JANANUDI.COM NETWORK
ಕುಂದಾಪುರ್ ಭಲಾಯ್ಕಿ ಆಯೋಗಾ ಥಾವ್ನ್ ಕೊರೊನಾ ವೈರಸ್ ವಿಶಿಂ ವಯ್ಜಾ ಥಾವ್ನ್ ಸಮ್ಜಣಿ
ಕುಂದಾಪುರ್ ,ಮಾ.15:ಕುಂದಾಪುರ್ ರೊಜಾರ್ ಮಾಯ್ ಫಿರ್ಗಜ್ ಭಲಾಯ್ಕಿ ಆಯೋಗಾನ್ ಕೊರೊನಾ ವೈರಸ್ ವಿಶಿಂ ವಯ್ಜಾ ಥಾವ್ನ್ ಸಮ್ಜಣಿ ದಿಂವ್ಚೆ ಕಾರ್ಯೆ ಮಾಂಡುನ್ ಹಾಡ್ಲೆಂ.
ಕಿರಿ ಮಂಜೆಶ್ವರ ಭಲಾಯ್ಕಿ ಪ್ರಾಥಮಿಕ್ ಕೇಂದ್ರಾಚಿ ಅಧಿಕಾರಿಣ್ ಡಾ| ನಿಶಾ ರೆಬೆಲ್ಲೊ ಹಾಣಿ ‘ವೈರಸ್ ಕಶೆಂ ಎಕಾಮೇಕಾ ಬದಲ್ತಾ, ಕಶೆಂ ಜಾಗ್ರುತ್‍ಕಾಯ್ ಕರಿಜೆ, ವೈರಸ್ ಕಿತ್ಲ್ಯಾ ದಿಸಾ ಉಪ್ರಾಂತ್ ಮನ್ಸ್ಯಾಂಚ್ಯಾ ಕುಡಿಂತ್ ರಿಗೊನ್ ಪರಿಣಾಮ್ ದಾಖಯ್ತಾ’ ಮ್ಹಣನ್ ಕಳಯ್ತಾ, ಹೆಂ ವೈರಸ್ ಸಾಮನ್ಯ್ ಜಾವ್ನಾಸೊನ್ ಭಿಯೆಂವ್ಚಿ ಗರ್ಜ್ ನಾ, ಪ್ರಾಯೆಚೆಂ ಮನಿಸ್, ವ ಪ್ರತಿರೋಧಕ್ ಸಕತ್ ಉಣೆ ಆಸ್ಲ್ಯಾ ಥಂಯ್ ಮಾತ್ರ್ ಜಿವಾಕ್ ಅಪಾಯ್ ಘಡ್ತಾ, ಪುಣ್ ಕೋಣೆಯಿ ಹ್ಯಾ ವಿಶ್ಯಾಂತ್ ಭಿರಾಂತ್ ಪಾಂವ್ಚಿ ಗರ್ಜ್ ನಾ. ವಿದೇಶಾಂ ಥಾವ್ನ್ ಆಯ್ಲ್ಯಾಂ ಥಾವ್ನ್ ಆಮಿ ಜಾಗ್ರುತ್ ರಾವಾಜೆ, ವಿದೇಶಾ ಥಾವ್ನ್ ಆಯ್ಲ್ಯಾನಿ ಕಡಾಯ್ ಜಾವ್ನ್ ತಾಣಿ ಪಾರ್ಮ್ ಭರ್ನ್ ದಿಂವ್ಕ್ ಆಸಾತ್’ ಮ್ಹಣ್ ಕಳಯ್ಲೆ.
ಕುಂದಾಪುರ್ ಸರ್ಕಾರಿ ಆಸ್ಪತ್ರೆಚೊ ವೈದ್ಯಾಧಿಕಾರಿ ಡಾ|ರೊಬರ್ಟ್ ರೆಬೆಲ್ಲೊನ್ ‘ಕುಂದಾಪುರ್ ಸರ್ಕಾರಿ ಆಸ್ಪತ್ರೆಂತ್ ಕೊರೊನಾ ವೈರಸ್ ಲಾಗ್ಲ್ಯಾ ಪೀಡೆಸ್ತಾಂಕ್ ಚಿಕಿತ್ಸಾ ದಿಂವ್ಚಿ ವ್ಯವಸ್ಥಾ ಕೆಲಾ. ತಾಂಕಾ ಐಸೊಲೇಟಡ್ ಕುಡಾಂ ಆಸಾ ಕೆಲ್ಯಾತ್. ಕೊರೊನಾ ವೈರಸ್ ಲಾಗ್ಲ್ಯಾ ಮ್ಹಣನ್ ದುಭಾವ್ ಆಸಲ್ಯಾ ವ್ಯಕ್ತಿಂಕ್ ಥೊಡೆಂ ದೀಸ್ ಆಸ್ಪತ್ರೆಂತ್ ತೀವ್ರ್ ನಿಗಾ ದವ್ರನ್ ಹೆರಾಂಕ್ ವೈರಸ್ ಪ್ರಸಾರ್ ಜಾಯ್ನಾಶೆಂ ಪ್ರಯತ್ನ್ ಕರ್ತಾಂವ್. ಹಾತ್ ಮೆಳೊಂವ್ಚೆ ಉಣೆ ಕರಿಜೆ, ಘಡಿಯೆ ಘಡಿ ಹಾತ್ ದುವ್ನ್ ಘೆಜೆ’ ಮ್ಹಣನ್ ಸಮ್ಜಣಿ ದಿಲಿ.
ಹ್ಯಾ ವೆಳಾರ್ ವಿಗಾರ್ ಮಾ|ಬಾ|ಸ್ಟ್ಯಾನಿ ತಾವ್ರೊನ್ ಕೊರೊನಾ ವೈರಸ್ ಥಾವ್ನ್ ರಾಕೊಂಕ್ ಆನಿ ಪ್ರಸಾರ್ ಜಾಯ್ನಾ ಜಾಂವ್ಕ್ ಫಿರ್ಗಜ್ ಲೋಕಾಂ ಸವೆಂ ಪ್ರಾರ್ಥನ್ ಭೆಟಯ್ಲೆ. ಆಯೋಗಾಚಿ ಸಂಚಾಲಕಿ ಡಾ|ಸೋನಿ ಡಿಕೋಸ್ತಾನ್ ಸ್ವಾಗತ್ ಮಾಗ್ಲೊ. ಸಾಂದೊ ವಿಲ್ಸನ್ ಡಿಸೋಜಾನ ಧನ್ಯವಾದ್ ಪಾಟಯ್ಲೆ.
