JANANUDI NETWORK
ಪರಿಸರ್ ಸಂರಕ್ಷಣೆ ಖಾತಿರ್ ಕಥೊಲಿಕ್ ಸಭೆ ಥಾವ್ನ್ ದಿಯೆಸಿಜಿಜ್ ಮಟ್ಟಾರ್ ಎಕಾಚ್ ಕಾಳಾರ್ ವನಮಹತ್ಸೋವ್ ಆಚರಣ್
ಕುಂದಾಪುರ್, ಜು.23: ಕಥೊಲಿಕ್ ಸಭಾ ಉಡುಪಿ ಪ್ರದೇಶ್ (ರಿ) ಹಾಣಿ ಉಡುಪಿ ಧರ್ಮ್‍ಪ್ರಾಂತ್ಯಾಚಾ ಸರ್ವ್ ಫಿರ್ಗಜೆಂತ್ ಎಕಾಚ್ ಕಾಳಾರ್ ವನಮಹತ್ಸೋವ್ ಕರ್ಚ್ಯಾ ಮಹೋದ್ದೇಶಾನ್ ಜುಲಾಯ್ಚ್ಯಾ 21 ವೇರ್ ಶಂಕರಪುರ ಸಾಂತ್ ಜೋನ್ಸ್ ಇಗರ್ಜೆಚ್ಯಾ ವಠಾರಾಂತ್ ಝಡ್ ಲಾಂವ್ನ್ ವನಮಹತ್ಸೋವಾಕ್ ಚಾಲನ್ ಕೆಲೆಂ.
“ಪರಿಸರ್ ಸಂರಕ್ಷಣೆಕ್ ಸಂಘ್ ಸಂಸ್ಥೆ ಎಕಾ ಮೆಕಾ ಮೆಳೊನ್ ಸಂಘಟಿತ್ ಜಾವ್ನ್ ವಾವ್ರ್ ಕೆಲ್ಯಾರ್ ನಿತಳ್ ಪರಿಸರ್ ಆಸಾ ಕರುಂಕ್ ಸಾಧ್ಯ್ ಜಾತಾಂ. ಧರ್ಮ್ ಕೇಂದ್ರಾಚಿಂ ಪರಿಸರ್‍ಯಿ ರೂಕಾಂ ಝಡಾನಿಂ ಭರೊನ್ ಪ್ರಕ್ರತಿ ಸೊಭಿತ್ ಜಾವ್ನ್ ಸೊಭಾಜೆ” ವನಮಹತ್ಸೋವಾಕ್ ಚಾಲನ್ ಕೆಲ್ಯಾ ಕಥೊಲಿಕ್ ಸಭಾ ಉಡುಪಿ ಪ್ರದೇಶ್ ಹಾಚೊ ಅಧ್ಯಕ್ಷ್ ಅಲ್ವಿನ್ ಕ್ವಾಡ್ರಸ್ ಹಾಣಿ ಸಂದೇಶ್ ದಿಲೊ. ‘ಪರಿಸರಾ ಖಾತಿರ್ ಆಮಿ ಸದಾಂಚ್ ಮ್ಹಳ್ಯಾ ಬರಿ ಸಂರಕ್ಷಣ್ ಕರ್ಚಿಂ ಗರ್ಜ್ ಆಸಾ, ನಾ ತರ್ ಪ್ರಕ್ರತೆಕ್ ಅಪಾಯ್ ಚುಕ್ಚೆಂ ನಾ. ಚಡ್ ಆನಿ ಚಡ್ ರೂಕಾಂ ಝಡಾಂ ಲಾಂವ್ನ್ ತಾಂಕಾಂ ವಾಡೊಂವ್ಚೆಂಚ್ ವನಮಹತ್ಸೋವಾಚೊ ಮುಖ್ಯ್ ಉದ್ದೇಶ್. ಹರ್ಯೆಕ್ಲ್ಯಾನಿಂ ಪರಿಸರ್ ಸಂರಕ್ಷಣೆಚೊ ನೀಚೆವ್ ಕರಿಜೆ’
‘ರೂಕಾಂಚೊ ನಾಶ್, ಪ್ಲಾಸ್ಟಿಕ್ ಉಪಯೋಗ್ ಚಡಾಚ್ ಗೆಲ್ಯಾನ್ ಪರಿಸರಾಂತ್ ಹುನ್ಸಾಣ್ ಚಡೊನ್ ಯೆತೆಂ ಆಸಾ, ದೆಕುನ್ ಪ್ರಕ್ರತಚಿ ಸಮಾತೋಲನ್ ಸಾಂಬಾಳ್ಚ್ಯಾ ಖಾತಿರ್ ಹರ್ಯೆಕ್ಲ್ಯಾನಿಂ ಜಾಗ್ರತ್ ಜಾವ್ನ್ ಪರಿಸರ ಸಂರಕ್ಷಣ್ ಕಾರ್ಯ ರೂಪಾಕ್ ಹಾಡ್ಚ್ಯಾ ಖಾತಿರ್ ಆತ್ಮವಲೋಕನ್ ಕರುಂಕ್ ಜಾಯ್’ ಮ್ಹಣನ್ ತಾಣಿ ಕಳಯ್ಲೆಂ.
ಹ್ಯಾ ಸಂದರ್ಭಾರ್ ಫಿರ್ಗಜೆಚೊ ವಿಗಾರ್ ಮಾ|ಬಾ|ಫರ್ಡಿನಾಂಡ್ ಗೊನ್ಸಾಲ್ವಿಸ್ ಉಪಸ್ಥಿತ್ ಆಸೊನ್ ತಾಣಿಯಿ ವನಮಹತ್ಸೋವಾಕ್ ಸಾಂಗಾತ್ ದಿಲೊ.
ಕಥೊಲಿಕ್ ಸಭಾ ಉಡುಪಿ ಪ್ರದೇಶ್ ಹಾಂಚ್ಯಾ ಯೆವ್ಜಣೆ ಪರ್ಮಾಣೆ ಉಡುಪಿ ಧರ್ಮ್‍ಪ್ರಾಂತ್ಯಾಚಾ ಸರ್ವ್ ಫಿರ್ಗಜೆಚ್ಯಾ ವಠಾರಾಂತ್ 600 ಚ್ಯಾಕಿ ಚಡ್ ಝಡಾಂ ಲಾಯ್ಲಿ ಮಾತ್ರ್ ನ್ಹಯ್ 10 ಹಜಾರಾಕ್‍ಯಿ ಚಡ್ ಝಡಾಂ ದಿಯೆಸಿಜೆಚ್ಯಾಂ ಕ್ರಿಸ್ತಿ ಪರ್ಜಾಂಕ್ ವಾಂಟುನ್ ಹೊ ವಿಶಿಶ್ಠ್ ವನಮಹತ್ಸೋವ್ ಯಶಸ್ವಿ ಕೆಲೊ. ಕಲ್ಯಾಣ್‍ಪುರ್ ವಾರಾಡ್ಯಾಂತ್ 2000, ಶಿರ್ವಾ ವಾರಾಡ್ಯಾಂತ್ 1500, ಕುಂದಾಪುರ್ ವಾರಾಡ್ಯಾಂತ್ 2000, ಕಾರ್ಕಳ್ ವಾರಾಡ್ಯಾಂತ್ 1000, ಉಡುಪಿ ವಾರಾಡ್ಯಾಂತ್ 1500 ಝಡಾಂ ವಿತರಣ್ ಕೆಲಿ. ಲೋಕಾನಿಂ ಘರಾ ವೆಲ್ಲಿಂ ಝಡಾಂ ಲಾಂವ್ನ್ ತಾಂಚೊ ಪೋಷಣ್ ಕರಿಜೆ ಆನಿ ಪ್ರಮಾಣಿಕ್ ಥರಾನ್ ಹೆಂ ವಿಶಿಷ್ಠ್ ಯೋಜನ್ ಜ್ಯಾರಿ ಕರ್ಚ್ಯಾ ದಿಶ್ಯಾನ್ ಝಡಾಂಚ್ಯಾ ವಾಡವಳೆಚಿ ಮಾಹೆತ್ ಮಹಿನ್ಯಾವಾರ್ ಘಟಕಾನಿಂ ದಿಂವ್ಕ್ ಜಾಯ್ ಮ್ಹಣನ್ ನಿರ್ಣಯ್ ಕೆಲ್ಯಾ. ಮ್ಹಣನ್ ಕಳಯ್ಲ್ಯಾ.
