ಕುಂದಾಪುರ್ ರೊಜಾರ್ ಮಾಯೆಚ್ಯಾ ಇಗರ್ಜೆ ಚಾರ್ ದಿಸಾಂಚಿಂ ರೆತಿರ್ ಸಂಪನ್ನ್ ಜಾಲಿ
ಕುಂದಾಪುರ್,ಮಾ.18: ಕುಂದಾಪುರ್ ರೊಜಾರ್ ಮಾಯೆಚ್ಯಾ ಇಗರ್ಜೆ ಮೂಲ್ಕಿ ದೈವಿಕ್ ಕೇಂದ್ರಾಚ್ಯಾ ಯಾಜಕಾಂ ಥಾವ್ನ್ ಚಾರ್ ದಿಸಾಂ ಚಲಯ್ಲಿ ರೆತಿರ್ ಯಶಸ್ವೆನ್ ಸಂಪನ್ನ್ ಜಾಲಿ.
ಮಾಚ್ರ್ಯಾಚ್ಯಾ 14 ತಾರೀಕೆ ಥಾವ್ನ್ 17 ತಾರೀಕ್ ಮ್ಹಣಾಸರ್ ಚಾರ್ ದಿಸಾನಿಂ ಚಲಲ್ಯಾ ಹಿ ರೆತಿರ್ ಮಾ|ಬಾ|ಅನಿಲ್ ಫೆರ್ನಾಂಡಿಸ್, ಮಾ|ಬಾ|ಒಲ್ವಿನ್ ಫೆರ್ನಾಂಡಿಸ್, ಮಾ|ಬಾ|ಅಬ್ರಾಹಮ್ ಡಿಸೋಜಾ, ಮಾ|ಬಾ|ಇವಾನ್ ಗೋಮ್ಸ್ ಹಾಣಿ ಉಜ್ವಾಡ್, ದೇವ್ ಆಪವ್ಣೆ, ಭೊಗ್ಸಾಣೆ, ದೆವಾಚೊ ಮೋಗ್, ಕಾಕ್ಳುತ್, ಮಾಗ್ಣೆ, ದಯಾ, ಪಾತಾಕ್, ಕುಮ್ಸಾರ್, ಕುಟ್ಮಾ ಜಿವಿತ್ ಅಸಲ್ಯಾ ವಿಷಯಾಂಚೆರ್ ಶಿಕವ್ಣ್, ಪ್ರವಚನ್ ದಿಂವ್ನ್ , ಪವಿತ್ರ್ ಸಾಂಕ್ರಾಮೆಂತಾಚ್ಯಾ ಆರಾಧಾನ ಸಂಗಿ ರೆತಿರ್ ಚಲಂವ್ನ್ ವೆಲಿಂ. ಹ್ಯಾ ಸಂದರ್ಭಿ ಲ್ಹಾನಾಂ ಭುಗ್ರ್ಯಾಂ ಖಾತಿರ್ ವೀಶೆಸ್ ಮಾಗ್ಣೆ, ಆಶಿರ್ವಾದಾಚೆಂ ಕಾರ್ಯೆ ಚಲ್ಲೆಂ,
ಪರಿವರ್ತನ್, ಭೊಗ್ಸಾಣೆ, ಸೈತಾನಾಕ್ ಪಾಟ್ ಕರ್ಚೆಂ ಪದ್ವಿ ವ ಅಧಿಕಾರ್ ಆನಿ ಬಾಪಾಚೆಂ ಬೆಸಾಂವ್ ಹ್ಯಾ ಪಾಂಚ್ ವಿಶ್ಯಾಂತ್ ಚಡಿತ್ ಸಮ್ಜೊಣಿ ದಿಂವ್ನ್ ಮನ್ಸ್ಯಾ ಜಿವಿತಾಕ್ ಗರ್ಜ್ ಪಡ್ಚ್ಯೊ ಪಾಂಚ್ ಚಾವಿಯೊ ಮ್ಹಣನ್ ಸಮ್ಜಾವ್ಣಿ ದಿಲಿ. ಹ್ಯಾ ರೆತಿರೆಕ್ ಮಾನೇಸ್ತ್ ಮ್ಯಾಕ್ಷಿಮ್ ಮೊರಾಸ್ ಹಾಣೆ ಗಾಯನ್ ಆನಿ ಸಂಗೀತ್ ದಿಂವ್ನ್ ಸಂಗಾತ್ ದಿಲೊ.
ಹ್ಯಾ ರೆತಿರೆಕ್ ಫಿರ್ಗಜ್‍ಗಾರಾನಿಂ ಚಡ್ ಆಸಕ್ತ್ ದಾಖವ್ನ್ ಚಡಿತ್ ಮಾಪಾನ್ ವಾಂಟೊ ಘೆತಲ್ಯಾನ್ ಹಿ ಏಕ್ ಯಶಸ್ವೆ ಭರಿತ್ ರೆತಿರ್ ಜಾಂವ್ಕ್ ಪಾವ್ಲಿ. ಫಿರ್ಗಜ್ ವಿಗಾರ್ ಭೊ|ಮಾ|ಬಾ|ಸ್ಟ್ಯಾನಿ ತಾವ್ರೊ, ಪ್ರಾಂಶುಪಾಲ್ ಮಾ|ಬಾ| ಪ್ರವೀಣ್ ಅಮ್ರತ್ ಮಾರ್ಟಿಸ್ ಹಾಣಿ ಹರ್ಯೇಕ್ ದಿಸಾಂ ರೆತಿರೆಚ್ಯಾ ಬಲಿದಾನಾಂತ್ ವಾಂಟೊ ಘೆತ್ಲೊ. ಸಹಾಯಕ್ ವಿಗಾರ್ ಮಾ|ಬಾ| ರೋಯ್ ಲೋಬೊನ್ ರೆತಿರೆಚ್ಯಾ ಮಾಂಡವಳ್ ಮಾಂಡುನ್ ಹಾಡ್ಚ್ಯಾಂತ್ ಸಹಕಾರ್ ದಿಲೊ. ಕೊವೆತಾಂಚಿಂ ಸಿಸ್ಟರಾಂ, ಆನಿ ಗಾಯಾನ್ ಪಂಗ್ಡಾನ್ ಹ್ಯಾ ರೆತಿರೆಕ್ ಸಹಕಾರ್ ದಿಲೊ. ವಿಗಾರ್ ಬಾಪಾನ್, ಸರ್ವಾಂಚೊ ಉಪ್ಕಾರ್ ಆಟಾಯ್ಲೊ.
