ಕೋಲಾರ ಮೂಲದ ಹಿರಿಯ ಪತ್ರಕರ್ತ ದಿವಂಗತ ಎಂ.ಎಸ್. ಪ್ರಭಾಕರ (ಕಾಮರೂಪಿ) ಅವರ ಸಂಸ್ಮರಣೆ ದಿನವಾದ ಡಿಸೆಂಬರ್ 20ರಂದು ಪ್ರತಿವರ್ಷ ವಿಶೇಷ ಕಾರ್ಯಕ್ರಮವನ್ನು ಆಯೋಜಿಸಲಾಗುತ್ತದೆ.
ಇದೇ ರೀತಿಯಲ್ಲಿ ಜಿಲ್ಲೆಯ ಹಿರಿಯ ಪತ್ರಕರ್ತರ ಹುಟ್ಟುಹಬ್ಬ ಅಥವಾ ಜಯಂತಿಯಂದು ಅರ್ಹ ಪತ್ರಕರ್ತರೊಬ್ಬರಿಗೆ ಸನ್ಮಾನ ಮತ್ತು ದಿವಂಗತರ ಸ್ಮರಣೆ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗುತ್ತದೆ.
ಹೊಸ ವರ್ಷ ಸ್ನೇಹಮಿಲನ ಮತ್ತು ಕಾರ್ಯಾಗಾರಗಳು
ಪ್ರತಿ ವರ್ಷದ ಜನವರಿ 1ರಂದು “ಸ್ನೇಹಮಿಲನ” ಕಾರ್ಯಕ್ರಮ ಆಯೋಜಿಸಲಾಗುತ್ತಿದ್ದು, ಹಿಂದಿನ ವರ್ಷದ ಅವಲೋಕನ ಮತ್ತು ಮುಂದಿನ ವರ್ಷದ ಮಾರ್ಗದರ್ಶನ ಕುರಿತ ಸಂವಾದ ನಡೆಯುತ್ತದೆ.
ಇದಲ್ಲದೆ, ಸಾಮಾಜಿಕ ಹಾಗೂ ಪ್ರಚಲಿತ ವಿಷಯಗಳ ಕುರಿತ ಕಾರ್ಯಾಗಾರಗಳು ಪತ್ರಕರ್ತರಿಗಾಗಿ ನಿಯಮಿತವಾಗಿ ನಡೆಯುತ್ತಿವೆ.
ರಾಜಕಾರಣಿಗಳ ಬದಲು ತಜ್ಞರೇ ಅತಿಥಿಗಳು
ಸಂಘದ ಇನ್ನೊಂದು ವಿಶಿಷ್ಟ ಕ್ರಮವೆಂದರೆ ಅದರ ಯಾವುದೇ ಕಾರ್ಯಕ್ರಮಗಳಿಗೆ ರಾಜಕಾರಣಿಗಳನ್ನು ಆಹ್ವಾನಿಸುವ ಬದಲು, ಪತ್ರಿಕೋದ್ಯಮ ಕ್ಷೇತ್ರದ ಹಿರಿಯರು ಹಾಗೂ ವಿಷಯ ತಜ್ಞರನ್ನು ಅತಿಥಿಗಳಾಗಿ ಆಹ್ವಾನಿಸುವ ಪದ್ದತಿಯನ್ನು ಪ್ರಾರಂಭಿಸಿರುವುದು.
ಸಂಘದ ಒಗ್ಗಟ್ಟು – ಮಾದರಿ
ಒಗ್ಗಟ್ಟಿನಿಂದ ಕಾರ್ಯನಿರ್ವಹಿಸುತ್ತಿರುವ ಕೋಲಾರ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘವು ತನ್ನ ಚಟುವಟಿಕೆಗಳ ಮೂಲಕ ರಾಜ್ಯದ ಇತರ ಘಟಕಗಳಿಗೆ ಮಾದರಿಯಾಗಿದೆ ಎಂದು ಸಂಘದ ಅಧ್ಯಕ್ಷ ಬಿ.ವಿ. ಗೋಪಿನಾಥ್ ತಿಳಿಸಿದ್ದಾರೆ.
ಅವರು ಮುಂದಿನ ದಿನಗಳಲ್ಲಿ ಕಲ್ಯಾಣ ನಿಧಿ ವಿಸ್ತರಣೆ ಹಾಗೂ ಪತ್ರಕರ್ತರ ವೃತ್ತಿ ಅಭಿವೃದ್ಧಿಗೆ ಸಂಬಂಧಿಸಿದ ತರಬೇತಿ ಶಿಬಿರಗಳನ್ನು ಆಯೋಜಿಸುವ ಯೋಜನೆಗಳಿವೆ ಎಂದೂ ಹೇಳಿದರು.