JANANUDI NETWORK
ಕಥೋಲಿಕ್ ಸಭಾ ಥಾವ್ನ್ ಸ್ವಾತಂತ್ರ್ಯತ್ಸೋವ್ ದಿವಸ್ ಆನಿ ಪ್ರತಿಭಾ ಪುರಸ್ಕಾರ್
ಕುಂದಾಪುರ್, ಆ.15: ಸ್ವಾತಂತ್ರ್ಯ್ ಆಚರಣ್ ಆನಿ ಪ್ರತಿಭಾ ಪುರಸ್ಕಾರ್: ಕಥೋಲಿಕ್ ಸಭಾ ಕುಂದಾಪುರ್ ಘಟಕಾ ಥಾವ್ನ್ ಕುಂದಾಪುರ್ ರೊಜಾರ್ ಮಾಯೆಚ್ಯಾ ಇಗರ್ಜೆ ಮೈದಾನಾರ್ 73 ವ್ಯೊ ಸ್ವಾತಂತ್ರ್ಯತ್ಸೋವ್ ದಿವಸ್ ಆಚರಣ್ ಕೆಲೊ. ಸಹಾಯಕ್ ವಿಗಾರ್ ಮಾ|ಬಾ|ವಿಜಯ್ ಡಿಸೋಜಾನ್ ಎನ್.ಸಿ.ಸಿ. ಕೇಡೆಟಾ ಥಾವ್ನ್ ಗೌರವ್ ಸ್ವೀಕಾರ್ ಕರ್ನ್ ಭಾರತಾಚೊ ಭಾವ್ಟೊ ರೋಹಣ್ ಕರ್ನ್. ‘ಆಮ್ಕಾಂ ಹೊ ಸ್ವಾತಂತ್ರ್ ಆಮ್ಚ್ಯಾ ಹಜಾರೊ ಮಲ್ಘಡಾಂಚ್ಯಾ ಪ್ರಾಣ್ ಬಲಿದಾನ್ ವರ್ವಿಂ ಮೆಳ್ಳ್ಯಾ, ಆಮ್ಚೊ ದೇಶ್ ಆಜ್ ಕಾಲ್ ಐ.ಸಿ.ಯು. ಂತ್ ಆಸ್ಲ್ಯಾ ಬರಿ ಜಾಲಾಂ. ರಾಜಕೀಯ ಸಮಸ್ಯೆ ಚಡ್ಲ್ಯಾತ್. ದೇಶ್ ಭರ್ ವಾದಾಳ್ ವಾರೆ ಪಾವ್ಸಾ ವರ್ವಿಂ ಅನೇಕ್ ಲೋಕ್ ನಿರ್ಗತಿಕ್ ಜಾಲ್ಯಾ. ಆಮಿ ತಾಂಕಾಂ ಬೊರ್ಯಾ ಮನಾನ್ ಕುಮೊಕ್ ದಿಂವ್ನ್ ಆಮ್ಚೊ ನೀಜ್ ದೇಶ್ ಪ್ರೇಮ್ ದಾಖಂವ್ನ್ ದಿಂವ್ಯಾ ಮ್ಹಣನ್ ತಾಣಿ ಸಂದೇಶ್ ದಿಂವ್ನ್ ಶುಭಾಷಯ್ ಪಾಠಯ್ಲೆ.
ವಿಗಾರ್ ಭೋವ್ ಮಾನಾಧಿಕ್ ಬಾ|ಸ್ಟ್ಯಾನಿ ತಾವ್ರೊನ್ ಮರಿಯೆಚೆ ಸ್ವರ್ಗಾರೋಹಣಾಚೆಂ ಫೆಸ್ತಾಚೆಂ ಬಲಿದಾನ್ ಭೆಟಂವ್ನ್ ‘ಮರಿ ಆಮ್ಚಿ ಮಾತಾ, ಪವಿತ್ರ್ ಸಭೆಂತ್ ಮರಿಯೆ ಮಾಯೆಕ್ ಅತ್ಯಂತ್ ಗೌರವ್ ಆಸಾ. ಜೆಜುಚಿ ಮಾತಾ ತಿ, ತಿಚ್ಯಾ ಉತ್ತಿಮ್ ಕನ್ರ್ಯಾನಿಂ ತಿಕಾ ಜೆಜುನ್ ಉಂಚ್ ಉಭಾರ್ಲೊ ಆನಿ ಆಪ್ಲ್ಯಾ ಬರಿ ಸ್ವರ್ಗಾಕ್ ಉಭಾರ್ನ್ ಘೆತ್ಲೊ’ ಮ್ಹಣನ್ ತಾಣಿ ಸಂದೇಶ್ ದಿಲೊ. ಸ್ವಾತಂತ್ರ್ಯ ವಿಶಿಂ ತಾಣಿ ‘ಆಮ್ಕಾಂ ಪಯ್ಲೆಂ ಪರ್ಗಾಂವ್ಚ್ಯಾನಿ ಗುಲಾಮ್ ಕರ್ನ್ ಘೆತ್ಲೆಂ. ದೇಶ್ ಭಕ್ತಾನಿಂ ತಾಂಚೊ ಜೀವ್ ಬಲಿದಾನ್ ಕರ್ನ್ ಆಮ್ಕಾ ಸ್ವಾತಂತ್ರ್ ಘೆಂವ್ನ್ ದಿಲೆಂ. ಪುಣ್ ಆಜ್ ಆಮ್ಕಾ ಖರೆ ಸ್ವಾತಂತ್ರ್ ಆಸಾಗಿ ಮ್ಹಣನ್ ಚಿಂತುಕ್ ಯೆತಾಂ ಏಕಾ ಥರಾಚೆಂ ಆಮಿ ಗುಲಾಮ್ ಜಾಂವ್ನಾಸಾಂವ್ ಮ್ಹಳ್ಯಾ ಬರಿ ಭೊಗ್ತಾ’ ಮ್ಹಣನ್ ತಾಣಿ ಕಳಯ್ಲೆ.
ಧ್ವಜ್ ವಂದನ್ ಕಾರ್ಯಕ್ರಮಾ ಉಪ್ರಾಂತ್ ವಿಗಾರ್ ಭೋವ್ ಮಾನಾಧಿಕ್ ಬಾ|ಸ್ಟ್ಯಾನಿ ತಾವ್ರೊ ಆನಿ ಸಹಾಯಕ್ ವಿಗಾರ್ ವಿಜಯ್ ಡಿಸೋಜಾನ್ ಧಾವಿ, ಪಿ.ಯು.ಸಿ. ಪದ್ವಿ, ಆನಿ ಸ್ನಾಕೋತ್ತರ್ ಪದ್ವೆಂತ್ ಉತ್ತಮ್ ಅಂಕ್ ಘೆಂವ್ನ್ ಸಾಧನ್ ಕೆಲ್ಯಾ ವಿಧ್ಯಾರ್ಥಿಂಕ್ ಕಥೊಲಿಕ್ ಸಭಾ ತರ್ಪೆನ್ ಇನಾಮ್, ಪದಕ್ ಆನಿ ಮಾನ್‍ಪತ್ರ್ ದಿಂವ್ನ್ ಮಾನ್ ಕೆಲೊ. ಪ್ರಾಂಶುಪಾಲ್ ಬಾ|ಪ್ರವೀಣ್ ಎ ಮಾರ್ಟಿಸ್, ಕಥೊಲಿಕ್ ಸಭಾ ನಿಯೋಜಿತ್ ಅಧ್ಯಕ್ಷ್ ಬರ್ನಾಡ್ ಡಿಕೋಸ್ತಾ, ನಿರ್ಗಮನ್ ಅಧ್ಯಕ್ಷಿಣ್ ಶೈಲಾ ಡಿಆಲ್ಮೇಡಾ, ಖಜಾಂಚಿ ಪ್ರೇಮಾ ಡಿಕುನ್ಹಾ, ಉಪಾಧ್ಯಕ್ಷಿಣ್ ಜೂಲಿಯೆಟ್ ಪಾಯ್ಸ್ ಆನಿ ಘಟಕಾಚೆಂ ಹೇರ್ ಪದಾಧಿಕಾರಿ ಹಾಜಾರ್ ಆಸ್ಲೆಂ. ಘಟಕಾಚೊ ಅಧ್ಯಕ್ಷ್ ವಾಲ್ಟರ್ ಡಿಸೋಜಾನ್ ಸ್ವಾಗತ್ ಮಾಗ್ಲೊ. ಕಾರ್ಯದರ್ಶಿ ವಿಲ್ಸನ್ ಡಿಆಲ್ಮೇಡಾನ್ ಉಪ್ಕಾರ್ ಆಟಾಯ್ಲೊ. ವಿಲ್ಸನ್ ಒಲಿವೆರಾನ್ ಕಾರ್ಯೆ ಚಲವ್ನ್ ವೆಲೆಂ.
