ಕುಂದಾಪುರ, ಮೇ. 10: ಕುಂದಾಪುರ್ಚೊ ವಿಗಾರ್ ಭೋ|ಮಾ|ಸ್ಟ್ಯಾನಿ ತಾವ್ರೊ ಬಾಪಾನ್ 50 ವರ್ಸಾಂ ಪಯ್ಲೆಂ ಹ್ಯಾಚ್ ದಿಸಾ ಮೇ 10 ವೆರ್ ಯಾಜಕೀ ದೀಕ್ಷಾ ಉದ್ಯಾವಾರ್ ಸಾಂ. ಫ್ರಾನ್ಸಿಸ್ ಸಾವೆರ್ ಇಗರ್ಜೆಂತ್ ಅಪ್ಣಾಯ್ಲಿ. ಆನಿ ಆಜ್ ಕುಂದಾಪುರ್ ರೊಜಾರ್ ಮಾಯೆಚ್ಯಾ ಇಗರ್ಜೆಂತ್ ಪವಿತ್ರ್ ಬಲಿದಾನ್ ಭೆಟವ್ನ್ ಯಾಜಕೀ ದೀಕ್ಷೆಚೊ ತಾರೀಕೆ ಲೆಕಾಚೊ ಭಾಂಗಾರೋತ್ಸವ್ ಆಚರಣ್ ಕೆಲೊ. ಹ್ಯಾ ಸಂದರ್ಭಿ ಸಹಾಯಕ್ ಯಾಜಕ್ ಮಾ|ಬಾ|ಅಶ್ವಿನ್ ಆರಾನ್ನಾ ಆನಿ ಫಿರ್ಗಜ್ ದೇವ್‍ಪ್ರಜೆನ್ ಸಾಂಗಾತಾ ಬಲಿದಾನ್ ಭೆಟಯ್ಲೆ.
ಉಪ್ರಾಂತ್ ಮಟ್ವೆ ಉಲ್ಲಾಸುಂಚೆಂ ಕಾರ್ಯೆ ಇಗರ್ಜೆಚ್ಯಾ ಪೊರ್ಟಿಕೊಂತ್ ಚಲ್ಲೆಂ. ಸಹಾಯಕ್ ಯಾಜಕ್ ಮಾ|ಬಾ|ಅಶ್ವಿನ್ ಆರಾನ್ನಾ ಆನಿ ಗೊವ್ಳಿಕ್ ಮಂಡಳಿ ಉಪಾಧ್ಯಕ್ಷಿಣ್ ಶಾಲೆಟ್ ರೆಬೆಲ್ಲೊನ್ ಬರೆಂ ಮಾಗ್ಲೆಂ. ಮೇ 7 ತಾರೀಕೆರ್ ಚಲಲ್ಯಾ ಭೋ|ಮಾ|ಸ್ಟ್ಯಾನಿ ತಾವ್ರೊ ಬಾಪಾಚೊ ಯಾಜಕೀ ದೆಣ್ಯಾಚೊ ಭಾಂಗಾರೋತ್ಸವ್ ಆನಿ ಜಲ್ಮಾ ದಿಸಾಚೊ ಅಮøತೋತ್ಸವ್ ಆಚರಣ್ ಕೆಲ್ಯಾ ವೆಳಾರ್ ಮಿನತ್ ಕೆಲ್ಯಾ ಜುಬ್ಲೆವ್ ಸಮಿತಿಚ್ಯಾ ಮುಖೆಲ್ಯಾಂಕ್ ಉಪಾಧ್ಯಕ್ಷಿಣಿನ್ ಫುಲಾಂ ದಿವ್ನ್ ಧನ್ಯವಾದ್ ಪಾಠಯ್ಲೆಂ.
ಜುಬ್ಲೆವ್‍ಗಾರ್ ವಿಗಾರ್ ಭೋ|ಮಾ|ಸ್ಟ್ಯಾನಿ ತಾವ್ರೊನ್ ‘ಆಜ್‍ಯಿ ಇತ್ಲ್ಯಾ ವ್ಹಡಾ ಸಂಖ್ಯಾನ್ ಯೆವ್ನ್ ಮ್ಹಜೊ ಯಾಜಕೀ ಜುಬ್ಲೆವ್ ಆಚರಣ್ ಕೆಲ್ಯಾಕ್ ಆನಿ ಪವಿತ್ರ್ ಬಲಿದಾನಾಂತ್ ವಾಂಟೆಲಿ ಜಾವ್ನ್ ಮ್ಹಜ್ಯಾ ಖಾತಿರ್ ಮಾಗ್ಲ್ಯಾ ಖಾತಿರ್ ದೇವ್ ಬರೆಂ ಕರುಂ ಮ್ಹಣಾಲಾಗ್ಲೊ. ಸಾಂಗಾತಾ ಆಯ್ಚ್ಯಾ ದಿಸಾ ಜಲ್ಮಾ ದೀಸ್ ಆಚರಣ್ ಕೆಲ್ಯಾಂಕ್ ಉಲ್ಲಾಸ್ ಪಾಠಯ್ಲೆಂ.
