JANANUDI.COM NETWORK
ಕುಂದಾಪುರಾಂತ್ ಫಾ|ಮಹೇಶ್ ಡಿಸೋಜಾಕ್ ಶ್ರದ್ದಾಂಜಲಿ: ಫಾ|ಸ್ಟ್ಯಾನಿ ಗದ್ಗತಿತ್ ಜಾಲೊ
ಕುಂದಾಪುರ್, ಒ. 13: ಶಿರ್ವಾ ಫಿರ್ಗಜೆಚೊ ಸಹಾಯಕ್ ಯಾಜಕ್ ತಶೆಂ ಡಾನ್ ಬಾಸ್ಕೊ ಸಿ.ಬಿ.ಎಸ್.ಸಿ. ಇಸ್ಕೊಲಾಚೊ ಪ್ರಾಂಶುಪಾಲ್ ದೆವಾಧಿನ್ ಮಾ|ಬಾ|ಮಹೇಶ್ ಡಿಸೋಜಾ ಹಾಂಚ್ಯಾ ಅತ್ಮ್ಯಾಕ್ ಕುಂದಾಪುರ್ ಫಿರ್ಗಜ್ ಪರ್ಜಾನ್ ಶಾಂತಿ ಮಾಗೊನ್ ಶ್ರದ್ದಾಂಜಲಿ ಅರ್ಪಿತ್ ಕೆಲಿ.
ಹಾಚೆಂ ಮುಖೇಲ್ಪಣ್ ಕುಂದಾಪುರ್ಚೊ ವಿಗಾರ್ ತಶೆಂ ಕುಂದಾಪುರ್ ವಾರಾಡೊ ವಿಗಾರ್‍ವಾರ್ ಭೊ|ಮಾ|ಬಾ| ಸ್ಟ್ಯಾನಿ ತಾವ್ರೊನ್ ಘೆಂವ್ನ್ ‘ಶಿರ್ವಾ ಫಿರ್ಗಜೆಂತ್ ಹಾಂವ್ ವಿಗಾರ್ ಜಾವ್ನಾಸ್ತಾಂ, ಬಾಪ್ ಮಹೇಶ್ ಮ್ಹಜೆಂ ಸಂಗಿ ದೋನ್ ವರ್ಸಾಂ ಆಸಲ್ಲೆಂ. ತೆಂ ಭೋವ್ ಮೊಗಾಳ್ ಜಾವ್ನಾಸ್ಲೆಂ. ಶಿರ್ವಾ ಡಾನ್ ಬೊಸ್ಕೊ ಸಿ.ಬಿ.ಎಸ್.ಸಿ. ಇಸ್ಕೊಲ್ ಆರಂಭ್ ಕರ್ತಾನಾ ತಾಣಿ ಮಸ್ತ್ ವಾಂವ್ಟ್ ಘೆತಲ್ಲಿ. ಭಾಂದ್ಪಾಚೆಂ ಕಾಮ್ ಆನಿ ಇಸ್ಕೊಲ್ ಆರಂಭ್ ಕರುಂಕ್ ಜಾಯಾಸ್ಲಿಂ ಸರ್ವ್ ಕಾಮಾಂತ್ ತಾಣಿ ಮುಖೇಲ್ಪಣ್ ಘೆತ್ಲೆಂ. ತಾಚೆಂ ಮರಣ್ ಸ್ವೀಕಾರ್ ಕರುಂಕ್ ಕಷ್ಟ್ ಜಾತಾತ್, ತರೀ ದೆವಾಚೆ ಯೋಜನ್ ವೆಗ್ಳೆಂಚ್ ಆಸ್ತಾಂ. ದೆವಾಚೆ ಯೋಜನ್ ಆಮಿ ಸ್ವೀಕಾರ್ ಕರ್ತಾಂವ್. ಬಾಪ್ ಮಹೇಶಾಚ್ಯಾ ಮೊರ್ನಾ ವರ್ವಿಂ ಉಡುಪಿ ಧರ್ಮ್ ಪ್ರಾಂತಾಚ್ಯಾ ಯಾಜಕ್ ಭಾರೀಚ್ ದುಖ್ ಪಾವ್ಲ್ಯಾತ್. ತಶೆಂಚ್ ದಿಯೆಸಿಜಿಚ್ಯಾ ದೇವ್ ಪ್ರಜಾಂಕ್. ತಶೆಂಚ್ ಬಾಪ್ ಮಹೇಶಾಚ್ಯಾ ಕುಟ್ಮಾದಾರಾಂಕ್ ಚಡಿತ್ ದುಖ್ ಪಾವ್ಲಾ ತೆಂ ದುಖ್ ಸೊಸುನ್ ವ್ಹರುಂಕ್ ದೇವ್ ತಾಂಕಾಂ ಆಧಾರ್ ದಿಂವ್ದಿ ಮ್ಹಣನ್ ಮಾಗ್ಯಾಂ’ ಮ್ಹಣನ್ ತಾಣಿ ದುಖಿತ್ ಜಾವ್ನ್ ಶ್ರದ್ದಾಂಜಲಿ ವೇಳಾರ್ ಮಾಗ್ಲೆ. ಹ್ಯಾ ವೇಳಾರ್ ತೆಂ ದುಖಿನ್ ಗದ್ಗದಿತ್ ಜಾಲೆಂ.
ಬಾಪ್ ಮಹೇಶಾಚ್ಯಾ ಮೊರ್ನಾ ವಿಶ್ಯಾಂತ್ ಪೆÇಲೀಸ್ ತನ್ಕಿ ಚಲ್ತಾಂ ಜಾಲ್ಯಾನ್ ಮಾಧ್ಯಮಾಚ್ಯಾನಿಂ ಸಾರ್ಕೆಂ ಕಿತೆಂಚ್ ಕಳೊನ್ ಯೆತಾಂ ಪರ್ಯಾಂತ್ ಮೊರ್ನಾ ವಿಶಿಂ ಗುಸ್ಪೊಡ್ ಗೊದೊಳೆಚ್ಯಾ ಖಬರ್ ಪ್ರಸಾರ್ ಕರಿನಾಯೆ ಮ್ಹಣನ್ ಉಡುಪಿ ಧರ್ಮ್ ಪ್ರಾಂತಾಚೊ ಧರ್ಮಾಧ್ಯಕ್ಷ್ ಅ|ಮಾ|ದೊ| ಜೆರಾಲ್ಡ್ ಐಸಾಕ್ ಲೋಬೊನ್ ಮಾಧ್ಯಮಾಲಾಗಿಂ ವಿನಂತಿ ಕೆಲ್ಯಾನ್ ಜನನುಡಿ ಟಾಟ್ ಕಾಮ್ ಬಾಪ್ ಮಹೇಶಾ ವಿಶಿಂ ಖಂಯ್ಚಿಯಿ ಖಬರ್ ಪ್ರಸಾರ್ ಕರುಂಕ್ ನಾ.
ಸಾಧೊ ಬೊಳೊ ಜಾವ್ನಾಸ್ಲೊ ತರ್ನೊ, ಉಡುಪಿ ಧರ್ಮ್ ಪ್ರಾಂತಾಚೊ ಪಯ್ಲೆ ಯಾಜಕ್ ಮ್ಹಣನ್ ಕೀರ್ತ್ ಅಪ್ಣಾಯ್ಲ್ಯಾ ಬಾಪ್ ಮಹೇಶಾಚ್ಯಾ ಮೊರ್ನಾ ಥಂಯ್ ಜನನುಡಿ ಡಾಟ್ ಕಾಮ್ ಅತೀವ್ ದುಖ್ ವ್ಯಕ್ತ್ ಕರ್ತಾಂ ಆನಿ ಹಾಚ್ಯಾ ಮರ್ಣಾ ವರ್ವಿಂ ದುಖಿತ್ ಜಾಲ್ಯಾ ಸರ್ವಾಂಕ್ ಭುಜಾವಣ್ ಪಾಟಯ್ತಾ. ಖಾಸ್ ಕರ್ನ್ ತಾಂಚ್ಯಾ ಆವಯ್ ಬಾಪಯ್, ಕುಟ್ಮಾದಾರಾಂಕ್ ಹೆಂ ದುಖ್ ಸೊಸುನ್ ವ್ಹರುಂಕ್ ದೇವ್ ಸಕತ್ ದಿಂವ್ದಿ ಮ್ಹಣನ್ ಮಾಗ್ತಾಂ ಆನಿ ತಾಚ್ಯಾ ಅತ್ಮ್ಯಾಕ್ ಶ್ರದ್ದಾಂಜಲಿ ಪಾಟಯ್ತಾ.