ಮಂಗ್ಳುರ್ : “ಸಾಹಿತ್ಯಾಚ್ಯಾ ವಾಡಾವಳಿಕ್ ಯುವಜಣ್ ಆನಿ ಭುರ್ಗ್ಯಾಂ ಥಂಯ್ ವಾಚ್ಪಾಚಿ ಆನಿ ಬರವ್ಪಾಚಿ ವೋಡ್ ಚಡಂವ್ಚಿ ಗರ್ಜ್. ಆನಿ ಹ್ಯೆ ದಿಶೆನ್ ತರ್ಬೆತಿ ದಿಂವ್ಚೊ ಆನಿ ಘೆಂವ್ಚೊ ಬರೊ ವಾವ್ರ್ ಬರ್ಯಾ ಮನಾನ್ ಜಾಯ್ಜಯ್”.
ಮಂಗ್ಳುರ್ ದಿಯೆಸೆಜಿಚೊ ವಿಗಾರ್ ಜೆರಾಲ್ ಮೊನ್ಸಿಂಞೊರ್ ಬೊ.ಮಾ. ಮೆಕ್ಸಿಂ ನೊರೋನ್ಹಾ ಹಾಣಿಂ ಡಿಸೆಂಬರಾಚ್ಯಾ 3 ತಾರಿಕೆರ್, ಮಂಗ್ಳುರ್ ಭಿಸ್ಪಾಚ್ಯಾ ನಿವಾಸಾಚ್ಯಾ ಸಭಾಸಲಾಂತ್, ಕೊಂಕಣಿ ಲೇಖಕ್ ಸಂಘ್ ಕರ್ನಾಟಕ ಆನಿ ರಾಕ್ಣೊ ಹಪ್ತ್ಯಾಳೆಂ ಹಾಂಚ್ಯಾ ಜೋಡ್ ಆಶ್ರಯಾಖಾಲ್ ಚಲ್ಲ್ಲ್ಯಾ ” ಫಿರ್ಗಜ್ ಪತ್ರಾಂಚೆ ಸಂಪಾದಕ್ ಆನಿ ಲೇಖಕಾಂಚೊ ಸಮ್ಮೇಳ್” ಹಾಚೆಂ ದಿವೊ ಪೆಟವ್ನ್ ಉದ್ಘಾಟನ್ ಕರ್ನ್ ಸಂದೇಶ್ ದಿಲೊ.
ರಾಕ್ಣೊ ಸಂಪಾದಕ್ ಮಾ.ಬಾ. ರುಪೇಶ್ ಮಾಡ್ತಾ, ಕೆ.ಎಲ್.ಎಸ್. ಸಂಚಾಲಕ್ ಮಾನೆಸ್ತ್ ರಿಚರ್ಡ್ ಮೋರಾಸ್, ಸ್ತ್ರೀ ಸಾಹಿತಿ ಪ್ರತಿನಿಧಿ ಜಾವ್ನ್ ಮಾನೆಸ್ತಿನ್ ಶಾಲಿನಿ ವಾಲೆನ್ಸಿಯ ವೆದಿರ್ ಹಾಜರ್ ಆಸ್ಲ್ಲಿಂ.
ಸಮ್ಮೇಳಾಚೊ ವಾಂಟೊ ಜಾವ್ನ್ ಕೊಂಕ್ಣೆಚೆ ನಾಮ್ಣೆಚೆ ಬರವ್ಪಿ ಆನಿ ಸಂಪಾದಕ್ ಜಾವ್ನ್ ಅನುಭವ್ ಆಸ್ಲ್ಲೆ ಡೊ| ಜೆರಿ ನಿಡ್ಡೋಡಿ, ಡೊ|ಎಡ್ವರ್ಡ್ ನಜ್ರೆತ್, ಮಾನೆಸ್ತ್ ಡೊಲ್ಫಿ ಕಾಸ್ಸಿಯಾ ಆನಿ ಮಾನೆಸ್ತ್ ಮಚ್ಚಾ ಮಿಲಾರ್ ಹಾಣಿಂ ಫಿರ್ಗಜ್ ಪತ್ರಾಚ್ಯಾ ಸಂಪಾದಕಾಚಿ ಜವಾಬ್ದಾರಿ, ಲೇಖನಾಂ ಬರಂವ್ಚ್ಯಾಕ್ ತಯಾರಾಯ್, ಪತ್ರಾಕ್ ವರ್ದಿ/ಖಬರ್ ಬರಂವ್ಚಿ ಹ್ಯಾ ವಿಷಯಾಂಚೆರ್ ವಿಚಾರ್ ಮಂಡನ್ ಕೆಲೆ. ಮಾ.ಬಾ. ರುಪೇಶ್ ಮಾಡ್ತಾ ಸಭಾ ಚಲಯ್ಣಾರ್ ಜಾವ್ನ್ ಆಸ್ಲ್ಲೆ. ತ್ಯಾ ನಂತರ್ ಭಾಸಾಭಾಸ್ ಚಲ್ಲಿ. ಕೊಂಕಣಿ ಲೇಖಕ್ ಸಂಘ್ ಕರ್ನಾಟಕ ಹಾಚೆ ಸಾಂದೆ, ವಿವಿಧ್ ಫಿರ್ಗಜ್ ಪತ್ರಾಂಚೆ ಸಂಪಾದಕ್, ಬರವ್ಪಿ ಹಾಜರ್ ಆಸ್ಲ್ಲೆ.
ಪ್ರಾರ್ಥನಾ ಸವೆಂ ಸಮ್ಮೇಳ್ ಸುರ್ವಾತ್ಲೊ. ಮಾನೆಸ್ತ್ ರಿಚರ್ಡ್ ಮೋರಾಸಾನ್ ಪ್ರಾಸ್ತಾವಿಕ್ ಉಲವ್ಪ್ ಚಲಯ್ಲೆಂ. ಮಾನೆಸ್ತಿಣ್ ಐರಿನ್ ರೆಬೆಲ್ಲೊನ್ ಸ್ವಾಗತ್ ಕರ್ನ್,ಮಾನೆಸ್ತಿಣ್ ಪ್ರೀತ ಮಿರಾಂದನ್ ಧನ್ಯವಾದ್ ಪಾಠಯ್ಲೆ. ಲವಿ ಗಂಜಿಮಠನ್ ಕಾರ್ಯಕ್ರಮ್ ನಿರೂಪಣ್ ಕೆಲೆಂ. ಸುಂಕಾಣ್ ಸಮಿತಿಕ್ ನವ್ಯಾನ್ ವಿಂಚೊನ್ ಆಯಿಲ್ಲ್ಯಾ ಮಾನೆಸ್ತ್ ಹೆನ್ರಿ ಮಸ್ಕರೇನಸಾನ್ ಸರ್ವ್ ಸಹಕಾರ್ ದಿಲೊ.
