JANANUDI.COM NETWORK
ಆಶಾವಾದಿ ಪ್ರಕಾಶನಾನ್ ಮಾಂಡುನ್ ಹಾಡ್‌ಲ್ಲೆಂ ’ಜಾಗತಿಕ್ ಡಿಜಿಟಲ್ ಕೊಂಕಣಿ ದಿವಸ್ 2021’ ವೆಬಿನಾರ್ 28 ನವೆಂಬರ್ (ಆಯ್ತಾರಾ) ಸಾಂಜೆರ್ 4 ಥಾವ್ನ್ 6 ಪರ್ಯಾಂತ್ ಚಲ್ಲೆಂ. ಪಾಂಚ್ ಡಿಜಿಟಲ್ ಇ-ಪುಸ್ತಕಾಂಚೆಂ ವಿಮೋಚನ್, ಪಯ್ಣಾರಿ-ವೀಜ್ ಸಾಹಿತಿಕ್ ಸರ್ತೆಂತ್ ಇನಾಮಾಂ ತಶೆಂಚ್ ಆಶಾವಾದಿ ಜಾಗತಿಕ್ ಡಿಜಿಟಲ್ ಪುರಸ್ಕಾರ್ 2021 ಘೋಶಿತ್ ಕೆಲೊ.
ಕಾರ್ಯೆಂ ನಿರ್ವಾಹಕಿ ಬಾಯ್ ಸಿಯಾಲಿನಿ ಫೆರ್ನಾಂಡಿಸಾನ್ ಆಯ್ಲೆವಾರ್ ದೆವಾಧಿನ್ ಜಾಲ್ಲ್ಯಾ ಬೆನ್ನಿ ಟೀಚರಿಚ್ಯಾ ಅತ್ಮ್ಯಾಕ್ ಶಾಂತಿ ಮಾಗುನ್ ಏಕ್ ಮಿನುಟ್ ಮಾವ್ನ್ ಪ್ರಾರ್ಥನಾಂತ್ ಕಾರ್ಯಾಚಿ ಸುರ್ವಾತ್ ಕರುನ್ ಉಪ್ರಾಂತ್ ಅಪ್ಲ್ಯಾ ಜಿಣ್ಯೆಂತ್ ಪನ್ನಾಸ್ ವರಸಾಂ ಸಂಪಯಿಲ್ಲ್ಯಾ ಬಾಬ್ ಲಾರೆನ್ಸ್ ವಿನೋದ್ ಬಾರ್ಬೋಜಾಕ್ ಪರ್ಬಿಂ ದಿವುನ್. ಕೊಂಕಣಿಕ್ ರಾಜ್ಯ್/ಲಿಪಿಚಿಂ ಸೀಮಾಂ ಉತ್ರುಂಕ್ ಕಶೆಂ ಡಿಜಿಟಲ್ ಮಾಧ್ಯಮ್ ಆಧಾರ್ ಜಾತಾ ಮ್ಹಳ್ಳೆಂ ಸಾಂಗುನ್ ಹ್ಯಾ ದಿಶೆನ್ ಆಶಾವಾದಿ ಪ್ರಕಾಶನಾಚ್ಯಾ ಡಿಜಿಟಲ್ ವಾವ್ರಾಚಿ ಮಟ್ವಿ ಝಳಕ್ ದಿತಚ್ ಪಯ್ಣಾರಿ.ಕೊಮ್ ಸಹ-ಸಂಪಾದಕ್ ಬಾಬ್ ಶೈಲೇಂದ್ರ ಮೆಹ್ತಾನ್ ಸ್ವಾಗತ್ ಉಲವ್ಪ್ ಕೆಲೆಂ. ಕಾರ್ಯಾಚೆಂ ಉಗ್ತಾವಣ್ ಕರುನ್ ಅಪ್ಲ್ಯಾ ಸಂಧೇಶಾಂತ್ ’ಡಿಜಿಟಲ್ ಮಾಧ್ಯಮಾಂತ್ ಬರೆಂ ತಶೆಂಚ್ ವಾಯ್ಟ್ ಎಕಾಚ್ ಮಾಪಾನ್ ಆಸುಂಕ್ ಸಾಧ್ಯ್ ಆಸಾ ತರ್‌ಯೀ ಬರೆಂ ವಿಂಚುನ್ ತೆಂ ಕೊಂಕಣಿಚ್ಯಾ ಬರೆಪಣಾಕ್ ವಾಪ್ರುಂಕ್ ಗೊಂಯ್, ತಶೆಂಚ್ ಗೊಂಯ್ ಭಾಯ್ಲಿಂ ಜಾಯ್ತಿಂ ಖೂಪ್ ಮಿನತ್ ಕರತಾತ್ ಆನಿ ಹಿ ಮಿನತ್ ಕೊಂಕಣಿಕ್ ವೆಗ್-ವೆಗಳ್ಯಾ ಥರಾಂನಿ ಥೆಂಕೊ ದೀಂವ್ಕ್ ಸಕ್ತಲೊ ಆನಿ ಕೊಂಕಣಿಕ್ ಮುಕಾರ್ ವರಪಾಕ್ ಅಸಲಿ ಮಿನತ್ ಭೋವ್ ಗರ್ಜೆಚಿ ಮ್ಹಣಾಲಿ ಡೊ|ಕಿರಣ್ ಬುಡ್ಕುಲೆ.
ಮುಕೆಲ್ ಉಲವ್ಪಿ ಬಾಬ್ ಮೆಲ್ವಿನ್ ರೊಡ್ರಿಗಸಾನ್ ಅಪ್ಲ್ಯಾ ಉಲವ್ಪಾಂತ್ ’ಡಿಜಿಟಲೀಕರಣ್ ಖಂಡಿತ್ ಕೊಂಕಣಿಚಿ ಏಕ್ ಗರ್ಜ್, ಪುಣ್ ಹೆಂ ಡಿಜಿಟಲೀಕರಣ್ ಜಾಲ್ಲೆಂ; ಜಾಂವ್ ಇ-ಪುಸ್ತಕಾಂ, ಆ-ಪುಸ್ತಕಾಂ, ಖಂಯ್ಚರ್ ಆನಿ ಕಿತ್ತುನ್ ಪರ್ಯಾಂತ್ ದವರ್ಚಿಂ ಆನಿ ತಾಚೊ ಖರ್ಚ್ ಕೊಣ್ ಆನ್ ಕಿತ್ತುನ್ ಪರ್ಯಾಂತ್ ಉಟಂವ್ಕ್ ಸಕ್ತಲೊ? ಮ್ಹಳ್ಳೆಂ ಪ್ರಶ್ನ್ ಮುಕಾರ್ ದವರುನ್ ಕೊಂಕಣಿಕ್ ಡಿಜಿಟಲ್ ಮಾಧ್ಯಮಾಂತ್ ಮುಕಾರ್ ಹಾಡುಂಕ್ ಪಾಟ್ಲ್ಯಾ ಕಾಂಯ್ ತೆಂಪಾಥಾವ್ನ್ ವಾವ್ರ್ ಕರುನ್ ಆಸ್ಚ್ಯಾ ಆಶಾವಾದಿ ಪ್ರಕಾಶನಾಚಿ ಥೊಕ್ಣಾಯ್ ಕೆಲಿ.
ಲಾರೆನ್ಸ್ ವಿ. ಬಾರ್ಬೋಜಾನ್ ವಿಮೋಚನ್ ಜಾಂವ್ಕ್ ಆಸ್ಚ್ಯಾ ಪಾಂಚ್ ಪುಸ್ತಕಾಂಚಿ ಮಟ್ವಿ ವಳೊಕ್ ಕರುನ್ ದಿತಚ್;
’ಸಿಸಿಫಸ್ ತೆಂಗ್‌ಶೆರ್’ (ಶೈಲೇಂದ್ರ ಮೆಹ್ತಾಚ್ಯಾ ನಾಗರಿ ಕವಿತೆಂಚೆಂ ಕನ್ನಡ್ ಲಿಪಿಯಂತರ್ ಡಿಜಿಟಲ್-ಪುಸ್ತಕ್) ಮೆಲ್ವಿನ್ ರೊಡ್ರಿಗಸಾನ್ ವಿಮೋಚನ್ ಕೆಲೆಂ. ’ಅಂತರ್‌ನಾದ್’ (ಉರ್ಜಿತಾ ಭೊಬೆಚ್ಯಾ ಕವಿತೆಂಚೆಂ ಕನ್ನಡ್ ಲಿಪಿಯಂತರ್ ಇ-ಪುಸ್ತಕ್) ಬಾಯ್ ಉಶಾ ರಾಣೆನ್ ವಿಮೋಚನ್ ಕೆಲೆಂ, ’ಇಂದ್ರಧೊಣು’ (ಉದಯ್ ಮಾಂಬ್ರೊಚ್ಯಾ ನಾಗರಿ ಕವಿತೆಂಚೆಂ ಕನ್ನಡ್ ಲಿಪಿಯಂತರ್ ಡಿಜಿಟಲ್-ಪುಸ್ತಕ್) ಬಾಬ್ ಚೇತನ್ ಆಚಾರ್ಯನ್ ವಿಮೋಚನ್ ಕೆಲೆಂ. ’ಚಾಬೂಕ್ ಆನಿ ಹೆರ್ ಕಥಾ’ (ರೊನಾಲ್ಡ್ ಮೊಂತೇರೊಚ್ಯೋ ಕೊಂಕಣಿ ಕಥೆಚೆಂ ಡಿಜಿಟಲ್-ಪುಸ್ತಕ್) ಡೊ|ಜಯವಂತ್ ನಾಯ್ಕ್ ಹಾಣೆಂ ವಿಮೋಚನ್ ಕೆಲೆಂ, ’ಫಾಂತ್ಯಾಪಾರಾಚೆಂ ಸಪಣ್’ (ವಾಲ್ಟರ್ ನಂದಳಿಕೆಚ್ಯೊ ಕೊಂಕಣಿ ಕಥೆಚೆಂ ಡಿಜಿಟಲ್-ಪುಸ್ತಕ್) ಬಾಯ್ ಡೊ|ಜಯಂತಿ ನಾಯ್ಕ್ ಹಿಣೆಂ ವಿಮೋಚನ್ ಕೆಲೆಂ. ಪುಸ್ತಕಾಂ ವಿಮೋಚನ್ ಕೆಲ್ಲ್ಯಾಂನಿ ತಶೆಂಚ್ ಬರವ್ಪ್ಯಾಂನಿ ಆಪಾಪ್ಲೆ ಸಂಧೇಶ್ ದಿಲೆ.
ತ್ಯೇ ಉಪ್ರಾಂತ್ ದೆ|ವಿಲ್ಫಿ ರೆಬಿಂಬಸ್ ಸ್ಮಾರಕ್ ಚಲ್‌ಲ್ಲ್ಯಾ ಪಯ್ಣಾರಿ-ವೀಜ್ ಜಾಗತಿಕ್ ಕೊಂಕಣಿ ಸಾಹಿತಿಕ್ ಸರ್ತ್ ೨೦೨೧ ಹಾಂತುಂ ಇನಾಮಾಂ ಜಿಕ್ಲಲ್ಯಾಂಚಿಂ ನಾಂವಾಂ ವಲ್ಲಿ ಕ್ವಾಡ್ರಸಾನ್ ಘೋಷಿತ್ ಕೆಲಿಂ. ಇನಾಮಾಂ ಜೊಡ್ಲೆಲ್ಯಾಂಚಿಂ ಇನಾಮಾಂ ತಶೆಂಚ್ ಶಿಫಾರಸ್ ಪತ್ರಾಂ ದಸೆಂಬರಾಂತ್ ತಾಂಕಾಂ ಪಾವಿತ್ ಜಾತಲಿಂ ಮ್ಹಣುನ್ ಸಾಂಗ್ಲೆಂ. ದಲ್ಗಾದೊ ಕೊಂಕಣಿ ಅಕಾಡೆಮಿಚೊ ಅಧ್ಯಕ್ಷ್ ಬಾಬ್ ವಿನ್ಸಿ ಕ್ವಾಡ್ರೊಸಾನ್ ದೆ|ಫ್ರೆಡ್ರಿಕ್ ಕ್ವಾಡ್ರಸ್ ಸ್ಮಾರಕ್ ಆಶಾವಾದಿ ಡಿಜಿಟಲ್ ಕೊಂಕಣಿ ಪುರಸ್ಕಾರ್ ’ಆಂಟನಿ ವೆರೊನಿಕಾ ಫೆರ್ನಾಂಡಿಸಾಚ್ಯಾ ’ಮಾಡಾಥಾವ್ನ್ ತೆಲಾಖಣಿ ಪರ್ಯಾಂತ್’ ಪುಸ್ತಕಾಕ್ ಘೋಶಿತ್ ಕರುನ್ ಅಪ್ಲೊ ಸಂಧೇಶ್ ದಿಲೊ.
ತ್ಯೇ ಉಪ್ರಾಂತ್ ಕಾರ್ಯಾಚೆ ಸಯ್ರೆ ಜಾವ್ನ್ ಹಾಜರ್ ಆಸ್ಲೆಲ್ಯಾ ಬಾಬ್ ಆರ್. ಎಸ್. ಭಾಸ್ಕರ್, ಬಾಬ್ ಗ್ಯಾನೇಶ್ವರ್ ತರೀ, ಬಾಬ್ ವಿಶಾಲ್ ಕೊಡಿಯಾಳ್ ತಶೆಂಚ್ ಬಾಬ್ ವಿಲ್ಲಿ ಗೋಯೆಸ್ ಹಾಣಿಂ ಆಪಾಪ್ಲೆ ಸಂಧೇಶ್ ದಿಲೆ. ವಲ್ಲಿ ಕ್ವಾಡ್ರಸಾನ್ ಧಿನ್ವಾಸ್ ಪಾಠಯ್ಲೆ.
Zagotik Digitol Konkonni Divos 2021
Ashawadi Prokaxonan manddun haddl’lem ’zagotik ddijittol konkonni divos 2021’ vebinar 28 novembor (aitara) sanjer 4 thaun 6 poreant chol’lem. Panch ddijittol i-pustokanchem vimochon, poinnari-viz sahitik sortent inamam toxench axavadi zagotik ddijittol puroskar 2021 ghoxit kelo.
Karyem nirvahoki Bai Cialini Fernandesan ailevar devadhin zal’lea Benny Teacherichea otmeak xanti magun ek minutt maun prarthonant kareachi survat korun uprant oplea jinnyent pon’nas vorosam sompoyil’lea Bab Lawrence V Barbozak porbim divun. Konkonnik rajy/lipichim simam utrunk koxem ddijittol madhyom’ adhar zata mholl’llem sangun hea dixen Ashawadi Prokaxonachea ddijittol vaurachi mottvi zhollok ditoch Poinnari.com’ soho-sompadok Bab Shailendra Mehtan svagot uloup kelem. Kareachem ugtaunn korun oplea sondhexant ’ddijittol madhyomant borem toxench vaitt ekach mapan asunk sadhy asa toryi borem vinchun tem konkonnichea boreponnak vaprunk Gõy, toxench Gõy bhailim zaitim khup minot korotat ani hi minot konkonnik veg-vegollea thoramni thenko diunko soktolo ani konkonnik mukar voropak osoli minot bhovo gorjechi mhonnali.
Mukel uloupi bab melvin roddrigosan oplea uloupant ’ddijittolikoronn khonddit konkonnichi ek gorz, punn hem ddijittolikoronn zal’lem; zamv i-pustokam, a-pustokam, khoinchor ani kit’tun poreant dourchim ani tacho khorch konn an kit’tun poreant uttounko soktolo? mholl’llem proxn mukar dourun konkonnik ddijittol madhyomant mukar haddunk pattlea kaim tempathaun vaur korun aschea axavadi prokaxonachi thoknnai keli.
Larens vi. Barbozan vimochon zaunko aschea panch pustokanchi mottvi vollok korun ditoch;
’Sisifos Tengxer’ (Shailendra Mehtachea Nagari kovitenchem Kon’nodd lipiyontor ddijittol-pustok) Melwyn Rodriguesan vimochon kelem. ’Ontornad’ (Urjita Bhobechea kovitenchem Kon’nodd lipiyontor i-pustok) Bai Usha Rannen vimochon kelem
’Indrodhonnu’ (Uday Mambrochea Nagari kovitenchem Kon’nodd lipiyontor ddijittol-pustok) Bab Chetan Acharyan vimochon kelem. ’Chabuk ani her Kotha’ (Ronald Monterocheo Konkonni kothechem ddijittol-pustok) Do|Jayavant Naik hannem vimochon kelem
’Fanteaparachem Soponn’ (Walter Nandallikecyem konkonni kothechem ddijittol-pustok) Bai Dr|Jayanti Naik hinnem vimochon kelem. Pustokam vimochon kel’leamni toxench boroupeamni apaple sondhex dile.
Tye uprant De|Wilfy Rebimbus smarok choll’lea Poinnari-Viz zagotik konkonni sahitik sort 2021 hantum inamam jikloleanchim namvam Valley Quadrosan ghoxit kelim. Inamam zoddleleanchim inamam toxench xifaros potram dosemborant tankam pavit zatolim mhonnun sanglem. Dolgado Konkonni Okaddemicho odhyokx Bab Vincy Quadrosan De|Fredrik Quadros smarok Ashawadi ddijittol konkonni puroskar 2021’ Antony Veronica Fernandesachea ’Maddathaun elakhonni poreant’ pustokak ghoxit korun oplo sondhex dilo.
Tye uprant kareache soire zaun hazor aslelea bab R. S. Bhaskor, Bab Geanexvor Tori, Bab Vishal Koddiall toxench Bab Willy Goes hannim apaple sondhex dile. Valley Quadrosan dhinvas patthoile.
