ಮಂಗ್ಳುರ್; 9 ಮಾರ್ಚ್ ಕೊಂಕಣಿ ಲೇಖಕಿಂಚೊ ಎಕ್ತಾರ್ ಆನಿ ಆಶಾವಾದಿ ಪ್ರಕಾಶನಾನ್ ಮಂಗ್ಳುರಾಂತ್ಲ್ಯಾ ಸಿ.ಓ.ಡಿ.ಪಿ. ಸಭಾಸಾಲಾಂತ್ ಸಕಾಳಿಂ 9:30 ಥಾವ್ನ್ 1:30 ಪರ್ಯಾಂತ್ ಅಂತರ್‌ರಾಷ್ಟ್ರೀಯ್ ಸ್ತ್ರೀಯಾಂಚೊ ದೀಸ್ ಭೋವ್ ಅಪುರ್ಭಾಯೆನ್ ಆಚರಣ್ ಕೆಲೊ. ಮಾ|ಚೇತನ್ ಲೋಬೊಚ್ಯಾ ಅಧ್ಯಕ್ಷ್‌ಪಣಾಖಾಲ್ ದಿವ್ಟಿ ಪೆಟವ್ನ್ ಹ್ಯಾ ಕಾರ್ಯಾಚೆಂ ಉಗ್ತಾವಣ್ ಜಾಲೆಂ. ಕಾಣಿಕ್ ಪತ್ರಾಚಿ ಆಧ್ಲಿ ಸಹ-ಸಂಪಾದಕಿ ಮಾರಿಯೆಟ್ ರಾಸ್ಕಿನ್ಹಾ, ಏವ್ರೆಲ್ ರೊಡ್ರಿಗಸ್, ಗ್ವಾದಲೂಪ್ ಡಾಯಸ್, ವಿಲ್ಲಿ ಗೋಯೆಸ್, ವಿಲ್ಫ್ರೆಡ್ ಲೋಬೊ ಪಡೀಲ್, ಆನಿ ಫ್ಲಾವಿಯಾ ಆಲ್ಬುಕರ್ಕ್ ವೆದಿಚೆರ್ ಹಾಜರ್ ಆಸ್ಲಿಂ.
ಸಲೋಮಿ ಮೊಗರ್ನಾಡ್ ಹಿಣೆಂ ಲೊಕಾರ್ಪಣ್ ಜಾಂವ್ಚ್ಯಾ ನೋವ್ ಪುಸ್ತಕಾಂಚಿ ತಶೆಂಚ್ ಬರವ್ಪ್ಯಾಂಚಿ ಮೊಟ್ವಿ ಒಳೊಕ್ ಕರುನ್ ದಿತಚ್, ಎವ್ರೆಲ್ ರೊಡ್ರಿಗಸಾನ್ ’ಫುಲಾಂ ತುರೊ’, ಮಾರಿಯೆಟ್ ರಾಸ್ಕಿನ್ಹಾನ್ ’ಮೊಳ್ಸುದ್’, ಮಾ|ಚೇತನ್ ಲೋಬೊನ್ ’ಸುರ್ಯೊ ಉದೆಲಾ (ಕನ್ನಡ ಲಿಪಿ)’, ಗ್ವಾದಲೂಪ್ ಡಾಯಸಾನ್ ’ಸುರ್ಯೊ ಉದೆಲಾ’ (ನಾಗರಿ ಲಿಪಿ), ವಿಲ್ಲಿ ಗೋಯೆಸಾನ್ ’ಸುರ್ಯೊ ಉದೆಲಾ’ (ರೋಮಿ ಲಿಪಿ), ವಿಲ್ಫ್ರೆಡ್ ಲೋಬೊನ್ ’ಭಿತರ್ಲೊ ಕವಿ’, ಆವಿಲ್ ರಾಸ್ಕಿನ್ಹಾನ್ ’ರೇಗಿಸ್ತಾನಾಂತ್ಲಿಂ ಫುಲಾಂ’, ಕ್ಯಾಥರೀನ್ ರೊಡ್ರಿಗಸಾನ್ ’ಪ್ಯಾರಿ ಪದಾಂ’ ಪುಸ್ತಕಾಚೆಂ ಲೊಕಾರ್ಪಣ್ ಕೆಲೆಂ.
ಪರ್ದ್ಯಾ ಪಾಟ್ಲ್ಯಾನ್ ಕೊಂಕಣಿಚೊ ವಾವ್ರ್ ಕೆಲ್ಲ್ಯಾ ಸ್ತ್ರೀ ಸಾಧಕಿಂಚಿ ಒಳೊಕ್ ಜೋಯ್ಸ್ ಪಿಂಟೊನ್ ಕರುನ್ ದಿತಚ್, ಏವ್ರೆಲ್ ರೊಡ್ರಿಗಸಾನ್ ಮಾರಿಯೆಟ್ ರಾಸ್ಕಿನ್ಹಾಕ್, ಗ್ವಾದಲೂಪ್ ಡಾಯಸಾನ್ ಐರಿನ್ ಪಿಂಟೊಕ್, ಫ್ಲಾವಿಯಾ ಆಲ್ಬುಕರ್ಕಾನ್ ಶಾಲಿನಿ ವಾಲೆನ್ಸಿಯಾಕ್, ಫೆಲ್ಸಿ ಲೋಬೊನ್ ಫ್ಲೋರಾ ಕ್ಯಾಸ್ತಲಿನೊಕ್ ಶಾಲ್ ಪಾಂಗ್ರುನ್, ಉಡಾಸಾಚಿ ಕಾಣಿಕ್ ದಿವುನ್ ಸನ್ಮಾನ್ ಕೆಲೊ. ಸನ್ಮಾನಿತಾಂ ತರ್ಫೆನ್ ಫ್ಲೋರಾ ಕ್ಯಾಸ್ತಲಿನೊ ಉಲಯ್ಲಿ.
ಹೆಚ್ ಸಂಧರ್ಭಾರ್ ಸಲೋಮಿ ಮೊಗರ್ನಾಡಾಕ್ ಮಾ|ಚೇತನ್ ಲೋಬೊನ್ ಸನ್ಮಾನ್ ಕೆಲೊ.
ಸಲೋಮಿ ಮೊಗರ್ನಾಡ್ ಹಿಚ್ಯಾ ಅಧ್ಯಕ್ಷ್‌ಪಣಾಖಾಲ್ ಚಲ್ಲೆಲ್ಯಾ ಕವಿಗೋಶ್ಟಿಂತ್ ಸ್ಮಿತಾ ಶೆಣಯ್, ಗ್ವಾದಲೂಪ್ ಡಾಯಸ್, ಜೋಯ್ಸ್ ಪಿಂಟೋ, ಲವಿಟಾ ಡಿಸೋಜ್ ನಕ್ರೆ, ಜೀತಾ ಗೊನ್ಸಾಲ್ವಿಸ್ ಬಾರ್ಕುರ್, ಡೊ.ಆನ್ನಿ ಕ್ಯಾಸ್ತಲಿನೊ, ಫೆಲ್ಸಿ ಲೋಬೊ, ಫ್ಲಾವಿಯಾ ಆಲ್ಬುಕರ್ಕ್, ಜೂಲಿಯೆಟ್ ಮೋರಸ್ ಹಾಣಿಂ ವಾಂಟೊ ಘೆತ್ಲೊ. ಉಪ್ರಾಂತ್ ’ಫುಲಾಂ ತುರೊ’ ಪುಸ್ತಕಾಂತ್ ಕವಿತಾ ಧಾಡ್ಲೆಲ್ಯಾಂಕ್ ಮಾನ್ ಪ್ರತಿ ದಿಲಿ.
ಫೆಲ್ಸಿ ಲೋಬೊಚೆಂ ಸೂತ್ರ್ ಸಂಚಾಲನ್ ಆಸ್ಲೆಲ್ಯಾ ಹ್ಯಾ ಕಾರ್ಯಾಂತ್ ಫ್ಲಾವಿಯಾ ಆಲ್ಬುಕರ್ಕಾರ್ ಯೆವ್ಕಾರ್ ಕೆಲೊ, ಜೀತಾ ಗೊನ್ಸಾಲ್ವಿಸಾನ್ ಧಿನ್ವಾಸ್ ಪಾಠಯ್ಲೆ.
