ಕಟಪಾಡಿ (6 ಸಪ್ತೆಂಬರ್ 2026) ಆಶಾವಾದಿ ಪ್ರಕಾಶನಾಚ್ಯಾ ’ಕೆ.ಬಿ.ಎಸ್’ (ಲಿಪಿಭಾಯ್ಲಿ ಕೊಂಕಣಿ) ಯೆವ್ಜಣೆಖಾಲ್ ಚೊವ್ತೆಂ ಪುಸ್ತಕ್ ’ಕ್ಯಾಥರಿನ್ ರೊಡ್ರಿಗಸಾಚ್ಯೊ ಕಥಾ’ ಲೊಕಾರ್ಪಣ್ ಕಾರ್ಯೆಂ, ಆಯ್ತಾರಾ (ಸಪ್ತೆಂಬರ್ ೬) ಸಕಾಳಿಂ ಸಾಡೆ ಥಾ ವೊರಾಂಚೆರ್, ಕಟಪಾಡಿಚ್ಯಾ ಜೋನ್ಸ್ ಆರ್ಕ್ ಘರಾಂಗ್ಣಾಂತ್ ಚಲ್ಲೆಂ. ನಾಮ್ನೆಚೊ ತುಳು ಸಾಹಿತಿ ಮುದ್ದು ಮೂಡುಬೆಳ್ಳೆನ್, ಆಶಾವಾದಿ ಪ್ರಕಾಶನಾನ್ ಕ್ಯಾಥರಿನ್ ರೊಡ್ರಿಗಸಾಚ್ಯಾ ೫೦ ಮೊಟ್ವ್ಯಾ ಕಾಣಿಯಾಂಕ್ ನಾಗರಿ ಲಿಪಿಂತ್ ಲಿಪ್ಯಂತರಣ್ ಕೆಲ್ಲೆಂ ಪುಸ್ತಕ್ ಲೊಕಾರ್ಪಣ್ ಕರುನ್ ’ಕ್ಯಾಥರಿನ್ ರೊಡ್ರಿಗಸ್’ ತುಳು ಸಾಹಿತ್ಯಾಂತ್ ಏಕ್ ವ್ಹಡ್ ನಾಂವ್, ಕನ್ನಡ, ತುಳು ಸಾಹಿತ್ಯ್, ನಾಟಕ್ ಶೆತಾಂತ್ ಸಯ್ತ್ ಜಾಯ್ತೆಂ ಯೋಗ್ದಾನ್ ದಿಲಾಂ ದೆಕುನ್ ತಿಚೆಂ ಪುಸ್ತಕ್ ಲೊಕಾರ್ಪಣ್ ಕರುಂಕ್ ಮ್ಹಾಕಾ ಖರೊಚ್ ಅಭಿಮಾನ್ ಭಗ್ತಾ ಮ್ಹಣಾಲೊ.
ಕಾರ್ಯಾಚ್ಯಾಸುರ್ವಾತೆರ್ ಲೊರೆಟಾ ವೀಣಾಮೊಂತೆರೊನ್ ಸರ್ವಾಂಕ್ ಯೆವ್ಕಾರ್ ಮಾಗೊನ್ ಮುದ್ದು ಮೂಡುಬೆಳ್ಳೆ, ಆಂಡ್ರ್ಯೂ ಎಲ್. ಡಿಕುನ್ಹಾ, ವಲ್ಲಿ ಕ್ವಾಡ್ರಸ್, ಕ್ಯಾಥರಿನ್ ರೊಡ್ರಿಗಸ್ ಆನಿ ಆಗ್ನೆಲ್ ರೊಡ್ರಿಗಸ್ ಹಾಂಕಾಂ ವೆದಿಕ್ ಯೆವ್ಕಾರ್ ದಿತಚ್ ಸಿಂತಿಯಾ, ಫ್ರೀಡಾ ಆನಿ ಪಂಗ್ಡಾಚ್ಯಾನಿಂ ಪ್ರಾರ್ಥನ್ ಗೀತ್ ಗಾಯ್ಲೆಂ. ಬಾಯ್ ಸ್ವೀನಿ ರೊಡ್ರಿಗಸಾನ್ ಯೆವ್ಕಾರ್ ಉಲವ್ಪ್ ಕರ್ತಚ್ ಕೆ.ಬಿ.ಎಸ್. ಸಲ್ಹಾ ಸಮಿತಿಚ್ಯಾ ಸಾಂದ್ಯಾನ್ ಆಂಡ್ರ್ಯೂನ್ ಎಲ್. ಡಿಕುನ್ಹಾನ್ ಕೆ.ಬಿ.ಎಸ್. (ಕೊಂಕಣಿ ಬಿಯೋಂಡ್ ಸ್ಕ್ರಿಪ್ಟ್) ವಿಷ್ಯಾಂತ್ ಉಲವ್ನ್ “ಭಾಸ್ ಜಾವ್ನಾಸಾ, ಅಭಿವ್ಯಕ್ತೆಚೆಂ ಮಾಧ್ಯಮ್. ಮಾಯ್ಭಾಸ್ ಅಮ್ಚ್ಯಾ ಪುರ್ವಜಾಂ ಥಾವ್ನ್ ಮೆಳ್ಲ್ಲಿ ಅಸ್ಮಿತಾಯ್. ಮೌಕಿಕ್ (ತೊಂಡಾ ಉತ್ರಾನಿಂ) ಆಯಿಲ್ಲಿ. ಕೊಂಕ್ಣೆಂತ್ ಕಿತ್ಲೆಶ್ಯಾ ಸಾಹಿತಿಂನಿ ಸೆವಾ ದಿವ್ನ್ ತ್ಯಾಗ್ ಅರ್ಪಿಲಾ. ಅಜ್ ಕಾಲ್ ಅಮ್ಚೆ ಬರವ್ಪಿ ಆನಿ ಕೊಂಕಣಿ ಸೆವಕ್ ಭಾಷೆಚ್ಯಾಕೀ ಲಿಪಿಂಕ್ ಚಡ್ ಮಹತ್ವ್ ದಿಲ್ಲೆಬರಿ ದಿಸ್ತಾ. ವೆವೆಗ್ಳ್ಯಾ ಲಿಪಿಂನಿ ಬರಂವ್ಚ್ಯಾ ಬರವ್ಪ್ಯಾಂಕ್ ಏಕ್ ಸಾಂಕೊವ್ ರಸ್ಚೆಂ ಕಾಮ್ ಕಾಂಯ್ ತೆಂಪಾಥಾವ್ನ್ ಆಶಾವಾದಿ ಪ್ರಕಾಶನ್ ಕರುನ್ ಅಸಾ. ಹೆಂ ಕಾರ್ಯೆಂ ತಶೆಂಚ್ ಹ್ಯಾ ಕಾರ್ಯಾಂತ್ ಉಗ್ತಾವಣ್ ಜಾಂವ್ಕ್ ಆಸ್ಚೆಂ ಪುಸ್ತಕ್ ಕೆ.ಬಿ.ಎಸ್. ಯೆವ್ಜಣೆಚೆಂ ಚೊವ್ತೆಂ ಪುಸ್ತಕ್” ಮ್ಹಣಾಲೊ.
ಆಶಾವಾದಿ ಪ್ರಕಾಶನಾಚೊ ವಲ್ಲಿ ಕ್ವಾಡ್ರಸ್ ಪ್ರಾಸ್ತವಿಕ್ ಉಲೊವ್ಪಾಂತ್ ಶಿಕ್ಷಕಾಚ್ಯಾ ದಿಸಾ ಸಮೆಸ್ತ್ ಶಿಕ್ಷಕಾಂಕ್ ಉಲ್ಲಾಸ್ ಪಾಟವ್ನ್ ಮ್ಹಣಾಲೊ “ಹಾಂವ್ ಕೊಂಕಣಿ ಸಾಹಿತ್ಯ್ ವಾಚುಂಕ್ ಶಿಕ್ಲ್ಲೊಂ ಪಾಂಗ್ಳಾಂತ್, ಸಾಹಿತ್ಯ್ ಮಾತ್ರ್ ನ್ಹಯ್, ಹೆರಾಂಕ್ ಮಾನ್ ದಿವ್ನ್ ಸ್ವತಾ ಮಾನ್ ಜೊಡ್ಚಿ ಸೊಭಿತ್ ರಿವಾಜ್ ಸಯ್ತ್ ಪಾಂಗ್ಳಾ ಫಿರ್ಗಜ್ಗಾರಾಂ ಥಾವ್ನ್ ಶಿಕೊನ್ ಆಯ್ಲಾಂ; ಮ್ಹಜ್ಯಾ ಯುವ ಪ್ರಾಯೆರ್ ಎಚ್. ಆರ್. ಆಳ್ವ, ಸ್ಟೀವನ್ ಆಳ್ವ ತಸಲ್ಯಾಂ ಮುಕೆಲ್ಯಾಂ ಥಾವ್ನ್ ಶಿಕೊಂಕ್ ಪ್ರೇತನ್ ಕೆಲಾಂ ಮಾತ್ರ್ ನ್ಹಯ್, ತಾಂಚ್ಯಾ ಪ್ರಭಾವಾಂತ್ ಹಾವ್ ಥೊಡೊ ತೆಂಪ್ ಶಂಕರಪುರ ಸಿವೈಎಮ್-ಚೊ ಸಾಂದೊ ಜಾವ್ನ್ ಆಸ್ಲೊಂ. ಆಶಾವಾದಿ ಪ್ರಕಾಶನಾಖಾಲ್ ಹಾಂವೆಂ ಶೆಂಭರಾಚ್ಯಾಕೀ ಚಡ್ ಪುಸ್ತಕಾಂ ಪ್ರಕಟ್ ಕೆಲ್ಯಾರೀ ತಾಂತು ನೊವೊದ್ ಠಕ್ಕೆ ಕನ್ನಡ ಲಿಪಿಯೆಚಿಂ. ಧಾ ಠಕ್ಕೆ ನಾಗರಿ ಆನಿ ರೊಮಿ ಲಿಪಿಯೆಚಿಂ. ಪುಣ್ ಹ್ಯಾ ನೊವೊದ್ ಠಕ್ಕೆ ಪುಸ್ತಕಾಂವಿಶಿಂ ದೋನ್ ಬರಿಂ ಉತ್ರಾಂ ಉಲಂವ್ಕ್ ಫುಟ್ವನಾಸ್ಚಿಂಚ್ ಧಾ ಠಕ್ಕೆ ನಾಗರಿ ಆನಿ ರೊಮಿ ಲಿಪಿಂತ್ ಪುಸ್ತಕಾಂ ಪರ್ಗಟ್ ಕೆಲ್ಲ್ಯಾಕ್ ಉತ್ರಾನಿಂ ಫಾತ್ರಾಯ್ತಾತ್ ಮ್ಹಳ್ಳೆಂ ಹಾಸ್ಯಾಸ್ಪದ್ ಸಂಗತ್. ಕ್ಯಾಥರಿನ್ ಬಾಯ್ ಆನಿ ಕೆವಿನ್ ಡಿಮೆಲ್ಲೊ ತಸಲ್ಯಾ ಬರವ್ಪ್ಯಾಂಚಾ ಕಾಣಿಯಾಂನಿ ಗ್ರಾಮೀಣ್ ಪ್ರದೇಶಾಚಿಂ ಚಿತ್ರಣಾಂ ಮೆಳ್ತಾತ್.”
ಪುಸ್ತಕ್ ಉಗ್ತಾವ್ಪಿ ಮುದ್ದು ಮೂಡುಬೆಳ್ಳೆ “ಆಪ್ಲಿ ಮಾಯ್ಭಾಸ್ ತುಳು ತರ್ಯೀ ಕೊಂಕಣಿಂತ್ಚ್ ಉಲಯ್ಲೊ. ಆನಿ ಆಪುಣ್ ಆಕಾಶವಾಣಿಂತ್ ವಾವ್ರ್ ಕರ್ತಾಸ್ತಾನಾ ತಾಚ್ಯಾ ಸಾಂಗೊಡ್ಯಾಂಚೊ ಉಲ್ಲೇಕ್ ಕರ್ನ್ ಕ್ಯಾಥರಿನ್ ಬಾಯೆಚ್ಯಾ ಸಾಹಿತ್ಯ್ ವಾವ್ರಾಕ್ ಅಭಾರ್ ಮಾಂದ್ಲೊ.
ಉಪ್ರಾಂತ್ ನಾಮ್ನೆಚೊ ವಿಮರ್ಶಕ್ ನಾನು ಮರೊಲ್ ತೊಟ್ಟಾಮ್ ಹಾಣೆಂ ಸನ್ಮಾನ್ ಕಾರ್ಯೆಂ ಚಲವ್ನ್ ವೆಲೆಂ; ಕ್ಯಾಥರಿನ್ ರೊಡ್ರಿಗಸಾಚ್ಯಾ ಸಾಹಿತ್ಯಿಕ್ ದೇಣ್ಗೆಕ್ ಆಶಾವಾದಿ ಪ್ರಕಾಶನಾ ತರ್ಫೆನ್ ಮುದ್ದು ಮೂಡುಬೆಳ್ಳೆನ್ ಯಾದಿಸ್ತಿಕಾ ಆನಿ ಕಾಣಿಕ್ ದಿವುನ್ ಮಾನ್ ಕೆಲೊ. ಮುದ್ದು ಮೂಡ್ಬೆಳ್ಳೆಕ್ ಆಗ್ನೆಲ್ ರೊಡ್ರಿಗಸಾನ್ ಕಾಣಿಕ್ ದಿಲಿ. ಜೊಸೆಫ್ ಕ್ವಾಡ್ರಸ್ (ಜೊ.ಕ್ವಾ) ಚ್ಯಾ ಕೊಂಕಣಿ ವಾವ್ರಾಕ್ ಆಶಾವಾದಿ ಪ್ರಕಾಶನಾಚ್ಯಾ ತರ್ಫೆನ್ ಸ್ಟೀವನ್ ಜೆ. ಆಳ್ವ ಪಾಂಗ್ಳಾ ಹಾಣೆಂ ಯಾದಿಸ್ತಿಕಾ ಆನಿ ಕಾಣಿಕ್ ದಿವುನ್ ಮಾನ್ ಕೆಲೊ. ಸ್ಟೀವನ್ ಜೆ ಆಳ್ವಕ್ ಆಗ್ನೆಲ್ ರೊಡ್ರಿಗಸಾನ್ ಕಾಣಿಕ್ ದಿಲಿ. ಉಪ್ರಾಂತ್ ವಿಲ್ಫ್ರೆಡ್ ಆರ್. ಪಾಂಗ್ಳಾಚ್ಯಾ ಕೊಂಕಣಿ ವಾವ್ರಾಕ್ ಆಶಾವಾದಿ ಪ್ರಕಾಶನಾ ತರ್ಫೆನ್ ಆಂಡ್ರ್ಯೂ ಎಲ್. ಡಿಕುನ್ಹಾನ್ ಯಾದಿಸ್ತಿಕಾ ಆನಿ ಕಾಣಿಕ್ ದಿವುನ್ ಮಾನ್ ದಿಲೊ. ಆಂಡ್ರ್ಯೂ ಡಿಕುನ್ಹಾಕ್ ಆಗ್ನೆಲ್ ರೊಡ್ರಿಗಸಾನ್ ಕಾಣಿಕ್ ದಿಲಿ.
ತ್ಯೇ ಉಪ್ರಾಂತ್ ರೈಜಲ್ ಫುರ್ಟಾಡೊನ್ ಕೊಂಕಣಿ ಕವಿಗೊಶ್ಟಿ ಆನಿ ಕೊಂಕಣಿ ಕವಿತಾ ಕ್ವಿಝ್ ಚಲವ್ನ್ ವ್ಹರುಂಕ್ ಬಾಯ್ ಸಲೊಮಿ ಮೊಗರ್ನಾಡ್ ಹಿಕಾ ವೆದಿಕ್ ಆಪವ್ನ್ ತಿಚಿ ವಳಕ್ ಕರುನ್ ದಿತಚ್ ಸಲೊಮಿಚ್ಯಾ ಅಧ್ಯಕ್ಷ್ಪಣಾರ್ ಅಪುರ್ಭಾಯೆಚಿ ಕವಿಗೊಶ್ಟಿ ಆನಿ ಕೊಂಕಣಿ ಕವಿತಾ ಕ್ವಿಝ್ ಚಲವ್ನ್ ವೆಲಿ. ಡೊ.ವಿಜಯ್ ಕುಮಾರ್ ಪೈ ಕೊಚಿನ್, ಡೊ.ಫ್ಲಾವಿಯಾ ಕ್ಯಾಸ್ತೆಲಿನೊ, ಎಲಿಜಾ ಫೆರ್ನಾಂಡಿಸ್, ಮೀನಾ ಮೊಂತೆರೊ, ವಾಯ್ಲೆಟ್ ಫ್ಲೇವಿ ಡಿಸೊಜ್, ಕ್ಯಾಥರಿನ್ ರೊಡ್ರಿಗಸ್, ಮುದ್ದು ಮೂಡುಬೆಳ್ಳೆ, ವಿಲ್ಫ್ರೆಡ್ ಆರ್ ಪಾಂಗ್ಳಾ, ಮೆಲ್ವಿನ್ ವಾಸ್ ಕೆಲರಾಯ್, ವಲ್ಲಿ ಕ್ವಾಡ್ರಸ್, ಆಂಡ್ರ್ಯೂ ಎಲ್ ಡಿ ಕುನ್ಹಾ ಆನಿ ಬಾಪ್ ಪ್ರೀತಮ್ ಮಿನೇಜಸ್ ಹಾಣಿಂ ವಿಂಚ್ಣಾರ್ ಕವಿತಾ ಸಾದರ್ ಕೆಲಿಂ. ಕೊಂಕಣಿ ಕ್ವಿಝಾಂತ್ ಸಮ್ಜೆಲ್ಯಾ ಲೊಕಾಂನಿ ವಾಂಟೆಲಿ ಜಾವ್ನ್ ಇನಾಮಾಂ ಜೊಡ್ಲಿಂ.
ಕಟಪಾಡಿ ಫಿರ್ಗಜಿಚೆ ವಿಗಾರ್ ಮಾ.ಬಾ. ರಾಜೇಶ್ ಪಸನ್ನ, ಹೊಲಿ ಕ್ರೊಸ್ ಕೌನ್ಸಿಲಿಂಗ್ ದಿರೆಕ್ತೊರ್ ಮಾ.ಬಾ. ಪ್ರೀತಮ್ ಜೋಯ್ ಮಿನೇಜಸ್, ಗೊವ್ಳಿಕ್ ಪರಿಶದ್ ಉಪಾಧ್ಯಕ್ಷ್ ಮಾನೆಸ್ತ್ ಹೆಕ್ಟರ್ ಫೆರ್ನಾಂಡಿಸ್, ಕಾರ್ಯದರ್ಶಿ ಶ್ರೀಮತಿ ತೆರೆಜಾ ಲೋಬೊ ಆನಿ ಹೆರ್ ಸಾಂದೆ ಹಾಜರ್ ಆಸ್ಲ್ಲೆ.
ಕ್ಯಾಥರಿನ್ ಬಾಯೆನ್ ಧಿನ್ವಾಸ್ ಪಾಟವ್ನ್ ಕುಮೊಕ್ ಆನಿ ಪಾಟಿಂಬೊ ದಿಲೆಲ್ಯಾಂಕ್ ಫುಲಾಂ ಝಡಾಂ ದೀವ್ನ್ ಅಭಾರ್ ಮಾಂದ್ಲೊ. ದೇಡ್ ವೊರಾಂಕ್ ರುಚಿಕ್ ಜೆವ್ಣಾಸವೆಂ ಕಾರ್ಯೆಂ ಸಂಪ್ಲೆಂ. ಕಟಪಾಡಿ ತಶೆಂಚ್ ಲಾಗ್ಶಿಲ್ಯಾ ಪರಿಸರಾಂತ್ಲ್ಯಾ ದೆಡ್ಶೆಂ ಲೋಕಾಂನಿ ಹ್ಯಾ ಕಾರ್ಯಾಂತ್ ಭಾಗ್ ಘೆತ್ಲೊ.
