ಗಂಟಾಲ್ಕಟ್ಟೆ : 6 ಮಾಯ್ 2023: ಆಶಾವಾದಿ ಪ್ರಕಾಶನಾನ್ ಐ.ಸಿ.ವೈ.ಎಮ್ ಆನಿ ವೈ.ಸಿ.ಎಸ್ ಹಾಂಚ್ಯಾ ಸಹಯೋಗಾಖಾಲ್ ಗಂಟಾಲ್ಕಟ್ಟೆಚ್ಯಾ ನಿತ್ಯಾದಾರ್ ಮಾಯೆಚ್ಯಾ ಇಗರ್ಜೆಚ್ಯಾ ಸಭಾಸಾಲಾಂತ್ ಆದೇಸಾಚೆಂ ಸಾಹಿತಿಕ್ ಕಾರ್ಯಾಗಾರ್ ಚಲವ್ನ್ ವ್ಹೆಲೆಂ.
ಫಿರ್ಗಜೆಚೊ ವಿಗಾರ್ ಮಾ|ಬಾ|ರೊನಾಲ್ಡ್ ಡಿಸೋಜಾಚ್ಯಾ ಅಧ್ಯಕ್ಷ್‌ಪಣಾಖಾಲ್, ಮಾಗ್ಣ್ಯಾಂತ್ ಸುರ್ವಾತ್ ಕರುನ್ ಹ್ಯಾ ಕಾರ್ಯಾಗಾರಾಚೆಂ ಉಗ್ತಾವಣ್ ಜಾತಚ್ ಅಪ್ಲ್ಯಾ ಯೆವ್ಕಾರ್ ಉಲವ್ಪಾಂತ್ “ಕೊಂಕಣಿ ಭಾಸೆಚೊ ಮೋಗ್ ಕರ್ಚೊ, ತಿಚೊ ಪೋಸ್ ಕರ್ಚಿ ಜವಾಭ್ದಾರಿ ಆಮಾಂ ಸರ್ವಾಂಚಿ ಜಾಲ್ಲ್ಯಾನ್ ತ್ಯಾ ಇರಾದ್ಯಾನ್ ಆಮ್ಚ್ಯಾ ಸಮಾಜೆಂತ್ ಆಸ್ಚ್ಯಾ ಸಾಹಿತಿಕ್ ತಾಲೆಂತಾಕ್ ವ್ಹಳ್ಕುನ್, ತಾಂಕಾಂ ಮುಕಾರ್ ಯೆಂವ್ಚಿ ವಾಟ್ ರುತಾಂ ಕರ್ಚೆ ದಿಶೆನ್ ಅಸಲಿಂ ಕಾರ್ಯಾಗಾರಾಂ ಮಾಂಡುನ್ ಹಾಡ್ಚಿ ಗರ್ಜ್ ಆಜ್ ಉದೆಲ್ಯಾ” ಮ್ಹಣಾಲೆ.
ಬೆನಿಟಾ ಮಿನೇಜಸಾನ್ ಕಾರ್ಯಾಗಾರಾಚೆಂ ಸೂತ್ರ್ ಸಂಚಾಲನ್ ಕೆಲೆಂ, ಐ.ಸಿ.ವೈ.ಎಮ್. ಅಧ್ಯಕ್ಷ್ ನೋಲನ್ ಮಿರಾಂದಾ, ವೈ.ಸಿ.ಎಸ್. ಅಧ್ಯಕ್ಷಿಣ್ ಲಿವ್ಯಾ ಸೆರಾವೊ, ಐ.ಸಿ.ವೈ.ಎಮ್. ಕಾರ್ಯದರ್ಶಿ ಇಯಾನ್ ಸಿಕ್ವೇರಾನ್, ವೈ.ಸಿ.ಎಸ್. ಕಾರ್ಯದರ್ಶಿ ಮೆಲಿಶಾ ಮಿರಾಂದಾ ಹಾಣಿಂ ಹೆಂ ಕಾರ್ಯಾಗಾರ್ ಚಲವ್ಪಿಂಚಿ ಒಳೊಕ್ ಕರುನ್ ದಿಲಿ. ಮಾ|ರೋಯ್ಸನ್ ಫೆರ್ನಾಂಡಿಸ್ (ಸಂಪಾದಕ್ – ಉಜ್ವಾಡ್ ಪಂದ್ರಾಳೆಂ), ಮಾ|ಚೇತನ್ ಲೋಬೊ (ಸಂಪಾದಕ್ – ಸೆವಕ್ ಮಯ್ನ್ಯಾಳೆಂ) ತಶೆಂಚ್ ವಲ್ಲಿ ಕ್ವಾಡ್ರಸ್ (ಸಂಪಾದಕ್ – ಪಯ್ಣಾರಿ) ಹಾಂಕಾಂ ವಿಗಾರಾನ್ ಶೊಲಾಂ ಪಾಂಗ್ರುನ್ ಫುಲಾಂಚೊ ಬುಕ್ಕೊ ತಶೆಂಚ್ ಯಾದಸ್ತಿಕಾ ದಿವುನ್ ಸ್ವಾಗತ್ ಕೆಲೊ. ವೆದಿಚೆರ್ ಫಿರ್ಗಜ್ ವಿಗಾರ್, ಗೊವ್ಳಿಗ್ ಪರಿಶದೆಚಿ ಕಾರ್ಯದರ್ಶಿ ಲಿಡಿಯಾ ಡಿಸೋಜ್, ಐ.ಸಿ.ವೈ.ಎಮ್ ಅಧ್ಯಕ್ಷ್ ಆನಿ ವೈ.ಸಿ.ಎಸ್.ಅಧ್ಯಕ್ಷ್ ಹಾಜರ್ ಆಸ್ಲಿಂ.
’ಖಬ್ರೊ ಕಶ್ಯೊ ಬರಂವ್ಚ್ಯೊ’ ವಿಶ್ಯಾಚೆರ್ ಮಾ|ರೋಯ್ಸನ್ ಫೆರ್ನಾಂಡಿಸ್ (ಸಂಪಾದಕ್ – ಉಜ್ವಾಡ್ ಪಂದ್ರಾಳೆಂ) ಹಾಣಿಂ ತರ್ಭೆತ್ ದಿಲಿ, ’ಲೇಖನಾಂ ಕಶಿಂ ಬರಂವ್ಚಿಂ’ ವಿಶ್ಯಾಚೆರ್ ತರ್ಭೆತ್‌ದಾರ್ ಮಾ|ಚೇತನ್ ಲೋಬೊ (ಸಂಪಾದಕ್ – ಸೆವಕ್ ಮಯ್ನ್ಯಾಳೆಂ) ಹಾಣಿಂ ತರ್ಭೆತ್ ದಿಲಿ. ’ಮೊಟ್ವ್ಯೊ ಕಾಣಿಯೊ ಕಶ್ಯೊ ಬರಂವ್ಚ್ಯೊ’ ವಿಶ್ಯಾಚೆರ್ ತರ್ಭೆತ್‌ದಾರ್ ವಲ್ಲಿ ಕ್ವಾಡ್ರಸ್ (ಸಂಪಾದಕ್ – ಪಯ್ಣಾರಿ) ಹಾಣಿಂ ತರ್ಭೆತ್ ದಿಲಿ.
ದನ್ಪಾರಾಂ ಜೆವ್ಣಾ ಉಪ್ರಾಂತ್ ಕವಿಗೋಶ್ಟಿಚ್ಯಾ ಅಧ್ಯಕ್ಷ್ ಆಂಡ್ರ್ಯೂ ಡಿ’ಕುನ್ಹಾಕ್ ವಿಗಾರಾನ್ ಶೋಲ್ ಪಾಂಗ್ರುನ್, ಫುಲಾಂಚೊ ಬುಕ್ಕೊ ಆನಿ ಯಾದಸ್ತಿಕಾ ದಿವುನ್ ಸ್ವಾಗತ್ ಕೆಲೊ. ಕವಿಗೋಶ್ಟಿಂತ್ ವಿಗಾರ್ ಮಾ|ರೊನಾಲ್ಡ್ ಡಿಸೋಜ್, ಫೆಲ್ಸಿ ಲೋಬೊ ದೆರೆಬೈಲ್, ಎಡ್ವಿನ್ ಪಿಂಟೊ ಗಂಟಾಲ್ಕಟ್ಟೆ, ಪೆದ್ರು ಪ್ರಭು ತಾಕೊಡೆ, ವಿಲ್ಲಿ ಅಲ್ಲಿಪಾದೆ, ಗ್ಲೇನಿಶ್ ಮಾರ್ಟಿಸ್ ಅಲಂಗಾರ್, ಜೋಯ್ಸ್ ಪಿಂಟೊ ಕಿರೆಂ/ಕಿನ್ನಿಗೊಳಿ, ಸಲೋಮಿ ಮಿಯಾಪದವ್, ವಲ್ಲಿ ಕ್ವಾಡ್ರಸ್ ಹಾಣಿಂ ವಾಂಟೊ ಘೆತ್ಲೊ.
ಉಪ್ರಾಂತ್ ಆಶಾವಾದಿ ಪ್ರಕಾಶನಾಚಿಂ ದೋನ್ ಕೊಂಕಣಿ ಪುಸ್ತಕಾಂಚೆಂ ಮೊಕ್ಳೀಕ್ ಕಾರ್ಯೆಂ ಚಲ್ಲೆಂ. ಆಶಾವಾದಿ ಪ್ರಕಾಶನಾಚೆಂ ಎಕಾವನಾವೆಂ ಪುಸ್ತಕ್ ’ಆಟ್ವೊ ಸುರ್’ ತಶೆಂಚ್ ಕವಯತ್ರಿ ’ಸಲೋಮಿ ಮಿಯಾಪದವ್’ ಚಿ ತಶೆಂಚ್ ತಿಚಿ ಒಳೊಕ್ ಕರುನ್ ಹ್ಯಾ ಪುಸ್ತಕಾಚೆಂ ಮೊಕ್ಳಿಕ್ ಕಾರ್ಯೆಂ ಆಂಡ್ರ್ಯೂ ಎಲ್. ಡಿಕುನ್ಹಾನ್ ಕೆಲೆಂ. ಆಶಾವಾದಿ ಪ್ರಕಾಶನಾಚೆಂ ಬಾವನಾವೆಂ ಪುಸ್ತಕ್ ’ಪಾನಾಂಚ್ ಫುಲಾಂ ಜಾತಾನಾ’ ತಶೆಂಚ್ ಕವಯತ್ರಿ ’ಮೊನಿಕಾ ಡೆ’ಸಾ ಮಥಾಯಸ್’ ಚಿ ತಶೆಂಚ್ ತಿಚಿ ಒಳೊಕ್ ವಲ್ಲಿ ಕ್ವಾಡ್ರಸಾನ್ ಕರುನ್ ದಿತಚ್ ಮಾ|ರೊನಾಲ್ಡ್ ಡಿಸೋಜಾನ್ ಪುಸ್ತಕಾಚೆಂ ಮೊಕ್ಳಿಕ್ ಕಾರ್ಯೆಂ ಚಲಯ್ತಚ್ ಸಲೋಮಿ ಮಿಯಾಪದವ್ ಹಿಣೆಂ ಅಪ್ಲಿಂ ಭಗ್ಣಾಂ ಉಚಾರುನ್ ಹ್ಯಾ ಪುಸ್ತಕಾಚ್ಯಾ ಪರ್ಗಟ್ಣೆಕ್ ಕಾರಣ್ ಜಾಲ್ಲ್ಯಾಂಕ್ ಧಿನ್ವಾಸ್ ಪಾಟಯ್ಲೆ.
ವಲ್ಲಿ ಕ್ವಾಡ್ರಸಾನ್ ಉಪ್ಕಾರ್ ಆಟವ್ಣೆಚೆಂ ಉಲವ್ಪ್ ಕರುನ್ ಯುವಜಣಾಂಕ್ ಕೊಂಕಣಿ ಸಾಹಿತ್ಯಾಚಿ ಒಳೊಕ್ ಕರುನ್ ದಿಂವ್ಚಿ, ತಶೆಂಚ್ ಸಾಹಿತಿಕ್ ತಾಲೆಂತಾಕ್ ಮುಕಾರ್ ಹಾಡ್ಚೆ ದಿಶೆನ್ ಐ.ಸಿ.ವೈ.ಎಮ್ ತಶೆಂಚ್ ವೈ.ಸಿ.ಎಸ್. ಸಂಘಟನಾನ್ ಏಕ್ ದೇಕ್ ದಿಲ್ಯಾ ಆನಿ ಹೆಂ ಪ್ರೇರಣ್ ಘೆವ್ನ್ ಹೆರ್ ಪ್ರಾಂತ್ಯಾಚ್ಯಾ ಯುವ ಸಂಚಾಲನಾನ್ ಸಯ್ತ್ ಅಸಲಿಂ ಕಾರ್ಯಾಗಾರಾಂ ಮಾಂಡುನ್ ಹಾಡ್ಲಿಂ ತರ್ ಆಮ್ಚ್ಯಾ ಕೊಂಕಣಿ ಭಾಸೆಕ್ ನವ್ಯೊ ಆಂಖ್ರ್ಯೊ ಫುಲ್ತಲ್ಯೊ ತಶೆಂಚ್ ನವಿಂ ಪಾನಾಂ, ಫುಲಾಂ ಫುಲ್ತಲಿಂ ಮ್ಹಳ್ಳೊ ಆಶಾವಾದ್ ಉವಾರ್ಲೊ ತಶೆಂಚ್ ಹ್ಯಾ ಕಾರ್ಯಾಗಾರಾಕ್ ಮಿನತ್ ಕೆಲ್ಲ್ಯಾ ಸಮೇಸ್ತಾಂಚೊ ಉಪ್ಕಾರ್ ಬಾವುಡ್ಲೊ.
ವರ್ದಿ: ಇಯಾನ್ ಸಿಕ್ವೇರಾ ಗಂಟಾಲ್ಕಟ್ಟೆ