JANANUDI.COM NETWORK
ಕುಂದಾಪುರ್, ಜ.3: ಹೆಮ್ಮಾಡಿ ಪಂಚಾಯ್ತಾಚ್ಯಾ ಕನ್ನಡಕುದ್ರು ವ್ಯಾಪ್ತಿಂತ್ ಎಲಿಸಾಂವಾಂಕ್ ರಾವೊನ್ ಜಿಕ್ಲ್ಯಾ ಶೈನಿ ಕ್ರಾಸ್ತಾಕ್ ಜನವರಿಚಾ ತೀನ್ ತಾರೀಕೆರ್ ಆಯ್ತಾರಾಚ್ಯಾ ಮಿಸಾ ಉಪ್ರಾಂತ್ ಕುಂದಾಪುರ್ ಕಥೊಲಿಕ್ ಸಭಾ ಘಟಕಾಚೊ ಅತ್ಮಿಕ್ ನಿರ್ದೇಶಕ್, ತಸೆಂ ಫಿರ್ಗಜ್ ವಿಗಾರ್ ಮಾ|ಬಾ|ಸ್ಟ್ಯಾನಿ ತಾವ್ರೊಚ್ಯಾ ಅಧ್ಯಕ್ಷಪಣಾ ಖಾಲ್ ಫುಲಾಂಚೊ ತುರೊ ದಿವ್ನ್ ಕುಂದಾಪುರ್ ಕಥೊಲಿಕ್ ಸಭಾ ತರ್ಫೆನ್ ಫಿರ್ಗಜ್ ಮಟ್ಟಾರ್ ಮಾನ್ ಕೆಲೊ.
ಕನ್ನಡ ಕುರ್ದ್ರ್ಯಾರ್ ಮೂಳ್ ಘರ್ ಆಸೊನ್, ಶೈನಿ ಕ್ರಾಸ್ತಾ ಕುಂದಾಪುರ್ ಫಿರ್ಗಜೆಂತ್ ಯಿ ಸಭಾರ್ ವರ್ಷಾಂ ಥಾವ್ನ್ ವಸ್ತಿ ಕರ್ನ್ ಆಸ್ಚ್ಯಾ, ಶೈನಿ ಕ್ರಾಸ್ತಾಕ್ ಮಾನ್ ಕರ್ನ್ ’ಆಜ್ ಕಾಲ್ ಆಮ್ಚಿ ಕ್ರಿಸ್ತಾಂವಾಂ ಎಲಿಸಾಂವಾಂತ್ ಯಿ ಜಿಕೊನ್ ಯೆಂವ್ಚೆ ಅಪ್ರೂಪ್ ಜಾಲ್ಯಾ ವೇಳಾರ್ ಆಮ್ಚ್ಯಾ ಫಿರ್ಗಜೆಚೆಂ ಶೈನಿ ಧೈರಾನ್ ಪಂಚಾಯತ್ ಇಲೆಕ್ಷಾನಾಂತ್ ರಾವೊನ್ ಜಿಕೊನ್ ಆಯ್ಲ್ಯಾ. ಪಂಚಾಯತ್ ಇಲೆಕ್ಷನ್ ಲ್ಹಾನ್ಜ್ ಜಾಂವ್ಕ್ ಪುರೊ, ಪುಣ್ ಪಂಚಾಯತ್ ಚುನಾವಣಾಂತ್ ಯಿ ಆಮ್ಚಿಂ ಕ್ರಿಸ್ತಾಂವಾಂ ಉಣಿ ಜಾವ್ನ್ ಆಯ್ಲ್ಯಾತ್ ಆಸ್ತಾಂ ಶೈನಿ ಪಂಚಾಯತ್ ಚುನಾವಣೆಂತ್ ಜಿಕೊನ್ ಆಯ್ಲೆಂ ಕ್ರಿಸ್ತಾಂವಾಕ್ ವ್ಹಡ್ ಏಕ್ ಗೌರವಾಚಿ ಗಜಾಲ್. ತಿ ವಿಂಚುನ್ ಆಯ್ಲ್ಯಾ ವ್ಯಾಪ್ತಿಂತ್ ತೆಂ ಬೊರಿ ಕಾಮಾ ಕರುಂದಿ, ತಿಕಾ ಯಶಸ್ವಿ ಭರಿತ್ ರಾಜಕೀಯ ಭವಿಶ್ಯ್ ಮಾಗ್ತಾಂ’ ಮ್ಹಣನ್ ವಿಗಾರ್ ಬಾಪ್ ಸ್ಟ್ಯಾನಿ ತಾವ್ರೊನ್ ಅಭಿನಂದನ್ ಪಾಠಯ್ಲೆಂ.
ಸ್ವಾಗತ್ ಕರುನ್, ಶೈನಿ ಕ್ರಾಸ್ತಾಚಿ ಪರಿಚಯ್ ಕರ್ನ್ ದಿಲ್ಯಾ ಕಥೊಲಿಕ್ ಸಭೆಚೊ ಅಧ್ಯಕ್ಷ್ ಬರ್ನಾಡ್ ಡಿಕೋಸ್ತಾನ್ ಶೈನಿ ಕ್ರಾಸ್ತಾಕ್ ಅಭಿನಂದನ್ ಪಾಟವ್ನ್,ಹ್ಯಾ ಸಂದರ್ಭಿ ಹಾಜರ್ ಆಸ್ಲ್ಯಾ ತಿಚ್ಯಾ ಪತಿ ಜೆಮ್ಸ್ ಕ್ರಾಸ್ತಾಕ್ ಯಿ, ಶೈನಿಕ್ ರಾಜಕೀಯಾಂತ್ ಮೆತೆರ್ ಜಾಂವ್ಕ್ ಪ್ರೇರಣ್ ದಿಲ್ಯಾ ಖಾತಿರ್ ಹೊಗ್ಳಿಕ್ ಉಚಾರ್ಲಿ.
ಹ್ಯಾಸಂದರ್ಭಿ ಸಹಾಯಕ್ ವಿಗಾರ್ ಮಾ|ಬಾ|ವಿಜಯ್ ಜೊಯ್ಸನ್ ಡಿಸೋಜಾ,ಪ್ರಾಂಶುಪಾಲ್ ಬಾಪ್ ಮಾ|ಪ್ರವೀಣ್ ಅಮ್ರತ್ ಮಾರ್ಟಿಸ್, ಫಿರ್ಗಜ್ ಉಪಾಧ್ಯಕ್ಷ್ ಲುವಿಸ್ ಫೆರ್ನಾಂಡಿಸ್,ಕಾರ್ಯದರ್ಶಿ ಆಶಾ ಕರ್ವಾಲ್ಲೊ, ಸಭಾರ್ ಧರ್ಮ್ ಭಯ್ಣ್ಯೊ, ಕಥೊಲಿಕ್ ಸಭೆಚೆ ಹುದ್ದೆದಾರ್ ಆನಿ ಸಾಂದೆ, ವಿವಿಧ್ ಸಂಘ್ ಸಂಸ್ಥ್ಯಾಚೆಂ ಹುದ್ದೆದಾರ್,ಆನಿ ಫಿರ್ಗಜ್ ಪ್ರಜಾ ಹಾಜರ್ ಆಸ್ಲಿ. 18 ಆಯೋಗಾಚಿಂ ಸಂಯೋಜಕಿ ತಸೆಂ ಕಥೊಲಿಕ್ ಸಭಾ ಕಾರ್ಯದರ್ಶಿ ಪ್ರೇಮಾ ಡಿಕುನ್ಹಾ ಧನ್ಯವಾದ್ ಅರ್ಪಣ್ ಕೆಲೆಂ.
