2023 ವ್ಯಾ ನವೆಂಬರಾಚ್ಯಾ 5 ತಾರಿಕೆರ್ ಆಯ್ತಾರಾ ಸಕಾಳಿಂ 10 ವೊರಾರ್, ಮಂಗ್ಳುರ್‌ಚ್ಯಾ ಡೊನ್ ಬೊಸ್ಕೊ ಮಿನಿ ಸಭಾಸಲಾಂತ್ ದೆವಾಧಿನ್ ಎಡ್ವಿನ್ ಜೆ. ಎಫ್. ಡಿಸೋಜ ಹಾಂಕಾಂ, ಆನಿ ದೆವಾಧಿನ್ ಜಾಲ್ಯಾ ಹೇರ್ ಕೊಂಕ್ಣಿ ಲೇಖಕಾಂಕ್, ಕರ್ನಾಟಕ ಕೊಂಕಣಿ ಲೇಖಕ್ ಸಂಘ್, ಕರ್ನಾಟಕ ಹಾಂಚೆಂ ತರ್ಫೆನ್ ಶ್ರದ್ಧಾಂಜಲಿ ಪಾಠಯ್ಲಿ. ಎಡ್ವಿನ್ ಜೆ. ಎಫ್. ಡಿಸೋಜ ತಶೆಂಚ್ ಆಯ್ಲೆವಾರ್ ದೆವಾಧಿನ್ ಜಾಲ್ಲ್ಯಾ ಶಾನ್ ಬೊಂದೆಲ್ ಆನಿ ಮೆಕ್ಸಿ ಕೆಲರಾಯ್ ಹಾಂಚೊ ಉಗ್ಡಾಸ್ ಕಾಡ್ನ್ ಮೌನ್ ಪ್ರಾರ್ಥನಾ ದ್ವಾರಿಂ ಮಾನಾನ್ ಗೌರವ್ ಅರ್ಪಿಲೊ ಆನಿ ತಾಂಚ್ಯಾ ಕುಟ್ಮಾಂಕ್ ಭುಜಾವಣ್ ಪಾಠಯ್ಲಿ. ಸುಂಕಾಣ್ ಸಮಿತಿಚೊ ಸಂಚಾಲಕ್ ಮಾನೆಸ್ತ್ ರಿಚಾರ್ಡ್ ಮೊರಾಸಾನ್ ಪ್ರಸ್ತಾವನ್ ದಿತಚ್, ಕೆ.ಎಲ್.ಎಸ್. ತರ್ಫೆನ್ ಡಾ. ಎಡ್ವರ್ಡ್ ನಜ್ರೆತ್ ಹಾಣಿಂ ಎಡ್ವಿನ್ ಜೆ. ಎಫ್ ಡಿಸೋಜಾಚ್ಯಾ ಕಥಾ ಆನಿ ಕಾದಂಬರಿಚೆರ್ ಉಲವ್ಪ್ ದಿಲೆಂ. ಮಾನೆಸ್ತ್ ಮಚ್ಚಾ ಮಿಲಾರ್ ಹಾಣಿಂ ಎಡ್ವಿನ್ ಜೆ. ಎಫ್ ಡಿಸೋಜಾಚ್ಯಾ ಸಾಹಿತ್ಯಾಭಾಯ್ಲ್ಯಾ ವಾವ್ರಾವಿಶಿಂ ಮಾಹೆತ್ ವಾಂಟುನ್ ಘೆತ್ಲಿ. ಮಾನೆಸ್ತ್ ಡೊಲ್ಫಿ ಕಾಸ್ಸಿಯಾನ್ ಸಾಹಿತಿಕ್ ವ್ಯಕ್ತಿತ್ವ್ ಜಾವ್ನ್ ದೆವಾಧಿನ್ ಎಡ್ವಿನಾಚಿ ವಳಕ್ ದಿಲಿ. ರಾಕ್ಣೊ ಸಂಪಾದಕ್ ಮಾ.ಬಾ. ರುಪೇಶ್ ಮಾಡ್ತಾ ಹಾಣಿಂ ದೆವಾಧಿನ್ ಎಡ್ವಿನಾಚ್ಯಾ ದುಖೇಸ್ತಾಂಕ್ ಭುಜ್ವಣ್ ಪಾಠವ್ನ್ ಮಾಗ್ಣೆಂ ಭೆಟಯ್ಲೆಂ.
ದೆವಾಧಿನ್ ಎಡ್ವಿನಾಚಿ ಪತಿಣ್ ಮಾನೆಸ್ತಿನ್ ಜೇನ್ ಡಿಸೋಜ, ಧುವ್ ರುತ್ , ಕುಟ್ಮಾದಾರಾಂ, ಕೊಂಕಣಿ ಸಾಹಿತಿ, ಎಡ್ವಿನಾಚೆ ಅಭಿಮಾನಿ ಸವೆಂ ಹಾಜರ್ ಆಸ್‌ಲ್ಲ್ಯಾ ಸರ್ವಾಂನಿ ದೆವಾಧಿನ್ ಎಡ್ವಿನಾಚ್ಯಾ ತಸ್ವೀರೆಕ್ ಫುಲಾಂ ಅರ್ಪುನ್ ಗೌರವ್ ಪಾಠಯ್ಲೊ.
ಮಾನೆಸ್ತ್ ಹೆನ್ರಿ ಮಸ್ಕರೇನಸಾನ್ ಕಾರ್ಯೆಂ ಚಲವ್ನ್ ವ್ಹೆಲೆಂ.
