JANANUDI.COM NETWORK
ಕುಂದಾಪುರ್, ಮಾ.26: ಕುಂದಾಪುರ್ ರೊಜಾರ್ ಮಾಯೆಚ್ಯಾ ಫಿರ್ಗಜೆ ಮಾರ್ಚಾಚ್ಯಾ 24 ವೆರ್ ವಾರ್ಷಿಕ್ ರೆತಿರ್ ಆರಂಭ್ ಜಾಲ್ಲಿ ರೆತಿರ್ ಆಜ್ 27 ವೆರ್ ಸಂಪನ್ನ್ ಜಾಲಿ. ಮಂಗಳೂರ್ ಡಿವೈನ್ ಮರ್ಸಿಚೊ ಮಾ|ಬಾ|ರಿಚ್ಚರ್ಡ್ ಕ್ವಾಡರ್ಸ್ ಆನಿ ತಾಚೊ ಪಂಗ್ಡಾನ್ ಚಲವ್ನ್ ವೆಲಿ.
ಮಾ|ಬಾ|ರಿಚ್ಚರ್ಡ್ ಕ್ವಾಡರ್ಸ್ ಹಾಣಿ ರೆತಿರ್ ಚಲವ್ನ್ ವ್ಹರ್ತಾನಾ ಉತ್ತಿಮ್ ಪ್ರಸಂಗ್ ದಿಲೆಂ. ಭಕ್ತಿಪಣ್, ಭವಾರ್ಥ್, ಮಾಗ್ಣೆ, ಭಾಗೆವೊಂತ್ಪಣ್, ಪಾತ್ಕಾಂತ್ ಪಡನಾ ಜಾಂವ್ಚ್ಯಾಕ್, ಭೊಗ್ಸಾಣೆ, ಅಶೆಂ ಸಭಾರ್ ವಿಶ್ಯಾಂತ್ ಶಿಕವ್ಣ್ ದಿಲಿ. ಸದಾಂಯಿ ಪವಿತ್ರ್ ಸಾಂಕ್ರಾಮೆಂತಾಚೆಂ ಆರಾಧಾನ್ ಚಲ್ಲೆಂ. ದುಸ್ರ್ಯಾ ದೀಸ್ ಕುಡಿಚ್ಯಾ ಭಲಾಯ್ಕೆಕ್, ವಿವಿಧ್ ಪೀಡೆ ಪಾಸೊತ್ ಆರಾಧಾನ್ ತಶೆಂ ಖುರ್ಸಾಕ್ ವಿಶೇಸ್ ರೀತಿನ್ ಆರಾಧಾನ್ ಕೆಲೆಂ. ತಿಸ್ರ್ಯಾ ದಿಸಾ ಭುಗ್ರ್ಯಾಂ ಖಾತಿರ್, ಕುಟ್ಮಾ ಖಾತಿರ್, ಕಾಜಾರಿ ಜೋಡ್ಯಾ ಪಾಸೊತ್, ಆರಾಧನ್ ಕರ್ನ್ ಆಶಿರ್ವಾದ್ ದಿಲೊ.
ಮಾ|ಬಾ|ರಿಚ್ಚರ್ಡ್ ಕ್ವಾಡರ್ಸ್ ಸಾಂಗಾತಾ ಫಿರ್ಗಜ್ ವಿಗಾರ್ ಮಾ|ಬಾ|ಸ್ಟ್ಯಾನಿ ತಾವ್ರೊ ಆನಿ ಸಹಾಯಕ್ ಯಾಜಕ್ ಮಾ|ಬಾ|ವಿಜಯ್ ಡಿಸೋಜಾನ್ ಭಕ್ತಿಕಾಂಚ್ಯಾ ಮಾತ್ಯಾರ್ ಹಾತ್ ದವರ್ನ್ ಮಾಗ್ಲೆ. ಮಾ|ಬಾ|ರಿಚ್ಚರ್ಡ್ ಕ್ವಾಡರ್ಸ್ ಸಾಂಗಾತಾ ಫಿರ್ಗಜ್ ವಿಗಾರ್ ಮಾ|ಬಾ|ಸ್ಟ್ಯಾನಿ ತಾವ್ರೊ ಹಾಣಿ ಪವಿತ್ರ್ ಬಲಿದಾನ್ ಭೆಟಂವ್ಚ್ಯಾ ಸವೆಂ ರೆತಿರ್ ಸಂಪನ್ನ್ ಜಾಲಿ. ವಿಗಾರ್ ಮಾ|ಬಾ|ಸ್ಟ್ಯಾನಿ ತಾವ್ರೊನ್ ಧನ್ಯವಾದ್ ಪಾಟಯ್ಲೆಂ.
ಹ್ಯಾ ತೀನ್ ದಿಸಾಂಚ್ಯಾ ರೆತಿರೆಂತ್ ಸಭಾರಾಂಕ್ ಬರೆಪಣ್ ಲಾಭ್ಲಾ ಮ್ಹಣುನ್ ಬ್ರದರ್ ಉರ್ಬಾನ್ ಡಿಸೋಜಾನ್ ಕಳಯ್ಲೆ. ರೆತಿರೆಕ್ ಪಯ್ಲ್ಯಾ ದಿಸಾ ಬ್ರದರ್ ಆಲ್ಬನ್ ಡಿಸೋಜಾ, ಉಪ್ರಾಂತ್ಲ್ಯಾ ದೋನ್ ದಿಸಾಂ ಬ್ರದರ್ ಆಲ್ವಿನ್ ಕುವೆಲ್ಲೊ ಹಾಣೆ ಗಾಯನ್ ಆನಿ ವಾಜ್‍ಂತ್ರ್ ಖೆಳೊನ್ ಸಾಂಗಾತ್ ದಿಲೊ.
