ಆಶಾವಾದಿ ಪ್ರಕಾಶನಾನ್ ಮಾಂಡುನ್ ಹಾಡ್ಚ್ಯಾ ವರ್ಸಾಳ್ಯಾ ಕಥಪಾಠ್ ರಾಶ್ಟ್ರ್ ಮಟ್ಟಾಚ್ಯಾ ಕಥೆಚ್ಯಾ ಅಧ್ಯಯನಾಂತ್ ಕೊಂಕಣಿಚ್ಯ ಉತ್ತಿಮ್ ಕಥಾಕಾರಾಚ್ಯಾ ಮೊಟ್ವ್ಯಾ ಕಾಣಿಯೆಂಚೆರ್ ಖೊಲಾಯೆನ್ ಅಧ್ಯಯನ್ ಚಲವ್ನ್ ಆಯ್ಲಾಂ. ಪಾಟ್ಲ್ಯಾ ಚ್ಯಾರ್ ವರ್ಸಾಂನಿ ವೆಗ್-ವೆಗಳ್ಯಾ ಪ್ರಕಾರಾಚ್ಯಾ ಅಧ್ಯಯನಾಂಕ್ ಆಟಾಪ್ಚಿಂ ಚ್ಯಾರ್ ಕಥಾಪಾಠ್ ಶಿಂಕಳೆಂಕ್ ಆಯೋಜನ್ ಕೆಲಾಂ. ಕಥಾಪಾಠ್ ಪಯ್ಲ್ಯಾ ಶಿಂಕಳೆಂತ್ ’ಮೊಟ್ವಿ ಕಥಾ ತಾಂತ್ರಿಕ್ ಬಾಂಧಾವಳ್’; ’ಗ್ರಾಮೀಣ್ ಪರಿಸರಾಚ್ಯೊ’, ’ಘಾಟಾಚ್ಯೊ ಕಥಾ’, ’ಬೊಂಬೊಯ್ಚ್ಯೊ ಕಥಾ’, ’ಪರ್ಗಾಂವ್ಚ್ಯೊ ಕಥಾ’ ಅಶೆಂ ಕೊಂಕಣಿಂತ್ಲ್ಯಾ ಮೊಟ್ವ್ಯಾ ಕಾಣಿಯಾಂಚ್ಯಾ ಪ್ರಕಾರಾಂಚೆರ್ ಅಧ್ಯಯನ್ ಚಲಯ್ಲೆಂ. ಕಥಾಪಾಠ್ ದುಸ್ರ್ಯಾ ಶಿಂಕಳೆಚೆರ್ ’ವಿಲ್ಫಿ ರೆಬಿಂಬಸಾಚ್ಯಾ ತೀನ್ ಮೊಟ್ವ್ಯಾ ಕಥೆಂಚೆರ್’ ಖೊಲಾಯೆನ್ ಅಧ್ಯಯನ್ ಚಲ್ಲೆಂ. ಕಥಾಪಾಠ್ ತಿಸ್ರ್ಯಾ ಶಿಂಕಳೆಂತ್ ’ಸಮಕಾಳೀನ್ ಕಥಾಕಾರಾಂಚ್ಯಾ ಕಥೆಂಚೆರ್ ತುಲನಾತ್ಮಕ್ ಅಧ್ಯಯನ್’ ಚಲಯ್ಲೆಂ. ಕಥಾಪಾಠ್ ಚೊವ್ತ್ಯಾ ಶಿಂಕಳೆಂತ್ ಸಿರಿವಂತಾಚ್ಯಾ ಮೊಟ್ವ್ಯಾ ಕಥೆಂಚೆರ್ ಅಧ್ಯಯನ್ ಚಲಯ್ಲೆಂ.
ಗೊಂಯ್, ಮಂಗ್ಳುರ್ ತಶೆಂಚ್ ಮಹಾರಾಶ್ಟ್ರ ಅಶೆಂ ಕೊಲೆಜಿಂನಿ ಶಿಕ್ಚ್ಯಾ ವಿಧ್ಯಾರ್ಥಿಂಕ್, ಸಾಹಿತಿಕ್ ಅಭಿರುಚ್ ಆಸ್ಚ್ಯಾ ಪರ್ಗಾಂವ್ಚ್ಯಾ ಬರವ್ಪ್ಯಾಂಕ್ ಸಾಂಗಾತಾ ಘೆವ್ನ್ ಮಾಂಡುನ್ ಹಾಡ್ಚ್ಯಾ ಹ್ಯಾ ವರ್ಸಾಚ್ಯಾ ಅಧ್ಯಯನಾಕ್ ನಾಮ್ನೆಚೊ ಕೊಂಕಣಿ ಕಥಾಕಾರ್ ಡೊ. ಎಡ್ವರ್ಡ್ ಎಲ್. ನಜ್ರೆತಾಚ್ಯೊ ಕಥಾ ವಿಂಚ್ಲ್ಯಾತ್.
ಮೃಗ್‌ಜಳ್: (ಡಿಜಿಟಲ್ ಆಡಿಯೊ ಪುಸ್ತಕ್) – ಡೊ. ಎಡ್ವರ್ಡ್ ಎಲ್. ನಜ್ರೆತಾಚ್ಯೊ ವಿಂಚ್ಣಾರ್ ಮೊಟ್ವ್ಯೊ ಕಥಾ ಆಡಿಯೊ ರುಪಾರ್ ಯೂಟ್ಯೂಬಾಚ್ಯಾ ಆಶಾವಾದಿ ಪ್ರಕಾಶನ್ ಚ್ಯಾನಲಾಚೆರ್ ಪ್ರಸಾರ್ ಜಾತಲ್ಯೊ.
ಮೃಗ್‌ಜಳ್: (ಲಿಪ್ಯಂತರ್) – ಡೊ. ಎಡ್ವರ್ಡ್ ಎಲ್. ನಜ್ರೆತಾಚ್ಯೊ ವಿಂಚ್ಣಾರ್ ಮೊಟ್ವ್ಯೊ ಕಥಾ ಕನ್ನಡ, ನಾಗರಿ ಆನಿ ರೋಮಿ ಲಿಪ್ಯೆಂನಿ ಲಿಪ್ಯಂತರ್ ಜಾವ್ನ್ ಪರ್ಗಟ್ ಜಾತಲ್ಯೊ.
ಕಥಾಪಾಠ್ ಶಿಂಕಳ್ 5: ಡೊ. ಎಡ್ವರ್ಡ್ ಎಲ್. ನಜ್ರೆತಾಚ್ಯಾ ಕಥೆಂಚೆರ್ ಅಧ್ಯಯನ್ ಕೆಲ್ಲಿಂ ರಾಶ್ಟ್ರ್ ಮಟ್ಟಾಚಿಂ ಸಾತ್ ಪೇಪರಾಂ ಎಕೆಕಾ ವೆಬಿನಾರಾಂನಿ ಸಾದರ್ ಜಾತೆಲಿಂ.
ಕಥಾಸಂಧಿ: ಅಗೋಸ್ತ್ 18 ತಾರಿಕೆಚ್ಯಾ ಆಯ್ತಾರಾ, ಗೊಂಯಾಂತ್ ಡೊ. ಎಡ್ವರ್ಡ್ ಎಲ್. ನಜ್ರೆತಾಸವೆಂ ಕಥಾಸಂಧಿ ಆಯೋಜಿತ್ ಜಾತಲಿ. ಹೆಚ್ ಸಂಧರ್ಭಾರ್ ಕಥಾಪಾಠ್ ಅಧ್ಯಯನಾಚಿಂ ಬರ್ಪಾಂ ಆಟಾಪ್ಚಿಂ ಪುಸ್ತಕಾಂ ಲೊಕಾರ್ಪಣ್ ಜಾತಲಿಂ.
1958 ಇಸ್ವೆಂತ್ ದಸೆಂಬ್ರ್ 28 ತಾರಿಕೆರ್ ಶಿರ್ವಾಂತ್ ಜಲ್ಮಲ್ಲೊ ಡೊ.ಎಡ್ವರ್ಡ್ ಎಲ್. ನಜ್ರೆತ್, ಹಾಡಾಂಚೊ ತಜ್ನ್, ತಶೆಂಚ್ ಅಪುರ್ಭಾಯೆಚೊ ಕಥಾಕಾರ್. ಭುಮಿ ವಯ್ಕುಂಟಾಂತ್ (1994), ಆಡ್ವಾರ್ಲೆಲೆಂ ಫಳ್ (1995), ಸಂಯ್ಬಾಚೆಂ ಪಾತಕ್ (1998), ಚಾಮಾದೊರಾಚೊ ಪೂತ್ (2003), ವಡ್ಲೆಂ ಫೆಸ್ತ್ (2016) ಹಾಚಿಂ ಪರ್ಗಟ್ ಜಾಲ್ಲಿಂ ಮೊಟ್ವ್ಯಾ ಕಥೆಚಿಂ ಪುಸ್ತಕಾಂ. ದಾಯ್ಜ್ ಸಾಹಿತಿಕ್ ಸ್ಪರ್ಧೊ, ರಾಕ್ಣೊ ಸಾಹಿತಿಕ್ ಸ್ಪರ್ಧೊ ಅಶೆಂ ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಹಾಣೆಂ ಆಪ್ಣಾಯ್ಲ್ಯಾಂತ್. ದಾಯ್ಜಿದುಭಯ್ ಸಾಹಿತಿಕ್ ಪುರಸ್ಕಾರ್, ಸಂಧೇಶ ಪುರಸ್ಕಾರ್, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಪುರಸ್ಕಾರ್ – ಹಾಕಾ ಲಾಭ್‌ಲ್ಲ್ಯಾಂತ್ಲೆ ಥೊಡೆ ಪುರಸ್ಕಾರ್.
ಆಶಾವಾದಿ ಪ್ರಕಾಶನಾಚೊ ಪಯ್ಲೊ ದಾಯ್ಜ್ ವರ್ಸಾಚೊ ಕಥಾಕಾರ್ ಪುರಸ್ಕಾರ್ 2006 – ಸ್ಟೇನ್ ಅಗೇರಾ, ದಾಯ್ಜ್ ವರ್ಸಾಚೊ ಕಥಾಕಾರ್ ಪುರಸ್ಕಾರ್ 2007 – ಕ್ಲೆರೆನ್ಸ್ ಕೈಕಂಬ ಹಾಂಕಾಂ ಫಾವೊ ಜಾಲಾ.