JANANUDI.COM NETWORK
ಮುಂಬಯ್: ಯದಾಹಂ ಜೀವಮಿ, ಅಹಮಾಶಂಸೆ (ಜೀವ್ ಆಸ್ತಾಸರ್ ಭರ‍್ವಸ್ತಾಂ)’ ಧ್ಯೇಯಾಖಾಲ್ 2000-1 ಇಸ್ವೆಂತ್ ಕುವೆಯ್ಟಾಂತ್ ಸುರ್ವಾತುನ್, ಯೆದೊಳ್ ಪಾಸುನ್ ಕೊಂಕಣಿ ಸಾಹಿತ್ಯಾಚೆ ವೆವೆಗಳೆ 47 ಬೂಕ್ ಪ್ರಕಾಶಿತ್ ಕೆಲ್ಲ್ಯಾ ಆಶಾವಾದಿ ಪ್ರಕಾಶನಾಚೊ ಪಾಂಚ್ವೊ ಡಿಜಿಟಲ್ ಆಡಿಯೊ ಬೂಕ್ ’ಕಥಾಮೃತ್ (ಕ್ಲೆರೆನ್ಸ್ ಕೈಕಂಬಚ್ಯೊ ಡಿಜಿಟಲ್ ಕಾಣಿಯೊ)’ ಮೊಕ್ಳಿಕ್ ಕಾರ್ಯೆಂ, ಅಗೋಸ್ತ್ 15 ತಾರಿಕೆರ್ ಸಾಂಜೆರ್ 7 ವೊರಾಂಚೆರ್ ’ಪಯ್ಲೆಂ ಅಂತರ್‌ರಾಶ್ಟ್ರೀಯ್ ಡಿಜಿಟಲ್ ಕೊಂಕಣಿ ಮಾಧ್ಯಮಾಚೆರ್ ಚಲ್ಲೆಂ.
ಕಾರ‍್ಯಾಚೆ ಸುರ‍್ವಾತೆರ್ ಜೆರಾಲ್ ಯೆವ್ಕಾರ್ ಮಾಗುನ್ ವಲ್ಲಿ ಕ್ವಾಡ್ರಸಾನ್ ಅಗೋಸ್ತ್ 10 ತಾರಿಕೆರ್ ಅಛಾನಕ್ ರಿತಿನ್ ಅಂತರ್‌ಲ್ಲ್ಯಾ ಕೊಂಕಣಿ ಬರವ್ಪಿ, ಆಮ್ಚೊ ಯುವಕ್ ಪತ್ರಾಚೊ ಆಧ್ಲೊ ಸಂಪಾದಕ್ ರೊಬರ‍್ಟ್ ಫುರ‍್ಟಾಡೊ ಸಾಸ್ತಾನಾಚ್ಯಾ ಅತ್ಮ್ಯಾಕ್ ಶಾಂತಿ ಲಾಭುಂಕ್ ಎಕಾ ಮಿನುಟಾಚೆಂ ಮವ್ನ್ ಪ್ರಾರ‍್ಥನ್ ಕೆಲೆಂ. ಕೊಂಕಣಿ ಸರ‍್ದಾರ್ ಮಾನೆಸ್ತ್ ಬಸ್ತಿ ವಾಮನ್ ಶೆಣಯ್ ಹಾಣಿಂ ಉಗ್ತಾವಣ್ ಉಲವ್ಪಾಂತ್ ’ಡಿಜಿಟಲ್ ಆಮ್ಚೊ ಫುಡಾರ್ ದೆಕುನ್ ಬದ್ಲುನ್ ವೆಚ್ಯಾ ಕಾಳಾಕ್ ಸರಿ ಜಾವ್ನ್ ಆಮಿ ಸಯ್ತ್ ಬದ್ಲುನ್, ಆತಾಂಚ್ಯಾ ಯುವಜಣಾಂಲಾಗಿಂ ಕೊಂಕಣಿ ಸಾಹಿತ್ಯಾಕ್ ವರ್ಚಿ ಏಕ್ ವಾಟ್ ಆಮಿ ತಯಾರ್ ಕರುಂಕ್ ಜಾಯ್’ ಮ್ಹಣ್ ಉಲೊ ದಿಲೊ.
ಮ್ಯಾಂಚೆಸ್ಟರ್ (ಯು.ಕೆ.) ಥಾವ್ನ್ ಲಾರೆನ್ಸ್ ವಿ. ಬಾರ್ಬೋಜಾನ್ ಡಿಜಿಟಲ್ ಬುಕಾಂಚಿ ಮಟ್ವಿ ವಳೊಕ್ ಕರುನ್ ೨೦೦೫ ಇಸ್ವೆಂತ್ ಆಶಾವಾದಿ ಪ್ರಕಾಶನಾನ್ ಡಿಜಿಟಲ್ ರುಪಾರ್ ಪರ‍್ಗಟ್ ಕೆಲ್ಲ್ಯಾ ’ಸಾಗೊರಾಚ್ಯಾ ವಾಟೆಚ್ಯೊ ಝರಿ; ಪಯ್ಲ್ಯಾ ’ಇ-ಬುಕಾಚಿ’, ತಶೆಂಚ್ ಹೆರ್ ಚ್ಯಾರ್ ಡಿಜಿಟಲ್ ಬುಕಾಂಚಿ ಮಾಹೆತ್ ದಿಲಿ. 2018 ಇಸ್ವೆಚ್ಯಾ ನವೆಂಬ್ರ್ 16 ತಾರಿಕೆರ್ ’ಕಥಾದಾಯ್ಜ್’ ನಾಂವಾಚ್ಯಾ ಪಯ್ಲ್ಯಾ ಡಿಜಿಟಲ್ ಆಡಿಯೊ ಬುಕಾಂತ್ ವಲ್ಲಿ ಕ್ವಾಡ್ರಸಾಚ್ಯೊ 23 ಮಟ್ವ್ಯೊ ಕಾಣಿಯೊ, ’ಸುರ‍್ಯೊ ಉದೆತಾ’ ನಾಂವಾಚ್ಯಾ ದುಸ್ರ್ಯಾ ಡಿಜಿಟಲ್ ಆಡಿಯೊ ಬುಕಾಂತ್ ರಾಶ್ಟ್ರೀಯ್ ಮಟ್ಟಾಚ್ಯಾ 27 ಕಾಣಿಯೆಗಾರಾಂಚ್ಯೊ ಮಟ್ವ್ಯೊ ಕಾಣಿಯೊ, ’ಮಾಯಾನಗರಿ’ ನಾಂವಾಚ್ಯಾ ತಿಸ್ರ್ಯಾ ಡಿಜಿಟಲ್ ಆಡಿಯೊ ಬುಕಾಂತ್ ವಲ್ಲಿ ಕ್ವಾಡ್ರಸಾಚ್ಯೊ ಮುಂಬಯ್‌ಚ್ಯೊ ಕಾಣಿಯೊ, ’ಸುರ‍್ಯೊ ಉದೆಲಾ’ ನಾಂವಾಚ್ಯಾ ಚೊವ್ತ್ಯಾ ಡಿಜಿಟಲ್ ಆಡಿಯೊ ಬುಕಾಂತ್ ರಾಶ್ಟ್ರೀಯ್ ಮಟ್ಟಾಚ್ಯಾ 25 ಕಾಣಿಯೆಗಾರಾಂಚ್ಯೊ ಮಟ್ವ್ಯೊ ಕಾಣಿಯೊ ಆನಿ ’ಕಥಾಮೃತ್’ ನಾಂವಾಚ್ಯಾ ಪಾಂಚ್ವ್ಯಾ ಡಿಜಿಟಲ್ ಆಡಿಯೊ ಬುಕಾಂತ್ ಕ್ಲೆರೆನ್ಸ್ ಕೈಕಂಬಚ್ಯೊ 20 ಮಟ್ವ್ಯೊ ಕಾಣಿಯೊ ಆಸಾತ್. ’ಕಥಾಝರ್’ ನಾಂವಾಚ್ಯಾ ಸವ್ಯಾ ಡಿಜಿಟಲ್ ಆಡಿಯೊ ಬುಕಾಕ್ ವೆಗಿಂಚ್ ಪ್ರಸಾರಿತ್ ಕರ್ಚಿ ತಯಾರಾಯ್ ಚಲುನ್ ಆಸಾ ಮ್ಹಣಾಲೊ.
ಪ್ರೇಮ್ ಮೊರಾಸಾನ್ ಪ್ರಮುಕ್ ಉಲವ್ಪ್ಯಾಂಚಿ; ಕೇರಳ ಥಾವ್ನ್ ಗೋಕುಲ್ದಾಸ್ ಪ್ರಭು, ಮಂಗ್ಳುರ್ ಥಾವ್ನ್ ದೊ|ಎಡ್ವರ್ಡ್ ಎಲ್. ನಜ್ರೆತ್, ಉಡ್ಪಿ ಥಾವ್ನ್ ಮಾ|ಚೇತನ್ ಕಾಪುಚಿನ್, ತಶೆಂಚ್ ಗೊಂಯ್ ಥಾವ್ನ್ ದೊ|ಪ್ರಕಾಶ್ ಪೆರ‍್ಯಂಕರ್ (ಗೊಂಯ್ ಯುನಿವರ್ಸಿಟಿಚ್ಯಾ ಕೊಂಕಣಿ ವಿಭಾಗಾಚೊ ಮುಖೆಸ್ತ್) ವಳೊಕ್ ಕರುನ್ ದಿಲಿ. ಗೋಕುಲ್ದಾಸ್ ಪ್ರಭುನ್ ’ಇ-ಬುಕಾಂನಿ ಸಯ್ತ್ ಆಸ್ಲಿ ವಾಚ್ಪಾಚಿ ಬಂದಡ್ ಡಿಜಿಟಲ್ ಆಡಿಯೊ ಬುಕಾಂನಿ ನಾ, ಡಿಜಿಟಲ್ ಆಡಿಯೊ ಬೂಕ್ ಆಯ್ಕುಂಚಿ ಏಕ್ ಸಲೀಸ್ ಕಲಾ ಆಯ್ಕುವ್ಪ್ಯಾಂಕ್ ಕಾಣಿ ಬರಿ ಕರುನ್ ಸಮ್ಜುಂಕ್ ಕುಮೊಕ್ ಕರ್ತಾ ದೆಕುನ್ ಕಾಣಿ ಸಾದರ್‌ಕರ‍್ಪಿಂನಿ ಸಬ್ಧಾಂಚೊ ಜೊಕ್ತೊ ಉಚ್ಛಾರ್ ಕರ್ಚಿ ಗರ‍್ಜ್ ಆಸಾ ಜಾಲ್ಲ್ಯಾನ್ ತ್ಯಾ ತ್ಯಾ ಪ್ರಾಂತ್ಯಾಚ್ಯಾ ಕಾಣಿಯಾಂಕ್ ಸಾದರ್ ಕರುಂಕ್ ತ್ಯಾ ತ್ಯಾ ಬೊಲಿಂಚ್ಯಾ ಸಾದರ್ ಕರ‍್ಪಿಂನಿ ಕೆಲ್ಯಾರ್ ಬರೆಂ. ಕೊಂಕಣಿಕ್ ಆತಾಂಚ್ಯಾ ಯುವಜಣಾಂಲಾಗಿಂ ವರುಂಕ್ ಡಿಜಿಟಲ್ ಆಡಿಯೊ ಏಕ್ ಉತ್ತೀಮ್ ಮಾಧ್ಯಮ್’ ಮ್ಹಣಾಲೊ. ದೊ|ಎಡ್ವರ್ಡ್ ನಜ್ರೆತಾನ್ ಕಶೆಂ ಆಯ್ಚ್ಯಾ ಕಾಳಾರ್ ಸರ್ವ್ ಭಾಸೆಂನಿ ವಾಚ್ಪ್ಯಾಂಚೊ ಸಂಕೊ ಉಣೊ ಜಾವ್ನ್ ಆಯ್ಲಾ, ಆನಿ ಪ್ರಿಂಟ್ ಮಾಧ್ಯಮ್ ಅಸ್ಕತ್ ಜಾವ್ನ್ ವೆಚ್ಯಾ ಕಾಳಾರ್ ಡಿಜಿಟಲ್ ಮಾಧ್ಯಮ್ ಏಕ್ ಪ್ರಮುಕ್ ವಿಕಲ್ಪ್ ಜಾವ್ನ್ ಉಭೆಂ ಜಾವ್ನ್ ಆಸಾ. ಆನಿ ಡಿಜಿಟಲ್ ಮಾಧ್ಯಮಾಂನಿ ಆಜ್ ಕೊಂಕಣಿಕ್ ’ಗಲ್ಫಾಚ್ಯಾ ಜಿವಿತಾಚ್ಯೊ ಕಾಣಿಯೊ’, ’ಮುಂಬಯ್ ಜಿವಿತಾಚ್ಯೊ ಕಾಣಿಯೊ’ ಆಯ್ಕುಂಕ್ ಮೆಳ್ತಾತ್ ಜಾಲ್ಲ್ಯಾನ್ ಆಮ್ಕಾಂ ಆಮ್ಚಿ ಸಮ್ಜುಣಿ ವಿಸ್ತಾರ್ ಕರುಂಕ್ ಏಕ್ ವಾಟ್ ಉಭಿ ಜಾತಾ’ ಮ್ಹಣಾಲೊ. ಮಾ|ಚೇತನ್ ಲೋಬೊನ್ ಜೆದ್ನಾಂ ಡಿಜಿಟಲ್ ಮಾಧ್ಯಮಾಚೆರ್ ಕೊಂಕಣಿ ಕಾಣಿಯೊ ಪ್ರಸಾರಿತ್ ಜಾಂವ್ಕ್ ಲಾಗ್ಲ್ಯೊ ತವಳ್ ಥಾವ್ನ್ ಚಡ್ತಾವ್ ಹರ‍್ಯೆಕ್ ಕಾಣಿ ಆಯ್ಕುನ್ ತಾಚೆಂ ಅಸ್ವಾದನ್ ಕೆಲ್ಯಾ. ಆಯ್ಚ್ಯಾ ಕಾಳಾರ್ ದೃಶ್ಯ್ ಮಾಧ್ಯಮಾಕ್ ಚಡಿತ್ ಖಾಯ್ಸ್ ಆಸಾ, ಪುಣ್ ಕಾಣಿ ಏಕ್ ವೆಗ್ಳೊ ಪ್ರಕಾರ್ ಜಾಲ್ಲ್ಯಾನ್ ಡಿಜಿಟಲ್ ಆಡಿಯೊ ಬುಕಾರುಪಾರ್ ಕೊಂಕಣಿ ಕಾಣಿಯೊ ಚಡಿತ್ ಲೊಕಾಂಕ್ ಕೊಂಕಣಿಲಾಗಿಂ ಹಾಡ್ಚ್ಯಾಂತ್ ಮಜತ್‌ಗಾರ್ ಜಾತಲೊ’ ಮ್ಹಣಾಲೊ. ದೊ|ಪ್ರಕಾಶ್ ಪೆರ‍್ಯಂಕರಾನ್ ’ಕೊಂಕಣಿ ವೆವೆಗಳ್ಯಾ ಲಿಪಿಂನಿ ವಾಂಟುನ್ ಗೆಲಾಂ ಜಾಲ್ಲ್ಯಾನ್ ಲಿಪಿಚ್ಯಾ ಬಂದಡೆಕ್ ಲಾಗುನ್ ಕೊಂಕಣಿಚ್ಯಾ ಸರ್ವ್ ಲಿಪಿಂನಿ ಆಸ್ಚೆಂ ಕೊಂಕಣಿ ಸಾಹಿತ್ಯ್ ಆಮ್ಕಾಂ ವಾಚುಂಕ್ ತಶೆಂಚ್ ತಾಂಚೆರ್ ಅಧ್ಯಯನ್ ಕರುಂಕ್ ಆಸ್ಚ್ಯೊ ವಾಟೊ ಉಣ್ಯೊ. ಪುಣ್ ಡಿಜಿಟಲ್ ಆಡಿಯೊ ಬೂಕ್ ಹ್ಯಾ ದಿಶೆನ್ ಭೋವ್ ಮಹತ್ವಾಚೆಂ. ಡಿಜಿಟಲ್ ಆಡಿಯೊ ಬುಕಾಂತ್ ಲಿಪಿಚೊ ಸಮಸ್ಸೊ ನಾ ದೆಕುನ್ ಹೆರ್ ಲಿಪಿಂನಿ ಬರಯಿಲ್ಲ್ಯೊ ಉತ್ತೀಮ್ ಕಾಣಿಯೊ ಆಮ್ಕಾಂ ಆಯ್ಕುಂಕ್, ಸಮ್ಜುಂಕ್ ಸಲೀಸ್ ಜಾಲ್ಲ್ಯಾನ್ ಸಾಹಿತ್ಯ್ ಶಿಕ್ಪ್ಯಾಂಕ್ ರಾಶ್ಟ್ರೀಯ್ ಸ್ಥರಾಚ್ಯಾ ಕೊಂಕಣಿ ಸಾಹಿತ್ಯಾಚೊ ಅಭ್ಯಾಸ್ ಕರುಂಕ್ ಏಕ್ ಅಪುರ್ಭಾಯೆಚಿ ಸಂಧಿ.’ ಮ್ಹಣಾಲೊ
ಪ್ರೇಮ್ ಮೊರಾಸಾನ್ ಕ್ಲೆರೆನ್ಸ್ ಕೈಕಂಬಾಚಿ ಮಟ್ವಿ ವಳೊಕ್ ಕರುನ್ ದಿತಚ್, ವಲ್ಲಿ ಕ್ವಾಡ್ರಸಾನ್ ವೀಸ್ ಕಾಣಿಯಾಂಕ್ ಸಾದರ್ ಕೆಲ್ಲ್ಯಾ ವೀಸ್ ಸಾದರ್‌ಕರ‍್ಪಿಂಚಿ ವಳೊಕ್ ಕರುನ್ ದಿತಚ್, ಮಾನೆಸ್ತಿಣ್ ಜೇನ್ ಐಡಾ ಪಿಂಟೊನ್ ’ಕಥಾಮೃತ್’ ಡಿಜಿಟಲ್ ಆಡಿಯೊ ಬುಕಾಕ್ ಡಿಜಿಟಲ್ ಮೊಕ್ಳೀಕ್ ಕರ್ತಚ್, ಕ್ಲೆರೆನ್ಸ್ ಕೈಕಂಬಾನ್ ಅಪ್ಲಿಂ ಭಗ್ಣಾಂ ಉಚಾರ್ನ್, ಚಾಳಿಸ್ ವರ್ಸಾಂ ಥಾವ್ನ್ ಕಾಣಿಯೊ ಬರವ್ನ್ ಆಯ್ಲ್ಯಾರೀ ಜಾಂವ್ಕ್ ನಾತ್ಲೊ ಅನ್ಭೋಗ್ ಆತಾಂ ಡೀಜಿಟಲ್ ಆಡಿಯೊ ಬುಕಾಂತ್ ಪ್ರಸಾರಿತ್ ಜಾಲ್ಲ್ಯಾ ಎಕಾ ಕಾಣಿಯೆಂತ್ ಜಾಲ್ಲೊ ಸಂತೊಸ್ ಉಚಾರುನ್, ಹ್ಯಾ ಡಿಜಿಟಲ್ ಬುಕಾಕ್ ತಯಾರ್ ಕರುಂಕ್ ಮಿನತ್ ಕೆಲ್ಲ್ಯಾ ಸರ‍್ವಾಂಚೊ ಉಪ್ಕಾರ್ ಬಾವುಡ್ಲೊ.
ಅಮೆರಿಕಾಥಾವ್ನ್ ದೊ|ಆಸ್ಟಿನ್ ಡಿ’ಸೋಜ್ ಪ್ರಭುನ್ ಅಪ್ಲ್ಯಾ ಉಲವ್ಪಾಂಕ್ ’ಪಯ್ಲೆಂ ಅಂತರ್‌ರಾಶ್ಟ್ರೀಯ್ ಕೊಂಕಣಿ ಕಾರ್ಯೆಂ ಚಲಂವ್ಚಿ ಸುರ‍್ವಾತ್ ಕರುನ್ ದೇಶಾಚ್ಯಾ ವೆವೆಗಳ್ಯಾ ದೇಶಾಂತ್ಲ್ಯಾ ಕೊಂಕಣಿ ಲೊಕಾಂಕ್ ಸಾಂಗಾತಾ ಮೆಳುಂಕ್ ಆವ್ಕಾಸ್ ಕರುನ್ ದಿಲ್ಲ್ಯಾ ಆಶಾವಾದಿ ಪ್ರಕಾಶನಾಚೊ ಉಪ್ಕಾರ್ ಬಾವುಡ್ಲೊ’. ಕೊನ್ಸೆಪ್ಟಾ ಫೆರ‍್ನಾಂಡಿಸ್ ಆಳ್ವನ್ ’ಡಿಜಿಟಲ್ ಬುಕಾಂಕ್ ಶಿಕ್ಷಣ್ (Academic) ಸಂಸ್ಥ್ಯಾಂನಿ ಗಳ್ಸುನ್ ಹಾಚೊ ಬರೊ ಫಾಯ್ದೊ ಜೊಡ್ಚೆ ಗರ‍್ಜೆವಿಶಿಂ ಉಲಯ್ಲಿ. ಕೆನಡಾ ಥಾವ್ನ್ ಜೆರಿ ಡಿ’ಮೆಲ್ಲೊ ಬೆಂದುರ್ ಹಾಣೆಂ ’ಡಿಜಿಟಲ್ ಮಾಧ್ಯಮಾಂತ್ ಕೊಂಕಣಿ ಕಾಣಿಯಾಂ ಮುಖಾಂತ್ರ್ ಆಮಿ ಚಡಿತ್ ಕೊಂಕಣಿ ಲೊಕಾಂಲಾಗಿಂ ವಚುಂಕ್ ಏಕ್ ಬರಿ ಸುರ‍್ವಾತ್ ಕರುನ್ ದಿತಾ’ ಮ್ಹಣಾಲೊ.
ಹೆಂ ಕಾರ್ಯೆಂ ಮಾಂಡುನ್ ಹಾಡ್‍ಲ್ಲ್ಯಾ ವಲ್ಲಿ ಕ್ವಾಡ್ರಸಾನ್ ಉಪ್ಕಾರ್ ಆಟವ್ಣಿ ಕೆಲಿ
