ನಾಂತ್ ಕೊಣಿಂ
ಮ್ಹುಜ್ಯಾ ಕಡೆನ್
ಜಾಯಿತ್ತೆಂ ಆಸಾ
ಮ್ಹುಣ್ತಾಲೊ ತುಂ
ಆಜ್ ತುಜಿ…..
ಪರಿಸ್ಥಿತಿ ಕಸಲಿ ಜಾಲಾ ?
ಪೈಶೆ ಯೇಟ್ಲ್ಯಾರ್ ಗಿ
ಜಿವಾಚೊ ಸ್ವಾಸ್ ಮೆಳಾನಾಂ
ತುಜೊ ಜೀವ್ ತೊ
ಗೆಲೊ ತರ್….
ಲಾಗಿಂ ಕೊಣ್ಣಿಂ ಯೆನಾ
ನಾಂ ತುಕಾ….
ನ್ಹಾಣ್ ಬರೆಂ ನೆಸಾಣ್
ನಾಂ ತುಜ್ಯಾ …
ಪೆಟ್ಯೆಕ್ ಫುಲಾಂ
ನಾಂತ್ ಘಾಂಟಿಂಚೊ ಆವಾಜ್
ನಾಂ ತುಜ್ಯಾ…..
ಅಂತಿಮ್ ಪಯ್ಣಾಕ್ ಬ್ಯಾಂಡ್
ಚಾ, ಕಾಫಿ
ನಾಂ ತುಜ್ಯಾ
ಪೆಟ್ಯೆ ಭೊಂವ್ತಿಂ
ಸೈರಿಂ ಧರ್ಯಿಂ…..
ಶ್ರಧ್ಧಾಂಜಲಿಂಚಿ ಉತ್ರಾಂ ನಾಂತ್
ಭುಜೈತಾಲಿಂ ಕೊಣಿಂ ನಾಂತ್
ಅತ್ಮ್ಯಾಂಚಾ ಮಿಸಾಕ್ ಕೊಣಿಂ ನಾಂತ್
ಕೇಟ್ರಿಂಗ್ ವಾಲ್ಯಾಂಚೆ
ರುಚಿಕ್ ಜೆವಾಣ್ ನಾಂ
ನಿಮಾಣೆಂ….
ಘರ್ಚಾಂಕ್ ಪೊಟ್ಲುನ್
ಧುಃಖಾಂ ಗಳಯ್ತಾಲಿಂ ನಾಂತ್
ಜಾಯ್ತೆಂ ತುಕಾ ಆಸ್ಲ್ಯಾರ್ ಗೀ…
ಅಂತಿಮ್ ತುಜ್ಯಾ….
ಸಾಸ್ಣಾಂಚಾ ಪಯ್ಣ್ಯಾಂಕ್
ಕಿತೆಂಚ್ ನಾಸ್ತಾಂನಾಂ
ಹ್ಯಾ ಭುಂಯ್ಚ್ಯಾ …..
ಗರ್ಭಾಂತ್ ಲಿಪ್ತೆಂ.
✍️. ಜೊಸೆಫ್ ಲುವಿಸ್ ಸಾಸ್ತಾನ್.
ಸಮಾಧಾನೆಚೊ ಸ್ವಾಸ್
ಉಬ್ತಾತ್ ತಿಂ
ಸುಕ್ಣಿಂ ಸೊವ್ಜಾಂ
ಕಿತೆಂಚ್ ಪರ್ವಾನಾಸ್ತಾಂ
ಕಿತೆಂಚ್ ಉಣೆಂ ನಾಸ್ತಾಂ
ರಚ್ನಾರ್ ತಾಂಕಾಂ ಪೊಸ್ತಾ
ರಾಸ್ ತಿಂ ಘಾಲಿನಾಂತ್
ಪುಂಜೊವ್ನ್ ತಿಂ ದವರಿನಾಂತ್
ಭುಕೇಕ್ ತಾಂಕಾಂ
ಉಣೆಂ ಪೊಡ್ಲೆನಾಂ
ಪೋಟ್ ತುಜೆಂ
ಭೊರ್ಲೆಂ ನಾಂ
ತುಪ್ಯಾನಿಂ ಭೊರ್ಚೆಂ
ರಾವಯ್ಲೆಂ ನಾಂ
ಚಡಿತ್ ಆಸ್ಲೆಂ
ದುಸ್ರ್ಯಾಂಕ್ ವಾಂಟ್ಲೆಂ ನಾಂ
ಹೊರ್ಭೊಸ್ ತುಜೊ
ಸೊಡ್ಲೊನಾಯ್
ತ್ಯಾ ಎಕಾ ದಿಸಾ
ತುಕಾ ಖಾಂವ್ಕ್ ಮೆಳ್ಳೆಂ ನಾಂ
ಸಾಸ್ಣಾಚಾ ತುಜ್ಯಾ
ಪಯ್ಣಾಕ್ ವೆತಾನಾಂ
ಮ್ಹುಜೆಂ ಮ್ಹುಳ್ಳೆಂ
ಸ್ವಾರ್ಥ್ ಬಂಧ್ ಕರ್
ಕಿತೆಂ ಆಸಾ ತೆಂ
ವಾಂಟುಂಕ್ ಕರ್
ಭುಕೆಲ್ಲ್ಯಾಂಚಿ ಭೂಕ್
ಥಾಂಬಾಶಿ ಕರ್
ನಿಮಾಣ್ಯಾ ದಿಸಾ
ಸಮಾಧಾನೆಚೊ ಸ್ವಾಸ್
ಸೊಡುಂಕ್ ಪ್ರಯತ್ನ್ ಕರ್.
✍️ ಜೊಸೆಫ್ ಲುವಿಸ್ ಸಾಸ್ತಾನ್.
