ಮಂಗಳೂರ್ : 2023 ವ್ಯಾ ಅಕ್ಟೋಬರ್ 8 ತಾರಿಕೆರ್ ಸಕಾಳಿಂ ಧಾ ವೊರಾರ್ ‘ಕೊಂಕಣಿ ಲೇಖಕ್ ಸಂಘ್ ಕರ್ನಾಟಕ’ ಹಾಂಚಿ ವಾರ್ಷಿಕ್ ಜೆರಾಲ್ ಜಮತ್ ಬಜ್ಜೋಡಿಂತ್ಲ್ಯಾ ಸಂದೇಶ ಸಭಾ ಸಲಾಂತ್ ಜಮ್ಲಿ. ಸುಂಕಾಣ್ ಸಮಿತಿಚೊ ಸಂಚಾಲಕ್ ಮಾನೆಸ್ತ್ ರಿಚರ್ಡ್ ಮೋರಸ್ ಸವೆಂ
ಸುಂಕಾಣ್ ಸಮಿತಿಚೆ ಸಾಂದೆ ಮಾನೆಸ್ತ್ ಡೊಲ್ಫಿ ಕಾಸ್ಸಿಯಾ ಆನಿ ಡಾ. ಎಡ್ವರ್ಡ್ ನಜ್ರೆತಾನ್ ಹಿ ಜಮಾತ್ ಚಲವ್ನ್ ವ್ಹೆಲಿ.
ಹೊ ಸಂಘ್ ಕಾನಡಿ ಲಿಪಿಂತ್ ಕೊಂಕಣಿ ಸಾಹಿತ್ಯ್ ರಚ್ಚ್ಯಾ ಕೊಂಕಣಿ ಸಾಹಿತಿಂಚ್ಯಾ ಹಿತಖಾತಿರ್ ರಚ್ಲೊಲೊ ಆಸುನ್ ಪಾಟ್ಲ್ಯಾ ಪಾಂಚ್ ವರ್ಸಾಂನಿ ಹ್ಯಾ ಸಂಘಾನ್ ಕೆಲ್ಲಿಂ ಕಾರ್ಯಕ್ರಮಾಂ ಆನಿ ಸಂಘಾಚೊ ದಿಷ್ಟಾವೊ ಆಪ್ಲ್ಯಾ ಪ್ರಸ್ತಾವಿಕ್ ಉಲವ್ಪಾಂತ್ ಡಾ. ಎಡ್ವರ್ಡ್ ನಜ್ರೆತಾನ್
ವಿವರಾಯ್ಲೊ. ಪಾಟ್ಲ್ಯಾ ವರ್ಸಾಂತ್ ಅಂತರ್ಲೆಲ್ಯಾ ಸರ್ವ್ ಕೊಂಕಣಿ ಸಾಹಿತಿ ತಶೆಂಚ್ ಕಲಾಕಾರಾಂಚ್ಯಾ ಅತ್ಮ್ಯಾಕ್ ಶಾಂತಿ ಮಾಗುನ್ ಮೌನ್
ಪ್ರಾರ್ಥನ್ ಚಲಯ್ಲೆಂ.
ಸಂಚಾಲಕ್ ಮಾನೆಸ್ತ್ ರಿಚರ್ಡ್ ಮೋರಸಾನ್ ಆಡಿಟ್ ಕೆಲ್ಲೆಂ ಸಂಘಾಚೆಂ ಲೇಕ್‍ಪಾಕ್ ಮಂಡನ್ ಕೆಲೆಂ. ಸಂಘಾಚ್ಯಾ ಮುಕ್ಲ್ಯಾ ಕಾರ್ಯಾವಳಿವಿಶಿಂ ಸಾಂದ್ಯಾಂನಿ ಜಾಯ್ತ್ಯೊ ಕ್ರಿಯಾತ್ಮಕ್ ಸಲಹಾ ದಿಲ್ಯೊ. ಜಮಾತಿಚೊ ಮುಕ್ಲೊ ಭಾಗ್ ಜಾವ್ನ್
ಕೊಂಕಣಿ ಸಾಹಿತಿ ಮಾನೆಸ್ತಿನ್ ಐರಿನ್ ರೆಬೆಲ್ಲೊ ಹಿಣೆಂ “ಕೊಂಕಣಿ ಸಾಹಿತ್ಯಾಕ್ ಸ್ತ್ರೀಯಾಂಚಿ ದೆಣ್ಗಿ” ಹ್ಯಾ ವಿಚಾರಾಚೆರ್ ಖೊಲಾಯೆನ್
ಆಧ್ಯಯನಾತ್ಮಕ್ ಉಲವ್ಪ್ ಸಾದರ್ ಕೆಲೆಂ. ಸ್ತ್ರೀ ಸಾಹಿತಿಂಕ್ ಆಸ್ಚ್ಯೊ ಅಡ್ಕಳಿ ವಿವರುನ್ ಅಡ್ಕಳಿ ನಿವ್ರಾಂವ್ಕ್ ಸಲಹಾ ದಿಂವ್ಚ್ಯೆ ಸವೆಂ
ಕಥೊಲಿಕ್ ತಶೆಂಚ್ ಕಥೊಲಿಕೇತರ್ ಸ್ತ್ರೀ ಸಾಹಿತಿಂಚಿ ವಳಕ್ ಆನಿ ಝಳಕ್ ದಿಲಿ. ಡಾ. ಎಡ್ವರ್ಡ್ ನಜ್ರೆತಾನ್ ಸ್ವಾಗತ್ ಕರ್ನ್,
ಮಾನೆಸ್ತ್ ಡೊಲ್ಫಿ ಕಾಸ್ಸಿಯಾನ್ ನಿರೂಪಣ್ ಕೆಲೆಂ.
ಜಮತಿಚೊ ದುಸ್ರೊ ಭಾಗ್ ಜಾವ್ನ್ ಕೊಂಕಣಿ ಸಾಹಿತಿ ಲವಿ ಗಂಜಿಮಠ ಹಿಣೆಂ ಲಿಖ್ಲಲೊ “ತುಂ ಪೂತ್ ನ್ಹಯ್” ಕಾದಂಬರಿಚೊ
ಪುಸ್ತಕ್ ಕುಟ್ಮಾಚೊ ಸೆವಕ್ ಸಂಪಾದಕ್ ಮಾ.ಬಾ. ಚೇತನ್ ಲೋಬೊ ಹಾಣಿಂ ವಿಮೋಚನ್ ಕೆಲೊ. ಆಪ್ಲ್ಯಾ ಉಲವ್ಪಾಂತ್ ತಾಣಿಂ
ಸಾಹಿತ್ಯಾಚ್ಯಾ ಉದರ್ಗತೆಕ್ ರಚನಾತ್ಮಕ್ ಠೀಕಾಯ್ ಗರ್ಜ್ ಆಸಾ ಮ್ಹಣ್ಚಿ ಅಭಿಪ್ರಾಯ್ ಉಚಾರ್ಲಿ. ಕೊಂಕಣಿ ಸಾಹಿತಿ ಆನಿ ವಿಮರ್ಷಕ್
ದೊತೊರ್ ಜೊಯೆರ್ ನೊರೋನ್ಹಾ ಹಾಣಿ ವಿಮೋಚಿತ್ ಕಾದಂಬರಿಚೊ ವಿಮರ್ಸೊ ಸಾದರ್ ಕೆಲೊ. ಲವಿ ಗಂಜಿಮಠ ಹಿಣೆಂ ಸಾಹಿತ್ಯ್
ಕಶೆಂ ಸಾಹಿತಿಕ್ ಜೀವ್ ದವರ್ತಾ ಮ್ಹಣ್ಚ್ಯೆವಿಶಿಂ ಆಪ್ಲೊ ಅನುಭವ್ ವಾಂಟುನ್ ಘೆತ್ಲೊ. ಪುಸ್ತಕಾಚೊ ಫೊರ್ ವಿನ್ಯಾಸ್ ಕೆಲ್ಲ್ಯಾ
ನಾಮ್ಣೆಚೊ ಕಲಾಕಾರ್ ಮಾನೆಸ್ತ್ ಜಾನ್ ಚಂದ್ರನಾಕ್ ವೆದಿರ್ ಸನ್ಮಾನ್ ಕೆಲೊ. ಕೆ.ಎಲ್.ಎಸ್ ಸುಂಕಾಣ್ ಸಮಿತಿಚೆ ಸಾಂದೆ, ಶ್ರೀಮತಿ
ರೀಟಾ ಮಸ್ಕರೇನಸ್, ಆನಿ ಪ್ರಕಾಶಕಿ ಶ್ರೀಮತಿ ವೀರಾ ಡಿ’ಸೋಜ ಮಾನಾಚ್ಯಾ ಸೈರ್ಯಾಂಸವೆಂ ವೆದಿರ್ ಹಾಜರ್ ಆಸ್‍ಲ್ಲಿಂ. ಮಾನೆಸ್ತ್ ಹೆನ್ರಿ
ಮಸ್ಕರೇನಸಾನ್ ಪುಸ್ತಕ್ ವಿಮೋಚನ್ ಕಾರ್ಯೆಂ ಚಲವ್ನ್ ವ್ಹೆಲೆಂ. ಬಾಂದವ್ಪಣಾಚ್ಯಾ ಜೆವ್ಣಾ ಸವೆಂ ಕಾರ್ಯೆಂ ಸಂಪ್ಲೆಂ.
