ತಿಚೆಂ ರುದಾನ್/ಮಾಂಯ್ ತುಂ ಖಂಯ್ ಆಸಾಯ್?/ ಗಾಯ್/ ಕವಿ: ಜೋಸೆಫ್ ಲುವಿಸ್ ಸಾಸ್ತಾನ್
[ಜೋಸೆಫ್ ಲುವಿಸ್ ಗಾಂವಾಂತ್ ಸಾಸ್ತಾಚೊ, ತಾಚಿಂ ಬರ್ಪಾಂ ಖ್ಯಾತ್ ಪತ್ರಾನಿಂ ಫಾಯ್ಸ್ ಜಾಲ್ಯಾತ್. ಅನೇಕ್ ಕಾಣಿಯೊಯಿ ಫಾಯ್ಸ್ ಜಾಲ್ಯಾತ್. ತಸೆಂಚ್ ಕವಿತಾ ಸರಳ್ ರೀತಿನ್ ಕವಿತಾ ಬರಂವ್ಚಿ ತಾಚಿ ಶೈಲಿ. ಜನನುಡಿ ಡಾಟ್ ಕಾಮ್ ಹಾಚೇರ್ ಹಾಚ್ಯಾ ಪಯ್ಲೆಯಿ ತಾಚಿಂ ಕವಿತಾ ಪ್ರಸಾರ್ ಜಾಲ್ಯಾತ್. ತಾಕಾ ಸಾಹಿತ್ಯ್ ಕ್ಷೇತ್ರಾಚಾ ವಾವ್ರಾಂತ್ ಜಯ್ತ್ ಮಾಗ್ತಾ – ಸಂಪಾದಕ್ ಬರ್ನಾಡ್ ಜೆ.ಕೋಸ್ತಾ]
*ರುದಾನ್ *
~~~~~~~~~~~~~~~~~
ಕಾಜಾರ್ ಜಾಲ್ಲಿ ಹಾಂವ್
ಭುರ್ಗಿಂ ನಾಸ್ತಾನಾ ಕರ್ಗಾತಾಲಿಂ.
ಬಾಳ್ಯಾಚೆಂ ರಡ್ಣೆಂ
ಆಯ್ಕುಂಕ್ ಕಾನ್
ಉಕ್ಲುಂಕ್ ತೆ ಹಾತ್
ಮ್ಹಜಾ ಬಾಳಾಕ್ ದೆಕ್ಚೆ ದೆೊಳೆ ಸ್ವಪ್ಣೆತಾಲೆ.
ತ್ಯಾ ಭುರ್ಗ್ಯಾಂಕ್ ಪಳೆವ್ನ್
ಕಾಳಿಜ್ ಮ್ಹಜೆಂ ಅಕ್ಲಾಸ್ತಾಲೆಂ.
ತಾಂತ್ಲಿ ಎಕ್ಲೀ ತರಿ
ಮ್ಹಜಿ ಧುವ್ ಯಾ ಪೂತ್ ಜಾವ್ನ್
ಮನ್ ಮ್ಹಜೆಂ ಚಾಳ್ವೈತಾಲೆಂ.
ಭಿಕಾರ್ಯಾಂಕ್ ಪಳೆ ಕಿತ್ಲಿಂ ಭುರ್ಗಿಂ,
ಗರ್ಭಾಪಾತ್ ಕರ್ತಲ್ಯಾಂಕ್ ಪಳೆ
ಕಿತ್ಲ್ಯಾ ಬಾಳಾಂಚೊ ಜೀವ್ ಕಾಡ್ತಾತ್
ಭುರ್ಗಿಂ ನಾಕಾ ಮ್ಹಣುನ್ ರಸ್ತ್ಯಾನಿಂ ಸೊಡ್ತಾತ್, ವಿಕ್ತಾತ್.
ತಸಲ್ಯಾಂಕ್ ಜಾತಾನಾ
ಮಾಕಾ ಕಿತ್ಯಾಕ್ ನಾ ???
ಮಾಕಾಂಯಿೂ ಆವಯ್ ಜಾಂವ್ಚಿ
ಆಶಾ ನಾಂಗಿ ???
ಹ್ಯಾ ಮ್ಹಜಾ ವೆಂಗೆತ್
ಏಕ್ ಬಾಳಾಕ್ ಧರ್ಚೆಂ ಭಾಗ್ ನಾಂಗಿ ???
ದೆವಾ,
ಏಕ್ ಆವಯ್ ಜಾಂವ್ಚೆ ರುದಾನ್
ತುಜಾ ಕಾಳ್ಜಾಕ್ ಆಯ್ಕಾನಾಂಗಿ ???
ಕೊಣಾ ಕೊಣಾಕ್ ತುಂ ಫಾವೊ ಕರ್ತಾನಾ
ಹ್ಯಾ ಮ್ಹಜಾ ಗರ್ಭಾಂತ್ ಏಕ್ ಬಾಳ್……
ದುಕಾಂ ಗಳವ್ನ್ ಹಾತ್ ಜೊಡ್ತಾಂ…. ಧನಿಯಾ.
✍️ ಜೋಸೆಫ್ ಲುವಿಸ್, ಸಾಸ್ತಾನ್.
ಮಾಂಯ್ ತುಂ ಖಂಯ್ ಆಸಾಯ್ ?
~~~~~~~~~~~~~~~~~~~~~~~~
ಪ್ರಾಯ್ ಉತ್ರಾಲ್ಲಿ, ಕಾತಿರ್ ಮಿರ್ಯೊ ಪಡ್ಲೆಲಿ
ದೊಳ್ಯಾಂಕ್ ದಿಷ್ಟ್ ನಾತ್ ಲ್ಲಿ ,
ಪಿಕ್ಲೆಲ್ಯಾ ಕೆಸಾಂಚಿ, ದಾಂತ್ ನಾತ್ಲಲಿ,
ಬೇತ್ ಘೆವ್ನ್ ಚಲ್ಚಿ,
ಕೂಲಿ ಕಾಮ್ ಕೆಲ್ಲಿ,
ಆವಯ್ ಆಟ್ ಭುರ್ಗ್ಯಾಂಚಿ ,
ಫುಡಾರಾ ಖಾತಿರ್ ಕಶ್ಟಾಲ್ಲಿ, ಖಾಂವ್ಕ್ ಜೇಂವ್ಕ್ ಭುರ್ಗ್ಯಾಂಕ್ ದಿಲ್ಲಿ,
ನೀಸ್ ಪಿಯೆವ್ನ್ ನಿದ್ತೆಲಿ, ಭುರ್ಗ್ಯಾಂಕ್ ಬರ್ಯಾ ಫುಡಾರಾಕ್ ಪಾವಯ್ಲೆಲ್ಯಾ ಮಾಂಯ್ಕ್,
ಭುರ್ಗಿಂ ಪೂರಾ ವಿಚಾರ್ತಾತ್,
ಮಾಂಯ್ ಆತಾಂ ತುಂ ಖಂಯ್ ಆಸಾಯ್ ?
ಘರ್ಕಾರ್ ಸರೊನ್ ವಿಧವ್ ಜಾಲ್ಲಿ,
ಬಾಪಯ್ಚೊ ಮೋಗ್ ದೀವ್ನ್ ಪೊಸ್ಲೆಲಿ,
ರೀಣ್ ಕಾಡ್ನ್ ಭುರ್ಗ್ಯಾಂಕ್ ಶಿಕಾಪ್ ದಿಲ್ಲಿ,
ವೆಳಾರ್ ಸಕ್ಡಾಂಕೀ ಕಾಜಾರ್ ಕರಯಿಲ್ಲಿ, ನಾತ್ರಾಂಚೊ ಸಾಂಗಾತ್ ಆಶೆಲ್ಲಿ,
ಭುರ್ಗಿಂಚ್ ಮುಜೊ ಆಧಾರ್ ಮ್ಹಣ್ ಚಿಂತ್ಲೆಲ್ಯಾ ಮಾಂಯ್ಕ್,
ಆಜ್ ಭುರ್ಗಿಂ ಸಕ್ಕಡ್ ವಿಚಾರ್ತಾತ್,
ಮಾಂಯ್ ತುಂ ಖಂಯ್ ಆಸಾಯ್..?
ಭುರ್ಗಿಂ ಫುಡಾರ್ ಮ್ಹುಣೊನ್ ಗಲ್ಫಾಕ್ ಉಡೊನ್,
ಹಳ್ಳೆಂತ್ ರಾವುಂಕ್ ನಾಕಾ ಮುಣೊನ್,
ಮಾತಾರಿ ಆವಯ್ಕ್ ಗಾವಾಂತ್ ಸೊಡ್ನ್ ಕೊಲ್ವಾಚ್ಯಾ ಘರಾಂತ್ ತಿಕಾ ಎಕ್ಸುರೆಂ ಕರ್ನ್,
ಆಟ್ ಭುರ್ಗಿಂ ಆಸೊನಿ ಅನಾಥ್ ಕರವ್ನ್,
ನಿಮಾಣೆಂ ತಿಕಾ ಆಶ್ರಾಮಾಂತ್ ಬಂಧಿ ಕರ್ನ್.
ಆತಾಂ ತಿಂಚ್ಚ್ ಭುರ್ಗಿಂ ರಡೊನ್ ವಿಚಾರ್ತಾತ್,
ಮಾಂಯ್ ತುಂ ಆತಾಂ ಖಂಯ್ ಆಸಾಯ್ ?
ನಿಮಾಣೆಂ ದಿಷ್ಟ್ ತಿಚೆರ್ ಲಾಯ್ಲಿನಾ,
ನಾತ್ರಾಂಕ್ ಪಳಂವ್ಚೆಂ ಭಾಗ್ ತಿಕಾ ಮೆಳ್ಳೆಂನಾ, ಸುನಾ ಜಾವ್ಯಾಂಚೊ ಸಾಂಗಾತ್ ಲಾಭಂವ್ಕ್ ನಾ,
ಪುತಾ ಧುವಾನಿಂ ಮೋಗ್ ದಿಲೊನಾ, ಫೋನಾರ್ ಉಲಯ್ಲಿಂ ಪುಣ್ ಗಾಂವಾಕ್ ಆಯ್ಲಿಂ ನಾಂ,
ಅನಾಥ್ ಜಾವ್ನ್ ಮೆಲ್ಲ್ಯಾ ಆಟ್ ಭುರ್ಗ್ಯಾಂಚ್ಯಾ ಮಾಂಯ್ಕ್,
ಆತಾಂ ಸಕ್ಕಡ್ ವಿಚಾರ್ತಾತ್,
ಮಾಂಯ್ ತುಂ ಖಂಯ್ ಆಸಾಯ್ …?
ಕೊರೊನಾನ್ ತಾಂಕಾ ಲಾಕ್ಡೌನ್ ಕರ್ತಾನಾಂ,
ಭುರ್ಗ್ಯಾಂಚಿ ಕಾಮಾಂ ಸಗ್ಳಿಂ ಉಸೊಳ್ತಾನಾಂ,
ಗಲ್ಫಾಂತ್ಲ್ಯಾ ಘರಾನಿಂ ಬಂಧಿ ಜಾತಾನಾಂ,
ಭುರ್ಗ್ಯಾಂಚಿ ಭಲಾಯ್ಕಿ ಭಿಗ್ಡೊನ್ ಯೆತಾನಾಂ,
ಗಾಂವಾಕ್ ವಸೊಂಕ್ ಸಯ್ತ್ ವಾಟ್ ನಾಸ್ತಾನಾಂ.
ಮಾಂಯ್ ಗಾಂವಾಕ್ ಧಿಕ್ಕಾರ್ಸುನ್ ಗೆಲ್ಲಿಂ,
ತ್ಯಾಚ್ ಮಾಂಯ್ಗಾವಾಕ್ ಯೇಂವ್ಕ್ ಆಶೆಂವ್ಚಿಂ,
ಜಲ್ಮ್ ದಿಲ್ಲ್ಯಾ ಮಾಂಯ್ಕ್ ಚ್ಚ್ ಅನಾಥ್ ಕೆಲ್ಲಿಂ,
ನಿಮಾಣೆಂ ತಿಂಚ್ ಅನಾಥ್ ಜಾತಾನಾಂ,
ಮಾಂಯ್ಚೊ ಉಗ್ಡಾಸ್ ಕಾಳ್ಜಾಂತ್ ಧೊಸ್ತಾನಾ,
ಬೊಬೊ ಘಾಲ್ನ್ ವಿಚಾರ್ತಾತ್ ತ್ಯಾ ಪರ್ದೆಶಿ ಗಾಂವಾ ಥಾವ್ನ್,
ಮಾಂಯ್ ತುಂ ಆತಾಂ ಖಂಯ್ ಆಸಾಯ್ .?
*ಜೋಸೆಫ್ ಲೂವಿಸ್, ಸಾಸ್ತಾನ್
*ಗಾಯ್ *
~~~~~~~~~~~~~~~~
ಅಂಬಾ ಅಂಬಾ ಕರುನ್,
ಮಾಂಯಿಕ್ ಮ್ಹಜ್ಯಾ,
ದುದ್ದು ಕಾಡುಂಕ್,
ಆಪಯ್ತಾ ಆಮ್ಚಿ ಗಾಯ್.
ಮಾಂಯ್ ಅಂಬಾಚೆ ದುದ್ದು ಕಾಡ್ತಾನಾ,
ತಿಚಾ ಬಾಬುಕ್ ಹಾಂವ್ ಧರ್ತಾಂ.
ಗಾಯ್ಚೆಂ ದುದ್ದು ಮಾಂಯ್ನ್ ಕಾಡ್ತೆರ್,
ತಿಚಾ ಬಾಬುಕ್ ಹಾಂವ್ ಲಾಗ್ಗಿಂ ಸೊಡ್ತಾಂ.
ಗಾಯ್ಚೆಂ ದುದ್ದು ಹ್ಹುನ್ ಕರ್ನ್,
ಮಾಂಯ್ ಮ್ಹಾಕಾಂ ದಿತಾ,
ಗುಟುಕ್ ಗುಟುಕ್ ಕರ್ನ್ ಹಾಂವ್,
ದುದ್ದು ಪೂರಾ ಖಾಲಿ ಕರ್ತಾಂ.
ಗಾಯ್ಚೆಂ ದೂದ್ ಪಿಯೆವ್ನ್ ಮ್ಹಾಕಾ,
ಸಕತ್ ಮೊಸ್ತ್ ಯೆತಾ,
ಮೊತ್ ಮ್ಹುಜಿ ಚುರುಕ್ ಜಾತಾ.
ಶಿಕಾಪ್ ಬರೆಂ ಕರ್ನ್ ಶಿಕ್ತಾಂ,
ಖೆಳ್ತಾಂ, ಜೆವ್ತಾಂ, ನಿದ್ತಾಂ.
ಗಾಯ್ಚೆಂ ದೂದ್ ಸದಾನೀತ್ ಪಿಯೆಯಾ,
ತೆದಾಳಾ ತುಂಮಿ ಸಕ್ತಿವಂತ್ ಜಾತಾಲ್ಯಾತ್.
* ಜೋಸೆಫ್ ಲುವಿಸ್, ಸಾಸ್ತಾನ್.