ಕುಂದಾಪುರ್, ನ.6: ಕುಂದಾಪುರ್ ರೊಜಾರ್ ಮಾಯೆಚ್ಯಾ ಇಗರ್ಜೆ ಲ್ಹಾನ್ ಸಮೂದಾಯ್ ಬಳ್ವಂತ್ ಕರ್ಚ್ಯಾ ಇರಾದ್ಯಾನ್ ಆಯ್ತಾರಾ ಮಂಗ್ಳೂರ್ ಧರ್ಮ್ ಪ್ರಾಂತ್ಯಾಚೊ ಲ್ಹಾನ್ ಸಮೂದಾಯಾಚೊ ನಿರ್ದೇಶಕ್ ಮಾ|ಬಾ|ಜೊಕೀಮ್ ಫೆರ್ನಾಂದ್ ಹಾಣಿ ಪವಿತ್ರ್ ಬಲಿದಾನ್ ಭೆಟವ್ನ್ ಲ್ಹಾನ್ ಸಮೂದಾಯಾ ವಿಶಿಂ ಶಿಕವ್ಣ್ ದಿಲಿ.
“ವಾಡ್ಯಾನಿಂ ಚಡ್ತಿಕ್ ಜಣಾನಿಂ ಲ್ಹಾನ್ ಸಮೂದಾಯ್ ಜಮಾತೆಕ್ ಹಾಜರ್ ಜಾಯ್ಜೆ, ಕೇವಲ್ ಮಾಗ್ಣೆ ಮಾತ್ರ್ ನ್ಹಯ್, ಹೇರ್ ಚಟುವಟಿಕ್ಯೊ ಮಾಂಡುನ್ ಹಾಡ್ನ್ ಲ್ಹಾನ್ ಸಮೂದಾಯ್ ಬಳಾಧಿಕ್ ಕರ್ಯೆತ್. ಆಮಿ ಮೆಲ್ಯಾ ದರ್ಯಾ ಬರಿ, ತಟಸ್ಥ್ ಆಸ್ಚೆಂ ಬರೆ ನ್ಹಯ್, ಮೆಲ್ಯಾ ದರ್ಯಾಂತ್ ಮಾಸ್ಳಿ ನಾ, ಕಾಂಯ್ಚ್ ನಾ, ತ್ಯಾ ಪರಿಸರಾಂತ್ ಕಿತೆಂಚ್ ಜಲ್ಮಾನಾ, ಫಳ್ ನಾ, ಪಾಚ್ವೆ ಪಣ್ ನಾ, ಅಶೆಂ ಆಮಿ ತಟಸ್ಥ್ ಆಸ್ಚೆಂ ನ್ಹಯ್. ಆಮಿ ಗಾಲಿಲೆಯಾಚ್ಯಾ ಸರೋವರ್ ಜೀವಾಳ್ ಆಸ್ಲ್ಯಾ ಬರಿ ಆಸಾಜೆ. ಪಾಚ್ಯ್ವಾ ಪರಿಸರಾನ್ ಫಳಾಭರಿತ್ ಜಾಯ್ಜೆ, ಮ್ಹಳ್ಯಾರ್, ಸೊಮಿಯಾಚೆ ಮಿಸಾಂವಾಂತ್ ಆಮಿ ಕ್ರಿಯಾಳ್ ಥರಾನ್ ಭಾಗ್ ಘೆಜೆ. ಪವಿತ್ರ್ ಪುಸ್ತಕಾಚಿಂ ಜಾಣ್ವಾಯ್ ಜೊಡುಂಕ್ ಆಜ್ ಕಾಲ್ ಡಾಕ್ಟರ್ಸ್, ಎಂಜಿನಿಯರ್ ಹೇರ್ ವ್ಹಡ್ ಶಿಕ್ಪಿ ಲಾಯಿಕಚ್ ಮುಕಾರ್ ಸರ್ತಾತ್ ಆಸ್ತಾಂ, ಆಮಿ ಪಾಟಿಂ ರಾಂವ್ಚೆ ನ್ಹಯ್. ಕ್ರಿಸ್ತಾಚೆಂ ರಾಜ್ ಹಾಂಗಾಸರ್ ನ್ಹಯ್ ತರೀ, ಸಂಸಾರಾಂರ್ ಹೇರ್ ರಾಷ್ಟ್ರಾನಿಂ ವೇಗಾನ್ ಚಡಾಚ್ ಆಸಾ. ಲೋಕ್ ಕ್ರಿಸ್ತಾಂವ್ ಜಾತೆಂ ಆಸಾತ್, ಆನಿ ಯಾಜಕ್ ಜಾಂವ್ಚೆಯಿ ಚಡಾಚ್ ಆಸಾ. ಅಶೆಂ ಆಸ್ತಾಂ, ಆಮಿ ಶೆಳೆ ಪಣ್ ಪಾಂಗ್ರುಚೆಂ ನ್ಹಯ್. ಲಾಯಿಕಾನಿ ಲ್ಹಾನ್ ಸಮೂದಾಯಾಂತ್ ಉರ್ಭೆನ್ ಭಾಗ್ ಘೆಂವ್ನ್ ಲ್ಹಾನ್ ಸಮೂದಾಯ್ ಬಳಾಧಿಕ್ ಕರಿಜೆ” ಮ್ಹಣುನ್ ಸಂದೇಶ್ ದಿಲೊ.
ಫಿರ್ಗಜೆಚೊ ವಿಗಾರ್ ಭೊ|ಮಾ|ಸ್ಟ್ಯಾನಿ ತಾವ್ರೊ ಹಾಣಿ ಸಹ ಭೆಟವ್ಣಿ ಕೆಲಿ ಆನಿ ಸಾಕ್ರಾಮೆಂತಾಚೆ ಆರಾಧಾನ್ ಚಲವ್ನ್ ವ್ಹರ್ನ್, ಉಪ್ಕಾರ್ ಆಟಾಯ್ಲೊ.
