Day: April 24, 2023

22 ಎಪ್ರಿಲ್ 2023: ಆಶಾವಾದಿ ಪ್ರಕಾಶನಾನ್ ಕೊಂಕಣಿ ಕವಿತೆಂಚ್ಯಾ ಗಝಲಾಂಚ್ಯಾ ಪ್ರಕಾರಾಚೆರ್ ಚಲಯಿಲ್ಲ್ಯಾ ಜಾಗತಿಕ್ ಕೊಂಕಣಿ ಡಿಜಿಟಲ್ ಕವಿಗೋಶ್ಟಿ ಎಪ್ರಿಲಾಚ್ಯಾ 22 ತಾರಿಕೆರ್, ಸನ್ವಾರಾ ಸಾಂಜೆರ್ 4:30 ಥಾವ್ನ್ 6:30 ಪರ್ಯಾಂತ್ ಮಾಂಡುನ್ ಹಾಡ್ಲಿ. ಮ್ಯಾಂಚೆಸ್ಟಾರ್ ಥಾವ್ನ್ ಲಾರೆನ್ಸ್ ವಿ. ಬಾರ್ಬೋಜಾನ್ ಸೂತ್ರ್-ಸಂಚಾಲನ್ ಕರುನ್ 21 ತಾರಿಕೆರ್ ಹ್ಯಾ ಸಂಸಾರಾಕ್ ಅಧೇವ್ಸ್ ಮಾಗ್‌ಲ್ಲ್ಯಾ ನಾಮ್ನೆಚ್ಯಾ ಗಜಾನನ್ ಜೋಗಾಚ್ಯಾ ಅತ್ಮ್ಯಾಕ್ ಶಾಂತಿ ಮಾಗುನ್ ದೋನ್ ಮಿನುಟಾಂಚೆಂ ಮಾವ್ನ್ ಪ್ರಾರ್ಥನ್ ಕೆಲೆಂ. ಗೊಂಯ್ಚ್ಯಾ ನಾಮ್ನೆಚಿ ಕವಯತ್ರಿ ಬಾಯ್ ಗ್ವಾದಲುಪ್ ಡಾಯಸಾಚ್ಯಾ ಅಧ್ಯಕ್ಷ್‌ಪಣಾಖಾಲ್ ಚಲ್‌ಲ್ಲ್ಯಾ ಹ್ಯಾ ಕವಿಗೋಶ್ಟಿಚ್ಯಾ ಯೆವ್ಕಾರ್ ಉಲವ್ಪಾಂತ್ ಬಾಬ್ ಶೈಲೇಂದ್ರ ಮೆಹ್ತಾನ್ ಗಝಲಾಂಚಿ ಬುನ್ಯಾದ್ ಕಶಿ ಜಾಲಿ ಆನಿ ಪರ್ಶಿಯನ್ ಥಾವ್ನ್ ಮೊಘಲಾಂ ಮುಖಾಂತ್ರ್ ಕಶಿ ಆಮ್ಚ್ಯಾ ದೇಶಾಕ್ ಪಾವ್ಲಿ ಆನಿ ಅಮೀರ್ ಖುಸ್ರೋ ತಸಲ್ಯಾ ನಾಮ್ನೆಚ್ಯಾ ಕವಿಂನಿ ತಿ ಉರ್ದು/ಅರೆಬಿಕ್ ಭಾಸೆಂನಿ ಲೊಕಾಮೊಗಾಳ್ ಕೆಲಿ. ತ್ಯೇ ಉಪ್ರಾಂತ್ ಕಶಿ ಹಿಂದಿ ತಶೆಂಚ್ ಹೆರ್ ಭಾಸೆಂನಿ ಸಯ್ತ್ ವಿಸ್ತಾರ್ಲಿ ಮ್ಹಳ್ಳೊ ಮೊಟ್ವೊ ವಿವರ್ ದಿವುನ್, ಕೊಂಕಣಿಂತ್ ಸಯ್ತ್ ಅಪ್ರೂಪಾಯೆನ್ ವಾಚುಂಕ್ ಮೆಳ್ಚ್ಯಾ ಗಝಲಾಂಚೆರ್ ಉಲವ್ನ್ ಗೊಂಯಾಂತ್ ತಶೆಂ ಮಂಗ್ಳುರಾಂತ್ ಸಯ್ತ್ ಕೊಂಕಣಿ ಗಝಲಾಂ ವಾಚುಂಕ್ ಮೆಳ್ಚೆವಿಶಿಂ ಉಲವ್ನ್ ಪ್ರಮುಕ್ ಉಲವ್ಪಿ ಬಾಬ್ ಗೋಕುಲ್‌ದಾಸ್ ಪ್ರಭುಚಿ ಒಳೊಕ್ ಕರುನ್ ದಿತಚ್ ಅಪ್ಲ್ಯಾ ಪ್ರಮುಕ್ ಉಲವ್ಪಾಂತ್ ಜಶೆಂ ತಮಿಳ್, ತೆಲುಗು ಆನಿ ಹೆರ್ ಪ್ರಾಂತೀಯ್ ಭಾಸೆಂನಿ ಗಝಲಾಂಚೆರ್ ಚಡ್ತಿಕ್ ಕವಿತಾ ಮೆಳಾನಾಂತ್ ತಶೆಂ ಕೊಂಕಣಿಂತ್ ಸಯ್ತ್ ಚಡಿತ್ ಮಾಪಾನ್ ತ್ಯೊ ಮೆಳಾನಾಂತ್ ಕಿತ್ಯಾಕ್ ಮ್ಹಳ್ಯಾರ್ ಗಝಲಾಂ ಫಕತ್ ಕವಿತಾ ನ್ಹಯ್ ಎಕಾ ಸಂಸ್ಕೃತೆಚೊ ವಾಂಟೊ ಜಾವ್ನಾಸ್ಲೊ ಮ್ಹಣಾಲೊ.

’ಹಾಂವ್ ಯಾದಿಂಕ್ ಪುಂಜಾಯ್ತಾಂ ಆನಿ ಲೋಕ್ ಮ್ಹಾಕಾ ಕವಿ ಮ್ಹಣ್ತಾಂ’ ಅಶೆಂ ಅಪ್ಲಿ ಒಳೊಕ್ ದಿಂವ್ಚಿ ಬಾಯ್ ಗ್ವಾದಲೂಪ್ ಡಾಯಸ್ ಗೊಂಯಾಂತ್ ವಸ್ತಿ ಕರ್ತಾ ತರ್‌ಯೀ ಹಿಚ್ಯೊ ಕವಿತಾ ಪ್ರಾಂತ್ಯಾಚ್ಯೊ ತಡಿ, ಲಿಪಿಚ್ಯೊ ಗಡಿ ಉತ್ರುನ್ ಹೆರ್ ಲಿಪಿಂನಿ, ಹೆರ್ ಭಾಸೆಂನಿ ಲಿಪಿಯಂತರ್, ಭಾಸಾಂತರ್ ಜಾಲ್ಯಾತ್ ಆನಿ ಸಭಾರ್ ಪುರಸ್ಕಾರ್ ಜೊಡ್ಲೆಲ್ಯಾ ಹಿಣೆಂ ಕವಿಗೋಶ್ಟಿ ಚಲವ್ನ್ ವೆಲಿ; ನಾಮ್ನೆಚೆ ಗಝಲ್‌ಕಾರ್/ಕವಿ; ಡೊ|ರಜಾಯ್ ಪವಾರ್ ಗೊಂಯ್, ಬಾಬ್ ವಿಲ್ಲಿ ಗೋಯೆಸ್ ಗೊಂಯ್, ಬಾಯ್ ಸ್ಮಿತಾ ಶೆಣಯ್ ಮಂಗ್ಳುರ್, ಬಾಬ್ ಶೈಲೇಂದ್ರ ಮೆಹ್ತಾ ಮುಂಬಯ್, ಡೊ|ಪೂರ್ಣಾನಂದ ಚಾರಿ ಗೊಂಯ್, ಬಾಬ್ ಆಂಡ್ರ್ಯೂ ಎಲ್. ಡಿ’ಕುನ್ಹಾ ಮಂಗ್ಳುರ್, ಬಾಯ್ ಶೀಲಾ ಭಂಡಾರಕರ್ ಮಯ್ಸೂರ್, ಬಾಬ್ ಪ್ರಕಾಶ್ ದ. ನಾಯ್ಕ್ ಗೊಂಯ್, ಬಾಯ್ ರುಪಾಲಿ ಕೀರ್ತನಿ ಮಾವ್ಜೊ ದುಭಯ್ ಆನಿ ಬಾಬ್ ವಲ್ಲಿ ಕ್ವಾಡ್ರಸ್ ಮುಂಬಯ್ ಹಾಣಿಂ ಹ್ಯಾ ಕವಿಗೋಶ್ಟಿಂತ್ ವಾಂಟೊ ಘೆತ್ಲೊ.

ಉಪ್ರಾಂತ್ ಆಶಾವಾದಿ ಪ್ರಕಾಶನಾಚ್ಯಾ ಮುಕೇಲ್‍ಪಣಾಖಾಲ್ 2005-6 ಇಸ್ವೆಂತ್ ದಾಯ್ಜ್.ಕೊಮ್ ಮುಖಾಂತ್ರ್ ’ತಿಂತೆರಾಂತ್ ಪಿಂತುರಾಂ’, ಉಪ್ರಾಂತ್ ’ಉತ್ರಾಂತ್ ಸೂತ್ರಾಂ’ ಮ್ಹಳ್ಳ್ಯೊ ಸರ್ತ್ಯೊ ಚಲಯ್ಲ್ಯೊ ಆನಿ ದೋನ್ ಕವಿತಾ ಸಂಕಲನಾಂ ಸಯ್ತ್ ಪುಸ್ತಕಾರುಪಾರ್ ಪರ್ಗಟ್ಲಿಂ. ತಶೆಂಚ್ 2021 ಇಸ್ವೆಂತ್ ಪಯ್ಣಾರಿ.ಕೊಮ್ ಮುಖಾಂತ್ರ್ ಮಯ್ನ್ಯಾಚ್ಯೊ ಕವಿತಾ ಸರ್ತ್ ಆಸಾ ಕರುನ್ ’ಲೋಕ್‌ಡಾವ್ನ್’ ಮ್ಹಳ್ಳೆಂ ಇ-ಪುಸ್ತಕ್ ತಶೆಂಚ್ ಆ-ಪುಸ್ತಕಾರುಪಾರ್ ಪ್ರಸಾರ್ ಕೆಲ್ಯೊ. ಆತಾಂ ’ಕವಿ ಆನಿ ಹಕ್ಕ್-ಮಾನ್’ ಮಯ್ನ್ಯಾಚ್ಯೊ ಕವಿತಾ ಸರ್ತೆಚೆಂ ಘೋಷಣ್ ಬಾಬ್ ಶೈಲೇಂದ್ರ ಮೆಹ್ತಾನ್ ಕರುನ್ ’ಹೆಂ ಮಾನಾಚೆಂ ಹಕ್ಕ್ ಕೊಂಕಣಿ ಕವಿಂಚೆಂ ದೆಕುನ್ ಪಯ್ಲ್ಯಾ ಮಯ್ನ್ಯಾಚಿ ಸರ್ತ್ ದೆ|ಪ್ರಕಾಶ್ ಪಡ್ಗಾಂವ್ಕಾರ್ ಹಾಂಚ್ಯಾ ಯಾದಿಕ್ ಸಮರ್ಪಿತ್ ಕೆಲ್ಯಾ ಅಶೆಂ ಮ್ಹಣಾಲೊ. ವಲ್ಲಿ ಕ್ವಾಡ್ರಸಾನ್ ಧಿನ್ವಾಸ್ ಪಾಟಯ್ಲೆ.

गझलांचेर जागतीक कोंकणी डिजिटल कविगोश्टी – विविधता

२२ एपरील २०२३: आशावादी प्रकाशनान कोंकणी कवितेंच्या गझलांच्या प्रकाराचेर चलयिल्ल्या जागतीक कोंकणी डिजिटल कविगोश्टी एपरिलाच्या २२ तारिकेर, सन्वारा सांजेर ४:३० थावन ६:३० पऱ्यांत मांडून हाडली. म्यांचेसटार थावन लारेन्स वी. बारबोजान सूत्र-संचालन करून २१ तारिकेर ह्या संसाराक अधेवस माग‌ल्ल्या नाम्नेच्या गजानन जोगाच्या अत्म्याक शांती मागून दोन मिनुटांचें मावन प्रार्थन केलें.
गोंयच्या नाम्नेची कवयत्री बाय ग्वादलूप डायसाच्या अध्यक्ष‌पणाखाल चल‌ल्ल्या ह्या कविगोश्टिच्या येवकार उलवपांत बाब शैलेंद्र मेहतान गझलांची बुन्याद कशी जाली आनी पर्शियन थावन मोघलां मुखांत्र कशी आमच्या देशाक पावली आनी अमीर खुस्रो तसल्या नाम्नेच्या कविंनी ती उर्दू/अरेबीक भासेंनी लोकामोगाळ केली. त्ये उपरांत कशी हिंदी तशेंच हेर भासेंनी सयत विसतारली म्हळ्ळो मोटवो विवर दिवून, कोंकणिंत सयत अपरूपायेन वाचुंक मेळच्या गझलांचेर उलवन गोंयांत तशें मंगळुरांत सयत कोंकणी गझलां वाचुंक मेळचेविशीं उलवन प्रमूक उलवपी बाब गोकूल‌दास प्रभुची ओळोक करून दितच अपल्या प्रमूक उलवपांत जशें तमीळ, तेलुगू आनी हेर प्रांतीय भासेंनी गझलांचेर चडतीक कविता मेळानांत तशें कोंकणिंत सयत चडीत मापान त्यो मेळानांत कित्याक म्हळ्यार गझलां फकत कविता न्हय एका संसकृतेचो वांटो जावनासलो म्हणालो.

’हांव यादिंक पुंजायतां आनी लोक म्हाका कवी म्हणतां’ अशें अपली ओळोक दिंवची बाय ग्वादलूप डायस गोंयांत वसती कर्ता तर‌यी हिच्यो कविता प्रांत्याच्यो तडी, लिपिच्यो गडी उत्रून हेर लिपिंनी, हेर भासेंनी लिपियंतर, भासांतर जाल्यात आनी सभार पुरसकार जोडलेल्या हिणें कविगोश्टी चलवन वेली; नाम्नेचे गझल‌कार/कवी; डो|रजाय पवार गोंय, बाब विल्ली गोयेस गोंय, बाय स्मिता शेणय मंगळूर, बाब शैलेंद्र मेहता मुंबय, डो|पूर्णानंद चारी गोंय, बाब आंडऱ्यू एल. डी’कुन्हा मंगळूर, बाय शीला भंडारकर मयसूर, बाब प्रकाश द. नायक गोंय, बाय रुपाली कीर्तनी मावजो दुभय आनी बाब वल्ली क्वाड्रस मुंबय हाणीं ह्या कविगोश्टिंत वांटो घेतलो.

उपरांत आशावादी प्रकाशनाच्या मुकेल‍पणाखाल २००५-६ इस्वेंत दायज.कोम मुखांत्र ’तिंतेरांत पिंतुरां’, उपरांत ’उत्रांत सूत्रां’ म्हळ्ळ्यो सर्त्यो चलयल्यो आनी दोन कविता संकलनां सयत पुसतकारुपार पर्गटलीं. तशेंच २०२१ इस्वेंत पयणारी.कोम मुखांत्र मयन्याच्यो कविता सर्त आसा करून ’लोक‌डावन’ म्हळ्ळें ई-पुसतक तशेंच आ-पुसतकारुपार प्रसार केल्यो. आतां ’कवी आनी हक्क-मान’ मयन्याच्यो कविता सर्तेचें घोषण बाब शैलेंद्र मेहतान करून ’हें मानाचें हक्क कोंकणी कविंचें देकून पयल्या मयन्याची सर्त दे|प्रकाश पडगांवकार हांच्या यादीक समर्पीत केल्या अशें म्हणालो.  वल्ली क्वाड्रसान धिन्वास पाटयले.

Gozholancher Zagotik Konkonni Ddijittol Kovigoxtti -Vividhota

22 epril 2023: Ashawadi Prakashan Konkonni kovitenchea gozholanchea prokaracher choloyil’lea zagotik konkonni ddijittol kovigoxtti eprilachea 22 tariker, sonvara sanjer 4:30 thaun 6:30 poreant manddun haddli. Meanchesttar thaun Lawrece V. Barbozan sutr-sonchalon korun 21 tariker hea somsarak odheus mag‌l’lea namnechea Gajajaj Jogachea otmeak xanti magun don minuttanchem maun prarthon kelem.
Gõychea namnechi kouyotri bai Guadalupe Diasachea odhyokx‌ponnakhal chol‌l’lea hea kovigoxttichea yeukar uloupant bab Sheilendra Mehtan gozholanchi bunead koxi zali ani porxiyon thaun mogholam mukhantr koxi amchea dexak pauli ani Amir Khusrau tosolea namnechea kovimni ti Urdu/Arabic bhasemni lokamogall keli. Tye uprant koxi hindi toxench her bhasemni soit vistarli mholl’llo mottvo vivor divun, konkonnint soit oprupayen vachunk mellchea gozholancher uloun Gõyant toxem mongllurant soit konkonni gozholam vachunk mellchevixim uloun promuk uloupi bab Gokul‌das Prabhuchi ollok korun ditoch oplea promuk uloupant zoxem Tamil, Telugu ani her pranti-i bhasemni gozholancher choddtik kovita mellanant toxem konkonnint soit choddit mapan teo mellanant kiteak mhollear gozholam fokot kovita nhoi eka somskritecho vantto zaunaslo mhonnalo.

’hamv yadink punzaitam ani lok mhaka kovi mhonntam’ oxem opli ollok dimvchi bai Guadalupe Dias Gõyant vosti korta tor‌yi hicheo kovita pranteacheo toddi, lipicheo goddi utrun her lipimni, her bhasemni lipiyontor, bhasantor zaleat ani sobhar puroskar zoddlelea hinnem kovigoxtti choloun veli; namneche gozhol‌kar/kovi; Ddo|Rajay Pawar Gõy, bab Willy Goes Gõy, bai Smitha Shennoy Mongllur, bab Shailendra Mehta Mumboi, Ddo|Purnananda Chari Gõy, bab Andrew L. DCunha Mongllur, bai Sheela Bhandarkar Mysore, bab Prakash d. Naik Gõy, bai Rupali Kirtoni Mauzo Dubai ani bab Valley Quadros Mumboi hannim hea kovigoxttint vantto ghetlo.

Uprant Ashawadi Prakashanachea mukel‍ponnakhal 2005-6 isvent daiz.com‘ mukhantr ’tinterant pinturam’, uprant ’utrant sutram’ mholl’lleo sorteo choloileo ani don kovita sonkolonam soit pustokarupar porgottlim. Toxench 2021 isvent poinnari.com‘ mukhantr moineacheo kovita sort asa korun ’lok‌ddaun’ mholl’llem i-pustok toxench a-pustokarupar prosar keleo. Atam ’kovi ani hokk-man’ moineacheo kovita sortechem ghoxonn bab Shailendra Mehtan korun ’hem manachem hokk konkonni kovinchem dekun poilea moineachi sort de|Prakash Padgaonkar hanchea yadik somorpit kelea oxem mhonnalo.  Valley Quadrosan dhinvas pattoile.