ವರದಿ: ಲಾರೆನ್ಸ್ ಫೆರ್ನಾಂಡಿಸ್, ಬೈಂದೂರ್
ಬೈಂದೂರ್ ’ಕ್ರಿಸ್ತಿ ಕಲಾಂಗಣ್’ ಥಾವ್ನ್”ಮಹಾ ಪಿಟ್ಟಾಷಿ’’ ಕೊಂಕ್ಣಿ ನಾಟಕ್ ಮಹಾ ಪ್ರದರ್ಶನ್
ಬೈಂದೂರ್: ಫಿರ್ಗಜ್ ಫೆಸ್ತಾಚಾ ಸಂದರ್ಭಿ ಸಾಂಸ್ಕೃತಿಕ್ ಮನೋರಂಜನ್ ಕಾರ್ಯಕ್ರಮ್ ಜಾವ್ನ್ ವ್ಹಡ್ಲ್ಯಾ ಫೆಸ್ತಾ ದಿಸಾ ಸಾಂಜೆರ್ ಕೊಂಕ್ಣಿ-ಕನ್ನಡ ಭಾಶೆಚೊ ಫಾಂಕಿವಂತ್ ಬರಯ್ಣಾರ್, ಕಲಾಕಾರ್ ಬರ್ನಾಡ್ ಜೆ. ಕೊಸ್ತಾ, ಹಾಂಚಾ ರಚ್ನೆಚೊ ಕೊಂಕ್ಣಿ ಸಾಮಾಜಿಕ್ ಹಾಸ್ಯ್ ನಾಟಕ್ ‘ಮಹಾ ಪಿಟ್ಟಾಷಿ’ ’ಕ್ರಿಸ್ತಿ ಕಲಾಂಗಣ್’ ಸಂಘಟನಾಚಾ ಕಲಾಕಾರಾಂನಿ ಆಪ್ಲ್ಯಾ ಆಟ್ವ್ಯಾ ವರ್ಸಾಚಾ ಸುವಾಳ್ಯಾರ್ ಫಿರ್ಗಜೆಚಾ ಉಗ್ತಾ ಮೈದಾನಾಚಾ ರಂಗ್ ಮಾಂಚಿಯೆರ್ ಆಪುರ್ಬಾಯೆನ್ ಪ್ರದರ್ಶಿತ್ ಕೆಲೊ.
ಕಾರ್ಯಕ್ರಮಾಚೆ ಸುರ್ವಾತೆರ್ ಕ್ರಿಸ್ತಿ ಕಲಾಂಗಣ್ ಸ್ತ್ರೀಯಾಂನಿ ಸ್ವಾಗತ್ ನೃತ್ಯ್ ಕರುನ್ ಸರ್ವಾಂಕ್ ಬರೊ ಯೆವ್ಕಾರ್ ಮಾಗ್ಲೊ. ಬೆಳ್ವೆ ಫಿರ್ಗಜೆಚೊ ವಿಗಾರ್ ಡೆನಿಸ್ ಡಿ’ಸೋಜಾ, ವಿಗಾರ್ ಮಾ| ಬಾ| ವಿನ್ಸೆಂಟ್ ಕುವೆಲ್ಲೊ, ಫಿರ್ಗಜ್ ಮಂಡಳಿ ಉಪಾಧ್ಯಕ್ಷ್ ಸ್ಟ್ಯಾನಿ ಡಾಯಸ್, ನಾಟಕಾಚೊ ಬರಯ್ಣಾರ್ ಬರ್ನಾಡ್ ಜೆ. ಕೊಸ್ತಾ, ಕ್ರಿಸ್ತಿ ಕಲಾಂಗಣ್ ಸಂಯೋಜಕ್ ಇಗ್ನೇಶಿಯಸ್ ನಜ್ರೆತ್ ವೆದಿಚೆರ್ ಹಾಜರ್ ಜಾವ್ನ್ ದಿವೊ ಪೆಟವ್ನ್ ಆನಿ ಕ್ರಿಸ್ತಿ ಕಲಾಂಗಣ್ ಸಾಂದ್ಯಾನಿ ದೆವಾಕ್ ಹರ್ಸುನ್ ಗೀತ್ ಗಾವ್ನ್ ಕಾರ್ಯಕ್ರಮಾಕ್ ಸುರ್ವಾತ್ ಕೆಲೆಂ.
ಹ್ಯಾ ಸಂದರ್ಭಾರ್ ಕ್ರಿಸ್ತಿ ಕಲಾಂಗಣಾಂತ್ ಸಭಾರ್ ವರ್ಸಾ ಥಾವ್ನ್ ಸೆವಾ ದೀವ್ನ್ ಆಸ್‍ಲ್ಲೊ ಮಾಲ್ಗಡೊ ಕಲಾಕಾರ್ ದೆ| ಮಾರ್ಟಿನ್ ಡಾಯಸಾಚಾ ಅಕಾಲಿಕ್ ಮರ್ಣಾಕ್ ದುಃಖ್ ಪಾವೊನ್ ತಾಚೊ ಉಗ್ಡಾಸ್ ಕಾಡುನ್ ಕ್ರಿಸ್ತಿ ಕಲಾಂಗಣ್ ಸಂಯೋಜಕ್ ಇಗ್ನೇಶಿಯಸ್ ನಜ್ರೆತಾನ್ ಶೃಧ್ಧಾಂಜಲಿ ಪಾಟಯ್ಲೆಂ. ಕಾರ್ಯಕ್ರಮಾಕ್ ಆಧಾರ್ ದಿಲ್ಲ್ಯಾ ಪೋಷಕಾಂಕ್ ಕ್ರಿಸ್ತಿ ಕಲಾಂಗಣ್ ಸಂಘಟನಾನ್ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಉಪ್ಕಾರ್ ಬಾವುಡ್ಲೊ. ಕ್ರಿಸ್ತಿ ಕಲಾಂಗಣ್ ಸಂಘಟನ್ ಕಲಾಂಕಾರಾಂಕ್ ಸಾಂಗಾತಾ ಮೆಳೊಂಕ್ ಏಕ್ ವೆದಿ ಜಾವ್ನಾಸೊನ್ ಕ್ರೀಸ್ತಾಚಾ ತತ್ವ ಪ್ರಕಾರ್ ಚಲ್ತಸ್ತಾನಾ ಮುಕ್ಲ್ಯಾ ದಿಸಾಂನಿ ಜಾಯ್ತ್ಯಾ ಕಲಾಕಾರಾಂಚಿ ದೆಣಿಂ ಉಜ್ವಾಡಾಕ್ ಯೆಂವ್ಕ್ ಕ್ರಿಸ್ತಿ ಕಲಾಂಗಣ್ ದಿವೊ ಜಾವ್ನಾಸಾ ಮ್ಹಣ್ ವಿಗಾರ್ ಮಾ| ಬಾ| ವಿನ್ಸೆಂಟ್ ಕುವೆಲ್ಲೊನ್ ಸಂದೇಶ್ ದಿಲೆಂ.
ನಾಟಕಾಚೊ ಬರಯ್ಣಾರ್ ಬರ್ನಾಡ್ ಜೆ. ಕೊಸ್ತಾಕ್ ತಾಚಾ ಸಾಹಿತ್ಯಾಚಿ ಆನಿ ವಯುಕ್ತಿಕ್ ಪರಿಚಯ್ ಕರುನ್ ಕ್ರಿಸ್ತಿ ಕಲಾಂಗಣಾ ತರ್ಫೆನ್ ಸನ್ಮಾನ್ ಕೆಲೆಂ. ಕ್ರಿಸ್ತಿ ಕಲಾಂಗಣ್ ಆನಿ ಹೆರ್ ಬೈಂದೂರ್ ಫಿರ್ಗಜ್ಗಾರಾಂನಿ ಗಾಂವಾಂತ್ ತಶೆಂ ಪರ್ಗಾವಾಂತ್ ನಾಟಕ್ ಖೆಳೊನ್ ಭರ್ಪೂರ್ ಸಹಕಾರ್ ದಿಲ್ಲ್ಯಾಕ್ ಉಪ್ಕಾರ್ ಬಾವುಡ್ನ್ ಕ್ರಿಸ್ತಿ ಕಲಾಂಗಣಾಕ್ ಬರ್ನಾರ್ಡ್ ಜೆ. ಕೊಸ್ತಾನ್ ಬರೆಂ ಮಾಗ್ಲೆಂ. ಉಪ್ರಾಂತ್ ‘ಮಹಾ ಪಿಟ್ಟಾಷಿ’ ನಾಟಕ್ ’ಕ್ರಿಸ್ತಿ ಕಲಾಂಗಣ್’ ಸಂಘಟನಾಚಾ ಕಲಾಕಾರಾಂನಿ ಆಪುರ್ಬಾಯೆನ್ ಪ್ರದರ್ಶಿತ್ ಕೆಲೊ.
ಕಾರ್ಯಕ್ರಮಾಂಕ್ ಆಧಾರ್ ದಿಲ್ಲಾ ಸಮೇಸ್ತಾಂಕ್ ಪೀಟರ್ ಪಾವ್ಲ್ ನಜ್ರೆತಾನ್ ಧನ್ಯವಾದ್ ಪಾಟಯ್ಲೆಂ ಆನಿ ವೀಣಾ ಫೆರ್ನಾಂಡಿಸಾನ್ ಕಾರ್ಯಕ್ರಮ್ ಚಲವ್ನ್ ವ್ಹೆಲೆಂ.
