ಗಂಗೊಳ್ಳಿ: ಸಮನ್ವಯ ದಾದ್ಲ್ಯಾಂಚೆ ಸ್ವ. ಸಹಾಯ್ ಸಂಘಟನ್ ಉಡುಪಿ ಜಿಲ್ಲೆ ತಶೆಂಚ್ ಸಮಾಜಿಕ್ ಅಭಿವೃದ್ಧಿ ಆಯೋಗ್ ಗಂಗೊಳ್ಳಿ ಫಿರ್ಗಜೆಚಾ ಮುಕೇಲ್ಪಣಾರ್ ಮಾರ್ಚ್ 5 ತಾರೀಕೆರ್ ಆಯ್ತಾರಾ ದನ್ಪಾರ 3:00 ವೊರಾರ್ ವಾರಾಡ್ಯಾ ಹಂತಾರ್ ದಾದ್ಲ್ಯಾಂಚೆ ಸ್ವ. ಸಹಾಯ್ ಸಂಘಟನಾ ವಿಶಿಂ ಮಾಹೆತ್ ಆನಿ ಸಾಂಧ್ಯಾಂಚೆಂ ಸಹಮಿಲನ್ ತಶೆಂಚ್ ತರ್ಬೆತಿ ಕಾರ್ಯಕ್ರಮ್ ಸಾಂ. ಜುಜೆ ವಾಜ್ ಸಭಾ ಸಾಲಾಂತ್ ಆಸಾ ಕೆಲೆಂ. ಹ್ಯಾ ಕಾರ್ಯಕ್ರಮಾಂಕ್ ಸಂಪನ್ಮೂಳ್ ವ್ಯಕ್ತಿ ಜಾವ್ನ್ ಸಂಪದಾಚೆಂ ದಿರೊಕ್ತರ್ ಬಾ| ರೆಜಿನಾಲ್ಡ್ ಪಿಂಟೊ ಹಾಜರ್ ಆಸ್ಲೆ. ತಾಣಿ ದಾದ್ಲ್ಯಾಂಚೆ ಸ್ವಸಹಾಯ್ ಸಂಘ್ ಆರಂಭ್ ಕರ್ಚೊ ಉದ್ದೇಶ್, ಸಂಘ ಥಾವ್ನ್ ಜಾಲ್ಲೆ ಬರೆಂಪಣ್, ತಶೆಂಚ್ ಸಂಘ ಥಾವ್ನ್ ಕಿತೆಂ ಆಶೆತಾತ್ ಮ್ಹಳ್ಳಿಂ ತೀನ್ ಸವಾಲಾಂ ಸಾಂದ್ಯಾಂಕ್ ದಿಲಿ ಆನಿ ಪಂಗಡ್ ತರ್ಕಾ ಮಾರಿಫಾತ್ ಜಾಪಿ ಬರವ್ನ್ ಸಭೆರ್ ಸಾದರ್ ಕರ್ಚೆಂ ಅವ್ಕಾಸ್ ದಿಲೆಂ . ಉಪ್ರಾಂತ್ ಸ್ವ-ಸಹಾಯ್ ಸಂಘಾಚೊ ಉದ್ದೇಶ್ ಕಿತೆಂ ಆನಿ ಸಂಘ್ ಕಶೆಂ ಚಲಂವ್ಚೆ ಮ್ಹಳ್ಯಾ ವಿಶ್ಯಾಂತ್ ಸವಿಸ್ತಾರ್ ರಿತಿನ್ ಮಾಹೆತ್ ದಿಲಿ. ಫಿರ್ಗಜ್ ಯಾಜಕ್ ಬಾl ತೋಮಸ್ ರೋಶನ್ ಡಿಸೋಜಾನ್ ಸುರ್ವಿಲೆ ಮಾಗ್ಣೆಂ ಶಿಕಯ್ಲೆಂ, ಬಾ। ಎಡ್ವಿನ್ ಡಿಸೋಜಾನ್ ಸಂದೇಶ್ ದಿಲೆಂ. ಹ್ಯಾ ಕಾರ್ಯಕ್ರಮಾಕ್ ಸ್ವ- ಸಹಾಯ್ ಸಂಘಾಚೊ ಕೇಂದ್ರಾಚೊ ಅಧ್ಯಕ್ಷ್ ಆಲ್ಟನ್ ರೆಬೇರೊ ತಶೆಂಚ್ ಹುದ್ದೆದಾರಾಂ ಹಾಜರ್ ಆಸ್ಲಿಂ. ಒಟ್ಟು 120 ಜಣ್ ಸಾಂದ್ಯಾಂನಿ ಹ್ಯಾ ಕಾರ್ಯಾಕ್ರಮಾಂತ್ ಭಾಗ್ ಘೆತ್ಲೆಂ.
