ಕೋಲಾರ:- ಪಿಯುಸಿ,ಪದವಿ ಪರಿಕ್ಷೆಗಳಿಗಿಲ್ಲದ ವೆಬ್‍ಕಾಸ್ಟಿಂಗ್ ಎಸ್ಸೆಸ್ಸೆಲ್ಸಿ ಮಕ್ಕಳಿಗ್ಯಾಕೆ, ಈಗಾಗಲೇ ಮಕ್ಕಳ ಬದುಕಿನೊಂದಿಗೆ ಸಾಕಷ್ಟು ಚೆಲ್ಲಾಟವಾಡಿದ್ದೀರಿ, 5, 8 ಮತ್ತು 9ನೇ ತರಗತಿ ಮಕ್ಕಳಿಗೆ ಪರೀಕ್ಷೆ ನಡೆಸದೇ ಗೊಂದಲ ಸೃಷ್ಟಿಸಿದ್ದೀರಿ, ದಿನಕ್ಕೊಂದು ಆದೇಶ ಮಾಡಿ ತಪ್ಪು ಮಾಡುತ್ತಿದ್ದೀರಿ, ನಿಮ್ಮ ಯಡವಟ್ಟುಗಳಿಗೆ ಕೊನೆಯಾಡಿ ಎಂದು ವಿಧಾನಪರಿಷತ್ ಸದಸ್ಯ ಡಾ.ವೈ.ಎ.ನಾರಾಯಣಸ್ವಾಮಿ ಸರ್ಕಾರವನ್ನು ಒತ್ತಾಯಿಸಿದರು.
ನಗರದಲ್ಲಿ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ಶಿಕ್ಷಣ ಇಲಾಖೆ ಕಳೆದ ಒಂದು ವರ್ಷದಿಂದ ಮಾಡಿರುವ ಯಡವಟ್ಟುಗಳು ಬೇರಾವ ಇಲಾಖೆಯಲ್ಲೂ ನಡೆದಿಲ್ಲ, ಎಸ್ಸೆಸ್ಸೆಲ್ಸಿ, ಪಿಯುಸಿ ಮೂರು ಪರೀಕ್ಷೆ ಅಂತಾರೆ ಇದರ ಸಾಧಕಬಾಧಕಗಳ ಕುರಿತು ಕನಿಷ್ಟ ಚರ್ಚೆಯನ್ನೂ ನಡೆಸಿಲ್ಲ ಇದೇ ಯಡವಟ್ಟುಗಳು ಮುಂದುವರೆದರೆ ಮಾಲ್ಯಮಾಪನ ಬಹಿಷ್ಕಾರಕ್ಕೆ ಕರೆ ನೀಡಬೇಕಾದೀತು ಎಂದು ಎಚ್ಚರಿಸಿದರು.
5,8 ಮತ್ತು 9ನೇ ತರಗತಿ ಪರೀಕ್ಷೆಗಳಲ್ಲಿ ಗೊಂದಲ ಸೃಷ್ಟಿಸಿದ್ದೀರಿ, ಈಗಾಗಲೇ 2 ವಿಷಯದ ಪರೀಕ್ಷೆ ನಡೆದಿದೆ, ಉಳಿದ ಪರೀಕ್ಷೆ ಯಾವಾಗ ಎಂಬ ಆತಂಕ ಪೋಷಕರು,ಮಕ್ಕಳನ್ನು ಕಾಡುತ್ತಿದೆ, ದಿನಕ್ಕೊಂದು ಆದೇಶ ಮಾಡುತ್ತಿದ್ದೀರಿ, ಎಸ್ಸೆಸ್ಸೆಲ್ಸಿ ಪರೀಕ್ಷೆಗೆ ಪ್ರೌಢಶಾಲಾ ಶಿಕ್ಷಕರು ಬೇಡ ಎಂದು ಆದೇಶ ಮಾಡಿದಿರಿ, ಇಲಾಖೆ ಹುಟ್ಟಿದಾಗಿನಿಂದ ಇಲ್ಲದ ಕಾನೂನು ಈಗ ಏಕೆ ಎಂದು ಪ್ರಶ್ನಿಸಿದಾಗ ಸದನದಲ್ಲಿ ಉತ್ತರ ಓದಲಾಗದೇ ನಗೆಪಾಟಲಿಗೆ ಒಳಗಾದರು ಎಂದು ಸಚಿವ ಮಧು ಬಂಗಾರಪ್ಪ ವಿರುದ್ದ ಕಿಡಿಕಾರಿದರು.
ವೆಬ್ ಕಾಸ್ಟಿಂಗ್ ಮಕ್ಕಳಮೇಲೆ ದೌರ್ಜನ್ಯ
ಮಾ.25 ರಿಂದ ಎಸ್ಸೆಸ್ಸೆಲ್ಸಿ ಪರೀಕ್ಷೆ ನಡೆಯಲಿದೆ, ಈಗ ಏಕಾಏಕಿ ಸರ್ಕಾರಿ ಆದೇಶ ಮಾಡಿದ್ದು, ಎಸ್ಸೆಸ್ಸೆಲ್ಸಿ ಪರೀಕ್ಷೆಗೆ ಪ್ರತಿ ಕೊಠಡಿಗೂ ಸಿಸಿ ಕ್ಯಾಮರಾ, ವೆಬ್ ಕಾಸ್ಟಿಂಗ್ ಮಾಡಬೇಕಂತೆ, ಪದವಿ,ಪಿಯುಸಿ ಪರೀಕ್ಷೆಗಿಲ್ಲದ ಈ ನೀತಿ ಏಕೆ, ಇದೇನು ಐಎಎಸ್ ಪರೀಕ್ಷೆಯಾ, ಪಿಎಸ್‍ಐ ಪರೀಕ್ಷೆಯೇ ಏಕೆ ಮಕ್ಕಳ ಮೇಲೆ ದೌರ್ಜನ್ಯ ನಡೆಸುತ್ತಿದ್ದೀರಿ, ಮಕ್ಕಳಿಗೆ ಆತ್ಮಸ್ಥೈರ್ಯ ತುಂಬುವ ಬದಲು ಭಯಭೀತರನ್ನಾಗಿಸುತ್ತಿದ್ದೀರಿ ಎಂದು ಆಕ್ರೋಷ ವ್ಯಕ್ತಪಡಿಸಿದರು.
ವೆಬ್ ಕಾಸ್ಟಿಂಗ್ ಸೌಲಭ್ಯ ಒದಗಿಸಲು 4 ಲಕ್ಷ ಬೇಕು, ಹಣ ಎಲ್ಲಿಂದ ತರೋದು, ಖಾಸಗಿ ಶಾಲೆಗಳಲ್ಲಿ ಸಂಚಿತ ನಿಧಿ ಇರಲ್ಲ, ಸರ್ಕಾರಿ ಶಾಲೆಗಳಲ್ಲಿ ಒಂದಿಪ್ಪತ್ತು ಸಾವಿರ ಇದ್ದರೆ ಹೆಚ್ಚು ಎಂದರು.
ಅಧಿಕಾರಿಗಳದ್ದೇ ದರ್ಬಾರು-ವ್ಯಂಗ್ಯ
ಇಲಾಖೆಯನ್ನು ಸಚಿವರಾ ಅಧಿಕಾರಿಗಳ ನಡೆಸುತ್ತಿರೋದು, ಅನುಮಾನ ಕಾಡುತ್ತಿದೆ, ನೀವೇ ಆದರೆ ನಿಮಗೆ ಪರಿಜ್ಞಾನ ಇದೆಯೇ ಎಂದು ಪ್ರಶ್ನಿಸಿ, ಮಧು ಬಂಗಾರಪ್ಪ ಪುಲ್‍ಟೈಂ ಅಥವಾ ಪಾರ್ಟ್‍ಟೈಂ ಸಚಿವರಾ ಉತ್ತರ ನೀಡಿ ಎಂದು ಪ್ರಶ್ನಿಸಿದರು.
ಮೌಲ್ಯಮಾಪನಕ್ಕೆ ಬೇಕಾದ ಖಾಸಗಿ ಶಾಲಾ ಶಿಕ್ಷಕರು ಪರೀಕ್ಷೆ ನಡೆಸಲು ಬೇಡವೇ ಏಕೆ ಈ ಗೊಂದಲದ ನೀತಿ, ರಾಜ್ಯದಲ್ಲಿ 55 ಲಕ್ಷ ಮಕ್ಕಳು ಖಾಸಗಿ ಶಾಲೆಗಳಲ್ಲಿ 45 ಲಕ್ಷ ಮಕ್ಕಳು ಸರ್ಕಾರಿ ಶಾಲೆಗಳಲ್ಲಿ ವ್ಯಾಸಂಗ ಮಾಡುತ್ತಿದ್ದಾರೆ, ಶಿಕ್ಷಕರಿಗೆ ಅವಮಾನ ಮಾಡಿದ್ದು ಸಾಕು ನೀವು ಸರಿಪಡಿಸದಿದ್ದರೆ ಮೌಲ್ಯಮಾಪನ ಬಹಿಷ್ಕಾರದ ಎಚ್ಚರಿಕೆ ನೀಡಬೇಕಾಗುತ್ತದೆ ಎಂದರು.
ಐದು ಬಾರಿ ಪಠ್ಯ ಪರಿಷ್ಕರಣೆ ಸರಿಯೇ
ಒಂದು ವರ್ಷದಲ್ಲಿ ಐದು ಬಾರಿ ಪಠ್ಯಪರಿಷ್ಕರಣೆ ಮಾಡಿದ್ದೀರಿ, ನಿಮ್ಮ ಮಂತ್ರಿಗಳಾದ ಪರಮೇಶ್ವರ್, ಮುಖಂಡ ಶ್ಯಾಮನೂರು ಶಿವಶಂಕರಪ್ಪ ಮತ್ತಿತರರ ದೊಡ್ಡದೊಡ್ಡ ಸಿಬಿಎಸ್ಸಿ, ಐಸಿಎಸ್ಸಿ ಶಾಲೆಗಳಿಗೆ ಮಾತ್ರ ರಾಷ್ಟ್ರೀಯ ಶಿಕ್ಷಣ ನೀತಿ ಬೇಕು, ಬಡಮಕ್ಕಳು ಓದುತ್ತಿರುವ ಶಾಲೆಗಳಿಗೆ ರಾಜ್ಯ ಶಿಕ್ಷಣ ನೀತಿಯೇ ಏಕಿ ತಾರತಮ್ಯ, ಕೇವಲ ರಾಜಕೀಯ ಅಜೆಂಡಾದಡಿ ಎನ್‍ಇಪಿಯನ್ನು ವಿರೋಧಿಸಿ ನಗೆಪಾಟಲಿಗೆ ಒಳಗಾಗಬೇಡಿ ಎಂದು ಆಗ್ರಹಿಸಿದರು.